ສະໜາມບິນແຂວງຫຼວງນ້ຳທາ ຍັງບໍ່ສາມາດເປີດໃຫ້ບໍລິການ ພາຍຫຼັງນ້ຳຖ້ວມ

ມາຮອດປັດຈຸບັນ ສະໜາມບິນແຂວງຫຼວງນ້ຳທາ ຍັງປິດໃຫ້ບໍລິການແບບບໍ່ມີກຳນົດ ຍ້ອນໄດ້ຮັບຄວາມເສຍຫາຍຢ່າງໜັກຈາກໄພນ້ຳຖ້ວມ ໃນໄລຍະທີ່ຜ່ານມາ ເຊິ່ງການຟື້ນຟູ ແລະສ້ອມແປງສະໜາມບິນ ກໍຍັງບໍ່ທັນເຮັດໄດ້ສຳເລັດເທື່ອ ເນື່ອງຈາກຕ້ອງໄດ້ໃຊ້ງົບປະມານຈຳນວນຫຼາຍ ສຳລັບມາໃຊ້ໃນວຽກດັ່ງກ່າວນີ້ ແລະ ເຮັດໃຫ້ຖ້ຽວບິນຈຳນວນໜຶ່ງ ທີ່ບໍ່ສາມາດຂຶ້ນ-ລົງ ຢູ່ສະໜາມບິນແຂວງຫຼວງນ້ຳທາໄດ້ ຕ້ອງໄດ້ໄປເປີດ ຢູ່ສະໜາມບິນສາກົນບໍ່ແກ້ວ ແທນ, ດັ່ງ ຜູ້ປະກອບການຮັບຈອງປີ້ຍົນ ນາງໜຶ່ງ ກ່າວຕໍ່ວິທະຍຸເອເຊຍເສລີ ໃນວັນທີ 16 ຕຸລາ ນີ້ວ່າ:

"ສະໜາມບິນຫຼວງນ້ຳທາ ແມ່ນເພິ່ນໜ້າຈະມີແຜນບິນປະມານປີໜ້າ ຈະມີການແຈ້ງການຕື່ມອີກບໍ່ຫັ້ນນາ ເພາະວ່າພາຍໃນປີນີ້ໜ້າຈະບໍ່ທັນແລ້ວ ຫັ້ນນາ ຖ້ຽວບິນພິເສດທີ່ວ່າຍົກເລີກ Flight ຫັ້ນນາ ແລ້ວເພິ່ນໄປບິນຢູ່ບໍ່ແກ້ວ ລົງບໍ່ແກ້ວ ຫັ້ນນາ ແມ່ນຮອດເດືອນ 6 ປີໜ້າ."

ໃນຂະນະທີ່ເຈົ້າໜ້າທີ່ ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງຫຼວງນ້ຳທາ ຊີ້ແຈງຕື່ມວ່າ ສະໜາມບິນແຂວງຫຼວງນ້ຳທາ ກຳລັງຢູ່ໃນລະຫວ່າງການສ້ອມແປງຄືນ ແລະປັບປຸງ ເຊິ່ງຍັງບໍ່ທັນມີກຳນົດເທື່ອວ່າ ຈະກັບມາເປີດໄດ້ໃນໄລຍະໃດ, ແຕ່ກ່ອນໜ້າທີ່ສະໜາມບິນຈະຖືກນ້ຳຖ້ວມນັ້ນ ຈຳນວນຄົນໃຊ້ບໍລິການມາຖ້ຽວບິນມາແຂວງຫຼວງນ້ຳທາ ກໍໜ້ອຍລົງເລື້ອຍໆ ຢູ່ແລ້ວ ຈຶ່ງບໍ່ສົ່ງຜົນກະທົບດ້ານການທ່ອງທ່ຽວ ພໍປານໃດດັ່ງນາງກ່າວວ່າ:

"ຍັງຄາດບໍ່ໄດ້ ເພິ່ນກຳລັງປັບປຸງນາ ສ່ວນຫຼາຍເຂົາເຈົ້າຂີ່ລົດມາ ຂີ່ລົດໄຟອີ່ຫຍັງຊື່ໆ ເຂົາເຈົ້າບໍ່ບິນເລີຍ ຄືໄລຍະຜ່ານມາ ເພິ່ນຈະຂີ່ຍົນເນາະ ແລ້ວບາດນີ້ມາ ແລ້ວນ້ຳຖ້ວມແດ່ ເພິ່ນກໍຂີ່ລົດໄຟ ແລ້ວກໍມາລົດຕູ້."

ສ່ວນພະນັກງານ ປະຈຳສາຍການບິນລາວ ນາງໜຶ່ງ ກໍຢືນຢັນວ່າ ທາງສາຍການບິນລາວ ກໍຍັງບໍ່ມີແຜນທີ່ຈະກັບມາເປີດຄືນ ຖ້ຽວບິນລະຫວ່າງສະໜາມບິນສາກົນວັດໄຕ ແລະ ສະໜາມບິນແຂວງຫຼວງນ້ຳທາ ເທື່ອ, ມີແຕ່ໃຫ້ຜູ້ໂດຍສານປ່ຽນໄປໃຊ້ເສັ້ນທາງອື່ນແທນ ເປັນຕົ້ນ ນັ່ງຍົນໄປລົງຢູ່ສະໜາມບິນສາກົນບໍ່ແກ້ວ ແລ້ວຕໍ່ລົດໂດຍສານໄປແຂວງຫຼວງນ້ຳທາ ຫຼື ໃຊ້ເສັ້ນທາງລົດໄຟລາວ-ຈີນ.

"ນ້ຳທາເພິ່ນຍັງປິດຢູ່ເຈົ້າ ເພິ່ນຍັງບໍ່ທັນໃຫ້ເດີນທາງເທື່ອ ຢູ່ໃນຊ່ວງການປັບປຸງ ບໍ່ທັນມີກຳນົດແຈ້ງການເທື່ອເຈົ້າ ໄປທາງບໍ່ແກ້ວຂີ່ລົດໄປຕໍ່ປະມານ 3 ຊົ່ວໂມງ ຊ່ອງທາງໜຶ່ງລະແມ່ນໄປລົດໄຟອຸດົມໄຊ ແລ້ວກໍຕໍ່ທາງຫຼວງນ້ຳທາ ກະໄດ້ເຈົ້າ."

ກ່ອນໜ້ານັ້ນ ກໍເຄີຍມີກະແສຂ່າວວ່າ ອາດມີການຍຸບສະໜາມບິນຫ້ວຍຊາຍ ແລະສະໜາມບິນແຂວງຫຼວງນ້ຳທາ ທີ່ກຳລັງປິດປັບປຸງຢູ່ ເພື່ອໄປລວມກັນກັບສະໜາມບິນສາກົນບໍ່ແກ້ວ ເພື່ອໃຫ້ຫຼາຍສາຍການບິນ ແລະຫຼາຍຖ້ຽວບິນ ໄປເປີດຢູ່ສະໜາມບິນສາກົນບໍ່ແກ້ວ ໃຫ້ຫຼາຍຂຶ້ນ.

ແຕ່ກ່ຽວກັບຂ່າວທີ່ວ່ານີ້ ນັກວິຊາການດ້ານການທ່ອງທ່ຽວ ຢູ່ແຂວງຫຼວງນ້ຳທາ ທ່ານໜຶ່ງ ກໍຄິດວ່າເປັນໄປໄດ້ຍາກ ທີ່ຈະມີການຍຸບສະໜາມບິນ 2 ແຫ່ງນັ້ນ ເພື່ອໄປລວມກັບສະໜາມບິນສາກົນບໍ່ແກ້ວ ແລະກໍເຊື່ອວ່າຈະກັບມາເປີດຄືນໄດ້ ໃນອະນາຄົດ ແລະກໍຈະມີຄົນມາໃຊ້ບໍລິການຫຼາຍຢູ່, ດັ່ງທ່ານ ກ່າວວ່າ:

"ບໍ່ແກ້ວຫັ້ນ ຈ້າວ ເຫວີຍ ຫັ້ນນາ ເຂົາເຈົ້າຢາກໃຫ້ໃຊ້ສະໜາມບິນ ຈ້າວເຫວີຍ ແຕ່ວ່າຕົ້ນເຜິ້ງຫັ້ນ ກັບບໍ່ແກ້ວ (ຫ້ວຍຊາຍ) ມັນຈະເປັນໄລຍະຫ່າງ 1 ຊົ່ວໂມງເນາະ ມັນຈະບໍ່ມັກໃຊ້ສະໜາມບິນ ຈ້າວເຫວີຍ ຍາກຈະໃຊ້ບໍ່ແກ້ວ (ຫ້ວຍຊາຍ) ສະນັ້ນຕອນນີ້ຢູ່ທີ່ບໍ່ແກ້ວ (ສະໜາມບິນຫ້ວຍຊາຍ) ແລ້ວກໍຫຼວງນໍ້າທາ ກຳລັງປັບປຸງເນາະ."

ສຳລັບສະໜາມບິນແຂວງຫຼວງນ້ຳທາ ໄດ້ຖືກນ້ຳຖ້ວມໜັກ ແຕ່ວັນທີ 10 ກັນຍາ 2024 ຈົນເຮັດໃຫ້ໂຕອາຄານໂດຍສານ ຖືກນ້ຳຖ້ວມສູງ ແລະ ມີຊາວບ້ານຈຳນວນໜຶ່ງ ຕິດຄາຢູ່ໃນສະໜາມບິນ ໃນເວລານັ້ນ, ມາຮອດປັດຈຸບັນ ກໍກຳລັງສືບຕໍ່ສ້ອມແປງ ແລະ ປັບປຸງຢູ່.

ແລະ ພາຍຫຼັງທີ່ສະໜາມບິນແຂວງຫຼວງນ້ຳທາ ຖືກປິດໄປ, ສະໜາມບິນສາກົນບໍ່ແກ້ວ ກໍໄດ້ອອກແຈ້ງການ ອະນຸຍາດໃຫ້ຖ້ຽວບິນພິເສດ ທີ່ບໍ່ສາມາດຂຶ້ນ-ລົງ ຢູ່ແຂວງຫຼວງນ້ຳທາໄດ້ ສາມາດມາໃຊ້ບໍລິການ ຢູ່ສະໜາມບິນສາກົນບໍ່ແກ້ວ ໂດຍຍົກເວັ້ນຄ່າຈອດ ແລະ ຄ່າບໍລິການຳພາກພື້ນດິນ ໃຫ້ແກ່ສາຍການບິນຕ່າງໆ ຈົນກວ່າສະໜາມບິນແຂວງຫຼວງນ້ຳທາ ຈະກັບມາເປີດໃຫ້ບໍລິການອີກເທື່ອໜຶ່ງ.

ປັດຈຸບັນ ສາຍການບິນລາວ ກໍໄດ້ເປີດຖ້ຽວບິນລະຫວ່າງ ສະໜາມບິນສາກົນວັດໄຕ ກັບ ສະໜາມບິນສາກົນບໍ່ແກ້ວ ລາຄາປະມານ 2,200,000 ກີບ ຕໍ່ຄົນຕໍ່ຖ້ຽວ, ໃນຂະນະທີ່ຖ້ຽວບິນແບບເໝົາລຳ ຂອງສາຍການບິນລ້ານຊ້າງ ກໍໄດ້ຫຼຸດຄ່າໂດຍສານລະຫວ່າງສະໜາມບິນສາກົນວັດໄຕ ແລະສະໜາມບິນສາກົນບໍ່ແກ້ວ ລົງເຫຼືອປະມານ 2,200,000 ກີບ ຕໍ່ຄົນຕໍ່ຖ້ຽວ ເຊັ່ນດຽວກັນ ຈາກເຄີຍມີລາຄາສູງແຕ່ປະມານ 2,900,000 ກີບ ຫາ 4,400,000 ກີບ ຕໍ່ຄົນຕໍ່ຖ້ຽວ ໃນກ່ອນໜ້ານີ້.