ເມືອງຕົ້ນເຜິ້ງ ເກັບຄ່າບໍຣິການຂີ້ເຫຍື້ອ ເປັນເງິນຕຣາຕ່າງປະເທດ ສວນທາງນະໂຍບາຍ ໃຊ້ເງິນກີບ

ໜ່ວຍບໍຣິການເກັບຂີ້ເຫຍື້ອ ເທສບານເມືອງຕົ້ນເຜິ້ງແຂວງບໍ່ແກ້ວ ເກັບຄ່າບໍຣິການມ້ຽນຂີ້ເຫຍື້ອ ຢູ່ບ້ານຕົ້ນເຜິ້ງ ສ່ວນຫຼາຍເປັນເງິນກີບ ແຕ່ບາງເຮືອນ ກໍສເນີຈ່າຍເປັນເງິນບາທໄທຍ ແລະ ເງິນຢວນຂອງຈີນ. ທາງໜ່ວຍງານກໍຮັບເອົາ. ອີງຕາມເຈົ້າໜ້າທີ່, ປະຊາຊົນ, ພໍ່ຄ້າ ແລະ ແມ່ຄ້າ ຢູ່ເມືອງຕົ້ນເຜິ້ງຫຼາຍໆ ຄົນກ່າວ. ສ່ວນເຈົ້າໜ້າທີ່ ທີ່ກ່ຽວຂ້ອງ ຢູ່ໜ່ວຍບໍຣິການເກັບຂີ້ເຫຍື້ອ ເທສບານເມືອງຕົ້ນເຜິ້ງ ທີ່ບໍ່ປະສົງອອກຊື່ ແລະຕຳແໜ່ງ ໄດ້ອະທິບາຍຕໍ່ຂ່າວສື່ສັງຄົມອອນລາຍນ໌ ລົງໂພສຕ໌ ກ່ອນໜ້ານີ້ວ່າ ໜ່ວຍງານເກັບຂີ້ເຫຍື້ອ ເມືອງຕົ້ນເຜິ້ງ ເກັບຄ່າຂີ້ເຫຍື້ອ ເປັນເງິນບາທ, 100 ບາທ. ເຈົ້າໜ້າທີ່ທ່ານນີ້ ໄດ້ອະທິບາຍຄວາມເປັນມາ ຂອງຂ່າວນັ້ນວ່າ ໜ່ວຍບໍຣິການເກັບຂີ້ເຫຍື້ອ ຂອງເມືອງ ເກັບຄ່າຂີ້ເຫຍື້ອ ຈໍານວນ 100 ບາທ ແລະ ອອກໃບບິນໃຫ້ລູກຄ້າເປັນເງິນບາທແທ້ ເນື່ອງຈາກລູກຄ້າສເນີໃຫ້ໜ່ວຍບໍຣິການ ເກັບຄ່າຂີ້ເຫຍື້ອ ເປັນເງິນບາທ ແຕ່ພໍຮອດມື້ເກັບຄ່າຂີ້ເຫຍື້ອ ລູກຄ້າເອົາເງິນກີບໃຫ້ 50 ພັນກີບ ແຕ່ໜ່ວຍບໍຣິການຮັບເງິນ 50 ພັນກີບ ບໍ່ໄດ້ຍ້ອນຄ່າຂີ້ເຫຍື້ອ 100 ບາທ ມີອັດຕຣາໄລ່ເປັນເງິນກີບ ໄດ້ 55 ພັນກີບລູກຄ້າ ຕ້ອງຈ່າຍໃຫ້ 55 ພັນກີບບໍ່ແມ່ນ 50 ພັນກີບ. ນອກຈາກນີ້ສ່ວນຫຼາຍ ໜ່ວຍບໍຣິການ ຈະເກັບຄ່າຂີ້ເຫຍື້ອ ເມືອງຕົ້ນເຜິ້ງ ເກັບຄ່າບໍຣິການເປັນເງິນກີບ ແລະຮັບເງິນກີບ ແຕ່ລູກຄ້າທ່ານໃດ ບໍ່ມີເງິນກີບກໍສາມາດສເນີຈ່າຍເປັນເງິນບາທ ຫຼືເງິນຢວນ ຕາມຄວາມສະມັກໃຈຂອງລູກຄ້າໄດ້.

ດັ່ງທ່ານໄດ້ກ່າວຕໍ່ ວິທຍຸເອເຊັຽ ເສຣີ ໃນວັນທີ 10 ກໍຣະກະດານີ້ວ່າ:

“ເຂົາເຈົ້າຂີ້ເຫຍື້ອຂຶ້ນເມືອໃຫ້ເດືອນລະ 100 ບາທ ໄດ້ບໍ່ອັນເຈົ້າຂອງຮ້ານເພິ່ນວ່າແນວນີ້ນ່າ ຄົນເກັບຂີ້ເຫຍື້ອວ່າ ໄດ້ເນາະ ພໍຮອດເດືອນມາແລ້ວ ເງິນບາທ ບໍ່ໃຫ້ເອົາເງິນກີບໃຫ້ເນາະ ເຂົາເຈົ້າໃຫ້ 50 ພັນກີບເຂົາເຈົ້າວ່າ ບໍ່ໄດ້ຕິ 50 ພັນກີບເງິນບາທ ເພີ່ນໄລ່ 100 ບາທ 55 ພັນກີບເນາະ ຫັ້ນນ່າ. ມັນເຂົ້າໃຈຜິດກັນ ບໍ່ແມ່ນວ່າເງິນກີບບໍ່ເອົາ ກໍເງິນກີບຫັ້ນແຫຼະ ສ່ວນຫຼາຍເຮົາເກັບເງິນກີບກັນຫັ້ນແຫຼະ ມີແຕ່ວ່າເປັນບາງຮ້ານ ເປັນບ້ານພັດສເນີເປັນເງິນຢວນ ເຮົາເກັບເປັນເງິນຢວນຫັ້ນ.”

ຂະນະທີ່ຢູ່ໃກ້ເຂດເສຖກິຈພິເສດ ສາມຫຼ່ຽມຄຳ ເປັນຕົ້ນ ຢູ່ບ້ານສີເມືອງງາມ ປະຊາຊົນ ຊາວຄ້າຂາຍຈ່າຍຄ່າຂີ້ເຫຍື້ອ ເປັນເງິນບາທ ຫຼືເງິນກີບ ແລ້ວແຕ່ວ່າຜູ້ໃດ ຈະສະດວກ ມີສະກຸນເງິນໃດ ແຕ່ສ່ວນຫຼາຍຊາວຄ້າຂາຍ ຈະຈ່າຍຄ່າຂີ້ເຫຍື້ອເປັນເງິນບາທ ເນື່ອງຈາກສ່ວນຫຼາຍໄດ້ຮັບເງິນຄ່າບໍຣິການ ອາຫານ-ເຄື່ອງດື່ມ ຈາກລູກຄ້າຊາວໄທຍ ແລະຊາວຈີນເປັນເງິນບາທ.

ດັ່ງແມ່ຄ້າຮ້ານອາຫານຕາມສັ່ງ ບ້ານສີເມືອງງາມ ກ່າວໃນມື້ດຽວກັນວ່າ:

“ປົກກະຕິເສັຍ 30 ພັນກີບທຸກເດືອນເປີດຮ້ານໄດ້ 2 ປີແລ້ວ, ກໍ 30 ພັນກີບ ຕລອດບໍ່ມີປ່ຽນ ເຂົາເຈົ້າເກັບເງິນກີບ ແຕ່ວ່າາເຮົາສະດວກໃຫ້ເງິນໃດ ເຂົາກໍເອົາແບບຫັ້ນຫັ້ນແຫຼະ ເຂົາກໍໄລ່ຕາມຫັ້ນພວກພະນັກງານເນາະ ໄດ້ເງິນເດືອນສ່ວນຫຼາຍເຂົາກໍໄດ້ເປັນເງິນກີບ ໝົດແຕ່ພວກອັນຄ້າຂາຍຫັ້ນ ເຂົາເຈົ້າສ່ວນຫຼາຍ ເຂົາກໍໃຊ້ເງິນບາດຄົນຈີນເນາະ ຄົນໄທຍເນາະມັນຢູ່ຕິດກັບໄທຍເນາະ ເຂົາກໍໃຊ້ເງິນບາທເຮົາຮັບທຸກສະກຸນເງິນ ເຂົາກໍມາກິນ.”

ສ່ວນຢູ່ບ້ານສີບຸນເຮືອງ ກໍເປັນບ້ານທີ່ຢູ່ໃກ້ກັບເຂດເສຖກິຈ ພິເສດສາມຫຼ່ຽມຄໍາ ປະຊາຊົນບ້ານດັ່ງກ່າວສ່ວນຫຼາຍ ກໍຈ່າຍຄ່າຂີ້ເຫຍື້ອເປັນເງິນບາທ ຄືກັນເຖິງແມ່ນວ່າໜ່ວຍບໍຣິການ ເກັບເງິນຂີ້ເຫຍື້ອ ເທສບານເມືອງຕົ້ນເຜິ້ງ ຈະໄລ່ເປັນເງິນກີບ ແຕ່ຈ່າຍຈິງກໍຈ່າຍເປັນເງິນບາທຢູ່ດີ. ໂດຍໃນເຂດບ້ານກໍມີການປະຊາສຳພັນ ໃຫ້ໃຊ້ເງິນກີບບໍ່ສາມາດຫຼີກລ້ຽງ ການໃຊ້ເງິນບາທ ຈ່າຍຄ່າຂີ້ເຫຍື້ອໄດ້ຄືກັນ.

ດັ່ງຊາວລາວ ຢູ່ບ້ານສີບຸນເຮືອງ ກ່າວໃນມື້ດຽວກັນວ່າ:

“ບາງຄົນກໍສະດວກມີເງິນບາທ ບາງຄົນກໍສະດວກ ມີເງິນກີບ ປັດຈຸບັນນີ້ກໍໃຊ້ເປັນເງິນບາທ ກັນຢູ່ສ່ວນຫຼາຍກໍຊ້ເປັນເງິນບາທ ນີ້ແຫຼະ ຫຼາຍເຂົາມາເກັບເປັນເງິນກີບເຮົາ ກໍໄລ່ເປັນເງິນບາທ ເປັນເງິນກີບສັບປ່ຽນກັນ. ໂອ້ ຢວນີ້ເຂົາມາລົນນະລົງໃຫ້ຈ່າຍເງິນກີບ ຄົນລາວນີ້ໃຊ້ເງິນບາທ ກໍຢູ່ທີ່ບຸກຄົນ ບຸກຄົນ ເຂົາຄ້ານໃຊ້ຫຼາຍແນ ກໍໃຊ້ເງິນບາທໄປເລີຍຫັ້ນນ່າ.”

ບ້ານດອນເງິນ ເປັນບ້ານທີ່ຢູ່ຫ່າງຈາກ ເທສບານເມືອງຕົ້ນເຜິ້ງ ເຖິງ 30 ກິໂລແມັດ, ປະຊາຊົນພາຍໃນບ້ານ ນິຍົມຈ່າຍຄ່າຂີ້ເຫຍື້ອ ເປັນເງິນບາທ ຄືກັນ ເນື່ອງຈາກເງິນກີບອ່ອນຄ່າ ຢ່າງຕໍ່ເນື່ອງ ເຮັດໃຫ້ຕ້ອງຈ່າຍຂີ້ເຫຍື້ອແພງຂຶ້ນ 5-10 ພັນກີບ ຕໍ່ເດືອນ. ສ່ວນຈ່າຍ 100 ບາທ ກໍ 100 ບາທ ຄືເກົ່າ. ປັດຈຸບັນຢູ່ເຂດເສຖກິຈພິເສດ ສາມຫຼ່ຽມຄໍາ ກໍຍັງນິຍົມຈ່າຍເງິນບາທ ແລະ ເງິນຢວນຫຼາຍກ່ວາເງິນກີບ.

ດັ່ງຊາວບ້ານ ຢູ່ບ້ານດອນເງິນ ກ່າວໃນມື້ດຽວກັນວ່າ:

“ຜູ້ໃດມີເງິນກີບ ກໍເອົາເງິນກີບຜູ້ໃດມີເງິນບາທ ກໍເອົາເງິນບາທ ໃຫ້ບາງຄົນນີ້ກໍໄລ່ເງິນກີບນີ້ໄລ່ ຫຼາຍເກີນໄປເຂົາກໍບໍ່ຢາກຈ່າຍເງິນກີບ ເຂົາກໍເອົາເງິນບາທ ໃຫ້ສົມມຸດວ່າ 100 ບາທ ເຂົາຈະໄລ່ເອົາ 55 ພັນກີບ 56 ພັນກີບ 58 ກັນີບ 60 ພັນກີບຕໍ່ 100 ບາດຜູ້ທີ່ມີເງິນບາທ ຢູ່ແລ້ວກໍບໍ່ຢາກຈ່າຍເງິນກີບລາວຫັ້ນແລ້ວກໍຈ່າຍເປັນເງິນບາທ ຢູ່ເຂດຕົ້ນເຜິ້ງຄາສິໂນນີ້ ກໍຈະເປັນເງິນບາທ ເງິນກີບເງິນຢວນສ່ວນຫຼາຍ ກໍເປັນເງິນບາທ ເງິນຢວນນີ້ແຫຼະ ສ່ວນຫຼາຍໃຊ້ເງິນບາທ ຫຼາຍກ່ວາເງິນກີບ.”

ພົລເອກ ວິໄລ ຫລ້າຄຳຟອງ, ຮອງນາຍົກຣັຖມົນຕຣີ  ແລະ ຣັຖມົນຕຣີ ກະຊວງປ້ອງກັນຄວາມສງົບ ສເນີ ໃຫ້ໃຊ້ແຕ່ເງິນກີບ ຢູ່ໃນແຂວງບໍ່ແກ້ວ ໃນນັ້ນລວມທັງເຂດເສຖກິຈ ພິເສດສາມຫຼ່ຽມຄຳ ແຕ່ວ່າການປະຕິບັດໂຕຈິງ ຕໍ່ຂໍ້ສເນີດັ່ງກ່າວບໍ່ໄດ້ຜົລດີປານໃດ ຍ້ອນສ່ວນຫຼາຍຄົນພາຍໃນເມືອງຕົ້ນເຜິ້ງ ແລະເຂດເສຖກິຈພິເສດ ສາມຫຼ່ຽມຄຳຍັງນິຍົມໃຊ້ສະກຸນເງິນ ຕ່າງປະເທດ ຈຶ່ງຢາກໃຫ້ຂັ້ນເທິງລົງມາຕິດຕາມຕື່ມ. ດັ່ງເຈົ້າໜ້າທີີ່ ທີ່ກ່ຽວຂ້ອງເມືອງຕົ້ນເຜິ້ງ ແຂວງບໍ່ແກ້ວກ່າວ ໃນມື້ດຽວກັນນີ້ວ່າ:

“ຊິບໍ່ໄດ້ຜົລປານໃດ ສ່ວນໜ້ອຍແຫຼະ ຊິໃຫ້ເປັນເງິນກີບໝົດ ເປັນໄປບໍ່ໄດ້ເພິ່ນບໍ່ມີເງິນກີບ ເພິ່ນມີເງິນບາທ ກໍຕ້ອງເອົາແຖວນີ້ ເຂົາເຈົ້າເງິນບາທ ສ່ວນຫຼາຍເນາະ ມັນກໍຕ້ອງໃຫ້ຂັ້ນເທິງ ລົງມາເບິ່ງອີກ ໂຕນັ້ນຫັ້ນແຫຼະເນາະ.”

ຍານາງ ວາລີ ເວດສະພົງ ສະມາຊິກສະພາແຫ່ງຊາຕ ເຂດເລືອກຕັ້ງທີ 1 ນະຄອນຫຼວງວຽງຈັນ ກ່າວຕໍ່ກອງປະຊຸມ ສະພາແຫ່ງຊາຕ ໃນວັນທີ 06 ກໍຣະກະດາ 2023 ວ່າ ເໜັ້ນຢໍ້າໃຫ້ຣັຖບານລາວ ແກ້ໄຂບັນຫາ ການໃຊ້ເງິນຢວນ ຂອງຈີນ ແລະສະກຸນເງິນຕ່າງປະເທດອື່ນໆ ພາຍໃນປະເທດ ເນື່ອງຈາກເປັນການທຳລາຍຄວາມເຊື່ອໝັ້ນ ຂອງປະຊາຊົນຕໍ່ເງິນກີບລາວ ຣັຖບານລາວຕ້ອງດຳເນີນການ ຢ່າງເດັດຂາດແລະທັນທີ ບໍ່ແມ່ນມິດງຽບ ຕໍ່ບັນຫາດັ່ງກ່າວ.