ຜູ້ໃຊ້ເຟສບຸກ 2 ຄົນ ທີ່ຖືກຈັບ ຫຼັງຈາກເຜີຍແພ່ຮູບຕັດຕໍ່ ຫົນທາງເປ່ເພ ຖືກປ່ອຍຕົວແລ້ວ

ທ້າວ ໄດເຈມ (Daijames) ແລະ ທ້າວ ເຈມ ຝາໝໍ້ (James Famor) ທີ່ຖືກເຈົ້າໜ້າທີ່ຕໍາຫຼວດເມືອງຕົ້ນເຜິ້ງ ແຂວງບໍ່ແກ້ວ ຈັບ ໃນມື້ວັນທີ 28 ສິງຫາ 2024 ໃນຂໍ້ຫາເຜິຍແພ່ວິດີໂອເລື່ອງ ຫົນທາງເປ່ເພນັ້ນ ໄດ້ຖືກປ່ອຍຕົວແລ້ວ.

ເພື່ອຂໍຮູ້ລາຍລະອຽດ ກ່ຽວກັບເລື່ອງທີ່ວ່ານີ້ ວິທຍຸເອເຊັຍເສຣີ ໄດ້ຕິດຕໍ່ຖາມໄປຍັງທ້າວ ໄດເຈມ ແຕ່ລາວບໍ່ຮັບສາຍ. ພ້ອມກັນນັ້ນກໍໄດ້ຕິດຕໍ່ໄປຫາທ້າວ ເຈມ ຝາໝໍ້ ແຕ່ລາວກໍບໍ່ຮັບສາຍເຊັ່ນດຽວກັນ.

ແຕ່ເມື່ອຕິດຕໍ່ໄປຫາຮ້ານ FaMor  Studio ຜູ້ເປັນເພື່ອນຂອງພວກກ່ຽວ ເວົ້າວ່າ ຊາວໜຸ່ມລາວທັງສອງຄົນນັ້ນ ແມ່ນທ້າວ ໄດເຈມ Daijames ແລະທ້າວ James Famor ໄດ້ຖືກຕໍາຫຼວດ ປກສ ເມືອງຕົ້ນເຜິ້ງ ແຂວງບໍ່ແກ້ວ ມາຈັບຕົວໄປ ໃນມື້ວັນທີ 28 ສິງຫາ 2024. ຫຼັງຈາກນັ້ນ ທ້າວ ໄດເຈມ ກໍໄດ້ຖືກປ່ອຍຕົວອອກມາກ່ອນ. ສ່ວນທ້າວ ເຈມ ຝາໝໍ້ ຍັງຖືກຂັງຄຸກ ແລະຖືກປັບທັດສະນະຄະຕິ ຈົນເຖິງວັນທີ 2 ກັນຍາ 2024 ຈຶ່ງຖືກປ່ອຍຕົວອອກມາ. ສ່ວນເລື່ອງຄ່າປັບໃໝ ແລະການປະກັນຕົວນັ້ນ ບໍ່ສາມາດເວົ້າໄດ້. ລາວເວົ້າວ່າ:

“ແມ່ນໆ ອອກມາແລ້ວ ອອກມາມື້ວານນີ້ຜູ້ນຶ່ງ ຜູ້ນຶ່ງຊື່ ໃດເຈມ ວັນທີ 28 ນີ້ແຫຼະ ປ່ອຍຄົນລະມື້ ແຕ່ເຮັດຕໍ່ບໍ່ໄດ້ແຫຼະ.”

ເພື່ອຂໍຮູ້ກ່ຽວກັບບັນຫາທີ່ວ່ານີ້ເພີ່ມຕື່ມ ວິທຍຸເອເຊັຍເສຣີ ໄດ້ຕິດຕໍ່ຖາມໄປຍັງຕໍາຫຼວດ ປກສ ແຂວງບໍ່ແກ້ວ, ເພີ່ນບອກວ່າ ບໍ່ຮູ້ເລື່ອງທີ່ເກີດຂື້ນນັ້ນ, ໃຫ້ຕິດຕໍ່ໄປຫາເມືອງຕົ້ນເຜິ້ງ.

“ແມ່ນແຫຼະ ມີແຕ່ປະສານທາງເມືອງຕົ້ນເຜິ້ງພຸ້ນເນີ ຢູ່ແຂວງບໍ່ຮູ້.”

ແລະເມື່ອຕິດຕໍ່ໄປຫາເຈົ້າໜ້າທີ່ ປກສ. ເມືອງຕົ້ນເຜິ້ງ ກໍຖືກປະຕິເສດ ທີ່ຈະໃຫ້ຂໍ້ມູນ ໂດຍເວົ້າວ່າ ໃຫ້ມາພົວພັນກັບ ປກສ ເມືອງຕົ້ນເອົາ ດັ່ງເຈົ້າໜ້າທີ່ ປກສ. ເມືອງຕົ້ນເຜິ້ງທ່ານນຶ່ງ ເວົ້າໃນມື້ວັນທີ 30 ສິງຫາທີ່ຜ່ານມານີ້ວ່າ:

“ເຈົ້າ ຄັນມີແມ່ນຫຍັງລະຂຶ້ນມາພົວພັນຢູ່ປກສ. ເມືອງຕົ້ນເຜິ້ງເລີຍເດີ ເຈົ້າ ເພື່ອຂ້ອງໃຈຫລືວ່າອີ່ຫຍັງບໍ່ເຂົ້າໃຈຈຸດໃດແລ້ວກະ ເຂົ້າມາຫາວິຊາສະເພາະເຂົາໂລດເດີ.”

ຫຼັງຈາກນັ້ນ ກໍໄດ້ພະຍາຍາມຕິດຕໍ່ໄປຫາຕໍາຫຼວດ ປກສ ເມືອງຕົ້ນເຜິ້ງ ຕື່ມ ແຕ່ບໍ່ສາມາດຕິດຕໍ່ໄດ້, ທາງຫ້ອງການຕໍາຫຼວດ ປກສ ເມືອງ ແລະເຈົ້າໜ້າທີ່ຕໍາຫຼວດ ບໍ່ຮັບໂທລະສັບ ແລະບາງຄັ້ງກໍຕັດສາຍໄປເລີຍ.

ແຕ່ເຖິງຢ່າງໃດກໍຕາມ ກ່ຽວກັບກໍລະນີທີ່ວ່ານີ້ ທ້າວ ເຈມ ຝາໝໍ້ ກໍຍອມຮັບຜິດວ່າ:

“ຊຶ່ງວ່າມື້ນີ້ ຂ້າພະເຈົ້າກໍອອກມາຍອມຮັບຜິດ ຊຶ່ງວ່າວັນທີ 28 ເດືອນ 8 2024 ທີ່ຜ່ານມານີ້ ຂ້າພະເຈົ້າເອງໄດ້ຖ່າຍຮູບ ທີ່ຫົນທາງມັນເປ່ເພ ມັນເປັນໜອງ ແລະຂ້າພະເຈົ້າໄດ້ໄປຕັດຕໍ່ເອົາຈໍລະເຂ້ ເອົາປາ ເອົາຫຍັງໄປໃສ່ ຊຶ່ງວ່າ ຂ້າພະເຈົ້າເອງກະບໍ່ໄດ້ມີຄວາມຄິດ ຫຼືວ່າມີຄວາມຕັ້ງໃຈຢາກໃສ່ຮ້າຍປ້າຍສີການນໍາທຸກພາກສ່ວນ ຊຶ່ງວ່າເລື້ອງມັນເກີດຂື້ນແລ້ວ ຂ້ອຍເອງກໍຍອມຮັບຜິດທຸກຢ່າງ.”

ກ່ຽວກັບເລື່ອງນີ້ ປະຊາຊົນຜູ້ນຶ່ງ ຢູ່ເມືອງຕົ້ນເຜິ້ງ ເວົ້າວ່າ ຊາວໜຸ່ມລາວ ທັງສອງຄົນ ມີແຕ່ໄດ້ເວົ້າ ພຽງແຕ່ເລື່ອງຫົນທາງ ທີ່ສະທ້ອນໃຫ້ເຫັນບັນຫາ ເພື່ອຮຽກຮ້ອງໃຫ້ທາງການ ປັບປຸງເສັ້ນທາງ ທີ່ເປ່ເພຫຼາຍເທົ່ານັ້ນ ກໍຖືກຈັບ, ເຫັນວ່າບໍ່ສົມຄວນ, ຍ້ອນບໍ່ໄດ້ໂຈມຕີພັກ-ລັດ ດັ່ງທີ່ລາວເວົ້າຕໍ່ວິທຍຸເອເຊັຍເສຣີ ໃນມື້ວັນທີ 30 ສິງຫາທີ່ຜ່ານມານີ້ວ່າ:

“ມັນ... ມັນບໍ່ສົມຄວນ ຂະເຈົ້າຮູ້ກັນໝົດ ມັນບໍ່ສົມຄວນທີ່ວ່າກໍຄວາມວຸ້ນວາຍ ເຮັດໃຫ້ໂຈມຕີພາກລັດວ່າ ພາກລັດນີ້ບໍ່ມີປັນຍາແປງເສັ້ນ ທາງນີ້ ຢ້ານເຊື່ອມເສັຽພາກລັດ ແຕ່ຄວາມຈິງພາກລັດບໍ່ຍອມ ຮັບຄວາມຈິງ ເມືອງຕົ້ນເຜິ້ງລະເປັນເມືອງເສດຖະກິດແທ້ໆແມ່ນບໍ່ ຫົນທາງຖະນົນມັນຈຶ່ງເປັນແນວນັ້ນ ແລ້ວທີ່ຕໍາຫລວດໄປຈັບ ມັນກະບໍ່ສົມຄວນຖ້າວ່າຈະເອີ້ນໄປຕັກເຕືອນ ກະຕັກເຕືອນລະແລ້ວ ອັນນີ້ໄປໃສ່ກັບມືເຂົາ.”

ແລະຊາວລາວນາງນຶ່ງ ຢູ່ເມືອງຕົ້ນເຜິ້ງ ກໍເວົ້າວ່າ ເຈົ້າໜ້າທີ່ ປກສ. ເມືອງຕົ້ນເຜິ້ງ ຈັບຊາວໜູ່ມລາວທັງ 2 ຄົນ ຍ້ອນໂປສຮູບພາບ ຜ່ານສື່ສັງຄົມອອນລາຍ ກ່ຽວກັບສະພາບເສັ້ນທາງເປ່ເພ ແລະມີການແຕ່ງຮູບພາບດ້ວຍ AI ທີ່ສະທ້ອນ ເຖິງບັນຫາ ຂອງຊຸມຊົນນັ້ນ  ຖືວ່າບໍ່ສົມຄວນ ແລະປະຕິບັດໜ້າທີ່ເກີນເຫດ ຖ້າເຮັດຫຍັງຜິດ ກໍຄວນເອີ້ນໄປສຶກສາອົບຮົມ ດັ່ງນາງເວົ້າວ່າ:

“ຖ້າ ອັນ ເຈົ້າໜ້າທີ່ເພິ່ນຈັບໄປ ກະບໍ່ສົມຄວນແລ້ວ ມີແຕ່ວ່າ ຖ້າບໍ່ຖືກໃຈຫລືວ່າເຮັດຜິດຫຍັງກະ ຮ້ອງໄປເນາະ ສຶກສາອົບລົມຂະເຈົ້າເນາະ ຄົນໃດກະເວົ້າຫັ້ນແຫລະ ເວົ້າກະເວົ້າຊື່ໆຫັ້ນດອກ ມັນບໍ່ມີໃຜມາສ້ອມມາແປງໃຫ້ເນາະ.”

ແລະຜູ້ປະກອບການບ້ານພັກແຫ່ງນຶ່ງ ຢູ່ເມືອງຕົ້ນເຜິ້ງ ກໍເວົ້າໃນມື້ດຽວກັນນີ້ ເຖິງສະພາບເສັ້ນທາງ ຢູ່ເຂດບ້ານດອນມູນ ວ່າ ປັດຈຸບັນ ເປ່ເພໜັກ, ເປັນບວກເປັນຂຸມ ສ້າງຄວາມຫຍູ້ງຍາກໃນການສັນຈອນໄປມາ ຂອງຊາວບ້ານ ແລະນັກທ່ອງທ່ຽວຫຼາຍ ໂດຍບໍ່ມີການສ້ອມແປງໃຫ້ເສັ້ນທາງ ໄປມາໄດ້ສະດວກ.

“ຫົນທາງອັນ ຂຶ້ນໄປທາງໜ້າເຂດ ແມ່ນສະດວກຢູ່ ແຕ່ທາງລົງໄປທາງທາງຕົ້ນເຜິ້ງ ແມ່ນທາງບໍ່ຄ່ອຍດີ ຂຸມບັກໃຫຍ່ໆເລິກໆ ໄປບໍ່ໄດ້ແຕ່ຂ້ອຍກະໄປບໍ່ໄດ້.”

ນັກວິຊາການ ດ້ານສື່ສັງຄົມອອນລາຍ ມະຫາວິທະຍາໄລ ສຸພານຸວົງ ແຂວງຫລວງພະບາງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 3 ກັນຍານີ້ວ່າ ປະຊາຊົນລາວທຸກ ຄົນຄວນຈະມີສິດ-ເສລີພາບ ໃນການສະແດງຄວາມຄິດຄວາມເຫັນ ເພື່ອສະທ້ອນບັນຫາຂອງສັງຄົມ ໃນຮູບແບບຕ່າງໆ ແລະຕ້ອງບໍ່ຖືກຄຸກຄາມ ແລະຂົ່ມຂູ່ ຈາກເຈົ້າໜ້າທີ່ທາງການລາວ.

ແລະວ່າ ກໍລະນີຂອງຊາວໜຸ່ມລາວ 2 ຄົນ ທີ່ໂພສຮູບພາບ ເພື່ອສະທ້ອນບັນ ຫາເສັ້ນທາງເປ່ເພ ຢູ່ໃນເຂດຊຸມຊົນຂອງຕົນເອງນັ້ນ ກໍເປັນເລື້ອງປົກກະຕິ ໃນຍຸກສະໄໝໃໝ່ ຊຶ່ງທາງການທຸກພາກສ່ວນຂອງລາວ ຄວນເຂົ້າໃຈ ແລະຍອມ ຮັບບັນຫາທີ່ເກີດຂຶ້ນ ແລະຕ້ອງຮີບຮ້ອນ ຫາທາງແກ້ໄຂ ເພື່ອຫຼຸດຜ່ອນຜົນກະທົບຕໍ່ປະຊາຊົນ, ບໍ່ແມ່ນຈະໄປຈັບຕົວພວກເຂົາເຈົ້າເຂົ້າຄຸກ ແລະປັບໄໝ ຊຶ່ງພວກເຂົາເຈົ້າ ບໍ່ໄດ້ກະທໍາຄວາມຜິດ ຫຼືສ້າງຄວາມເສັຽຫາຍໃຫ້ແກ່ປະເທດຊາດ ດັ່ງທີ່ທ່ານກ່າວວ່າ:

“ຕາມສ່ວນຕົວແທ້ກະ ຂະເຈົ້າບໍ່ໄດ້ຮັບຄວາມເປັນທໍາ ຄັນຂະເຈົ້າບໍ່ໂພສກະບໍ່ຮູ້ເດ້ ເຫັນບໍ່ບາງເທື່ອພັກ-ລັດ ຜູ້ໄປປະຕິບັດຫັ້ນ ຕ້ອງໄດ້ພິຈາລະນາຫັ້ນແຫລະ ຕົວເອງເບິ່ງຕົວເອງ ມັນກະບໍ່ເຫັນໝົດເດ້.”

ປັດຈຸບັນ ລັດຖະບານລາວ ເຝົ້າຕິດຕາມເບິ່ງ ຜູ້ໃຊ້ສື່ສັງຄົມອອນລາຍຢ່າງໃກ້ຊິດ, ຫາກພົບເຫັນບຸກຄົນໃດ ເຜີຍແຜ່ຂໍ້ມູນຂ່າວສານ ຫລືວິພາກວິຈານການເຮັດວຽກຂອງລັດ ກໍຈະຖືກຮຽກຕົວມາກ່າວເຕືອນ ແລະສັ່ງໃຫ້ປິດສື່ນັ້ນທັນທີ.  

ລັດຖະບານລາວ ໄດ້ອອກດໍາລັດ ວ່າດ້ວຍການຄຸ້ມຄອງຂໍ້ມູນ ຜ່ານອິນເຕີແນັດ ເພື່ອຄວບຄຸມ ຜູ້ທີ່ໃຊ້ສື່ສັງຄົມອອນລາຍໂດຍສະເພາະ.