ເສັ້ນທາງ ລະຫວ່າງຄຳມ່ວນ-ບໍຣິຄຳໄຊ ເປ່ເພໜັກໜ່ວງ

ມາຮອດປັດຈຸບັນເສັ້ນທາງ 8A ທາງເຊື່ອມຕໍ່ລະຫວ່າງ ເມືອງຄູນຄຳ ແຂວງຄຳມ່ວນ ຫາ ເມືອງຄຳເກີດ ແຂວງບໍຣິຄຳໄຊ ທີ່ໄດ້ຮັບຄວາມເສັຍຫາຍ ຈາກເຫດການນໍ້າຖ້ວມ ຍັງມີສະພາບເປ່ເພ ຢ່າງໜັກໜ່ວງ ແລະ ກໍຍັງປິດການສັນຈອນ ເພື່ອໃຫ້ພາກສ່ວນກ່ຽວຂ້ອງເລັ່ງ ສ້ອມແປງເສັ້ນທາງເຊິ່ງຊາວບ້ານ ທີ່ມັກແລ່ນຜ່ານ ລະຫວ່າງແຂວງຄຳມ່ວນ ຫາ ແຂວງບໍຣິຄຳໄຊ ຕ້ອງໄດ້ປ່ຽນໄປໃຊ້ເສັ້ນທາງເລຂ 1E ແລະ 1D ແທນ.

ດັ່ງເຈົ້າໜ້າທີ່ ເມືອງຄູນຄຳ ກ່າວຕໍ່ວິທຍຸ ເອເຊັຽ ເສຣີ ໃນວັນທີ 11 ສິງຫາ ນີ້ວ່າ:

“ໄປຍັງບໍ່ທັນໄດ້ເດີ້ເຣີ່ມສ້ອມແປງ ເຣີ່ມເກັ່ຍເອົາດິນ ເອົາຫຍັງ ທີ່ວ່າມັນຖົມລົງມາທາງຫັ້ນ ສະໄລ້ລົງໄປເດີນທາງຍັງບໍ່ທັນໄດ້ເທື່ອ ໄປໄດ້ແຕ່ຕ້ອງໄປທາງນາກາຍ-ຍົມມະລາດໄປໄດ້ຢູ່.”

ໃນຂະນະທີ່ເຈົ້າໜ້າທີ່ ເມືອງຄໍາເກີດ ແຂວງບໍຣິຄໍາໄຊ ກໍໄດ້ຢືນຢັນວ່າ ປັດຈຸບັນເສັ້ນທາງເລຂ 8A ມີສະພາບຖືກຕັດຂາດ ໃນບາງຈຸດເຮັດໃຫ້ຣົຖບໍ່ສາມາດ ເດີນທາງຜ່ານໄປມາໄດ້ ແຕ່ເຈົ້າໜ້າທີ່ທີ່ກ່ຽວຂ້ອງກຳລັງເລັ່ງແກ້ໄຂ ແລະ ສ້ອມແປງ ເພື່ອໃຫ້ກັບມາໃຊ້ໄດ້ຕາມປົກກະຕິ ຢ່າງໄວທີ່ສຸດ ທີ່ຈະເຮັດໄດ້.

ດັ່ງຍານາງໄດ້ກ່າວວ່າ:

“ຍັງເດີ້ການເດີນທາງ ຍັງຕິດຂັດຢູ່ ທາງຂາດແລ້ວກາຍັງມີດິນຖົມຢູ່ ເປັນບາງບ່ອນແກ້ໄຂໄດ້ ເຄິ່ງນຶ່ງແລ້ວ ຕອນນີ້ກຳລົງເລັ່ງ ໃຫ້ສຸດຄວາມສາມາດຢູ່.”

ສ່ວນຊາວບ້ານ ຢູ່ເມືອງຄູນຄໍາ ກໍຢືນຢັນວ່າສະພາບເສັ້ນທາງ ເລຂ 8A ຍັງໜັກໜ່ວງ ແລະ ມີຄວາມຫຍຸ້ງຍາກຢູ່ ໂດຍສະເພາະເສັ້ນທາງຢູ່ເຂດພູໄຮ ທີ່ໄດ້ຮັບຄວາມເສັຍຫາຍຫຼາຍ ທີ່ສຸດເຮັດໃຫ້ຊາວບ້ານຕ້ອງໄດ້ປ່ຽນໄປໃຊ້ ເສັ້ນທາງອື່ນແທນ.

ດ່ັງທ່ານກ່າວວ່າ:

“ຄູນຄຳເມືອຫຼັກ 20 ຍັງເມືອບໍ່ໄດ້ທາງຍັງເຈື່ອນຢູ່ ທີ່ພູໄຮທາງພູໄຮຍັງຫຼາຍເດີ້ ຍັງດົນເດີ້ໂຕນີ້ເດີ້ເພມັນເພແບບບມັນເຈື່ອນ ເປັນຊັ້ນພູລົງມາເລີຍສາຍບໍຣິຄຳໄຊ ກໍຄັນວ່າເມືອຫຼັກ 20 ກໍເມືອທາງວຽງທອງເລີຍເມືອງວຽງທອງ ລະເມືອໄດ້.”

ທ່ານກ່າວຕື່ມວ່າ ສະລັບສະພາບນໍ້າຖ້ວມ ຢູ່ເມືອງຄູນຄໍາປັດຈຸບັນ ລະດັບນໍ້າກໍໄດ້ຫຼຸດລົງຫຼາຍ ເກືອບແຫ້ງແລ້ວ ແລະເຈົ້າໜ້າທີ່ທີ່ກ່ຽວຂ້ອງ ຈາກຫຼາຍພາກສ່ວນກໍໄດ້ລົງພື້ນທີ່ ມາແຈກເຄື່ອງຂອງໃຫ້ຊາວບ້ານທີ່ປະສົບພັຍນໍ້າຖ້ວມ ແລ້ວຫຼາຍບ່ອນພ້ອມທັງຮີບໂຮມ ຂໍ້ມູນເສັຍຫາຍຂອງແຕ່ລະຄອບົວ ເພື່ອນຳໄປຂຶ້ນແຜນຊ່ອຍເຫຼືອຕໍ່ໄປ.

ຫຼ້າສຸດນີ້ມີຣາຍງານຕື່ມວ່າ ເມື່ອວັນທີ 10 ສິງຫາທີ່ຜ່ານມາ ທ່ານ ກອງແກ້ວ ໄຊສົງຄາມ ເຈົ້າແຂວງບໍຣິຄຳໄຊພ້ອມດ້ວຍຄະນະ ໄດ້ລົງພື້ນທີ່ຕິດຕາມສະພາບຄວາມເສັຍຫາຍ ຂອງເສັ້ນທາງເລຂ 8A ເຊິ່ງໄດ້ມີການແກ້ໄຂດິນເຈື່ອນ ຈາກເສັ້ນທາງແລ້ວ 10 ກິໂລແມັດແຕ່ກໍຍັງມີຣົຖຂອງຊາວບ້ານ ທີ່ຕິດຄ້າງຢູ່ເຂດດິນເຈື່ອນນັ້ນອີກຈຳນວນ 104 ຄັນອີງຕາມການຣາຍງານ ຂອງໜັງສືພີມລາວພັທນາ ເມື່ອວັນທີ 11 ສິງຫາ 2023.

ທາງດ້ານໜ່ວຍງານ ພາກເອກະຊົນທີ່ຕິດຕາມ ໃຫ້ການຊ່ອຍເຫຼືອຜູ້ປະສົບພັຍນໍ້າຖ້ວມ ຢູ່ແຂວງຄຳມ່ວນກ່າວວ່າສຳລັບການເດີນທາງ ເຂົ້າໄປຊ່ອຍເຫຼືອຊາວບ້ານໃນພື້ນທີ່ປະສົບພັຍ ນໍ້າຖ້ວມນັ້ນກໍຍັງບໍ່ສາມາດເດີນທາງເຂົ້າໄປໄດ້ເທື່ອ ເພາະເສັ້ນທາງບໍ່ອຳນວຍຄວາມສະດວກ ແຕ່ກໍຄາດວ່າຈະເດີນໄປມອບເຄື່ອງຂອງໃຫ້ແກ່ຊາວບ້ານ ໃນອີກບໍ່ດົນນີ້.

ດັ່ງເຈົ້າ ໜ້າທີ່ບໍຣິສັດເອກະຊົນນາງນຶ່ງ ກ່າວວ່າ:

“ຍາກພໍສົມຄວນເລີຍແຫຼະ ເພາະທາງລົງໄປຂອງເຮົາມັນກໍເປັນຂຸມ ເປັນຫຍັງຫຼາຍຫັ້ນນ່າວັນທີ 13 ນີ້ແມ່ນ ເຮົາຈະເດີນທາງໄປມອບເຄື່ງເນາະ ເຮົາກາມີຣົຖຂົນສົ່ງຂອງເຮົາ ທີ່ຈະລົງໄປມອບໃຫ້ເພິ່ນຫັ້ນນ່າ.”

ໃນຂະນະດຽວກັນ ເຈົ້າໜ້າທີ່ຂອງບໍຣິສັດເອກະຊົນ ອີກແຫ່ງນຶ່ງກ່າວວ່າ ທາງບໍຣິສັດຂອງທ່ານກຳລັງເປີດຮັບບໍຣິຈາກ ເຂົ້າສານ, ອາຫານແຫ້ງ ແລະ ອຸປະກອນເຄື່ອງໃຊ້ຕ່າງໆ ຈາກບັນດາຜູ້ໃຈບຸນເພື່ອທີ່ຈະນຳໄປມອບໃຫ້ແກ່ ຜູ້ປະສົບພັຍນໍ້າຖ້ວມໃນໄວໆນີ້ ເຊັ່ນດຽວກັນ.

ດັ່ງທ່ານກ່າວວ່າ:

“ພວກເຮົາວ່າຊິມີການບໍຣິຈາກ ຫຼືວ່າໄປສົ່ງເຄື່ອງບໍຣິຈາກ ພວກເຮົາດຽວນີ້ກຳລັງລວມ ລວມວ່າເຂົ້າໄດ້ຈັກກິໂລແລ້ວ ເພາະວ່າພວກເຮົາຢາກໄປບໍຣິຈາກ ເປັນອຸປະກອນ ຫຼືວ່າ ເປັນເຂົ້າ ສານອາຫານແຫ້ງພວກເຮົາຈະບໍ່ໄດ້ມອບ ເປັນເງິນ.”

ນອກຈາກນີ້ກໍຍັງມີເສັ້ນທາງ ອີກບາງແຫ່ງຢູ່ແຂວງຫົວພັນ ທີ່ຖືກດິນເຈື່ອນທັບ ຍ້ອນໄດ້ຮັບຜົລກະທົບ ຈາກພະຍຸ ແລະ ຝົນຕົກໜັກເປັນຕົ້ນເສັ້ນທາງເລຂ 1C ແລະ ເສັ້ນທາງເລຂ 6 ແຕ່ມາຮອດປັດຈຸບັນ ເຈົ້າໜ້າທີ່ທີ່ກ່ຽວຂ້ອງ ກໍກໍາລັງຢູ່ໃນລະຫວ່າງການແກ້ໄຂ ແລະ ສ້ອມແປງຈົນຣົຖສາມາດສັນຈອນ ຜ່ານໄດ້ແລ້ວ.

ດັ່ງເຈົ້າໜ້າທີ່ຜແນກໂຍທາທິການ ແລະ ຂົນສົ່ງ ແຂວງຫົວພັນກ່າວວ່າ:

“ມັນກາເປ່ເພບາງບ່ອນແຕ່ວ່າ ກາມີຣົຖແກ່ແລ້ວຣົຖນ້ອຍ ຣົຖຫຍັງນີ້ ບັນທຸກນີ້ກໍໄປມາໄດ້ແລ້ວ ເຂົາແປງຕອນນີ້ກຳລັງແປງ ຄັນມາທາງຊຽງຂວາງນີ້ ແມ່ນວ່າມາໄດ້ປົກກະຕິ.”

ສໍາລັບເສັ້ນທາງ ຢູ່ແຂວງຫົວພັນ ທີ່ຖືກດິນເຈື່ອນທັບ ແລະ ຕົ້ນໄມ້ຫັກທັບທີ່ກໍາລັງຢູ່ໃນລະຫວ່າງ ການແກ້ໄຂປະກອບດ້ວຍເສັ້ນທາງ ຈາກເມືອງຫ້ຽມ-ເມືອງຊ່ອນ-ເຂດແລ່ງແບ່ງ ຊາຍແດນວຽດນາມ, ເສັ້ນທາງຈາກເມືອງຊຳເໜືອ-ບ້ານຫ້ວຍມ້າ-ເມືອງຊ່ອນ ແລະ ອື່ນໆ ໂດຍທາງຂແນງຂົວທາງ ແລະ ຫ້ອງການໂຍທາທິການ ແລະ ຂົນສົ່ງ ຂອງແຕ່ລະເມືອງກຳລັງຮີບໂຮມ ຂໍ້ມູນຄວາມເສັຍຫາຍຢູ່. ອີງຕາມການຣາຍງານ ຂອງໜັງສືພີມ ວຽງຈັນທາມສ໌ ເມື່ອວັນທີ 10 ສິງຫາ 2023.