ເຮືອຂົນສົ່ງຄົນງານຊາວມຽນມ້າ ຫຼົ້ມກາງນໍ້າຂອງ ເຂດສາມຫຼ່ຽມຄຳ

ຕອນແລງຂອງວັນທີ 02 ກັນຍາ 2024 ຜ່ານມາ ເຮືອຂະໜາດກາງທີ່ກໍາລັງແລ່ນທວນກະແສນໍ້າຂອງເພື່ອຂົນສົ່ງແຮງງານມຽນມ້າ ທັງຍິງແລະຊາຍ ປະມານ 50 ຊີວິດຈາກດ່ານມັງກອນເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໂດຍມີຈຸດໝາຍປາຍທາງຄືທ່າເຮືອບ້ານໂປ່ງ ຕາແສງເມືອງພົງ ແຂວງ ທ່າຂີ້ເຫຼັກ ລັດສານ ຕະເວັນອອກ ປະເທດມຽນມ້າ ພັດເກີດອຸປັດຕິເຫດຫຼົ້ມທ່າມກາງກະແສນໍ້າໄຫຼແຮງ ພາຍຫຼັງເຮືອຂົນສົ່ງແຮງງານມຽນມ້າລໍານີ້ໄຫຼເຂົ້າທ້ອງເຮືອ ລຳໃຫຍ່ຂອງຈີນ.

ໃນຈໍານວນ 50 ຊີວິດນັ້ນມີ 10-20 ຊີວິດ ທີ່ຄົນເທິງເຮືອນລໍາໃຫຍ່ຂອງຈີນ ຊ່ວຍໂຍນກົງຢາງໃຫ້ພວກເຂົາເຈົ້າເກາະ ເພື່ອລອຍນໍ້າຂຶ້ນຝັ່ງໄດ້ສ່ວນອີກ 20-30 ຊີວິດບໍ່ຮູ້ຊະຕາກຳ. ດັ່ງຜູ້ເຫັນເຫດການເຮືອຫຼົ້ມ ກ່າວຕໍ່ວິທຍຸເອເຊັຽເສຣີ ໃນວັນທີ 03 ກັນຍາ ນີ້ວ່າ:

“ຂໍ້ມູນເບື້ອງຕົ້ນທີ່ເຂົາລາຍງານມາຄ່າວໆ ນີ້ວ່າມີຄົນຢູ່ໃນເຮືອນີ້ປະມານ 50 ຄົນ ຊ່ວຍໄດ້ແຕ່ 20 ຄົນ ມີແຕ່ພະມ້າ ພະມ້າຮັບສົ່ງໂດຍສະເພາະ ເຮືອມັນນ້ອຍນ່າພໍດີນໍ້າມັນແຮງກໍ່ເລີຍໄຫຼເຂົ້າມາທ້ອງເຮືອຈີນນີ້ ຄົນທີ່ຢູ່ໃນເຮືອຈີນກໍ່ຕັບເປັນຫ່ວງຢາງ ໂຍນໃຫ້ຄັນບໍ່ຊັ້ນກໍ່ຄືຊິບໍ່ລອດນໍ້າມັນແຮງມັນກໍ່ໄຫຼເຂົ້າມາໃຕ້ທ້ອງເຮືອໃຫຍ່ເດ້ ຂະເໜາດເຮືອຍັງບໍ່ທັນເຫັນແດ່ຄົນລອຍນໍ້າ.”

ເຮືອຫຼົ້ມລໍານີ້ເປັນເຮືອສົ່ງຜັກ ທີ່ຂົນຜັກຈາກໄທບໍ່ແມ່ນເຮືອຂົນສົ່ງຄົນ ແລະໝັ້ນໃຈວ່າມີແຮງງານມຽນມ້າຈຳນວນ 2 ຄົນທີ່ຈົມນໍ້າເສັຍຊີວິດລະຫວ່າງທີ່ຊ່ວຍກູ້ໄພ ສ່ວນແຮງງານມຽນມ້າທີ່ລອດຊີວິດ 10-20 ຄົນນັ້ນແມ່ນເຈົ້າໜ້າທີ່ກູ້ໄພຈາກເຂດເສດຖະກິດ ພິເສດສາມຫຼ່ຽມຄຳເຂົ້າມາປະຖົມພະຍາບານເບື້ອງຕົ້ນ ທັນທີພາຍຫຼັງທີ່ພວກເຂົາເຈົ້າຂຶ້ນຝັ່ງໄດ້. ດັ່ງຜູ້ເຫັນເຫດການເຮືອຫຼົ້ມກ່າວຕື່ມວ່າ.

“ເປັນເຮືອສາງຜັກຂົນສົ່ງຜັກຂ້າມຈາກຝັ່ງໄທມາ ບໍ່ແມ່ນເຮືອທີ່ວ່າຂົນສົ່ງຜູ້ໂດຍສານ ຊ່ວຍບໍ່ໄດ້ນີ້ 2 ຄົນເຂົາເຈົ້າກອດກັນມາ 2 ຄົນຫັ້ນນີ້ແລ້ວຄົນໄປຊ່ວຍຫັ້ນຢູ່ໃນເຮືອຫັ້ນຄັນດຶງຫຼຸດມື ລົງຈົມໄປຕໍ່ໜ້າຕໍ່ຕາຫັ້ນທີ່ອ້າຍເຫັນຫັ້ນນ່າ ໃນເຂດເຂົາກໍ່ມາທັນເຫດການເດ້ ຄົນຂຶ້ນເຮືອປຸບລົດກໍ່ຈອດຖ້າເລີຍ.”

ຂະນະທີ່ຈຸດເຮືອຫຼົ້ມນີ້ ຢູ່ຫ່າງຈາກຊາຍແດນບ້ານສົບຣວກຝັ່ງໄທ ປະມານ 3-4 ກິໂລແມັດ. ດ້ານເຈົ້າໜ້າທີ່ໄທໄດ້ເອົາເຮືອໄປສັງເກດການ. ຂະນະທີ່ຊາວບ້ານກຸ່ມຄົນເດີນເຮືອ ແລະນັກທ່ອງທ່ຽວກໍ່ໄດ້ພາກັນຊ່ວຍກວດຫາຜູ້ສູນຫາຍ ແລະ ຜູ້ລອດຊີວິດນໍາດ້ວຍ. ດັ່ງເຈົ້າໜ້າທີ່ໄທກ່າວວ່າ.

ພາສາໄທ “ຂ້ອຍກັບມາຈາກກິດຈະກໍາຈີດອາສາ ຈຶ່ງເອົາເຮືອໄປເບິ່ງສະຖານະການຫຼັງຈາກທີ່ເຂົາເຈົ້າຕົກລົງໄປໃນນໍ້າຂອງແລ້ວ ພົບວ່ານໍ້າຊ່ວງນັ້ນແຮງຫຼາຍສ່ວນກ່ອນໜ້ານີ້ລະຫວ່າງທີ່ເຂົາເຈົ້າຕົກນໍ້ານັ້ນ ມີເຮືອຂອງຊາວບ້ານກຸ່ມຄົນເດີນເຮືອ ແລະນັກທ່ອງທ່ຽວປະມານ 4-5 ລໍາຢູ່່ເຂດນັ້ນເຂົ້າໄປຊ່ວຍພວກເຂົາເຈົ້າຢູ່”

ເຈົ້າໜ້າທີ່ດ່ານມັງກອນກ່າວວ່າ ແຮງງານມຽນມ້າທີ່ເກີດອຸປັດຕິເຫດເຮືອຫຼົ້ມ ເທື່ອນີ້ສ່ວນຫຼາຍເປັນແຮງງານທີ່ໜີອອກຈາກ ບໍລິສັດຕອບແຊັດເພື່ອກັບປະເທດມຽນມ້າ ພາຍຫຼັງເຂດເສດຖະກິດສາມຫຼ່ຽມຄຳປະກາດ ມາດຕະການເດັດຂາດ ກວດລ້າງແກ້ງຄອລເຊັນເຕີ້ ຜູ້ຝ່າຝືນລັກລອບເຄື່ອນໄຫວຕອບແຊັດ ສໍ້ໂກງທາງໂທລະຄົມຈະຖືກດຳເນີນຄະດີຕາມລະບຽບກົດໝາຍຢ່າງເຂັ້ມງວດ ແລະເດັດຂາດນັບແຕ່ວັນທີ 26 ສິງຫາ 2024 ເປັນຕົ້ນໄປ. ດັ່ງເຈົ້າໜ້າທີ່ກ່າວວ່າ:

“ກາບໍ່ຮູ້ສາເຫດມັນຍ້ອນຫຍັງປົກກະຕິກາ ບໍ່ເຄີຍຫຼົ້ມນ່ານໍ້າເຖີງຈະແຮງປານໃດ ມັນກໍ່ເຂົາກໍ່ໄປຖືກຈັງຫວະມັນໜ້າຈະໄປຕໍາຕໍບໍ່ ຫຼືວ່າຊ່ຽວກັນບໍ່ກໍ່ບໍ່ແນ່ໃຈສາເຫດ ກໍ່ໜ້າຈະແມ່ນຂີ່ທວນກະແສນໍ້າເຂົາຊິເຂົ້າໄປທາງພະມ້າພຸ້ນນ່າ ຄົນຂ້ອນຂ້າງໜີກັບຫຼາຍສ່ວນຫຼາຍກໍ່ແມ່ນພວກຕອບແຊັດ ມັນບໍ່ມີບໍລິສັດລະພວກຕອບແຊັດ ກໍ່ບັນດາພະນັກງານມັນກໍ່ຫຼຸດລົງຫຼາຍຫັ້ນແຫຼະ.”

ຫຼ້າສຸດມີຂໍ້ມູນແບບບໍ່ເປັນທາງການວ່າ ເຈົ້າແຂວງບໍ່ແກ້ວກໍາລົງໄປຈຸດເກີດເຫດເຮືອຫຼົ້ມ ຈາກນັ້ນຈະມີການແຈ້ງໃຫ້ຮູ້ກ່ຽວກັບຄົນສູນຫາຍ ແລະ ຄົນລອດຊີວິດຕື່ມອີກ ດັ່ງເຈົ້າໜ້າທີ່ແຂວງບໍ່ແກ້ວກ່າວວ່າ:

“ເພິ່ນກຳລັງງປະສານຕົວຈິງເບິ່ງວ່າ ສູນຫາຍຈັກຄົນຈັກຄົນເພິ່ນກຳລັງເອົາຂໍ້ມູນ ແລ້ວເພິ່ນຊິແຈ້ງມານໍາຫຼັງ ເຈົ້າແຂວງເຂົາກຳລັງລົງພື້ນທີ່ໄປຢູ່ເປັນຈັ່ງໃດແລ້ວຊິແຈ້ງລາຍງານໃຫ້.”

ນອກຈາກນັ້ນຂໍ້ມູນ ຈາກຄົນໃນທ້ອງຖີ່ນລະບຸວ່າທ່າເຮືອໃຫຍ່ ຢູ່ດ່ານສາກົນມັງກອນທີ່ເປັນທ່າເຮືອຮັບແຮງງານມຽນມ້າ ເທື່ອນີ້ບໍ່ແມ່ນທ່າເຮືອເພື່ອຂົນສົ່ງໂດຍສານ ແຕ່ເປັນທ່າເຮືອເພື່ອຂົນສົ່ງສິນຄ້າ ແລະສ່ວນຫຼາຍມີເຮືອຂະໜາດໃຫຍ່ ຈອດທຽບທ່າ.