ຊາວບ້ານວ່າອອກຕຸ່ມຍ້ອນ ເຄມີ ຈາກສວນກ້ວຍ

ຊາວບ້ານຢູ່ບ້ານນ້ຳຟ້າ ເມືອງຕົ້ນເຜິ້ງ ແຂວງບໍ່ແກ້ວ ຫຼາຍຄອບຄົວ ອອກຕຸ່ມຄັນ ແລະ ໃນເວລາ ເຂົາເຈົ້າເກົາ ບໍລິເວນຕຸ່ມຈະປະກົດ ເປັນຮອຍດຳວົງໃຫຍ່ ຕາມແຂນ ຂາ ລຳໂຕ ແລະ ໜ້າ ໂດຍສະເພາະ ເດັກນ້ອຍ ຈະເປັນຫລາຍກ່ວາໝູ່.

ບັນຫາດັ່ງກ່າວເກີດຂຶ້ນ ຫລັງຈາກ ຊາວບ້ານລົງອາບນ້ຳຢູ່ຫ້ວຍເກິ່ງ ທີ່ຢູ່ລຸ່ມສວນກ້ວນຈີນ ແລະ ເຂົາເຈົ້າສົງສັຍວ່າ ເປັນຍ້ອນສານເຄມີ ຢູ່ສວນກ້ວຍຈີນໄຫລລົງໃສ່ຫ້ວຍນ້ຳ ຍ້ອນວ່າໃນເວລາ ຊາວບ້ານອາບ ນ້ຳຢູ່ຫ້ວຍເກິ່ງ ທີ່ຢູ່ເທິງສວນກ້ວຍຈີນ ເຂົາເຈົ້າພັດບໍ່ເປັນຕຸ່ມຫຍັງ. ຊາວບ້ານນ້ຳຟ້າ ໄດ້ກ່າວຕໍ່ເອເຊັຽເສຣີ ວ່າ:

"ເດັກນ້ອຍເປັນຫຼາຍໂອ້! ໄປອາບນ້ຳ ມັກເປັນຕຸ່ມບັກຫຼາຍໆ ຄັນເລີຍເກົາໆ ລະມັນອອກມາດຳຕຸ່ມໃຫຍ່, ອາບນ້ຳເທິງບ້ານນີ້ບໍ, ບໍ່ແມ່ນ ສວນກ້ວຍນີ້ເນາະ ແລ້ວວ່າ ໄປອາບນ້ຳຢູ່ເທິງນີ້ຢູ່ ເຂົາຕ່າງໆ ຈະນີ້ ຈະນັ້ນນີ້ ບໍ່ຄັນ, ແຕ່ວ່າ ອາບນ້ຳແຖວບ້ານ [ຢູ່ລຸ່ມສວນກ້ວຍ] ນີ້ຄັນ. ສົມມຸດວ່າ ເຂົາສີດຢາເນາະ ຫລືວ່າຝົນຕົກບໍ່ ເຮັດຈະນັ້ນລົງລຸ່ມມາ ບາງທີເຂົາກໍຖອກຖິ້ມຢາໃສ່ນ້ຳນີ້ ເຮົາກໍບໍ່ຮູ້ເນາະ ປະຊາຊົນເຮົານີ້ ໄປອາບນ້ຳກໍຄັນ."

ຊາວບ້ານນ້ຳຟ້າ ເມືອງຕົ້ນເຜິ້ງ ແຂວງບໍ່ແກ້ວ ຮູ້ສຶກເສັຽໃຈ ຖ້າສວນກ້ວຍຈີນໃຊ້ສານເຄມີ ເຮັດໃຫ້ປະຊາຊົນໄດ້ຮັບຜົນກະທົບ, ດັ່ງທ່ານ ກ່າວວ່າ:

"ຄັນວ່າເປັນແນວນັ້ນ ຮູ້ສຶກເສັຽໃຈໂອ້, ເຮົາເສັຽໃຈຍ້ອນກໍບໍ່ຢາກໃຫ້ເຮັດ ບໍ່ຢາກໃຫ້ປູກຫັ້ນແຫຼະ ຄັນມັນເປັນຕໍ່ໆກັນໄປ ມັນກໍຊິເຈີຫຼາຍຄົນ ມັນກໍຊິເສັຍໃຈເນາະ ມັນປົວ ກໍຊິບໍ່ດີຕີ້ ຄັນວ່າຖືກແທ້ໆ."

ບັນຫາດັ່ງກ່າວ ເກີດຂຶ້ນຍ້ອນວ່າ ຊາວບ້ານນ້ຳຟ້າ ຮູ້ເທົ່າບໍ່ເຖິງການໃນການນຳໃຊ້ ຢູ່ຫ້ວຍເກິ່ງມາອາບ, ຊາວບ້ານຫົວນ້ຳທາ ແຂວງບໍ່ແກ້ວ ກ່າວວ່າ:

"ຄວາມຮູ້ເທົ່າບໍ່ເຖິງການຫັ້ນນ່າ ສະນັ້ນ ກໍວິທີປ້ອງກັນ ການເຮັດການໃສ່ສານເຄມີ ອັນນີ້ຫັ້ນນ່າ ຕ້ອງລະມັດລະວັງ ຢາກໃຫ້ຊຸກຍູ້ທາງດ້ານ ນັ້ນຍ້ອນວ່າ ມາເຮັດສວນນັ້ນ ມັນຊິມີຜົນຮ້າຍໝົດກໍບໍ່ແມ່ນ ມັນກໍສົ່ງ ຜົນໄດ້ ຜົນເສັຽ."

ເຈົ້າໜ້າທີ່ສາທາຣະນະສຸຂ ປະຈຳສຸກສາລາ ກ່າວວ່າໃນໄລຍະນີ້ ເປັນລະດູຮ້ອນ ຊາວບ້ານນ້ຳຟ້າ ທັງຜູ້ໃຫຍ່ ແລະເດັກຍ້ອນ ຈະມາໃຊ້ ບໍຣິການຢູ່ສຸຂສາລາ ຍ້ອນວ່າ ເຂົາອາບນ້ຳຈາກຫ້ວຍເກິ່ງ ແຕ່ ເຈົ້າໜ້າທີ່ ໃຫ້ຢາຕາມອາການ. ພຍາບານ ປະຈຳສຸຂສາລາ ທີ່ຢູ່ໃກ້ບ້ານ ທ່າຟ້າ ໄດ້ກ່າວຕໍ່ເອເຊັຽເສຣີ ວ່າ:

"ຊ້ວງນີ້ ນ້ຳຢາກຄັນ ນ້ຳແຫ້ງ ແລ້ວມັນມີສວນກ້ວຍທາງເທິງ ແລ້ວເຂົາອາບນ້ຳ ກໍຢາກຄັນ ອາການບໍ່ເປັນຫລາຍ ກໍໃຫ້ຢາແກ້ແພ້ ຫລືວ່າ ໃຫ້ແກ້ແພ້ແກ້ຄັນ ເປັນຫລາຍກໍໃຫ້ຕ້ານເຊື້ອໄປນ້ຳ ເຮົາກໍບໍ່ໄດ້ວິໃຈ ເຮົາກໍບໍ່ຊ່າງຊິວ່າ ບົ່ງມະຕິ ບົ່ງມະຕິກໍຕາມອາການ ຊື່ໆເນາະອັນນີ້ ເນາະ."

ທ່ານກ່າວຕື່ມອີກວ່າ ຫລັງຈາກຊາວບ້ານ ຮັບຢາປິ່ນປົວ ກໍຈະມີການດີຂຶ້ນ ແລ້ວຈະກັບ ຮັບປິ່ນປົວອີກເທື່ອໃໝ່ ເມື່ອຮອດລະດູຮ້ອນໃນປີ ຕໍ່ໄປຍ້ອນວ່າ ນ້ຳຫ້ວຍນ້ອຍ ຢູ່ບ້ານແຫ້ງ ບໍ່ສາມາດໃຊ້ອາບໄດ້ ຊາວບ້ານຈຳເປັນຕ້ອງໄດ້ໃຊ້ນ້ຳອາບ ຈາກຫ້ວຍເກິ່ງຢູ່ທາງລຸ່ມສວນກ້ວຍ ຂອງຈີນ.

ເຈົ້າໜ້າທີ່ທາງການ ຍັງບໍ່ສາມາດຢັ້ງຢືນໄດ້ວ່າ ຊາວບ້ານນ້ຳຟ້າ ໄດ້ຮັບຜົນກະທົບຈາກສານເຄມີຢູ່ສວນກ້ວຍຈີນ. ເຈົ້າໜ້າທີ່ກະສິກັມ ແລະ ປ່າໄມ້ແຂວງບໍ່ແກ້ວ ໄດ້ກ່າວຕໍ່ເອເຊັຽເສຣີ ວ່າ:

"ມື້ວານນີ້ ອ້າຍກໍເຂົ້າໄປນ້ຳຟ້າຫັ້ນແຫຼະ ເຂົ້າໄປກຸ່ມຂະເຈົ້ານັ້ນແຫລະ ກໍບໍ່ໄດ້ເຫັນຂະເຈົ້າຣາຍງານຈັ່ງໃດ ກະມີແຕ່ຈະໃຫ້ອ້າຍນ້ອງ ຂະເຈົ້າ ລົງເບິ່ງໂຕຈິງເບິ່ງ ລົງເກັບຂໍ້ມູນໂຕຈິງເບິ່ງ ເພາະວ່າມີອ້າຍນ້ອງ ເຮົາປະຈຳຢູ່ກຸ່ມຫັ້ນຕລອດເດ້."

ອີງຕາມຂໍ້ມູນຈາກປະຊາຊົນບ້ານນ້ຳຟ້າ ຜູ້ດຽວກັນນີ້, ຄົນຈີນເຣີ່ມເຂົ້າມາປູກກ້ວຍ ຢູ່ບ້ານນ້ຳຟ້າ ນັບແຕ່ປີ 2017 ເປັນຕົ້ນມາ ໂດຍເຊົ່າ ທີ່ດິນ ນຳປະຊາຊົນ 10 ຄອບຄົວ ຢູ່ ບ້ານນ້ຳຟ້າ.