កម្មករប្រមាណ ២ពាន់នាក់ នៃរោងចក្រកាត់ដេរ ឃ្យូ.អិម.អាយ (QMI) ស្ថិតក្នុងភូមិស្រយឹង ឃុំពើក ស្រុកអង្គស្នួល ខេត្តកណ្ដាល បានប្រមូលផ្តុំគ្នានៅមុខច្រកចូលរោងចក្រ ឃ្យូ.អិម.អាយ ជាប់ផ្លូវជាតិលេខ៤ នៅថ្ងៃទី១០ ខែឧសភា ដើម្បីទាមទារឲ្យអាជ្ញាធរដោះលែងតំណាងពួកគេចំនួន ៣នាក់ ដែលត្រូវបានឃាត់ខ្លួននៅក្រសួងមហាផ្ទៃ កាលពីព្រឹកថ្ងៃទី៩ ឧសភា។ ក្នុងការតវ៉ានោះ កម្មករព្យាយាមចូលបិទកំណាត់ផ្លូវជាតិលេខ៤ តែពួកគេត្រូវបានរារាំងដោយសមត្ថកិច្ច។
កម្មកររោងចក្រកាត់ដេរ ឃ្យូ.អិម.អាយ ភាគច្រើនជាស្ត្រី បានមកប្រមូលផ្តុំគ្នាតាំងពីម៉ោងប្រមាណ ៧ព្រឹកថ្ងៃទី១០ ខែឧសភា ដើម្បីប៉ុនប៉ងបិទកំណាត់ផ្លូវជាតិលេខ៤ នៅម្តុំភូមិស្រយឹង ចម្ងាយប្រមាណ ៣០គីឡូម៉ែត្រពីទីក្រុងភ្នំពេញ។ ការប៉ុនប៉ងបិទផ្លូវជាតិនេះ ធ្វើឡើងមួយថ្ងៃបន្ទាប់ពីតំណាងរបស់គេចំនួន ៣នាក់ ត្រូវបានឃុំខ្លួន ក្រោយពីក្រសួងមហាផ្ទៃ កោះហៅមកសាកសួរអំពីការធ្វើកូដកម្មមិនចូលធ្វើការជាបន្តបន្ទាប់របស់កម្មករនៅរោងចក្រ ឃ្យូ.អិម.អាយ។
ក្នុងការតវ៉ានោះ កម្មករបានព្យាយាមរត់ចូលបិទផ្លូវម្តងជាពីរដង ប៉ុន្តែពួកគេត្រូវបានកម្លាំងសមត្ថកិច្ចខេត្តកណ្ដាល និងរាជធានីភ្នំពេញប្រមាណជិត ១០០នាក់ ប្រដាប់ដោយខែល និងដំបងរារាំងមិនឲ្យចូលឡើយ។ ទោះជាយ៉ាងណាក៏ដោយ ពួកគេបានព្យាយាមទម្លុះរនាំងសមត្ថកិច្ច ហើយចូលកាន់កាប់កំណាត់ផ្លូវជាតិលេខ៤ មួយស្របក់ ហើយក៏ត្រូវសមត្ថកិច្ចបំបែកវិញភ្លាម។ ក្នុងពេលបំបែកនោះ សមត្ថកិច្ចបានយកខែល និងដំបង រុញកម្មករ ហើយក៏ធ្វើឲ្យប៉ះទៅនឹងពោះរបស់ស្ត្រីមានផ្ទៃពោះប្រមាណ ៤ខែម្នាក់ ឈ្មោះ ខៀវ ម៉ៅ បណ្ដាលឲ្យគាត់ចុកសៀត។
«សំឡេងចម្រុះ»
ក្រោយការកាន់កាប់ផ្លូវជាតិមិនបានសម្រេច កម្មករមិនព្រមចាកចេញទៅណាឡើយ ពួកគេបន្តប្រកូកប្រកាសតាមឧបករណ៍បំពងសំឡេង ទាមទារឲ្យសមត្ថកិច្ចអនុញ្ញាតឲ្យពួកគេបិទផ្លូវ ដោយលើកឡើងថា ប្រសិនបើមិនឲ្យពួកគេបិទផ្លូវនោះទេ ថៅកែរោងចក្រនឹងមិនស្វែងរកដំណោះស្រាយឲ្យពួកគេ និងតំណាងរបស់ពួកគេឡើយ។
«សំឡេងចម្រុះ»
ក្នុងពេលតវ៉ានោះ មិនឃើញមានតំណាងភាគីរោងចក្រចេញមកចរចាស្វែងរកដំណោះស្រាយអ្វីឡើយ ក្រៅតែពីទុកឲ្យកម្មករ និងសមត្ថកិច្ច បន្តប្រឈមមុខដាក់គ្នា។ ប្រការនេះ កម្មករលើកឡើងថា ភាគីរោងចក្រគ្មានឆន្ទៈនឹងស្វែងរកដំណោះស្រាយឲ្យកម្មករទាំងអស់ឡើយ។ ប៉ុន្តែ ពួកគេថា ពួកគេមិនខ្វល់ទេ អ្វីដែលគេត្រូវការពេលនេះ គឺឲ្យអាជ្ញាធរដោះលែងតំណាងរបស់គេវិញ។
លោក មាន សំណាង មន្ត្រីនគរបាលដែលអះអាងថា ជាអ្នកទទួលខុសត្រូវដឹកនាំការរារាំងមិនឲ្យកម្មករបិទផ្លូវនោះ មានប្រសាសន៍ថា គាត់មិនដឹងរឿងអ្វីទេ ប៉ុន្តែគាត់មានតួនាទីថែរក្សាសណ្ដាប់ធ្នាប់នៅទីនោះ៖ «ក្រុមកម្មករបងប្អូនយើង គាត់រកបិទផ្លូវជាតិលេខ៤នេះ អ៊ីចឹងខ្ញុំត្រូវតែដាក់កម្លាំង ដើម្បីរក្សាសណ្ដាប់ធ្នាប់តាមដងផ្លូវជាតិលេខ៤ យើងហ្នឹង កុំឲ្យមានបញ្ហាអី»។
កាលពីពេលមុនថ្ងៃចូលឆ្នាំខ្មែរ រោងចក្រ ឃ្យូ.អិម.អាយ បានកោះហៅកម្មករ និងតំណាងកម្មករចំនួន ២៥នាក់ ឲ្យចូលជួប ហើយប្រាប់ថា រោងចក្រនឹងបញ្ចប់កិច្ចសន្យាការងារ និងបានបង្ខំឲ្យកម្មករផ្ដិតមេដៃទទួលយក តែកម្មករមិនព្រម ព្រោះពួកគេថារោងចក្រមិនព្រមផ្តល់សំណងការងារត្រឹមត្រូវ។ កម្មករថា ក្រោយមករោងចក្របានរារាំងមិនឲ្យកម្មករ និងតំណាងកម្មករ ចូលធ្វើការ ហើយថាចាប់តាំងពីមានការរារាំងនោះមក កម្មករនៅក្នុងរោងចក្រប្រមាណ ៤ពាន់នាក់ បាននាំគ្នាធ្វើកូដកម្មមិនព្រមចូលធ្វើការ ដោយពួកគេទាមទារឲ្យរោងចក្រអនុញ្ញាតឲ្យតំណាងពួកគេត្រឡប់ចូលធ្វើការវិញ។ កម្មករថា ការធ្វើកូដកម្មនេះ មិនមានការញុះញង់របស់តំណាងកម្មករណាម្នាក់ឡើយ។
ការប្រមូលផ្តុំរបស់កម្មករ បានបិទបញ្ចប់ទៅវិញនៅម៉ោងប្រមាណ ១រសៀល បន្ទាប់ពីកម្មករមិនមានសង្ឃឹមថា ពួកគេនឹងអាចចូលបិទផ្លូវជាថ្មីម្តងទៀតនោះ។ ទោះជាយ៉ាងណាក៏ដោយ កម្មករប្ដេជ្ញាថា ពួកគេនឹងខិតខំធ្វើយ៉ាងណា ដើម្បីស្វែងរកមធ្យោបាយឲ្យអាជ្ញាធរដោះលែងតំណាងរបស់ពួកគេ ហើយក៏បានអំពាវនាវឲ្យអង្គការក្រៅរដ្ឋាភិបាលនានា ជួយស្វែងរកដំណោះស្រាយឲ្យពួកគេផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។