មន្ត្រីបក្សប្រឆាំងថា សមាជិកព្រឹទ្ធសភាបក្សកាន់អំណាចមិនអាចជួយដោះស្រាយបញ្ហាពលរដ្ឋបានទេ
2024.03.02

រដ្ឋសភានៅព្រឹកថ្ងៃទី១ មីនា បានបោះឆ្នោតជ្រើសរើសលោក សុខ ឥសាន និងលោក ហេង ហាលីម ជាសមាជិកព្រឹទ្ធសភា។ មន្ត្រីបក្សប្រឆាំងលើកឡើងថា សមាជិកព្រឹទ្ធសភា របស់គណបក្សប្រជាជនកម្ពុជាមិនអាចដោះស្រាយទុក្ខលំបាករបស់ពលរដ្ឋ និងបញ្ហារំលោភសិទ្ធិមនុស្សបាននោះទេ។
មន្ត្រីបក្សប្រឆាំងមើលឃើញថា សមាជិកព្រឹទ្ធសភារបស់បក្សកាន់អំណាច នឹងក្លាយជាអ្នកចាំប្រថាប់ត្រាឱ្យក្រុមគ្រួសារ លោក ហ៊ុន សែន ច្រើនជាការពារផលប្រយោជន៍ពលរដ្ឋ។
អតីតតំណាងរាស្ត្រ គណបក្សសង្គ្រោះជាតិ លោក អ៊ំ សំអាន ប្រាប់វិទ្យុអាស៊ីសេរី នៅថ្ងៃទី១ ខែមីនា ថា លោកគ្មានជំនឿថា សមាជិកព្រឹទ្ធសភាថ្មីមានឆន្ទៈបម្រើផលប្រយោជន៍ដល់ពលរដ្ឋនោះទេ ពីព្រោះកន្លងមកនៅពេលពលរដ្ឋរងការរំលោភសិទ្ធិមនុស្ស តែងត្រូវបានសមាជិកព្រឹទ្ធសភាមិនអើពើ។ លោកបន្តថា សមាជិកព្រឹទ្ធសភាថ្មីនេះនឹងបង្កលក្ខណៈងាយស្រួលដល់គ្រួសារ លោក ហ៊ុន សែន ក្ដោបក្ដាប់អំណាច។
លោក អ៊ំ សំអាន៖ «បក្ខពួករបស់លោក ហ៊ុន សែន ហ្នឹងនៅក្នុងរដ្ឋសភាផង នៅក្នុងព្រឹទ្ធសភាផងនៅក្នុងរដ្ឋាភិបាលសុទ្ធតែបក្ខពួកលោក ហ៊ុន សែន ទៀត អ៊ីចឹងទាំងស្ថាប័នជាតិ ទាំងរដ្ឋាភិបាល ស្ថាប័នព្រឹទ្ធសភា រដ្ឋសភា គឺជាកម្មសិទ្ធិផ្ដាច់មុខរបស់ត្រកូល ហ៊ុន ហើយ អ៊ីចឹងនៅពេលដែលបក្ខពួកនិយមគ្រួសារនិយមនៅក្នុងព្រឹទ្ធសភា អ៊ីចឹងសមាជិកព្រឹទ្ធសភាមិនបម្រើឱ្យផលប្រយោជន៍ប្រជាពលរដ្ឋនោះទេ អ៊ីចឹងកាន់តែធ្វើឱ្យប្រជាពលរដ្ឋអត់ការងារធ្វើកាន់តែក្រីក្រទៅៗ ទៅធ្វើការខ្ញុំគេនៅប្រទេសថៃ»។
រដ្ឋសភាបានរៀបចំកិច្ចប្រជុំវិសាមញ្ញ នៅថ្ងៃទី១ ខែមីនា ដោយរដ្ឋសភាបានបោះឆ្នោតជ្រើសតាំង លោក សុខ ឥសាន និងលោក ហេង ហាលីម ឱ្យធ្វើជាសមាជិកព្រឹទ្ធសភា នីតិកាលទី៥ ។ ក្នុងចំណោមបេក្ខជនចំនួន៤រូប លោក សុខ ឥសាន ទទួលបានសន្លឹកឆ្នោតយល់ព្រម ចំនួន ១១៣សំឡេង និងលោក ហេង ហាក់លីម ទទួលបានសំឡេងគាំទ្រចំនួន ១១២សំឡេង ខណៈដែល លោក អ៊ា ឃីម៉េង និងលោក ឌី ទេពកោសល្យ ទទួលបានត្រឹម២សំឡេងប៉ុណ្ណោះ។
ប្រធានប្រតិបត្តិគណបក្សភ្លើងទៀនខេត្តប៉ៃលិន លោក ខឹម មុនីកុសល សង្កេតឃើញថា សមាជិកព្រឹទ្ធសភាភាគច្រើនគឺតែងចេញមុខការពារផលប្រយោជន៍ឱ្យក្រុមគ្រួសារត្រកូលហ៊ុន ។ ដូច្នេះ ប្រាកដណាស់ ស្ថាប័នព្រឹទ្ធសភា នឹងបម្រើគ្រួសារត្រកូលហ៊ុនច្រើនជាងដោះស្រាយបញ្ហារបស់ពលរដ្ឋ និងប្រទេសជាតិ ខណៈលោក ហ៊ុន សែន ក៏នឹងក្លាយជាប្រធានព្រឹទ្ធសភានៅពេលខាងមុខ។
លោក ខឹម មុនីកុសល៖ «ការរើសមនុស្សទៅធ្វើការហ្នឹងមិនផ្អែក ទៅលើឆន្ទៈឧត្ដមគតិរបស់ប្រជារាស្ត្រគឺផ្អែកទៅភក្ដីភាពទៅលើបុគ្គលជាពិសេសគណបក្សប្រជាជន តែប៉ុណ្ណឹង អ៊ីចឹងទេការគិតគូរការថ្លឹងថ្លែងអំពីផលប្រយោជន៍ជាតិជាធំហ្នឹងគឺពួកគាត់ មិនបានផ្ដល់តម្លៃមិនបានយកចិត្តទុកដាក់ទេ»។
ច្បាប់ស្ដីពីលក្ខន្តិកៈសមាជិកព្រឹទ្ធសភា មាត្រា២ ចែងថា សមាជិកព្រឹទ្ធសភាគឺជាតំណាងរបស់ប្រជាជាតិខ្មែរទាំងមូល ពុំមែនគ្រាន់តែជាតំណាង ឱ្យភូមិភាគរបស់ខ្លួននោះទេ។
វិទ្យុអាស៊ីសេរី មិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន និងប្រធានរដ្ឋសភា អ្នកស្រី ឃួន សុដារី ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១ ខែមីនា។
ទាក់ទិនរឿងនេះអ្នកសិក្សាកិច្ចការនយោបាយលោក ប៉ោ មករា យល់ឃើញថា រដ្ឋសភាគួរតែផ្ដល់ឱកាសឱ្យយុវជនជំនាន់ក្រោយដែលមានសក្ដានុពលជាជាងតែងតាំងមន្ត្រីចាស់ៗឱ្យធ្វើជាសមាជិកព្រឹទ្ធសភា។ លោកបន្តថា ប្រសិនបើសមាជិកព្រឹទ្ធសភាជាប់ឆ្នោតទាំងនោះស្ថិតក្រោមឥទ្ធិពលនយោបាយ នោះបញ្ហាប្រឈមរបស់ពលរដ្ឋនៅតែបន្តកើតមាន។
លោក ប៉ោ មករា៖ «អ្នកដែលយកខ្លួនជាប់ជាមួយគណបក្សនៅពេលដែលជាប់ជាតំណាងរាស្ត្រហ្នឹងវាធ្វើឱ្យការបំពេញតួនាទីវាអត់បានគ្រប់ជ្រុងជ្រោយមានប្រសិទ្ធភាពល្អ ការដោះស្រាយការងារហ្នឹងវានៅមានកម្រិតមានន័យថា ការយឺតយ៉ាវនៃការអភិវឌ្ឍន៍ហ្នឹងយើងឃើញមានបញ្ហាច្រើន ហើយសេដ្ឋកិច្ចមិនសូវលូតលាស់ប៉ុន្មានទេ ជាពិសេសប្រជាពលរដ្ឋ គាត់អាចដឹងពីប្រសិទ្ធភាពការងាររបស់តំណាងរាស្ត្រមានកម្រិតណា»។
ព្រឹទ្ធសភាកម្ពុជាមានសមាជិកទាំងអស់ចំនួន ៦២រូប ក្នុងនោះ ៥៨រូបត្រូវបានបោះឆ្នោតជ្រើសតាំងដោយអង្គបោះឆ្នោតដែលជាសមាជិកក្រុមប្រឹក្សាឃុំសង្កាត់ និងសមាជិករដ្ឋសភា ២រូបជ្រើសរើសដោយរដ្ឋសភា និង២រូបទៀតត្រូវបានតែងតាំងដោយអង្គព្រះមហាក្សត្រ។ ក្នុងការបោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃទី២៥ កុម្ភៈ គណបក្សប្រជាជនកម្ពុជា ទទួលបាន ៥៥ អាសនៈ និងគណបក្សឆន្ទៈខ្មែរដែលតំណាងឱ្យសម្ព័ន្ធភាពឆ្ពោះទៅអនាគតទទួលបាន ៣អាសនៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។