ໂຮງງານຜລິດເຈັ້ຽຂອງຈີນ ຈະຂຍາຍ ພື້ນທີ່

ໄຊຍາ
2018-08-07
ອີແມວລ໌
ຄໍາເຫັນ
Share
ພິມ
ກອງໄມ້ ທີ່ທາງບໍຣິສັດ ຊັນເປເປີ້ ນໍາເຂົ້າມາໃນໂຮງງານ ມີທັງໄມ້ວິກ ເພື່ອຜລິດເຈັ້ຽ ແລະ ໄມ້ທັມມະດາ ທີ່ຊາວບ້ານ ຕັດມາຂາຍໃຫ້ບໍຣິສັດ
ກອງໄມ້ ທີ່ທາງບໍຣິສັດ ຊັນເປເປີ້ ນໍາເຂົ້າມາໃນໂຮງງານ ມີທັງໄມ້ວິກ ເພື່ອຜລິດເຈັ້ຽ ແລະ ໄມ້ທັມມະດາ ທີ່ຊາວບ້ານ ຕັດມາຂາຍໃຫ້ບໍຣິສັດ
Screen captured : ໂທຣະພາບເຊໂປນ

ໂຮງງານຜລິດເຈັ້ຍ ຂອງບໍຣິສັດ ຊັນ-ເປເປີ ລາວ ໂຮນດິ້ງ ຈຳກັດ ຢູ່ບ້ານມັນຈີ ເມືອງເຊໂປນ ແຂວງສວັນນະເຂດ ເອົາເນື້ອທີ່ໃກ້ເຂດ ໂຮງງານເພີ່ມອີກ 40 ເຮັກຕ້າ ເພື່ອຂຍາຍໂຮງງານ ໃນນັ້ນກວມເອົາດິນໂຮງຮຽນ 1 ແຫ່ງ ເຮືອນ 1 ຫຼັງ ແລະ ດິນທຳການຜລິດ ຂອງ ປະຊາຊົນ ອີກຫລາຍຄອບຄົວ. ຕາມຄຳເວົ້າຂອງເຈົ້າໜ້າທີ່ ເມືອງເຊໂປນ ທ່ານນຶ່ງ ກ່າວຕໍ່ ວິທຍຸເອເຊັຍເສຣີ ໃນວັນທີ 07 ສິງຫາ ນີ້ວ່າ:

"ເປົ້າໝາຍມັນຄັດເອົາດິນ 40 ເຮັກຕ້າ ອີກມັນຢາກເອົາມັນຢາກຍ້າຍໂຮງຮຽນ ມ ຕົ້ນ ຫັ້ນມີເຮືອນປະຊາຊົນນຳ 1 ຫລັງ ດິນໄຮ່ດິນນາ ປະຊາຊົນນີ້ຫລະ ມັນຂຍາຍເນື້ອທີ່ໂຮງງານຫັ້ນເດ."

ເຈົ້າໜ້າທີ່ກ່າວຕື່ມວ່າ ປະຊາຊົນທ້ອງຖິ່ນຫລາຍຄົນ ບໍ່ເຫັນດີກັບການເອົາເນື້ອທີ່ດິນຂອງໂຮງຮຽນ ເພາະຈະເຮັດໃຫ້ນັກຮຽນ 8 ບ້ານ, ທີ່ ຮຽນຢູ່ໂຮງຮຽນດັ່ງກ່າວ ຕ້ອງຍ້າຍໄປບ່ອນໃໝ່ ແຕ່ຍັງບໍ່ທັນສລຸບວ່າ ຈະເອົາດິນໂຮງຮຽນແທ້ ຫລືບໍ່, ສ່ວນປະຊາຊົນທີ່ຈະເສັຍເຮືອນ ແລະ ດິນໄຮ່ດິນນາ ໃຫ້ແກ່ການຂຍາຍໂຮງງານ ບໍ່ມີຄວາມຂັດຂ້ອງ ແຕ່ຢ່າງໃດ ເພາະໝັ້ນໃຈວ່າ ຈະໄດ້ຄ່າຊົດເຊີຍ.

ທ່ານກ່າວຕື່ມອີກວ່າ ໃນຣະຍະນີ້ ເຈົ້າໜ້າທີ່ຂອງບໍຣິສັດ ຊັນ-ເປເປີ ລາວ ໂຮນດີິ້ງ ກຳລັງວັດແທກເນື້ອທີ່ດິນໄຮ່ສວນ ຂອງປະຊາຊົນ ໃນຂອບເຂດ 40 ເຮັກຕ້າ ນັ້ນເພື່ອຄິດໄລ່ຄ່າເສັຍຫາຍ, ພ້ອມທັງສຳຣວດຈຳນວນຄອບຄົວ ທີ່ຈະຖືກຜົລກະທົບຢ່າງຣະອຽດ ຕໍ່ໄປ.

ຢ່າງໃດກໍ່ຕາມ ໂຮງງານຜລິດເຈັ້ຍແຫ່ງນີ້ ຍັງບໍ່ທັນຫລຸດຜ່ອນກິ່ນເໝັນ ລົບກວນປະຊາຊົນໃກ້ຄຽງເທື່ອ, ຫຼ້າສຸດມີຣາຍງານວ່າ ມີຊາວບ້ານ 3 ຄົນ ທີ່ອາສັຍຢູ່ໃກ້ໂຮງງານດັ່ງກ່າວ ຕ້ອງໄດ້ໄປປີ່ນປົວ ຢູ່ໂຮງໝໍຍ້ອນມີອາການເຈັບຫົວ ແບບບໍ່ຮູ້ສາເຫດ, ຕາມຄຳເວົ້າ ຂອງຊາວບ້ານ ຄົນນຶ່ງ:

"2-3 ຄົນແຫລະໄປເຂົ້າໂຮງໝໍ ມາແຕ່ສາມແຍກເຂົ້າບໍຣິສັດ ແຕ່ວ່າສາເຫດສິຍ້ອນແມ່ນບໍ່ ຫລື ຍ້ອນພຍາດເຮົາກະບໍ່ຮູ້ ກະຢູ່ນຳທ່ານໝໍ ພຸ້ນແຫລະ ເຈັບຫົວເຈັບອັນນີ້ແຫລະ ໄປກວດໄຂ້ຍຸງ ກະບໍ່ເຫັນຈັກເທື່ອ ລາວຍັງບໍ່ທັນມາເດ້ແຕ່ໂຮງໝໍຫັ້ນ."

ວິທຍຸເອເຊັຍເສຣີ ພຍາຍາມຕິດຕໍ່ໄປຍັງ ອຳນາດການປົກຄອງເມືອງເຊໂປນ ເພື່ອຖາມກ່ຽວກັບຄວາມຄືບໜ້າ ຂອງການແກ້ໄຂບັນຫາ ໂຮງງານປ່ອຍກິ່ນເໝັນ ແຕ່ເຈົ້າໜ້າທີ່ກ່ຽວຂ້ອງ ກໍກຳລັງຫາລືກັນໃນທີ່ປະຊຸມ ຍັງບໍ່ສາມາດບອກຣາຍຣະອຽດ.

ຄໍາເຫັນ (1)
Share

(

Come on boys take everything. your Lao party-state friends let you do it so just do it. Don't leave anything to Lao people, besides they need no education.Leave no land for schools and leave no land for rice growing. Somseuay, somseuay !


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 10, 2018 05:56 AM

ເຕັມຫນ້າ