ពលរដ្ឋ​បារម្ភ​ការ​បង្ក​បង្កើន​ផល​ស្រូវ​ឆ្នាំនេះ ខណៈ​ទំនាយ​ថា នឹង​មាន​ទឹក​តិច

ដោយ សេក បណ្ឌិត
2019-04-13
អ៊ីម៉ែល
មតិ
Share
បោះពុម្ព
កសិករ​នៅ​ឃុំ​ព្រះបាទជាន់ជុំ ស្រុក​គិរីវង់ ដើរ​ពិនិត្យ​វាល​ស្រែ​ប្រាំង​​កំពុង​ក្រៀម​ស្វិត​ថ្ងៃ​ទី​១៣ កុម្ភៈ ឆ្នាំ​២០១៥។
កសិករ​នៅ​ឃុំ​ព្រះបាទជាន់ជុំ ស្រុក​គិរីវង់ ដើរ​ពិនិត្យ​វាល​ស្រែ​ប្រាំង​​កំពុង​ក្រៀម​ស្វិត​ថ្ងៃ​ទី​១៣ កុម្ភៈ ឆ្នាំ​២០១៥។
RFA

ទំនាយ​មហាសង្ក្រាន្ត​ឆ្នាំ​ថ្មី ឆ្នាំ​កុរ ឯកស័ក ពុទ្ធសករាជ ២៥៦២ ចូល ៦៣ គ​.​ស ឆ្នាំ​២០១៩ ត្រង់​ទំនាយ​ទឹកទន្លេ បាន​ព្យាករណ៍ ថា​ឆ្នាំនេះ​នឹង​មាន​ទឹក​តិច។ ចំណែក​ទំនាយ ត្រង់​កេណ្ឌ​ធញ្ញ​អាហារ ក៏បាន​ព្យាករណ៍​ដែរ​ថា ស្រូវ​ក្នុង​ស្រែ ចម្ការ​បាន​ផល​តែមួយ​ភាគ​ទេ ខូច​ខាត​អស់ ៩​ភាគ។

ចំណែក ក្រុម​កសិករ និង​អ្នក​ជំនាញ​ខាង​កសិកម្ម ព្រមទាំង​អ្នកសេដ្ឋកិច្ច​វិញ តើ​ពួកគាត់ មើល​ឃើញ​យ៉ាង​ដូចម្តេច​ដែរ ចំពោះ​ការ​បង្ករ​បង្កើន​ផល​កសិកម្ម និង​ស្ថានភាព​សេដ្ឋកិច្ច នៅ​ឆ្នាំ​ថ្មី​នេះ​...?

សូម​ស្ដាប់​សេចក្ដីរាយការណ៍​ពិស្ដារ​របស់ លោក សេក បណ្ឌិត ជុំវិញ​បញ្ហា​នេះ ពី​រដ្ឋធានី​វ៉ាស៊ីនតោន ដូច​តទៅ​..!!

អំពី​ទំនាយ​ប្រចាំ​ឆ្នាំ

សៀវភៅ​មហាសង្ក្រាន្ត​ឆ្នាំ​ថ្មី ឆ្នាំ​កុរ ឯកស័ក ដែល​រៀបរៀង​ដោយ​លោក អ៊ឹម បូរិន្ទ អ្នក​សិក្សា​ស្រាវជ្រាវ​វិជ្ជា​ហោរាសាស្ត្រ និង​ប្រពៃណី ទំនៀមទម្លាប់​ខ្មែរ បាន​បង្ហាញ​អំពី​កេណ្ឌ ព្រះភិរុណ​សាស្ត្រ ឬ ទំនាយ​ចំនួន​ទឹកភ្លៀង ប្រចាំ​ឆ្នាំ​ថា ឆ្នាំនេះ ភព​ព្រហស្បតិ៍ ជា​អធិបតី ដឹកនាំ​ផ្លូវ​ទៅ​សុំ​ទឹកភ្លៀង​ពី​ស្ដេច​នាគ ហើយ​បាន​នាគ​៥ បង្អុរ​ទឹកភ្លៀង ៥​រយ​មេ ក្នុង​នោះ​ចែក​ចេញ​ទៅ ចក្រ​វាឡ ២​រយ​មេ ព្រៃ​ហេមពាន្ត ១៥០​មេ មហាសមុទ្រ ១ ពាន់​២​រយ​មេ​(១២០០) និង​ជម្ពូទ្វីប​មនុស្សលោក​យើង​នេះ មាន​ចំនួន ៥០​មេ។

នៅ​កម្ពុជា ទំនាយ​ក្នុង​តម្រា​មហាសង្ក្រាន្ត កុរ ដដែល​នេះ ក៏បាន​ព្យាករណ៍​ឱ្យ​ដឹង​ដែរ​ថា នៅ​ដើម​ឆ្នាំនេះ​ភ្លៀង​ល្អ កណ្ដាល​ឆ្នាំ​ភ្លៀង​តិច និង​ចុង​ឆ្នាំ​ភ្លៀង​ច្រើន។

កេណ្ឌធារាទិគុណ

ឆ្នាំ​នេះ មាន​កេណ្ឌ () ត្រូវ​ត្រង់​តេជោធាតុ​ចុះ ទំនាយ​ទាយ​ថា ភ្លើង​កាច​សាហាវ​ជាង​ឆ្នាំ​មុនៗ​។​

ចំណែក ទំនាយ​អំពី​ទឹកទន្លេ វិញ​៖ ឆ្នាំនេះ ទំនាយ​ថា ទឹកទន្លេ បឹង បួរ មាន​ទឹក​តូច ឬ​តិចតួច​ណាស់ បើ​ប្រៀបធៀប​ទៅ​នឹង​បណ្ដា​ឆ្នាំ​ទាំងពួង។

កេណ្ឌ​ធញ្ញ​អាហារ

ទំនាយ​ទាយ​ថា ឆ្នាំនេះ​មាន​កេណ្ឌ​() មាន​ឈ្មោះថា «បាប​» ស្រូវ​ក្នុង​ស្រែ ចម្ការ បាន​ផល​មួយ​ភាគ ខូច​ខាត់​អស់​៩​ភាគ ស្រូវ​ដុះ​ល្អ​តែ​ដំបូង ក្រោយមក​នឹង​កើត​ទុរ្ភិក្ស​ផ្សេងៗ។

ប្រជានុរាស្ត្រ មាន​សេចក្ដី​ទុក្ខ​លំបាក​ព្រោះ​ធញ្ញ​អាហារ ម្ហូបអាហារ ស្រូវ​អង្ករ បន្លែ បង្ការ​ផ្សេងៗ អាច​ឡើង​ថ្លៃ ។ តំបន់​ខ្លះ​កើត​អន្តរាយ​ជា​អនេក មានទុក្ខ​លំបាក ខ្សត់ខ្សោយ ទី​ទាល់ក្រ ព្រោះ​សត្វ​កណ្ដុរ បំផ្លាញ​ដំណាំ​ទាំងនោះ។

ពាក់ព័ន្ធ​នឹង​ទំនាយ​លើ​ការ​ធ្វើ​ស្រែ​វិញ​៖ ឆ្នាំនេះ ទំនាយ​ថា ស្រែ​ដី​ទំនាប និង​ស្រែ​ដី​ទួល​គ្រប់​ទីកន្លែង​បាន​ល្អ​ដូចគ្នា។

កេណ្ឌ​ព្រឹក្សា

ឆ្នាំនេះ​ដើម​រការ​ជា​ស្ដេច មាន​ទំនាយ​ថា មាន​ភ្លៀង​ច្រើន ទឹកនឹង​ជន់​លិច​ស្រូវ​អស់​។​

ទំនាយ​តាម​ថ្ងៃ​សង្ក្រាន្ត

ដោយសារ​ថ្ងៃ​ចូលឆ្នាំ​ត្រូវ​ចំ​នឹង​ថ្ងៃ អាទិត្យ ទំនាយ​ថា ឆ្នាំ​«​កុរ​» នេះ ការ​ធ្វើ​ស្រែ​មិន​សូវ​បាន​ផល​ល្អ​ឡើយ។

អំពី​ទំនាយ​ថ្ងៃ វ័នបត់៖ ជា​ថ្ងៃ​កណ្ដាល​នៃ​ពិធី​ចូលឆ្នាំ​ត្រូវ​ចំ​ថ្ងៃ​ចន្ទ ទំនាយ​ថា ឆ្នាំនេះ អំបិល ឡើងថ្លៃ ជំទាវ ខុណ្នាង ក្ដៅ​ក្រហាយ​ចិត្ត ប្រជានុរាស្ត្រ រមែង​កើត​ជំងឺ​គ្រុន រងា​ច្រើន​ជា​អនេក។

អំពី​ទំនាយ​ថ្ងៃ​ឡើងស័ក​៖ ជា​ថ្ងៃ​ចុងក្រោយ​នៃ​ពិធី​ចូល​ឆ្នាំថ្មី​ប្រពៃណី​ជាតិ ត្រូវ​នឹង​ថ្ងៃ​អង្គារ ទំនាយ​ថា ឆ្នាំ​នេះ រាជ​អាមាត្យ មន្ត្រី​តូច ធំ នឹង​ប្រកបដោយ​សេចក្ដី​សុខ ត្រជាក់ត្រជំ ព្រម​ដោយ​ទ្រព្យសម្បត្តិ​បរិបូណ៌ ទោះបី​មានការ​ប្រយុទ្ធ​តស៊ូ​ជាមួយ​បច្ចាមិត្ត​យ៉ាង​ណា​ក្ដី។

ទាក់ទង​នឹង​ទំនាយ របស់​មហាសង្ក្រាន្ត​ឆ្នាំ​ថ្មី​នេះ ប្រជាកសិករ មួយ​ចំនួន មិនទាន់​ប្រាកដ​ថា ត្រឹមត្រូវ ឬ ក៏​រឿង​នេះ​នឹង​ក្លាយ​ជា​ការពិត​ឬ​យ៉ាងណា​នោះ​ទេ។

ប៉ុន្តែ​ពួកគាត់​យល់ថា បើ​ភ្លៀង​តិច ហើយ​កន្លែង​ខ្លះ​នៅតែ​អត់​មាន​ភ្លៀង​ធ្លាក់​ដូច​នៅ​ដើម​រដូវ​ប្រាំង​នេះ កសិករ​នឹង​ជួប​ការ​ខាតបង់ ខ្វះ​ស្បៀងអាហារ ស្រូវ​អង្ករ​អាច​នឹង​ឡើងថ្លៃ ដូច​ទំនាយ​ប្រចាំ​របស់​មហាសង្ក្រាន្ត​នោះ​ហើយ។

ចំណែក​នៅ​រដូវវស្សា​វិញ បើ​មាន​ភ្លៀង​ធ្លាក់​ច្រើនពេក ហួស​តម្រូវការ ក៏​នាំ​ឱ្យ​មាន​គ្រោះអាសន្ន​ដល់​កសិករ​ដែរ។

កសិករ នៅ​ស្រុក​បារាយ ខេត្ត​កំពង់ធំ លោក អ៊ុច ឡេក បាន​ឱ្យ​ដឹង​ថា ប្រព័ន្ធ​ស្រោចស្រព និង​ប្រភព​ទឹក​សម្រាប់​ជួយ​កសិករ នៅ​ខ្វះខាត​ច្រើន ចំណែក​ប្រព័ន្ធ​រំដោះ​ទឹកជំនន់ ក៏​ខ្វះខាត​ដូចគ្នា​ដែរ៖ «បាទ​..!!​កសិករ​នៅ​ស្រុក​បារាយ​នេះ ភ័យ​បារម្ភ នឹង​មាន​បញ្ហា​ប្រឈម អ្នកខ្លះ​ធ្លាប់​ធ្វើ​វាល​ធំ ឥឡូវ​ទម្លាក់​ចោល​អស់​ខ្លះ​ហើយ ចង់​ពាក់​កណ្ដាល ដោយ​ឮ​មហា​សង្ក្រាន្ត​ថា​ទឹក​វា​តូច បារម្ភ​ខ្លាច​អត់​ទឹក​គ្រប់​ធ្វើស្រែ ទឹក​តូច​ហើយ​បារម្ភ​ខ្លាច​អត់​ទីផ្សារ​លក់​ចេញ សំខាន់​ឱ្យ​តែ​រក​ទីផ្សារ​ឱ្យ​បាន​ទោះ​យ៉ាងម៉េច​ក៏​គ្រាន់បើ​ដែរ»

ចំណែក កសិករ ផលិត​អំបិល​វិញ ក៏​កំពុង​មាន​ក្តី​បារម្ភ​ដូចគ្នា​ដែរ។ អ្នក​ផលិត​អំបិល​ម្នាក់​នៅ​សង្កាត់​ត្រើយ​កោះ ក្រុង​កំពត លោក ពៅ សុន ថ្លែង​ថា លោក​ទំនងជា​មិន​អាច​ផលិត​អំបិល​បាន​ច្រើន​ឡើយ​នៅ​ឆ្នាំនេះ បើសិនជា​អាកាសធាតុ​មិន​អំណោយផល​ល្អ​ទេ​នោះ។

លោក​ថា បញ្ហា​ប្រឈម​ខ្លាំង របស់​អ្នក​ផលិត​អំបិល គឺ​កាលណា​មាន​ភ្លៀង​ច្រើនពេក មិន​អាច​ផលិត​អំបិល​បានទេ និង​បញ្ហា​សំខាន់​មួយទៀត គឺ​ការ​ប្រឈម​ដោយ​ខ្វះ​កម្លាំង​ពលកម្ម៖ «បើ​តាម​ស្ថានភាព​ជាក់ស្ដែង បើ​ក្រោយ​ចូលឆ្នាំ មាន​ភ្លៀង​កក់ខែ​បន្ថែម​ទៀត ផលិត​មិនកើត តាមមើលទៅ​អំបិល​មិន​គ្រប់​ទេ នេះ​បើ​តាម​ខ្ញុំ​គិត​…​ដោយសារ​ភ្លៀង​កក់ខែ​ប៉ុន្មាន​ថ្ងៃនេះ​ធំ​ណាស់​..! បើ​រាំង​ចាប់​ឥឡូវនេះ​ទៅ​ដល់​ក្រោយ​ចូលឆ្នាំ រហូត​ម្ដុំ​ខែ​៥​អី ហ្នឹង​ប្រហែល​អាច​ទប់ទល់​បាន​ខ្លះ»

ចំណែក​ការផលិត​ស្រូវប្រាំង​របស់​កសិករវិ​ញ លោក បណ្ឌិត យ៉ង់ សាំងកុមារ អ្នក​ជំនាញ​លើ​វិស័យ​កសិកម្ម និង​ជា​មន្ត្រី​ជាន់ខ្ពស់​នៃ​គណបក្ស​ប្រជាធិបតេយ្យ​មូលដ្ឋាន បាន​ឱ្យ​ដឹង​ថា នៅ​រដូវប្រាំង កសិករ​នៅ​តំបន់​ខ្លះ អាច​ខ្វះខាត​ទឹក​ស្រោចស្រព​ជិត ៩០%

បញ្ហា​នេះ នាំ​ឱ្យ​កសិករ មិន​អាច​ផលិត ស្រូវ អង្ករ បាន​គ្រប់​តាម​តម្រូវការ​ឡើយ។ ពាក់ព័ន្ធ​នឹង​គ្រោះ​រាំងស្ងួត​នេះ មន្ត្រី​រដ្ឋាភិបាល​អះអាង​ថា ដោយសារ​បាតុភូត អែលនីណូ (El Nino) ដែល​បណ្ដាល​ឱ្យ​អាកាសធាតុ​ក្ដៅ​ហួតហែង​ខ្លាំង នៅ​អំឡុង​ខែ​មីនា ឆ្នាំ​២០១៩​នេះ។

កាល​ពី​ពេល​ថ្មីៗ តំបន់​ខ្លះ នៃ​ខេត្ត​ចំនួន ៩ ដែល​ខ្វះខាត​ទឹក​ប្រើប្រាស់​ខ្លាំង​នោះ គឺ​ខេត្ត​បាត់ដំបង បន្ទាយមានជ័យ ឧត្តរមានជ័យ កំពង់ធំ ព្រៃវែង ព្រះវិហារ ប៉ៃលិន មណ្ឌលគិរី និង​ខេត្ត​កោះកុង។

ទាក់ទង​បញ្ហា​សេដ្ឋកិច្ច​វិញ​!! លោក ហ៊ុន សែន បាន​សរសេរថា​នៅ​ក្នុង​គេហទំព័រ​ហ្វេសប៊ុក (Facebook) របស់លោក​កាលពី​ថ្ងៃ​១២ កុម្ភៈ ឆ្នាំ​២០១៩​នេះ​ថា ប្រទេស​កម្ពុជា​ពីមុន​ដែល​ធ្លាប់​ជា​ប្រទេស​ក្រីក្រ​ធ្លាក់​ដល់​បាតដាល ប៉ុន្តែ​ឥឡូវ​លោក​អះអាង​ថា កម្ពុជា​បាន​ងើប​រួច​ផុត​ពី​ភាព​ក្រីក្រ និង​មាន​កំណើន​សេដ្ឋកិច្ច​ក្នុង​រង្វង់ ៧% ដោយសារ​ចំណូល​ពន្ធ​កាន់តែ​ខ្ពស់។ លោក​បន្ត​ថា ការ​ព្យាករណ៍​នៅ​ថ្ងៃ​អនាគត គឺ​កម្ពុជា​នឹង​អាច​ក្លាយ​ជា​ប្រទេស​មាន​ប្រាក់ចំណូល​មធ្យម​កម្រិត​ខ្ពស់ នៅ​ឆ្នាំ​២០៣០ និង​ប្រាក់ចំណូល​ខ្ពស់​នៅ​ឆ្នាំ​២០៥០។

ក៏ប៉ុន្តែ​ថ្មីៗ​នេះ នៅ​ក្នុង​របាយការណ៍​ព្យាករណ៍​សន្ទុះ​សេដ្ឋកិច្ច​កម្ពុជា​ឆ្នាំ​២០១៩ របស់​ធនាគារ​អភិវឌ្ឍន៍​អាស៊ី (ADB) ចេញផ្សាយ​កាល​ពី​ដើម​ខែ​មេសា​នេះ បាន​រក​ឃើញ​ថា សេដ្ឋកិច្ច​កម្ពុជា​នឹង​ធ្លាក់​ចុះ​ពី ៧% នៅ​ឆ្នាំ ២០១៩ ទៅ ៦.% ក្នុង​ឆ្នាំ​២០២០។

របាយការណ៍​ដដែល​បាន​បង្ហាញ​ទៀត​ថា បញ្ហា​ប្រឈម​ជាច្រើន ដែល​ធ្វើ​ឱ្យ​សេដ្ឋកិច្ច​កម្ពុជា​ធ្លាក់​ចុះ​នេះ រួមមាន​ការ​ធ្លាក់​ចុះ​នៃ​កំណើន​សេដ្ឋកិច្ច​នៅ​ប្រទេស​ចិន ដែល​ជា​ទិសដៅ​នាំចេញ​សំខាន់​មួយ​របស់​កម្ពុជា។ បញ្ហា​សេដ្ឋកិច្ច​នៅ​ប្រទេស​ចិន​នេះ នឹង​ធ្វើ​ឱ្យ​ប៉ះពាល់​ដល់​ការនាំចេញ​ទំនិញ​របស់​កម្ពុជា ទៅ​ចិន និង​វិស័យ​ទេសចរណ៍​ផង។

អ្នក​ជំនាញ​យល់ថា បើ​យោង​តាម របាយការណ៍ របស់ ADB និង​ការ​ជួប​គ្រោះ​រាំងស្ងួត​នៅ​ដើម​រដូវ​ប្រាំង​ឆ្នាំ​២០១៩ ធ្វើ​ឱ្យ​កសិករ​ផលិត​ស្រូវប្រាំង​មិនទាន់​រដូវ​កាល និង​មិន​បាន​គ្រប់​ចំនួន គ្រប់កន្លែង​នោះ ទំនងជា​ទំនាយ​របស់​មហាសង្ក្រាន្ត​ឆ្នាំ​ថ្មី អាច​នឹង​ក្លាយ​ជា​ការពិត បើ​របប​ក្រុងភ្នំពេញ មិន​ឆាប់​រក​យុទ្ធសាស្ត្រ ទប់ទល់​បញ្ហា​ខ្វះ​ទឹក​ប្រើប្រាស់ ដើម្បី​សម្រួល​ដល់​ដំណើរ​ការ​ដាំ​ដុះ​ឱ្យ​បាន​រលូន ខួប​ប្រាំង ខួប​វស្សា ដោយ​គ្មាន​ឧបសគ្គ និង​គ្មាន​អ្នក​ជំនាញ​ចុះ​ជួយ កសិករ ក្នុង​ការ រៀបចំ​ផែនការ​រក្សា​ទឹក ឬ​ស្វែង​ប្រភព​ទឹក​បម្រុង​ទុកជាមុន និង​ត្រូវ​មាន​គោលការណ៍ និង​វិធី​ប្រើប្រាស់​សន្សំសំចៃ​ទឹក ឱ្យ​ស្រប​ទៅ​តាម​ផែនការ​ដាំដុះ​ពេញ​មួយ​ឆ្នាំ ដោយ​ម៉ត់ចត់​ឱ្យ​ទាន់​ពេល​វេលា​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល