ປູກຕົ້ນໄມ້ ໃຫ້ໄດ້ປ່າ ພາດ ເປົ້າໝາຍ

ສິດນີ
2017-12-27
ອີແມວລ໌
ຄໍາເຫັນ
Share
ພິມ
ໂຄງການປູກປ່າ ຂອງທາງການລາວ ທີ່ພາດເປົ້າໝາຍ ໃນປີນີ້ ທີ່ ແຂວງອຸດົມໄຊ
ໂຄງການປູກປ່າ ຂອງທາງການລາວ ທີ່ພາດເປົ້າໝາຍ ໃນປີນີ້ ທີ່ ແຂວງອຸດົມໄຊ
Screen captured from LNTV

ເຈົ້າຫນ້າທີ່ແຂວງອຸດົມໄຊ ກ່າວວ່າ ໃນປີ 2017 ນີ້ ທາງການແຂວງບໍ່ສາມາດ ປູກປ່າເສີມ ໃນປ່າຜລິດຈຳນວນ 8 ພັນເຮັກຕາ ໄດ້ຕາມ ເປົ້າໝາຍ ທີ່ຕັ້ງໄວ້ ຍ້ອນຂາດງົບປະມານ ແລະບຸຄລາກອນ ໃນການລົງໄປເຮັດວຽກ ໃນເຂດເປົ້າຫມາຍ ຈຶ່ງເຮັດໃຫ້ ໂຄງການປູກປ່າໃນ ແຂວງໃນປີນີ້ ບໍ່ປະສົບຜົລສຳເຣັດ ດັ່ງທ່ານກ່າວ ໃນມື້ວັນທີ 26 ທັນວາ ນີ້ວ່າ:

"ແຜນໂຄຕາປູກປ່າໄມ້ຂອງກົມປ່າໄມ້ ທີ່ກົມປ່າໄມ້ກົມປ່າໄມ້ກໍແບ່ງໃຫ້ ກໍເປັນຫນ້າທີ່ອັນໜັກໜ່ວງຢູ່ ວາງອອກວ່າອຸດົມໄຊ ປີນຶ່ງຈະປູກໄມ້ ໃນປ່າຜລິດນນີ້ກໍປະມານ 8 ພັນເຮັກຕາ ແຕ່ພວກເຮົານີ້ບໍ່ສາມາດປູກໄດ້ ແນວນັ້ນງົບປະມານ ບໍ່ພຽງພໍປູກໄດ້ ບໍ່ເກີນພັນສອງພັນນີ້ແຫຼ້ວ."

ທ່ານກ່າວຕື່ມວ່າ ການປູກປ່າເສີມໃຫ້ໄດ້ 8 ພັນເຮັກຕາໃນປີນີ້ ຖືວ່າຍາກຫຼາຍ ເນື່ອງຈາກປ່າ ຢູ່ໃນແຂວງອຸດົມໄຊ ມີຫຼາຍປ່າ ຢູ່ໃນ​ຫຼາຍ ພື້ນທີ່ ແລະໃນຫລາຍເມືອງ ດັ່ງປ່າຜລິດນ້ຳພາກ ປ່າຜລິດສາຍນ້ຳງາ ແລະ ປ່າຜລິດສາຍແມ່ນ້ຳຂອງ ໂດຍມີເນື້ອທີ່ ທັງຫມົດປະມານ 2 ແສນ 6 ຫມື່ນ 95 ພັນເຮັກຕາ ໃນຂນະທີ່ ເຈົ້າຫນ້າທີ່ ໃນແຕ່ລະເມືອງ ມີບໍ່ຮອດ 30 ຄົນ ຮ່ວມທັງ ການຂາດງົບປະມານ ໃນການຊື້ ພັນໄມ້ ແລະຄ່າໃຊ້ຈ່າຍ ໃນການດຳເນີນງານ ຈຶ່ງເຮັດໃຫ້ການປູກປ່າ ພາດເປົ້າຫມາຍ ທີ່ໄດ້ວາງໄວ້. ທ່ານວ່າ ໂຄງການດັ່ງກ່າວຕ້ອງມີ ງົບປະມານ ໃນການຈ້າງປະຊາຊົນຊ່ອຍປູກ ຈຶ່ງຈະສຳເຣັດ:

"ຈະຈ້າງຂະເຈົ້າ ທີ່ຜ່ານມາພວກເຮົາເວົ້າລ້າ ຂຽນລ້າ ຂຽນແຕ່ບໍ່ມີ ງົບປະມານ ທີ່ຈັດສັນ ໃຫ້ປະຊາຊົນນີ້ມີສ່ວນຮ່ວມນຳເຮົາເດ ຖ້າມີ ສ່ວນຮ່ວມ ມີເງິນໃຫ້ຂະເຈົ້ານີ້ ຂະເຈົ້າກໍຊ່ອຍເຮົາເຮັດ."

ທ່ານກ່າວຕື່ມວ່າ ໂຄງການປູກໄມ້ເສີມ ທີ່ແຂວງອຸດົມໄຊ ທີ່ເລີ້ມປະຕິບັດກັນມາ ແຕ່ປີ 2015 ນັ້ນ ບໍ່ເຄີຍບັນລຸເປົ້າຫມາຍເລີຍ ຍ້ອນ ຂາດງົບປະມານ ແລະບຸກຄຣາກອນດັ່ງທີ່ກ່າວມາຂ້າງເທິງນີ້.

ຄໍາເຫັນ (1)
Share

(

ເມື່ອຕັດໄມ້ທໍາລາຍປ່າ ບໍ່ໄດ້ເວົ້າວ່າຂາດງົບປະມານ ບາດເມື່ອຍາມປູກຕົ້ນໄມ້ ແລະຟື້ນຟູປ່າຊໍ້າພັດເວົ້າວ່າຂາດງົບປະມານ ອັນນີ້ໃຜໆກໍເຂົ້າໃຈໄດ້ງ່າຍໆນໍ້! ສົມເພດພວກທ່ານແຫ່ງຜູ້ນໍາທັງຫຼາຍເດ ບໍ່ຮູ້ວ່າຊິເອົາຄວາມເວົ້າອັນໄດ ແລະພຶດຕິກໍາອັນໄດ ມາໄຊ້ອີກຕໍ່ໄປລໍຟັງເບິ່ງເອົາ, ໂອ້ຍຂອ້ຍຢາກອາຍຄໍາເພີ່ນເວົ້າແທ້ໆ ພີ່ນອ້ງລາວເຮົາຊິວ່າຢ່າງໃດບອກແດ່.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 13, 2018 07:34 AM

ເຕັມຫນ້າ