មូលហេតុព្រះសង្ឃនិងពលរដ្ឋខ្មែរក្រោមចូលរួមបាតុកម្មរបស់បក្សសង្គ្រោះជាតិ
2013.12.18
ព្រះសង្ឃ និងខ្មែរកម្ពុជាក្រោម ចូលរួមបាតុកម្មរបស់គណបក្សសង្គ្រោះជាតិ នាទីលានប្រជាធិបតេយ្យ កាលពីថ្ងៃទី២៤ ខែតុលា ឆ្នាំ២០១៣។
ព្រះសង្ឃ និងពលរដ្ឋខ្មែរក្រោម តែងបានបង្ហាញវត្តមានក្នុងបាតុកម្មអហិង្សាគណបក្សសង្គ្រោះជាតិ។ ដូចគ្នាទៅនឹងពលរដ្ឋខ្មែរឯទៀត ព្រះសង្ឃ និងពលរដ្ឋខ្មែរក្រោម ទាំងនោះ ទាមទារចង់ឲ្យមានយុត្តិធម៌ការបោះឆ្នោត។ លើសពីនេះ ពួកគេគិតថា ប្រសិនបើគណបក្សសង្គ្រោះជាតិ ជាប់ឆ្នោត បានកាន់អំណាចមែននោះ គណបក្សប្រឆាំងមួយនេះអាចជួយធ្វើអោយស្ថានភាពជីវិតព្រះសង្ឃ និងពលរដ្ឋខ្មែរក្រោម នៅកម្ពុជា មានភាពល្អប្រសើរជាងនេះ។ ពួកគេក៏សង្ឃឹមថា គណបក្សសង្គ្រោះជាតិ អាចមានវិធានការជួយព្រះសង្ឃ និងពលរដ្ឋខ្មែរក្រោម នៅកម្ពុជាក្រោមផងដែរ។
ព្រះសង្ឃខ្មែរក្រោមមួយអង្គ មានស្រុកកំណើតនៅខេត្តឃ្លាំង ព្រះនាម ថាច់ ថាវរី បានឲ្យដឹងនៅពេលដែលព្រះអង្គចូលរួមបាតុកម្មនៅទីលានប្រជាធិបតេយ្យ កាលពីថ្ងៃទី១៨ ខែធ្នូ ថា ការដែលព្រះអង្គសម្រេចចិត្តចូលរួមក្នុងបាតុកម្មអហិង្សាគណបក្សសង្គ្រោះជាតិ ជាបន្តបន្ទាប់នោះ ដោយសារព្រះអង្គយល់ឃើញថា ការបោះឆ្នោតនាពេលកន្លងមកនៅមានភាពអយុត្តិធម៌ជាច្រើន។ ម្យ៉ាងទៀត ព្រះអង្គបានមើលឃើញភាពអយុត្តិធម៌ក្នុងសង្គមច្រើនផ្សេងទៀត ដូចជាការជិះជាន់ធ្វើបាបពីសំណាក់អាជ្ញាធររដ្ឋាភិបាល និងការទន្ទ្រានឈូសឆាយផ្ទះសម្បែងប្រជាពលរដ្ឋ។
ព្រះតេជព្រះគុណ ថាវរី មានថេរដីកាបន្ថែមថា ក្រៅតែពីចូលរួមដើម្បីរកយុត្តិធម៌ឲ្យពលរដ្ឋខ្មែរនៅកម្ពុជា ព្រះអង្គក៏ចង់ស្វែងរកយុត្តិធម៌ឲ្យព្រះសង្ឃ និងពលរដ្ឋខ្មែរក្រោម ដែលកំពុងរស់នៅលើទឹកដីនៃប្រទេសកម្ពុជា សព្វថ្ងៃ។ ព្រះតេជព្រះគុណថា អាជ្ញាធររដ្ឋាភិបាលសព្វថ្ងៃនៅមិនទាន់បានយកចិត្តទុកដាក់ចំពោះខ្មែរក្រោមឲ្យបានពេញលេញនៅឡើយ ហើយនៅកន្លែងខ្លះទៀត ខ្មែរក្រោមត្រូវបានគេលាបពណ៌ថា ជាជនជាតិវៀតណាម ទៀតផង។ សម្រាប់ព្រះតេជព្រះគុណ ថាវរី នេះ គឺជាការរើសអើងមួយលើពលរដ្ឋខ្មែរក្រោម។
ព្រះតេជព្រះគុណ ថាច់ ថាវរី៖ «ការរើសអើងនេះ មិនមែនការរើសអើងមិនឲ្យនៅ មិនឲ្យអីទេ ការរើសអើងនេះ ដូចជាការធ្វើក្រដាសស្នាម បញ្ជីកំណើតហ្នឹងអត់បានទេ គឺពិបាកធ្វើតែម្តង ហើយអាត្មាចូលរួមក្នុងឱកាសនេះ ដើម្បីជាការសម្ដែងមួយថា អាត្មាក៏ជាកូនខ្មែរមួយរូប ក៏មានឆន្ទៈមនសិការខ្មែរ ដើម្បីស្វែងរកយុត្តិធម៌សម្រាប់ប្រជាពលរដ្ឋខ្មែរដទៃដែរ ប្រសិនបើគណបក្សសង្គ្រោះជាតិ ជាប់ឆ្នោតនៅក្នុងអាណត្តិហ្នឹង ចំពោះខ្មែរក្រោម យើងគិតថា ប្រាកដជាគេយកចិត្តទុកដាក់ទៅលើខ្មែរដូចគ្នា ដោយសារតែគេមិនរើសអើងដាក់យើងខ្មែរលើខ្មែរក្រោមទេ យើងគិតថា យើងនឹងមានការអធ្យាស្រ័យជាងមុន»។
ក្រៅតែពីបានបង្ហាញសុទិដ្ឋិនិយមថា គណបក្សសង្គ្រោះជាតិ អាចយកចិត្តទុកដាក់បន្ថែមចំពោះស្ថានភាពខ្មែរក្រោមនៅកម្ពុជា ព្រះតេជព្រះគុណក៏មានក្តីសង្ឃឹមថា គណបក្សមួយនេះអាចជួយព្រះសង្ឃ និងពលរដ្ឋខ្មែរនៅកម្ពុជាក្រោមបាន ប្រសិនបើបក្សប្រឆាំងមួយនេះក្លាយជាបក្សកាន់អំណាច។ ព្រះតេជព្រះគុណ ថាវរី មិនហ៊ានរំពឹងថា គណបក្សសង្គ្រោះជាតិ អាចទាមទារទឹកដីកម្ពុជាក្រោមពីវៀតណាម វិញបាននោះទេ តែព្រះអង្គរំពឹងថា យ៉ាងហោចណាស់ គណបក្សមួយនេះអាចហ៊ានធ្វើអន្តរាគមន៍ទៅរដ្ឋាភិបាលវៀតណាម ឲ្យបញ្ឈប់ការប្រព្រឹត្តអំពើអយុត្តិធម៌ផ្សេងៗលើព្រះសង្ឃ និងពលរដ្ឋខ្មែរក្រោម។ លើសពីនេះ គណបក្សសង្គ្រោះជាតិ អាចផ្តល់សេរីភាពឲ្យអង្គការសមាគមខ្មែរកម្ពុជាក្រោមនៅកម្ពុជា រៀបចំកម្មវិធីជួបជុំផ្សេងៗ ដែលរដ្ឋាភិបាលសព្វថ្ងៃពុំសូវបានអនុញ្ញាត។
ព្រះតេជព្រះគុណ ថាច់ ថាវរី៖ «បើគណបក្សសង្គ្រោះជាតិ ឈ្នះ គណបក្សសង្គ្រោះជាតិ អាចផ្តល់ឲ្យសម្រាប់ប្រជាពលរដ្ឋក៏ដូចជាព្រះសង្ឃខ្មែរកម្ពុជាក្រោម អាចធ្វើបុណ្យខួបរំលឹកទឹកដីក៏ដូចជាបុណ្យជាតិសម្រាប់ខ្មែរកម្ពុជាក្រោមមួយចំនួនផងដែរ យើងមើលសព្វថ្ងៃ ប្រជាជន ឬក៏ព្រះសង្ឃខ្មែរកម្ពុជាក្រោម សុំកន្លែងដើម្បីប្រារព្ធទិវាថ្ងៃ៤ ខែ៦ ដើម្បីរំលឹកខួបមួយដែលមានការឈឺចាប់ ដែលបារាំង កាត់ទឹកដីអោយវៀតណាម ហ្នឹង ក៏ខ្មែរមិនអនុញ្ញាតឲ្យធ្វើដែររាល់ថ្ងៃនេះ»។
ជាទូទៅ ពលរដ្ឋខ្មែរក្រោមមានការយល់ឃើញមួយថា រដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា សព្វថ្ងៃ មានទំនាក់ទំនងជិតស្និទ្ធជាមួយរដ្ឋាភិបាលនៃសាធារណរដ្ឋសង្គមនិយមវៀតណាម ហើយពេលខ្លះ រដ្ឋាភិបាលកម្ពុជា ហាក់យកចិត្តទុកដាក់តិចតួចនៅពេលដែលព្រះសង្ឃ និងពលរដ្ឋខ្មែរក្រោមស្នើឲ្យពួកគេធ្វើអន្តរាគមន៍ទៅរដ្ឋាភិបាលវៀតណាម ដើម្បីដោះស្រាយបញ្ហាប្រឈមមួយចំនួនដែលខ្មែរក្រោមជួបប្រទះ។ នេះអាចជាកត្តាមួយដែលធ្វើឲ្យព្រះសង្ឃ និងពលរដ្ឋខ្មែរក្រោមភាគច្រើន ផ្ញើក្តីសង្ឃឹមលើគណបក្សសង្គ្រោះជាតិ វិញ។
ប្រជាពលរដ្ឋខ្មែរក្រោមម្នាក់ឈ្មោះ សួន កុសល សព្វថ្ងៃរស់នៅភ្នំពេញ ដែលសុំលាក់ឈ្មោះខេត្តកំណើតរបស់ខ្លួននៅកម្ពុជាក្រោម បានពោលថា ប្រសិនបើគណបក្សសង្គ្រោះជាតិ បានកាន់អំណាចនៅកម្ពុជា មែននោះ លោកសង្ឃឹមថា គណបក្សសង្គ្រោះជាតិ នឹងខ្វល់ខ្វាយចំពោះស្ថានភាពរស់នៅរបស់ខ្មែរក្រោមទាំងនៅកម្ពុជា និងនៅឯដែនដីកម្ពុជាក្រោម។
លោក សួន កុសល៖ «គណបក្សសង្គ្រោះជាតិ នឹងលើកស្ទួយ និងយកចិត្តទុកដាក់មិនដូចជាគណបក្សកាន់អំណាចបច្ចុប្បន្នទេ គេមិនសូវមានការយកចិត្តទុកដាក់ចំពោះបងប្អូនខ្មែរក្រោមប៉ុន្មានទេ ហេតុដូច្នោះ ខ្ញុំសង្ឃឹមថា ប្រសិនជាគណបក្សសង្គ្រោះជាតិ គាត់ឈ្នះដាច់ខាតហ្នឹង គឺខ្មែរកម្ពុជាក្រោម នឹងមានសង្ឃឹមច្រើនក្នុងការទទួលបានសិទ្ធិពេញលេញក្នុងភាពជាមនុស្សជាតិដូចគេលើពិភពលោកអ៊ីចឹងដែរ ដូច្នោះខ្មែរកម្ពុជាក្រោម យើងគ្មានគណបក្សណាជាទីសង្ឃឹមទេ គឺគណបក្សសង្គ្រោះជាតិ នេះហើយ»។
ខុសពីព្រះតេជព្រះគុណ ថាច់ ថាវរី និងលោក សួន កុសល ប្រជាពលរដ្ឋខ្មែរក្រោមម្នាក់ទៀតឈ្មោះ ថាច់ ឡីម។ លោកមានស្រុកកំណើតនៅស្រុកថ្កូវ ខេត្តព្រះត្រពាំង ហើយសព្វថ្ងៃមានគ្រួសារនៅខេត្តកំពង់ចាម បានឲ្យដឹងថា លោកចូលរួមបាតុកម្មគាំទ្រគណបក្សសង្គ្រោះជាតិ ពីព្រោះលោកខ្លាចទឹកដីកម្ពុជា បច្ចុប្បន្ន ត្រូវជនជាតិវៀតណាម ទន្ទ្រានយកដូចដែនដីកម្ពុជាក្រោម។
លោក ថាច់ ឡីម៖ «ឈាមខ្ញុំឈាមតា សឺន គុយ យើងមិនខុសគ្នាទេ យើងសព្វថ្ងៃនៅកម្ពុជា កណ្ដាលនេះ វាមិនខុសពីកម្ពុជាក្រោម ទេ ខ្ញុំបាត់បង់ទឹកដីខ្ញុំ ២១ខេត្តនៅកម្ពុជាក្រោម។ ឥឡូវនៅសល់ ២៤ខេត្តក្រុងនេះ បើយើងមិនខំថែរក្សា ២៤ខេត្តក្រុងនេះទេ គង់បាត់បង់ដូចទឹកដីចម្ប៉ា ដូចទឹកដីកម្ពុជាក្រោម ខ្ញុំឈឺចាប់ ហើយខ្ញុំ ខ្ញុំមកមិនដែលខានមួយថ្ងៃណា ថ្ងៃបាតុកម្មថ្ងៃណាខ្ញុំមកថ្ងៃហ្នឹង ថ្ងៃមកដំបូងខ្ញុំសន្លប់តើ ខ្ញុំដួល ខ្ញុំងងឹតមុខ ខ្ញុំនៅតែមកទៀត នៅដើរហែជាមួយឯកឧត្តម ដើររាល់តែថ្ងៃហ្នឹង ដើរទៅដើរមក ខ្ញុំចង់សម្ដែងទឹកចិត្តខ្ញុំថា ខ្ញុំនឹងស្រឡាញ់ជាតិ ស្រឡាញ់បូរណភាពទឹកដីរបស់ខ្ញុំ ជាតិរបស់ខ្ញុំ»។
ចំណែកស្ត្រីខ្មែរក្រោមឈ្មោះ ដែន សំបូរ មកពីខេត្តរោងដំរី ជាប់ព្រំប្រទល់ខេត្តស្វាយរៀង ប្រទេសកម្ពុជា បានកត់សម្គាល់ថា លោកនាយករដ្ឋមន្ត្រី ហ៊ុន សែន ដឹកនាំប្រទេសយូរឆ្នាំមកហើយ តែប្រជាពលរដ្ឋខ្មែរនៅតែក្រ។ អ្នកស្រីថា ក្នុងនាមជាពលរដ្ឋ អ្នកស្រីមានសិទ្ធិជ្រើសរើសមេដឹកនាំដែលល្អ និងគិតគូរពីរឿងជាតិ។ លើសពីនេះ អ្វីដែលធ្វើឲ្យអ្នកស្រីព្រួយបារម្ភនោះ គឺការផ្តល់ដីសម្បទានសេដ្ឋកិច្ចទៅឲ្យក្រុមហ៊ុនវៀតណាម ៩៩ឆ្នាំ។ កត្តានេះ បានធ្វើឲ្យអ្នកស្រីព្រួយបារម្ភពីការបាត់បង់ទឹកដីកម្ពុជា ដូចទឹកដីកម្ពុជាក្រោម។
អ្នកស្រី ដែន សំបូរ៖ «ពួកខ្ញុំភ័យខ្លាច បងប្អូននៅស្រុកខ្មែរភ័យខ្លាចមិនភ័យ ខ្ញុំអត់ដឹងទេ ប៉ុន្តែខ្មែរខ្ញុំកម្ពុជាក្រោម ខ្ញុំភ័យឡើងម៉ាចង់លស់ព្រលឹង ពីព្រោះខ្ញុំខ្មែរកម្ពុជាក្រោម សូម្បីតែលេខមិនចេះផង កុំថាឡើយអក្សរ ហើយខ្ញុំជាកូនខ្មែរ ខ្ញុំមិនបានរៀនសូត្រអ៊ីចឹង ខ្ញុំឈឺចាប់សម្បើមណាស់ មិនត្រឹមថាតែខ្ញុំទេ កូនចៅបងប្អូនខ្ញុំទាំងអស់អត់មានអ្នកណាចេះអក្សរខ្មែរទេ អ៊ីចឹងខ្ញុំខ្មែរទោះបីនៅណាក៏ខ្ញុំជាខ្មែរដែរ អ៊ីចឹងខ្ញុំត្រូវស្រឡាញ់ខ្មែរដូចគ្នា គ្មាននរណាស្រឡាញ់យើងខ្មែរដូចគ្នាចេះស្រឡាញ់គ្នាទេ បើយើងចេះស្រឡាញ់គ្នា ចេះចាប់ដៃគ្នា ចេះពង្រឹង គ្មាននរណាហ៊ានមើលងាយ ហើយក៏ហ៊ានឈ្លានពានយើងដែរ ទេវតាបង្កើតយើងមកចែកដីចែកធ្លីឲ្យរៀងខ្លួនហើយ បើយើងមិនចេះថែរក្សាជារឿងរបស់យើង កុំបន្ទោសទេវតាឲ្យសោះ»។
អ្នកស្រី សំបូរ សង្ឃឹមថា នៅពេលគណបក្សសង្គ្រោះជាតិ កាន់អំណាច គណបក្សសង្គ្រោះជាតិ អាចជួយទាមទារឲ្យពលរដ្ឋខ្មែរនៅកម្ពុជាក្រោម រស់នៅមានសិទ្ធិសេរីភាព និងបានសិក្សាអក្សរសាស្ត្រ និងវប្បធម៌ខ្មែរបានពេញលេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត