កម្មករ​គ្រប់​វិស័យ​ស្នើសុំ​រដ្ឋាភិបាល​រក្សា​ការ​ផ្ដល់​ប្រាក់​ឈ្នួល​៦០​ភាគរយ ក្នុង​កំឡុង​ពេល​ព្យួរ​ការងារ

ដោយ ទីន ហ្សាការីយ៉ា
2020-04-08
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន ចុះ​ជួប​កម្មករ​នៅ​ខណ្ឌ​ពោធិ៍សែនជ័យ រាជធានី​ភ្នំពេញ កាល​ពី​ព្រឹក​ថ្ងៃ​ទី​១៧ ខែ​មករា ឆ្នាំ​២០១៨។
លោក​នាយករដ្ឋមន្ត្រី ហ៊ុន សែន ចុះ​ជួប​កម្មករ​នៅ​ខណ្ឌ​ពោធិ៍សែនជ័យ រាជធានី​ភ្នំពេញ កាល​ពី​ព្រឹក​ថ្ងៃ​ទី​១៧ ខែ​មករា ឆ្នាំ​២០១៨។
Photo courtesy of SPM Facebook's page

តំណាង​កម្មករ​គ្រប់​វិស័យ ស្នើសុំ​ឱ្យ​រដ្ឋាភិបាល​រក្សា​ប្រាក់​ឈ្នួល​៦០​ភាគរយ ដល់​កម្មករ​ដដែល ក្នុង​កំឡុង​ពេល​ព្យួរ​ការងារ និង​ទាមទារ​ផលប្រយោជន៍​លក្ខខណ្ឌ​ការងារ​មួយ​ចំនួន​ទៀត ដើម្បី​កុំ​ឱ្យ​និយោជក​ឆ្លៀត​ឱកាស​បញ្ឈប់​កម្មករ។

ប្រធាន​សហព័ន្ធ​សហជីព​ប្រជាធិបតេយ្យ​កម្មករ​កម្ពុ​ជា ហៅ​កាត់ ស៊ីខៅឌូ លោក គង់ អាទិត្យ ឱ្យ​ដឹង​ថា ញត្តិ​របស់​សហជីព មាន​គោលបំណង​ចង់​ឱ្យ​រដ្ឋាភិបាល​អន្តរាគមន៍​រក្សា​គោលនយោបាយ ឱ្យ​ថៅកែ​ផ្ដល់​ប្រាក់ខែ​ឱ្យ​កម្មករ​៤០​ភាគរយ និង​រដ្ឋាភិបាល​២០​ភាគរយ​ដដែល ទាំង​កម្មករ​ក្នុង​វិស័យ​កាត់ដេរ និង​កម្មករ​ក្រៅ​វិស័យ​កាត់ដេរ។

លោក គង់ អាទិត្យ បន្ត​ថា ការ​បន្ថយ​អត្ថប្រយោជន៍​ឱ្យ​កម្មករ​ក្នុង​វិស័យ​កាត់ដេរ ពី​៦០​ភាគរយ (​ប្រហែល​១២០​ដុល្លារ​) មក​នៅ​ត្រឹម​៧០​ដុល្លារ​វិញ ធ្វើ​ឱ្យ​កម្មករ​រង​ផល​លំបាក​ខ្លាំង៖ «បើ​ឱ្យ​៧០​ដុល្លារ អ៊ីចឹង​វា​ទាប​។ អ៊ីចឹង ខាង​សហជីព​យើង​សំណូមពរ​ឱ្យ​អនុវត្ត​គោលការណ៍​ចាស់​ហ្នឹង​ណា ៦០​ភាគរយ (​រដ្ឋាភិបាល​)២០ (​រោងចក្រ​)៤០ ហ្នឹង​។ យើង​ទទូច​សុំ​ឱ្យ​អនុវត្ត​អាហ្នឹង ដើម្បី​ឱ្យ​ជួយ​កម្មករ​ក្នុង​គ្រា​លំបាក​ហ្នឹង ហើយក៏​យើង​សុំ​ឱ្យ​ភាគី ដូចជា ប្រេន (brand) ដូចជា​អ្វី​ផ្សេងៗ​ហ្នឹង ក៏​ត្រូវ​ចូលរួម​អន្តរាគមន៍ នៅ​ក្នុង​គ្រា​លំបាក​ហ្នឹង ទាក់ទង​ហិរញ្ញវត្ថុ ដែល​ត្រូវ​បើក​ឱ្យ​កម្មករ និង​ជួយ​គ្រា​ហ្នឹង»

ក្រុម​សហជីព​យ៉ាងតិច​១២ បាន​ធ្វើ​ញត្តិ​រួមគ្នា ដើម្បី​ស្នើសុំ​ឱ្យ​រដ្ឋាភិបាល ឱ្យ​រក្សា​ការ​ផ្ដល់​ប្រាក់​ឈ្នួល​៦០​ភាគរយ ជូន​កម្មករ​ក្នុង​វិស័យ​កាត់ដេរ​ដដែល និង​ទាមទារ​ឱ្យ​រក្សា​ការ​ផ្ដល់​ប្រាក់​ឈ្នួល​៦០​ភាគរយ​នេះ ដល់​កម្មករ ក្នុង​វិស័យ​ផ្សេងទៀត ដូចគ្នា​ដែរ ដូចជា កម្មករ​និយោជិក ក្នុង​វិស័យ​សេវាកម្ម សណ្ឋាគារ កាស៊ីណូ ក្លឹប​កម្សាន្ត ដឹកជញ្ជូន សំណង់ កសិកម្ម និង​វិស័យ​មួយ​ចំនួន​ផ្សេងទៀត​។ ក្រុម​សហជីព ស្នើសុំ​ទៀត​ថា រដ្ឋាភិបាល​ត្រូវ​ហាមឃាត់​និយោជិក (​ថៅកែ​) កុំ​ឱ្យ​ឆ្លៀតឱកាស​ប្រើប្រាស់​លេស​ព្យួរ​កិច្ចសន្យាការងារ ទៅជា​បិទ​ក្រុមហ៊ុន ឬ​ផ្ដាច់​កិច្ចសន្យា​របស់​កម្មករ​និយោជិក។

លោក គង់ អាទិត្យ ថ្លែង​ថា ការ​ព្យួរ​កិច្ចសន្យាការងារ ក៏​នឹង​ធ្វើ​ឱ្យ​ប៉ះពាល់​ដល់​គ្រួសារ​របស់​កម្មករ​ដែរ។ ដូច្នេះ សហជីព​ស្នើសុំ​ឱ្យ​រដ្ឋាភិបាល​ពង្រីក​ការ​អនុវត្ត​ផ្ដល់​សេវា​បេឡា​ជាតិ​របប​សន្តិសុខ​សង្គម (​..ស​) ឥតគិតថ្លៃ ដល់​សមាជិក​ក្រុម​គ្រួសារ​ក្នុង​បន្ទុក​របស់​កម្មករ​និយោជិក ដែល​រងគ្រោះ​ត្រូវ​ព្យួរ​ការងារ។

ក្រុម​សហជីព ក៏​ចង់​ឱ្យ​រដ្ឋាភិបាល​ចេញ​បញ្ជា​ឱ្យ​ធនាគារ និង​គ្រឹះស្ថាន​មីក្រូហិរញ្ញវត្ថុ​ទាំងអស់ ផ្អាក​បណ្ដោះអាសន្ន​រាល់​ការ​សង​បំណុល​ទាំង​ប្រាក់​ដើម និង​ការប្រាក់​របស់​កម្មករ​និយោជិក រួម​ទាំង​ការ​អន្តរាគមន៍​ឱ្យ​ដោះលែង​សកម្មជន និង​ថ្នាក់ដឹកនាំ​សហជីព ដែល​បាន​ចាប់ខ្លួន​កន្លងមក​ឱ្យ​មាន​សេរីភាព និង​បញ្ឈប់​ការ​រឹតត្បិត​សិទ្ធិ​សេរីភាព​របស់​សហជីព។

ជុំវិញ​ញត្តិ​របស់​ក្រុម​សហជីព​នេះ អាស៊ីសេរី មិន​អាច​សុំ​ការ​បញ្ជាក់​ពី​អ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ លោក ហេង សួរ និង​អគ្គលេខាធិការ សមាគម​រោងចក្រ​កាត់ដេរ​នៅ​កម្ពុជា លោក ខេន លូ បានទេ នៅ​ថ្ងៃ​ទី​៨ មេសា។

ប៉ុន្តែ​លោកនាយក​រដ្ឋមន្ត្រី ហ៊ុន សែន បាន​ប្រកាស​ក្នុង​សន្និសីទ​សារព័ត៌មាន កាល​ពី​ថ្ងៃ​ទី​០៧ មេសា ថា រដ្ឋាភិបាល​គ្មាន​លទ្ធភាព​ជួយ​ពលរដ្ឋ​ក្រីក្រ គ្រប់គ្នា​បាន​ទេ ព្រោះ​ផល​ប៉ះពាល់​ពី​ជំងឺ​កូវីដ១៩ (Covid-19) មាន​ទំហំ​ធំ ធ្វើ​ឱ្យ​រង​ផល​ប៉ះពាល់​ដល់​ពលរដ្ឋ​គ្រប់គ្នា​។ លោក​ជំរុញ​ឱ្យ​ពលរដ្ឋ​លក់​សម្ភារៈ​យក​ប្រាក់​ចាយ​សិន ដើម្បី​ទប់ទល់​នឹង​ស្ថានភាព​នេះ​។ តែ​យ៉ាងណា លោក​ថា រដ្ឋាភិបាល អាច​មាន​លទ្ធភាព​ជួយ​ពលរដ្ឋ តាមរយៈ​គោល​នយោបាយ​ប័ណ្ណ​ក្រីក្រ៖ «អ្នក​ដែល​មាន​ប័ណ្ណ​ក្រីក្រ រដ្ឋ​នឹង​ធ្វើ​អន្តរាគមន៍​។ ក៏ប៉ុន្តែ​ដូចដែល​ក្មួយ​សួរ​មក​ពូ​ថា អ្នក​រត់​ម៉ូតូឌុប​គាត់​ត្អូញត្អែរ ថា មានបាន​ប៉ះប៉ូវ​ទេ លក់​ម៉ូតូ​សិន​ទៅ ចាយ​សិន​ទៅ ទិញ​អង្ករ​ស៊ី​សិន»

លោក គង់ អាទិត្យ យល់​ថា ប័ណ្ណ​ក្រីក្រ មិន​អាច​ជួយ​ពលរដ្ឋ​បាន​គ្រប់គ្នា​ទេ ហើយ​បើ​ពេល​នេះ ក្រុម​កម្មករ​សម្រុក​នាំគ្នា​ទៅ​សុំ​ប័ណ្ណ​ក្រីក្រ​ទាំងអស់​គ្នា ក៏​ទៅ​មិន​រួច​ដែរ។ លោក​សង្ឃឹម​ថា រដ្ឋាភិបាល នឹង​ទទួលយក​សំណើ​របស់​ក្រុម​សហជីព ហើយ​អន្តរាគមន៍​ឱ្យ​មាន​ប្រសិទ្ធភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល