ປະຊາຊົນ ນັກວິຊາການ ກັງວົນ ນ້ຳຂອງໃສ ຜິດຣະດູການ
2019.12.20
ທິວທັສແມ່ນ້ຳຂອງ ໃນມຸມສູງ ຈາກຝັ່ງໄທຍ ທີ່ເມືອງສັງຄົມ ແຂວງໜອງຄາຍ (ຮູບຖ່າຍເມື່ອ: ເດືອນທັນວາ 2019)
RFA/AS
ປັດຈຸບັນ, ປະຊາຊົນ ຢູ່ທີ່ອາໄສ ຢູ່ແຄມນ້ຳຂອງ ຫຼາຍແຂວງ ຢູ່ປະເທດໄທຍ ມີຄວາມກັງວົນ ກ່ຽວກັບ ສະພາບນ້ຳຂອງໃສ ຜິດຣະດູການ ຍ້ອນວ່າ ເຂື່ອນໄຊຍະບູຣີ ກັກນ້ຳໄວ້ ຜລິຕກະແສໄຟຟ້າ ນັບແຕ່ເດືອນ ຕຸລາ ເປັນຕົ້ນມາ.
ການປ່ຽນແປງ ຂອງນ້ຳຂອງ ຜິດຣະດູການ ເຮັດໃຫ້ ມີຝູງປາ ເປັນຈຳນວນຫຼາຍ ມາໂຫ້ ຢູ່ຈຸດໃດຈຸດນຶ່ງ ຍ້ອນວ່າ ນ້ຳຂອງບົກແຫ້ງ. ດັ່ງ ພຣະອາຈານ ພິທັກໄຊ ຈາຣຸທັມໂມ ເຈົ້າອາທິການ ວັດຫາຍໂສກ ແຂວງໜອງຄາຍ ໄດ້ກ່າວຕໍ່ ເອເຊັຽເສຣີ ວ່າ:
“ພໍອອກພັນສາແລ້ວ ຮູ້ສຶກວ່າ ໃສ ໃສຫຼາຍເລີຍ. ວັນທີ 27 ມານີ້, ເຣີ້ມຂຶ້ນມາ ບຶດດຽວ ໂຕນີ້ ມັນຈະມີ ປາບຶກນ້ອຍ ປາສະຫວາຍ, ປາປາກ. ທີ່ຫຼາຍທີ່ສຸດ ກະແມ່ນ ປາປາກ. ນ້ຳນີ້ ມັນຜັນຜວນ ປາມັນບໍ່ມີບ່ອນຢູ່ ປາກະເລີຍ ແລ່ນຫາທີ່ ຫຼົບພັຍ.”
ບັນຫາ ນ້ຳຂອງແຫ້ງ ແລະ ໃສ ຜິດປົກກະຕິ ສ້າງຄວາມກັງວົນໃຈ ໃຫ້ແກ່ ຊາວບ້ານ. ດັ່ງ ຍານາງ ການຈະນາ ແກ້ວພິມ, ເຈົ້າໜ້າທີ່ເມືອງສັງຄົມ ແຂວງໜອງຄາຍ ໄດ້ກ່າວຕໍ່ ເອເຊັຽເສຣີ ວ່າ:
“ກະມີຂໍ້ ກັງວົນຢູ່ວ່າ ຕໍ່ໄປ ມັນຈະເກີດຫຍັງຂຶ້ນ. ກະເປັນສິ່ງທີ່ວ່າ ປະຊາຊົນ ພີ່ນ້ອງເຮົາ ຄາດການ ບໍ່ໄດ້ເລີຍ. ສຳລັບ ແມ່ນ້ຳຂອງ ປ່ຽນສີ ເປັນຂໍ້ກັງວົນຢູ່ວ່າ ຕໍ່ໄປນີ້ ຖ້າມີການສ້າງເຂື່ອນ ຂຶ້ນໄປເລື້ອຍໆ ໃນອະນາຄົດ ບໍ່ຮູ້ວ່າ ສິ່ງທີ່ໄດ້ຮັບ ຜົລກະທົບ ມັນຊິໜັກ ກ່ວານີ້ບໍ່.”
ຍານາງ ການຈະນາ ຮຽກຮ້ອງ ໃຫ້ຣັຖບານລາວ ເບິ່ງຄືນວ່າ ເຂື່ອນນ້ຳຂອງ ເກີດຂຶ້ນໃນລາວ ນັ້ນ ສົ່ງຜົລກະທົບ ຕໍໍ່ຊາວບ້ານ ທີ່ອາໄສ ຢູ່ແຄມນ້ຳຂອງ ແນວໃດ ແລະ ຄວນເຮັດແນວໃດ ເພື່ອບໍ່ໃຫ້ ເກີດຜົລກະທົບຕື່ມ.
ການສ້າງເຂື່ອນ ໃສ່ແມ່ນ້ຳຂອງ ເຮັດໃຫ້ນ້ຳແຫ້ງລົງ ແລະ ຈະສົ່ງ ຜົລກະທົບ ຕໍ່ສັດນ້ຳ ແລະ ຊີວະນາໆພັນ. ດັ່ງ ດຣ. ຊະວະລິດ ວິທຍານົນ, ນັກວິຊາການ ອິດສະຣະ ດ້ານຄວາມຫຼາກຫຼາຍ ທາງສິ່ງທີ່ມີຊີວິດ ໄດ້ອະທິບາຍວ່າ:
“ເກີດຈາກການ ສ້າງເຂື່ອນ ທັງໃນແມ່ນ້ຳຂອງ ສາຂາ ແລະ ເຂື່ອນ ໃນແມ່ນ້ຳ ສາຍຫຼັກ ເຣີ້ມມີການ ປິດກັ້ນນ້ຳ. ປະກອບກັບ ໄລຍະນີ້ ເປັນໄລຍະ ທີ່ຝົນແລ້ງ ຝົນຕົກ ໃນລຸ່ມນ້ຳຂອງ ໜ້ອຍກ່ວາ ປົກກະຕິ. ບາງບ່ອນ ກໍອາຈຊິຖືກກັກ ຫຼື ຂາດໄລຍະ ກໍຊິເຮັດໃຫ້ ພາວະ Oxygen ໜ້ອຍລົງ ພວກສັດນ້ຳ ກໍຊິຕາຍ.”
ເມື່ອວັນທີ 13 ທັນວາ ທີ່ຜ່ານມາ, ນັກວິຊາການ ຈາກຫຼາຍພາກສ່ວນ ໃນໄທຍ ໄດ້ຈັດກອງປະຊຸມ ກ່ຽວກັບ ຫົວຂໍ້ ນ້ຳຂອງໃສ ຜິດຣະດູການ, ເຊິ່ງໄດ້ເວົ້າ ກ່ຽວກັບ ຜົລກະທົບ ທີ່ຈະເກີດຂຶ້ນ ແລະ ຫຼາຍຄົນ ພາກັນກັງວົນ ກ່ຽວກັບ ເຂື່ອນທີ່ຈະສ້າງ ໃສ່ແມ່ນ້ຳຂອງອີກ, ເປັນຕົ້ນແມ່ນ ເຂື່ອນຫຼວງພຣະບາງ ນັ້ນ ຈະເຮັດໃຫ້ ສະພາບນ້ຳຂອງ ແລະ ສັດນ້ຳ ລວມທັງ ຊີວະນາໆພັນ ມີການປ່ຽນແປງ ໃນທາງລົບ.
