ຫຼາຍເຂື່ອນ ໃນລາວ ປ່ອຍນໍ້າເຮັດໃຫ້ລະດັບນໍ້າຂອງເພີ່ມ ຂຶ້ນຢ່າງໄວວາ

ມາຮອດປັດຈຸບັນຫຼາຍເຂື່ອນໃນລາວ ຍັງສືບຕໍ່ປ່ອຍນໍ້າອອກຈາກເຂື່ອນ ພາຍຫຼັງປະລິມານ ນໍ້າຝົນຈາກພະຍຸຫຼວງຫຼາຍ ເຮັດໃຫ້ເຂື່ອນຕ້ອງປ່ອຍນໍ້າເພື່ອປ້ອງກັນເຂື່ອນແຕກ ຈຶ່ງເຮັດໃຫ້ລະດັບນໍ້າຂອງເພີ່ມຢ່າງໄວວາແລ້ວຫຍື່ງຖ້ວມເຮືອນຊານຊາວບ້ານພາຍໃນ ແຂວງຫຼວງພະບາງທີ່ຕັ້ງຢູ່ໃນເຂດຕໍ່າ. ຂະນະກຳມະກອນຄຸ້ມຄອງໄພພິບັດແຂວງຫຼວງພະບາງເລັ່ງໃຫ້ການຊ່ວຍເຫຼືອໃນຫຼາຍດ້ານຍົກຍ້າຍເຄື່ອງຂອງສັດລ້ຽງໄວ້ບ່ອນທີ່ປອດໄພເປັນຕົ້ນ ບ້ານໂພນແພງ, ບ້ານພະບາດໃຕ້ ນະຄອນຫຼວງພະບາງ. ດັ່ງເຈົ້າໜ້າທີ່ ແຂວງຫຼວງພະບາງກ່າວຕໍ່ວິທະຍຸເອເຊັຽເສຣີໃນວັນທີ 13 ກັນຍາ.

“ນໍ້າອູ 1, 2, 3 ຍັງປ່ອຍອອກມາຢູ່ນໍ້ານ່າເພາະວ່ານໍ້າຍັງບໍ່ທັນບົກແຫ້ງເທື່ອນ່າແຕ່ກໍ່ຟ້າມື້ນີ້ແຈ້ງແດດແລ້ວກໍ່ຄືສິປິດມື້ນີ້ແຫຼະເພາະວ່ານໍ້າມື້ນີ້ກໍ່ບົກແຫ້ງຫຼາຍແລ້ວ, ເຂື່ອນນໍ້າຂອງກັບເຂື່ອນນໍ້າຄານກໍ່ປ່ອຍຄືກັນເຂື່ອນນໍ້າຄານກໍ່ບັກໃຫຍ່ໆ ເດ້ບາດນີ້ເພາະວ່ານໍ້າຂອງເຮົາກໍມີແຕ່ແຫ່ງດຽວເຮົາກໍ່ສືບຕໍ່ປ່ອຍຢູ່ປ່ອຍລົງຢູ່ຫັ້ນນ່າແຕ່ມາຮອດມື້ນີ້ນໍ້າຄານນີ້ກຳລັງຊົງໂຕຢູ່ເນາະຍັງບໍ່ທັນຂື້ນເພາະວ່ານໍ້າຫຍຶ່ງມັນຈະຂື້ນນໍ້າຫຍຶ່ງມາຂື້ນນໍ້າຂອງແຕ່ວ່າເຂື່ອນນໍ້າຂອງເຂົາເຈົ້າກໍ່ປ່ອຍຖືກວ່າໄຫຼໄຫຼລົງແຮງຢູ່ນໍ້າໄຫຼລົງໄວ.”

ຮ່ອງຄວາມກົດດັນອາກາດຕໍ່າຫຼືຮ່ອງຝົນຍັງສືບຕໍ່ພາດຜ່ານພາກເໜືອແລະພາກກາງຂອງປະເທດລາວສົມທົບກັບກະແສມໍລະສຸມຕາເວັນຕົກສຽງໃຕ້ພັດປົກຄຸມເຮັດໃຫ້ມີຝົນຕົກ. ພ້ອມດຽວກັນນີ້ປະລິມານນໍ້າຈາກພາກເໜືອຍັງສືບຕໍ່ໄຫຼລົງມາຕື່ມຈະເຮັດໃຫ້ລະດັບນໍ້າຂອງຍັງຈະຂື້ນຢ່າງຕໍ່ເນື່ອງໂດຍລະດັບນໍ້າຂອງຢູ່ສະຖານີວຽງຈັນຂອງວັນທີ 13 ກັນຍາ 2024 ຄື 12,68 ແມັດເຊີ່ງເປັນລະດັບທີ່ຈະເພີ່ມຂື້ນຈາກມື້ຜ່ານມາ ແລະ ຢູ່ລະດັບອັນຕະລາຍແລ້ວ. ດັ່ງເຈົ້າໜ້າທີ່ເມືອງສີໂຄດຕະບອງກ່າວວ່າ.

“ຝົນຕົກມາແຕ່ເໜືອພຸ້ນມາແຕ່ຈີນພຸ້ນມັນກໍ່ຫຍື່ງໆ ຫຍື່ງໆ ຕາມຂື້ນມາມັນກໍ່ມີລະດັບນໍ້າເກີນມາດຕະຖານເຂົາຕ້ອງປ່ອຍນໍ້າອອກຈາກເຂື່ອນເພື່ອຮັກສາຄວາມປອດໄພຖ້າວ່າບໍ່ປ່ອຍເຂື່ອນກໍ່ຕ້ອງແຕກມັນຈະມາໜູນແມ່ນໍ້າສາຍຫຼັກກໍ່ຄືແມ່ນໍ້າຂອງຫຼາຍສາຍ ມັນມີເຂື່ອນໄຊຍະແດ່ເຂື່ອນນໍ້າອູ ເຂື່ອນນໍ້າຄານມັນຍູ້ເຂົ້າບ່ອນຮັບມັນກໍ່ຕ້ອງແມ່ນລຸ່ມແມ່ນໍ້າຂອງນີ້ແຫຼະ.”

ເຈົ້າໜ້າທີ່ເມືອງສີໂຄດຕະບອງກ່າວຕື່ມວ່າ ຄະນະກໍາມະການຄຸ້ມຄອງໄພພິບັດເມືອງສີໂຄດຕະບອງເລັ່ງໃຫ້ການຊ່ວຍເຫຼືອ ແລະກຽມຮັບມືໄພນໍ້າຖ້ວມສູງສຸດໃນຕໍ່ໜ້ານໍາ.

“ປະຊາຊົນເພິ່ນໄປອາໃສຢູ່ຕິດຄອງນໍ້ານັ້ນໂລດ ບາດນໍ້າຫຍື່ງມັນກໍ່ຕ້ອງຖ້ວມເປັນທໍາມະດາ ຮອງເຈົ້າຄອງຄະນະປະຈຳເພິ່ນກໍຕິດຕາມຊ່ວຍມາມື້ຄືນນີ້ກໍ່ມາຮອດ 11-12 ໂມງກາງຄືນພຸ້ນມາເບິ່ງຊ່ວຍວ່າຂາດເຂີນອັນໃດແດ່ກະປູ້ກະເປົາດິນຊອກດິນຊາຍໃຫ້ປະຊາຊົນແດ່ ທະຫານ, ຕຳຫຼວດກໍ່ຮ່າຍຊາຍໃສ່ເປົາຕິດໄວ້ຢູ່ນີ້ແຫຼະ.”

ລະດັບນໍ້າຂອງທີ່ເພີ່ມຂື້ນນັ້ນເຮັດໃຫ້ມັນໄຫຼເຂົ້າຖ້ວມເຮືອນປະຊາຊົນຢູ່ບ້ານດ່ານຄໍາ, ເກົ້າລ້ຽວ, ໜອງດາ ແລະ ບ້ານຫ້ວຍຫ້ອມ ເມືອງສີໂຄດຕະບອງນະຄອນຫຼວງວຽງຈັນ. ດັ່ງຊາວບ້ານກ່າວວ່າ:

“ນໍ້າຂອງມັນລົ້ນນ່າເພາະວ່າມັນຕໍ່າ ທາງໜອງດາຕອນນີ້ເພິ່ນກໍາລັງເລັ່ງ ອັນພະນັກງານເຂົ້າໄປຊ່ວຍເຫຼືອແຕ່ວ່າຕອນນີ້ຍັງຖ້ວມຢູ່ຫ້ວຍຫ້ອມ ກັບໜອງດາເພິ່ນກຳລັງລົງໄປຊ່ວຍເຫຼືອ.”

ເມືອງຜາອຸດົມ ແຂວງບໍ່ແກ້ວກໍ່ເປັນເມືອງໜຶ່ງທີ່ໄດ້ຮັບຜົນກະທົບຈາກນໍ້າຖ້ວມຍ້ອນປະລິມານນໍ້າຝົນຫຼາຍເຂື່ອນນໍ້າທາ 1 ແລະ 2 ຈຶ່ງປ່ອຍນໍ້າອອກຈາກເຂື່ອນທຸກປະຕູຈົນເຮັດໃຫ້ນໍ້າຖ້ວມບ້ານເຮືອນ ແລະ ດິນທຳການຜະລິດລວມເຖີງສັດລ້ຽງຂອງຊາວບ້ານ. ມາຮອດປະຈຸບັນເຂື່ອນນີ້ໄດ້ເປີດປະຕູປ່ອຍນໍ້າບາງປະຕູເທົ່ານັ້ນແລະນໍ້າໄດ້ບົກແຫ້ງແລ້ວ. ດັ່ງເຈົ້າໜ້າທີ່ແຂວງບໍ່ແກ້ວກ່າວວ່າ.

“ຖືວ່າຕອນນີ້ເຂົາກໍ່ປິດລົງແລ້ວຈໍານວນໜຶ່ງເຂົາກໍ່ປ່ອຍປົກກະຕິຜ່ານມາຕອນຖ້ວມຫຼາຍ ໆ ຫັ້ນເຂົາປ່ອຍໝົດທຸກປະຕູດຽວນີ້ເຂົາກໍ່ປິດລົງປິດລົງບາງປະຕູປະມີນຍັງບໍ່ທັນໄດ້ເທື່ອຜົນເສັຍຫາຍນ່າເພາະວ່າເຮົາຍັງບໍ່ທັນໄດ້ລົງສຳຫຼວດຕົວຈີງເທື່ອເພາະວ່າຖ້າໃຫ້ປົກກະຕິກ່ອນທາງເມືອງເຮົາແລ້ວກໍ່ທີມງານເມືອງທີມງານແຂວງເຮົາສິໄດ້ລົງນໍ້າຖ້ວມຫັ້ນປະມານ 2 ມື້ຕັ້ງແຕ່ວັນທີ 9 ຈົນຮອດວັນທີ 11 ລົດມື້ວານນີ້ມື້ນີ້ກໍຖືວ່າເລີ່ມແຫ້ງ.”

ນອກນັ້ນຄະນະກໍາມະທິການແມ່ນໍ້າຂອງສາກົນລະບຸວ່າລະດັບນໍ້າຂອງຢູ່ສະຖານີພະຍາ ກອນນໍ້າຖ້ວມຫຼວງພະບາງຂອງວັນທີ 13 ກັນຍາ ນີ້ຢູ່ທີ່ 286.215 ແມັດ ເຊີ່ງເປັນລະດັບທີ່ກາຍລະດັບນໍ້າຖ້ວມທີ່ກຳນົດໃຫ້ຢູ່ທີ່ 285.195 ແມັດ ແລ້ວ ແລະຄາດວ່າໃນອີກສອງວັນຂ້າງໜ້າຄືນັບແຕ່ວັນທີ 14 ເຖີງ 15 ກັນຍານີ້ລະດັບນໍ້າແມ່ນໍ້າຂອງໃນເຂດຫຼວງພະບາງຈະສືບຕໍ່ຖ້ວມຢ່າງຄົງທີ່ເຖີງຂັ້ນຫຼຸດລະດັບລົງຈາກນັ້ນວັນທີ 16 ກັນຍາລະດັບນໍ້າຂອງຈະຢູ່ໃນຂັ້ນເຕືອນໄພແລະພໍມາຮອດວັນທີ 17 ເຖີງ 18 ກັນຍາ ລະດັບນໍ້າຂອງຈະຫຼຸດລົງ.

ຂະນະທີ່ລະດັບແມ່ນໍ້າຂອງຢູ່ສະຖານີພະຍາກອນນໍ້າຖ້ວມວຽງຈັນຂອງວັນທີ 13 ກັນຍານີ້ ຢູ່ທີ່ 170.61 ແມັດ ເຊີ່ງເປັນລະດັບທີ່ກາຍລະດັບນໍ້າຖ້ວມທີ່ກຳນົດໃຫ້ຢູ່ທີ່ 170.54 ແມັດແລ້ວແລະຄາດວ່າໃນອີກ 2 ວັນຂ້າງໜ້າຄືລະດັບແມ່ນໍ້າຂອງໃນເຂດນະຄອນຫຼວງວຽງຈັນນີ້ຈະສືບຕໍ່ນໍ້າຖ້ວມສູງຂື້ນໃນວັນທີ 14 ເຖີງ 15 ກັນຍາ ຈາກນັ້ນນໍ້າຖ້ວມຈະຫຼຸດລະດັບລົງໃນວັນທີ 16 ເຖີງ 17 ກັນຍາ.

 ນອກນັ້ນສະຖານີພະຍາກອນນໍ້າຖ້ວມຢູ່ປາກເຊ, ສະຫວັນນະເຂດ ລະດັບນໍ້າຂອງຈະເພີ່ມຂື້ນທຸກມື້ນັບແຕ່ວັນທີ 14-17 ກັນຍາ, ສ່ວນສະຖານີພະຍາກອນນໍ້າຖ້ວມຢູ່ປາກຊັນ ແລະ ທ່າແຂກລະດັບນໍ້າຂອງຈະຢູ່ລະດັບເຕືອນໄພນໍ້າຖ້ວມພາຍໃນ 3 ວັນ ຂ້າງໜ້າປະມານວັນທີ 15-17 ກັນຍາ 2024 ນີ້.