កម្មករនៅបាវិតរងការគំរាមកាត់លុយនិងបណ្ដេញពីការងារបើមិនទៅទទួលលោក ហ៊ុន សែន
2018.05.10
ពិធីសំណេះសំណាលរបស់លោកនាយករដ្ឋមន្ត្រី ហ៊ុន សែន និងកម្មកររោងចក្រនៅក្រុងបាវិត ខេត្តស្វាយរៀង នៅថ្ងៃទី១០ ខែឧសភា ឆ្នាំ២០១៨។
Photo courtesy of Hun Sen Facebook page
កម្មកររោងចក្រនៅក្រុងបាវិត ខេត្តស្វាយរៀង អះអាងថា ខាងថៅកែរោងចក្រ បានព្រមានកាត់លុយ និងបណ្ដេញពួកគាត់ចេញពីការងារ បើមិនទៅចូលរួមទទួលលោកហ៊ុន សែន ដែលចុះទៅឃោសនារកសំឡេងឆ្នោតនោះទេ។ មន្ត្រីសិទ្ធិមនុស្ស ចាត់ទុកថា ការគំរាមនិងការដាក់សម្ពាធនេះ គឺជាការរំលោភសិទ្ធិឯកជន។
កម្មកររោងចក្រនៅក្រុងបាវិតខេត្តស្វាយរៀងអះអាងថា ការទៅទទួលនិងអង្គុយស្ដាប់លោកនាយក រដ្ឋមន្ត្រី ហ៊ុន សែន ថ្លែងសុន្ទរកថានោះ មិនមែនធ្វើឡើយដោយស្ម័គ្រចិត្តនោះទេ គឺធ្វើឡើងដោយការ បង្ខិតបង្ខំ និងការដាក់សម្ពាធផ្សេងៗ។ កម្មការិនីម្នាក់ ដែលមិនបញ្ចេញឈ្មោះព្រោះខ្លាចរងការបញ្ឈប់ពីការងារ រៀបរាប់ថា ខាងតំណាងរោងចក្រ បានអនុញ្ញាតឱ្យកម្មករឈប់សម្រាកមួយថ្ងៃ ប៉ុន្តែត្រូវតែចូលរួមទទួលលោក ហ៊ុន សែន ជា ដាច់ខាត ហើយបើនរណាមិនទៅចូលរួមទទួលលោក ហ៊ុន សែន នោះទេ គឺនឹងត្រូវកាត់ប្រាក់ខែចំនួន ២០ដុល្លារ។ «»
កម្មករម្នាក់ទៀត ឱ្យដឹងស្រដៀងគ្នានេះដែរថា មានរោងចក្រខ្លះព្រមានកាត់លុយ ២០ដុលា្លរ និងរោងចក្រខ្លះទៀត ព្រមានបណ្ដេញចេញពីការងារ បើមិនទៅទទួលលោក ហ៊ុន សែន ទេនោះ។ លោកថា ប្រសិនបើ មិនមានការបង្ខិតបង្ខំទេ គឺប្រហែលជាមិនមានកម្មករទៅចូលរួមពិធីសំណេះសំណាលជាមួយលោក ហ៊ុន សែន ច្រើនឡើយ។ «»
កាលពីព្រឹកថ្ងៃទី៩ ខែឧសភា លោក ហ៊ុន សែន បានចុះទៅជួបកម្មកររោងចក្រនៅក្រុងបាវិត និង សម្ពោធតំបន់សេដ្ឋកិច្ចពិសេសថ្មីមួយទៀត។ ក្នុងពិធីសំណេះសំណាលនោះ មានកម្មករចូលរួម ប្រមាណជាង ២ម៉ឺននាក់មកពីរោងចក្រ សហគ្រាសចំនួន២៦។ លោក ហ៊ុន សែន ក៏នឹងបន្តជួបកម្មករផ្សេងទៀតនៅក្រុងបាវិតនៅថ្ងៃទី១០ ខែឧសភា។ កម្មករដែលចូលរួមទទួលនិងអង្គុយស្តាប់លោក ហ៊ុន សែន ទទួលបានឲ្យលុយម្នាក់ ២ម៉ឺន។
កម្មកររោងចក្របញ្ជាក់ថា មូលហេតុដែលខាងថៅកែរោងចក្រ បង្ខិតបង្ខំ និងដាក់សម្ពាធលើកម្មករ នេះ ព្រោះខាងតំណាងរោងចក្ររងសម្ពាធពីខាងអាជ្ញាធរលោក ហ៊ុន សែន ដែរ ដូចជាក្រសួងការងារ និងម្ចាស់តំបន់។ «»
កម្មកររោងចក្រចាត់ទុកថា វត្តមានចុះជួបកម្មកររបស់លោក ហ៊ុន សែន នោះ គឺជាការស្វែងសន្លឹកឆ្នោតពីកម្មករ ខណៈដែលគណបក្សប្រជាជនកម្ពុជា បានចាញ់ការបោះឆ្នោតឃុំសង្កាត់នៅក្រុងបាវិត ទៅឱ្យគណបក្សសង្គ្រោះជាតិ។
មន្ត្រីសម្រួលអង្គការលីកាដូ (Licadho) ប្រចាំខេត្តស្វាយរៀង លោក នុត ប៉ូពិណ្ណារ័ត្ន មានប្រសាសន៍ថា លោកមិនបានដឹងករណីនេះទេ ប៉ុន្តែប្រសិនបើជាការពិត គឺមានន័យថា ការបង្ខិតបង្ខំនោះ គឺជាការរំលោភ សិទ្ធិបុគ្គលរបស់ពួកគាត់។ ទោះយ៉ាងណាក្តី លោកថា អាចមានកម្មករខ្លះចង់ចូលរួមដែរ ព្រោះថា ទីមួយបានលុយ និងបានឈប់សម្រាកមួយថ្ងៃ។
កម្មកររោងចក្រអះអាងថា ការសុន្ទរកថា របស់លោក ហ៊ុន សែន ដ៏វែងអន្លាយនោះ គឺភាគច្រើនកម្មករស្ដាប់មិនសូវចូលឡើយ ព្រោះមានភាសាភូតកុហក លាបពណ៌ និងគំរាមកំហែងជាដើម ដើម្បីធ្វើយ៉ាងណាឱ្យកម្មករទៅបោះបោះឆ្នោត និងបោះឱ្យគណបក្សប្រជាជនកម្ពុជា។ យ៉ាងណាក្តី កម្មករមួយចំនួនអាចទៅបោះឆ្នោត និងមួយចំនួនទៀតមិនទៅបោះឆ្នោតនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
