អនុប្រធានគណបក្សប្រជាជនកម្ពុជា លោក ស ខេង បានថ្កោលទោសថ្នាក់ដឹកនាំគណបក្សប្រឆាំងនៅក្រៅប្រទេស ដែលបានយកឈ្មោះលោក ទៅភ្ជាប់ជាមួយក្រុមប្រឹក្សាជាតិតស៊ូរបស់លោក សម រង្ស៊ី ថាជារឿងមិនពិត និងដើម្បីបំបែកបំបាក់ផ្ទៃក្នុងបក្សប្រជាជនកម្ពុជា។
អ្នកនាំពាក្យលោក ស ខេង បានបញ្ជាក់ក្នុងសេចក្ដីប្រកាសរបស់គណៈកម្មការកណ្ដាលគណបក្សប្រជាជនកម្ពុជា នៅថ្ងៃទី២៤មីនា ថា លោក ស ខេង នៅតែគោរពកោតសរសើរក្រុមគ្រួសារលោក ហ៊ុន សែន ថា បានបន្សល់ទុកស្នាដៃច្រើនជូនដល់សង្គមកម្ពុជា ដែលមិនអាចបំភ្លេចបានឡើយ។
ប្រតិកម្មនេះធ្វើឡើង បន្ទាប់ពីប្រធានស្ដីទីគណបក្សសង្គ្រោះជាតិ លោក សម រង្ស៊ី បានតែងតាំងក្បាលម៉ាស៊ីនក្រុមប្រឹក្សាជាតិតស៊ូ ដែលមានលោក សម រង្ស៊ី ជាប្រធាន អ្នកអត្ថាធិប្បាយនយោបាយលោក គឹម សុខ ជាអ្នកនាំពាក្យ និងលោក ឆាំ ឆានី អគ្គលេខាធិការសាខាសង្គ្រោះជាតិប្រចាំទ្វីបអឺរ៉ុប ជាជំនួយការ ហើយថា លោក ស ខេង និង មន្ត្រីគណបក្សប្រជាជនកម្ពុជាមួយចំនួនទៀត ក៏បានចូលក្នុងចលនានេះដែរ។ ក្រុមប្រឹក្សានេះ មានគោលដៅ ដើម្បីប្រមូលកម្លាំងខ្មែរនៅទូទាំងពិភពលោក រួមគ្នារំដោះកម្ពុជា ចេញពីរបបដឹកនាំរបស់ត្រកូល «ហ៊ុន» និងដើម្បីបញ្ចប់នយោបាយ «ងើបមួយវ៉ៃមួយ» របស់លោក ហ៊ុន សែន។
អ្នកអត្ថាធិប្បាយនយោបាយ លោក គឹម សុខ ប្រាប់វិទ្យុអាស៊ីសេរីថា ការលើកឡើងរបស់ លោក ស ខេង ទំនងមានសម្ពាធពីប្រធានគណបក្សប្រជាជនកម្ពុជា គឺលោក ហ៊ុន សែន ដែលព្រួយបារម្ភខ្លាចចលនារបស់បក្សប្រឆាំងនេះ ផ្ទុះឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។