ເພັ້ຽຈັກຈັ່ນ ທຳລາຍ ຕົ້ນ​ເຂົ້າ

ໄຊຍາ
2021-09-20
Share
ເພັ້ຽຈັກຈັ່ນ ທຳລາຍ ຕົ້ນ​ເຂົ້າ ຊາວບ້ານ ຊື້ຢາຂ້າແມງໄມ້ ມາພົ່ນຂ້າເພັ້ຽຈັກຈັ່ນ ທີ່ທໍາລາຍຕົ້ນເຂົ້າ ດ້ວຍຕົນເອງ.
ພາບປະກອບ: ນັກຂ່າວພົລເມືອງ

ເພັ້ຽຈັກຈັ່ນ ຫຼື ສັດຕຣູພືດ ໄດ້ບຸກເຂົ້າທັມລາຍ ເຂົ້ານາປີຂອງປະຊາຊົນ ໃນເມືອງຫ້ວຍຊາຍແຂວງບໍ່ແກ້ວ ນັບແຕ່ວັນທີ 15 ກັນຍາ ເປັນຕົ້ນມາ. ໃນນີ້ ມີບ້ານປາກງາວ ແລະ ບ້ານດອນຄູນ ຮວມຜົລເສັຽຫາຍ 129.5 ເຮັກຕ້າຣ໌ ຕົກເປັນ 72 ຄອບຄົວ ແລະ ເສັຽຫາຍໜັກ 2 ຄອບຄົວ. ດັ່ງຊາວບ້ານຢູ່ບ້ານດອນຄູນ ເມືອງຫ້ວຍຊາຍ ແຂວງບໍ່ແກ້ວໄດ້ກ່າວວ່າ:

"ເຄິ່ງນຶ່ງຍັງບໍ່ທັນເຫຼືອງ ຄືຊິໄດ້ກິນເຄິ່ງນຶ່ງ ໂອ້ຕາຍ ໄປເປັນຫ້ຽນໆ ມັນກໍເຫຼືອງຕາຍໄປຕາຍໄປ ແບບຫັ້ນສາມາດຟື້ນຄືນຊີບໄດ້ ຕາຍມີແຕ່ຕາຍແບບນັ້ນ ໄປເລື້ອຍໆຫັ້ນແຫຼະ. ປີນີ້ແຫຼະ ມີແຕ່ເຫັນມີນ່າ ບໍ່ໄດ້ເຕັມເມັດເຕັມໜ່ວຍແຫຼະ ບາງເຈົ້າກໍຖືວ່າ ບໍ່ໄດ້ກ່ຽວ ເລີຍແຫຼະ.”

ຊາວບ້ານບາງຄົນ ເຮັດນາປະມານ 4 ໄຮ່ປາຍ ໃນນັ້ນ ເສັຽຫາຍໄປແລ້ວ 1 ໄຮ່ປາຍ ແລະ ບາງຄົນມີ 3-4 ໄຮ່ ກໍເສັຽຫາຍເກືອບ ທັງໝົດ. ຊາວບ້ານບາງຄົນ ກໍເອົາສານເຄມີໄປສີດເພື່ອຂ້າເພັ້ຽຈັກຈັ່ນນຳອີກ. ດັ່ງຊາວບ້ານ ບ້ານປາກງາວ ເມືອງຫ້ວຍຊາຍ ໄດ້ກ່າວ ວ່າ:

"ຊ່ວງວັນທີ 10 ຂຶ້ນມານີ້ນ່າ ມັນມີປະກົດການຢູ່ວ່າ ແມງຫັ້ນຫຼາຍເນາະ ຢູ່ນາອ້າຍນີ້ ຊ່ວງຕົ້ນເດືອນ 9 ມັນກໍຈະບໍ່ເຫັນຫຼາຍເນາະ ແມງນ່າ ມັນຈະເປັນສີແດງໆ ສີເຫຼືອງໆໜ້ອຍນຶ່ງເນາະ. ເຮົາສີດ ແຕ່ວ່າຕາຍຢູ່ເນາະ ແຕ່ວ່າ ຕົ້ນເຂົ້ານີ້ ມັນຕາຍມັນເຫຼືອງຫຼາຍ ມັນຈະບໍ່ຄືນແລ້ວຫັ້ນນ່າ ຕົ້ນສີຂຽວບໍ່ຕາຍ ມັນກໍຈະໄດ້ຄືນຢູ່.”

ຊາວບ້ານຜູ້ໃດ ດຳນາຊ້າກວ່າໝູ່ ກໍຈະໄດ້ຮັບຜົລກະທົບ ຍ້ອນເພັ້ຽຈັກຈັ່ນຫຼາຍ ແລະ ອີກຢ່າງນຶຶ່ງ ຊາວບ້ານ ບໍ່ເຄີຍປະສົບບັນຫາ ເພັ້ຽຈັກຈັ່ນ ບຸກທຳລາຍ ເຂົ້ານາປີ ສະນັ້ນເຂົາເຈົ້າ ຈຶ່ງບໍ່ມີປະສົບການ ໃນການແກ້ໄຂບັນຫາໄດ້ທັນ. ດັ່ງຊາວບ້ານ ຢູ່ບ້ານຫ້ວຍຂົມ ເມືອງຫ້ວຍຊາຍໄດ້ກ່າວວ່າ:

"ກາວ່າມັນຊິແດງ ມັນກໍເປັນເດືອນເລີຍ ບາງຄົນມັນບໍ່ຮູ້ຄິດ ວ່າມັນແດງຕາມທັມມະຊາດ ທັມດານັ້ນ ເຂົາບໍ່ໄດ້ສັງເກດລະອຽດ ບາດ ໄປຜູ້ທີ່ມັນເປັນຫຼາຍໆ ແລ້ວໄປສັງເກດເລິກໆ ຈຶ່ງຊິຮູ້ວ່າ ມັນມີແມງໄມ້ຫັ້ນນ່າ ແລ້ວມັນເຮັດໃຫ້ກົກເຂົ້າຫັ້ນ ໃບເປັນແດງແຫງນເຂົ້າ ຖ້າເປັນຫຼາຍມັນກໍຈະຕາຍຍຸບລົງເລີຍ.”

ເຈົ້າໜ້າທີ່ຜແນກກະສິກັມ ແລະ ປ່າໄມ້ ເມືອງຫ້ວຍຊາຍ ໄດ້ກ່າວວ່າ ຍັງບໍ່ທັນຮູ້ສາເຫດການ ຣະບາດຂອງເພັ້ຽຈັກຈັ່ນເທື່ອ. ຫຼ້າສຸດ ເຈົ້າໜ້າທີ່ ໄດ້ລົງເກັບກຳຂໍ້ມູນຜົລເສັຽຫາຍ ຂອງເຂົ້ານາປີ ຢ່າງໃກ້ຊິດ ຕລອດສັປດານີ້ ເພື່ອເຮັດແຜນສເນີ ພາກສ່ວນທີ່ກ່ຽວຂ້ອງ ໃນການຫຼຸດຄ່າພາສີທີ່ດິນໃຫ້ຊາວບ້ານ ທີ່ໄດ້ຮັບຜົລກະທົບຈາກເພັ້ຽຈັກຈັ່ນ:

"ກຽມໜັງສືຣາຍງານນີ້ແຫຼະ ຊ່ອຍເຫຼືອປະຊາຊົນ ກໍເວົ້າເຣື່ອງສເນີທາງການນຳ ນຶ່ງຄັນຖ້າຜູ້ໃດເສັຽຫາຍຫຼາຍ 70% ຂຶ້ນເມືອ ກໍເວົ້າ ເຣື່ອງຂໍຍົກເວັ້ນພາສີທີ່ດິນ ຂໍຄວາມຊ່ອຍເຫຼືອຫັ້ນເນາະ. ອັນນີ້ກໍເວົ້າໄປຮອດເຣື່ອງ ພວກແຮງງານສວັດດີການພວກການເງິນ.”

ທ່ານໄດ້ກ່າວຕື່ມວ່າ ພາຍຫຼັງທີ່ຮັບຮູ້ວ່າເພັ້ຽຈັກຈັ່ນ ບຸກທຳລາຍເຂົ້ານາປີ ຕັ້ງແຕ່ເດືອນກັນ ຍາ ມາຮອດປັດຈຸບັນ ກໍໄດ້ແນະນຳ ໃຫ້ ຊາວບ້ານ ຊື້ສານເຄມີມາ ຂ້າເພັ້ຽຈັກຈັ່ນດ້ວຍໂຕເອງ. ເນື່ອງຈາກພາກສ່ວນທີ່ກ່ຽວຂ້ອງ ບໍ່ມີງົບປະມານ ມາຊ່ອຍເຫຼືອໃນດ້ານນີ້.

ສ່ວນທາງຫ້ອງການກະສິກັມ ແລະ ປ່າໄມ້ ຈະແຈກເຂົ້າສານໃຫ້ຊາວບ້ານ ແທນຜົລຜລິດທີ່ເສັຽຫາຍ ຫຼື ບໍ່ນັ້ນ ແມ່ນຈະພິຈາຣະນາ ກັບທາງຂັ້ນເທິງຕື່ມ.

ຕລອດໄລຍະເວລາຫຼາຍປີຜ່ານມາ ເມືອງຫ້ວຍຊາຍ ແຂວງບໍ່ແກ້ວ ບໍ່ເຄີຍເກີດເຫດການ ເພັ້ຽຈັກຈັ່ນບຸກທຳລາຍເຂົ້ານາປີ, ແຕ່ປີນີ້ ຖືວ່າເປັນປີທຳອິດ ທີ່ເພັ້ຽຈັກກະຈັ່ນ ບຸກທຳລາຍເຂົ້ານາປີ ກຳລັງອອກຮວງ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ