ສານເຄມີ ທີ່ໃຊ້ໃນສ່ວຍກ້ວຍຈີນແຫ່ງນຶ່ງ ຖືກປ່ອຍໄຫຼລົງສູ່ນ້ຳງື່ມ

ສວນກ້ວຍຂອງນັກລົງທຶນຈີນ ແຫ່ງນຶ່ງ ທີ່ບໍ່ຮູ້ຊື່ບໍຣິສັດ ຄັກແນ່ ຢູ່ບ້ານຖິ່ນຍຸງ ເມືອງວຽງຄໍາ ແຂວງວຽງຈັນ ປ່ອຍສານພິດເຄມີ ທີ່ໃຊ້ໃນສວນກ້ວຍ ແບບຊະຊາຍ ລົງໃສ່ນໍ້າງື່ມ ແລະສິ່ງແວດລ້ອມ ເມື່ອປະມານອາທິດທີ່ຜ່ານມານີ້ ເຮັດໃຫ້ຊາວບ້ານ ຈໍານວນນຶ່ງ ເຣີ່ມໄດ້ຮັບຜົລກະທົບ ຈາກກິ່ນຂິວ ທີ່ມາຈາກນໍ້າເປື້ອນ ແລະມີຜົລກະທົບຕໍ່ສິ່ງແວດລ້ອມ ແລະ ຢ້ານຈະສົ່ງຜົລກະທົບ ຕໍ່ການຜລິດນໍ້າປະປາ ຖ້າຫາກພາກສ່ວນທີ່ກ່ຽວຂ້ອງ ບໍ່ລົງມາແກ້ໄຂ, ອີງຕາມ ຄໍາເວົ້າຂອງຊາວບ້ານ ທີ່ເຫັນເຫດການນັ້ນ ຕໍ່ວິທຍຸເອເຊັຽເສຣີ ໃນມື້ວັນທີ 13 ກັນຍານີ້.

“ເຂົາເຈົ້າເຮັດສວນກ້ວຍຈີນ ເຮັດມາດົນແລ້ວ ເຂົາເຈົ້າກໍ່ຫາມາປ່ອຍຫວ່າງຝົນຕົກນີ້ນ່າ. ປ່ອຍຢູ່ຫັ້ນແຫລະ ມັນຢູ່ເທິງນໍ້າປະປາເຮົາເດ້. ເຂົາເຈົ້າໃຊ້ປຸ໋ຍ ໃຊ້ຫຍັງຕລອດ. ບາດນີ້ຝົນຕົກລົງມາ ມັນກໍຈະເປັນນໍ້າເສັຽນໍ້າຫຍັງໄປຫັ້ນແຫລະ ມັນກະຈະມີກິ່ນເໝັນ. ເວລາເຂົາໃຊ້ປຸ໋ຍຫັ້ນ ແລ້ວກະນໍ້າເສັຽຫັ້ນ ເທົ່ານັ້ນລະ.”

ທ່ານເວົ້າຕໍ່ໄປ ເຖິງຊື່ບໍຣິສັດຈີນ ທີ່ເປັນເຈົ້າຂອງສວນກ້ວຍນັ້ນວ່າ ກໍບໍ່ຮູ້ຄັກແນ່ ຍ້ອນວ່າ ເຄີຍເຫັນປ້າຍ, ມີແຕ່ຊື່ເປັນພາສາຈີນ ທີ່ຕິດຢູ່ໜ້າສວນກ້ວຍ. ອ່ານບໍ່ອອກ, ບໍ່ມີພາສາລາວຢູ່ນໍາ ແລະກໍຮູ້ພຽງແຕ່ວ່າ ຄົນງານ ທີ່ມາເຮັດວຽກຢູ່ໃນສວນກ້ວຍນັ້ນ ສ່ວນໃຫຍ່ເປັນຊົນເຜົ່າມົ້ງ ຈາກແຂວງຜົ້ງສາລີ ທີ່ມາຢູ່ໃນສວນກ້ວຍ ແບບເປັນຄອບຄົວ.

ປະຊາຊົນ ທີ່ຢູ່ບ້ານໃກ້ຄຽງສວນກ້ວຍຈີນ ອີກຜູ້ນຶ່ງ ເວົ້າເຖິງເຣື່ອງດັ່ງ ກ່າວວ່າ ແມ່ນເກີດຂຶ້ນແທ້ ແລະຕົນເອງ ເຄີຍເຫັນມາແລ້ວ, ແຕ່ບໍ່ແນ່ໃຈວ່າ ເປັນຍ້ອນນໍ້າເສັຍ ຈາກສວນກ້ວຍຂອງຈີນ ຫລືຈາກໂຮງງານ ທີ່ຢູ່ໃນເຂດສວຍກ້ວຍນັ້ນ, ເນື່ອງຈາກບໍ່ໄດ້ຕິດຕາມເບິ່ງ ຢ່າງໃກ້ຊິດ ຍ້ອນບໍ່ໄດ້ຢູ່ບ້ານຖິ່ນຍຸງ.

“ນໍ້າເສັຽລົງນໍ້າງື່ມຫັ້ນບໍ໋. ເຄີຍເຫັນຢູ່ ແມ່ນແທ້ໄດ໋. ແມ່ນໄດ໋ ຢູ່ໄກກັນຢູ່ຢູ່ຫ່າງກັນຢູ່. ໂອ໋ ບໍ່ຄ່ອຍແນ່ໃຈເພາະວ່າ ມັນເປັນໂຮງງານເກົ່າ.”

ພ້ອມດຽວກັນນັ້ນ ຊາວບ້ານອີກຜູ້ນຶ່ງ ທີ່ເຄີຍຂັບຣົຖ ຜ່ານເຂດສວນກ້ວຍຂອງຈີນນັ້ນ ເວົ້າຕໍ່ວິທຍຸເອເຊັຽເສຣີ ວ່າ ສວນກ້ວຍແຫ່ງນີ້ ມີຂນາດໃຫຍ່ ແລະກວ້າງຫລາຍ, ແຕ່ບໍ່ຮູ້ວ່າ ປະມານຈັກເຮັກຕ້າຣ໌. ສ່ວນຂ່າວທີ່ວ່າ ທາງສວນກ້ວຍ ໄດ້ປ່ອຍນໍ້າເສັຍ ລົງນໍ້າງື່ມ ແລະໃສ່ສິ່ງແວດລ້ອມນັ້ນ ຕົນບໍ່ຮູ້ຄັກແນ່ຍ້ອນບໍ່ໄດ້ສັງເກດ ຢ່າງລະອຽດ.

“ໃກ້ສວນກ້ວຍ ແມ່ນແລ້ວເຂົ້າໄປໃນ ໄປຕິດຕັ້ງປໍ້າ. ໂອ໋ ໃຫຍ່ເຕີບແທ້ ບໍ່ຮູ້ວ່າຈັກໄຮ່ ຫລາຍໆ ກະບໍ່ໄດ້ສັງເກດຫລາຍ ເພາະວ່າເຮົາຊິຂີ່ກາຍໄປຊື່ໆ.”

ຊາວບ້ານຜູ້ນຶ່ງ ທີ່ຢູ່ໃກ້ສວນກ້ວຍຈີນດັ່ງກ່າວ ໄດ້ຖ່າຍວິດິໂອ ໃນມື້ວັນທີ 11 ກັນຍານີ້ ກ່ຽວກັບສະພາບນໍ້າເປື້ອນ ແລະກິ່ນຂິວ ຈາກການປ່ອຍສານເຄມີ ແລະປຸ໋ຍເຄມີ ຈາກສວນກ້ວຍ ລົງໃສ່ນໍ້າງື່ມ ຈົນເຮັດໃຫ້ນໍ້າ ຢູ່ອ້ອມຂ້າງສວນກ້ວຍ ກາຍເປັນສີຂຽວ ແລະກໍຢ້ານມັນຈະສົ່ງຜົລກະທົບ ຕໍ່ການຜລິດນໍ້າປະປາ ໃນອີກບໍ່ດົນ.

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາ ເຈົ້າໜ້າທີ່ຫລາຍພາກສ່ວນ ຢູ່ເມືອງວຽງຄໍາ ແລະກໍໄດ້ຄໍາຕອບ ຈາກເຈົ້າໜ້າທີ່ທີ່ກ່ຽວຂ້ອງ ນາງນຶ່ງວ່າ ນາງເອງ ບໍ່ທັນຮູ້ທີ່ມາທີ່ໄປ ຢ່າງຄັກແນ່ເທື່ອ, ແຕ່ກໍໄດ້ຍິນຂ່າວວ່າ ເຈົ້າໜ້າທີ່ຫ້ອງການຊັພຍາກອນທັມມະຊາຕ ແລະສິ່ງແວດລ້ອມ ຂອງເມືອງ ຈະໄປຕິດ ຕາມ ກວດກາໃນໄວໆນີ້.

“ຢູ່ຖິ່ນຍຸງບໍ໋ ຖິ້ມນໍ້າເສັຽລົງໄປຫັ້ນຫວາ ເພິ່ນມີແຜນໄປຢູ່ ພະນັກງານຢູ່ສິ່ງແວດລ້ອມໄທເຮົາ ກະເປັນຄະນະກັມມະການ ຮັບຜິດຊອບຫັ້ນແຫລະເນາະ.”

ສໍາລັບຣາຍລະອຽດ ກ່ຽວກັບສວນກ້ວຍຈີນແຫ່ງນີ້ ເປັນຕົ້ນ ຊື່ບໍຣິສັດ, ເນື້ອທີ່ສວນ, ເຮັດສວນມາໄດ້ຈັກປີນັ້ນ ເຈົ້າໜ້າທີ່ຜູ້ນຶ່ງບອກວ່າ ຍັງຂໍສງວນ ທີ່ຈະໃຫ້ຂໍ້ມູນນັ້ນ.

ກ່ຽວກັບບັນຫາ ທີ່ເກີດຂຶ້ນນີ້ ຊາວລາວຫລາຍຄົນ ກໍໄດ້ສະແດງຄວາມເຫັນຜ່ານສື່ສັງຄົມອອນລາຍນ໌ ເປັນຕົ້ນເຣື່ອງ ທີ່ສະທ້ອນໃຫ້ເຫັນ ເຖິງການສືບຕໍ່ຂອງຣັຖບານລາວ ໃນການໃຫ້ຄົນຈີນ ມາສັມປະທານທີ່ດິນ ເຮັດສວນກ້ວຍ ຢູ່ເລື້ອຍໆ ໂດຍບໍ່ສົນໃຈນໍາເຣື່ອງ ການໃຊ້ສານເຄມີ ທີ່ຈະສົ່ງຜົລກະທົບຕໍ່ຊາວບ້ານ.

ແຕ່ເຖິງຢ່າງໃດກໍຕາມ ຄົນງານສວນກ້ວຍຈີນແຫ່ງນຶ່ງ ຢູ່ແຂວງຫລວງພຣະບາງ ກໍເວົ້າເຖິງເຣື່ອງການລົງທຶນປູກກ້ວຍ ຂອງນັກທຸຣະກິຈຈີນ ຢູ່ຫລາຍພື້ນທີ່ໃນລາວວ່າ ຍັງນໍາໃຊ້ສານເຄມີ ແລະປຸ໋ຍເຄມີຢ່າງຕໍ່ເນື່ອງ ເພາະວ່າ ມີຄວາມຈໍາເປັນຕ້ອງໄດ້ໃຊ້ ເພື່ອເຮັດໃຫ້ໝາກກ້ວຍງາມ ແລະບໍ່ເໜົ່າໄວ ໃນລະຫວ່າງຂົນ ສົ່ງໄປປະເທດຈີນ ແລະສວນກ້ວຍຈີນຫລາຍແຫ່ງ ຫລີກລ່ຽງການໃຊ້ຄົນງານ ທີ່ມີປວັດ ແພ້ສານເຄມີ ເຂົ້າເຮັດວຽກ ໃນສວນກ້ວຍນໍາ.

“ເພາະວ່າຢູ່ສວນກ້ວຍ ມັນຈະໄດ້ໃຊ້ຢາຫັ້ນນ່າ ເຂົາເຈົ້າຈະເຮັດຫລາຍຢູ່ ເພາະວ່າໄດ້ຂັດກ້ວຍ ໄປເຫັນມາຫັ້ນນ່າ ມັນກະມີຫລາຍຜແນກ ກະຄືອັນນີ້ຖ້າເຮົາເຮັດບໍ່ໄດ້ ສ່ວນນີ້ກະເຮົາໄປຢູ່ຜແນກອື່ນຊີ້ນ່າ.”

ກ່ອນໜ້າເກີດບັນຫານີ້ຂຶ້ນ ວິທຍຸເອເຊັຽເສຣີ ເຄີຍໄດ້ຣາຍງານວ່າ ໃນປີນີ້ ສວນກ້ວຍຂອງຈີນ ຢູ່ບ່ອນອື່ນໆ ໃນລາວ ໄດ້ເຮັດໃຫ້ມີຜົລກະທົບ ຕໍ່ຊາວບ້ານ ແລະສິ່ງແວດລ້ອມ ຮວມທັງສັດລ້ຽງ ທີ່ໄປກິນຫຍ້າ ໃກ້ກັບເຂດສວນກ້ວຍ. ເປັນຕົ້ນ ເມື່ອວັນທີ 29 ມິນາ 2023 ນີ້ ກໍໄດ້ເກີດເຫດ ງົວຂອງຊາວບ້ານລົ້ມຕາຍ 2 ໂຕ ພາຍຫລັງທີ່ໄດ້ເຂົ້າໄປກິນຫຍ້າ ຢູ່ໃນເຂດສວນກ້ວຍຂອງຈີນແຫ່ງນຶ່ງ ຢູ່ບ້ານປາກງາວ ເມືອງຫ້ວຍຊາຍ ແຂວງບໍ່ແກ້ວ. ຊາວບ້ານທີ່ຮູ້ຂ່າວ ເຊື່ອວ່າ ງົວນັ້ນ ຕາຍຍ້ອນກິນຫຍ້າ ທີ່ປົນເປື້ອນສານພິດເຄມີ ທີ່ນໍາໃຊ້ໃນສວນກ້ວຍ ຊຶ່ງອາຈຖືກນໍ້າຝົນພັດ ອອກຈາກບໍຣິເວນປູກກ້ວຍນັ້ນ.