ຄົນຂັບລົດແທັກຊີ ຢູ່ເຂດເສດຖະກິດພິເສດສາມລ່ຽມຄໍາ ຖືກຄາດຕະກໍາໂຫດ

ຄົນຂັບລົດແທັກຊີ ຢູ່ເຂດເສດຖະກິດພິເສດສາມຫລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ຊື່ທ້າວ ຄານ ອາຍຸ 23 ປີ ຄົນບ້ານປ້ອມ ເມືອງແບງ ແຂວງອຸດົມໄຊ ຖືກຄາດຕະກໍາຢ່າງໂຫດຫ້ຽມ ໃນລົດແທັກຊີ ຢູ່ບ່ອນປ່ຽວ ແລະມືດ ເມື່ອຄືນວັນທີ 18 ກັນຍາ 2024 ນີ້. ເຖິງແມ່ນວ່າຍັງບໍ່ທັນຮູ້ສາເຫດຂອງການຄາດ ຕະກໍານັ້ນ ແຕ່ຫຼາຍຄົນກໍເຊື່ອວ່າ ອາດເກີດຈາກການຂັດແຍ້ງຜົນປະໂຫຍດ ທາງທຸລະກິດ ທີ່ຜູ້ເສຍຊີວິດເຮັດຢູ່.

ໃນກຸ່ມຄົນຂັບແທັກຊີດ້ວຍກັນ ສ່ວນນຶ່ງຄາດການວ່າ ເຫດການຄາດຕະກໍານີ້ ອາດບໍ່ໄດ້ເກີດຂຶ້ນ ຈາກການຍາດລູກຄ້າ ຫຼືການຫຼຸດຄ່າລົດໃຫ້ລູກຄ້າ ຍ້ອນຄ່າລົດແທັກຊີ ຢູ່ທີ່ປະມານ 230,000 ກີບເທົ່ານັ້ນ ບໍ່ໄດ້ຫຼາຍ ຈົນຕ້ອງຂ້າກັນ. ແຕ່ສາເຫດ ອາດຈະມາຈາກທຸລະກິດອື່ນ ທີ່ລາວເຄີຍເຮັດ ເປັນຕົ້ນ ທຸລະກິດຫິ້ວເຄື່ອງ ຫລືທຸລະກິດໂອນເງິນ ທີ່ອາດກ່ຽວຂ້ອງກັບທຸລະກິດສີເທົາ ແກ້ງອາດສະຍາກໍາຂ້າມຊາດ ໃນເຂດສາມຫລ່ຽມຄໍາ. ສະຖານທີ່ເກີດເຫດຄາດຕະກໍານັ້ນ ແມ່ນຢູ່ຫົນທາງ ລະຫວ່າງເທດສະບານເມືອງຕົ້ນເຜິ້ງ ໄປບ້ານນໍ້າເກິງ ເປັນບ່ອນປ່ຽວ ແລະມືດ, ອີງຕາມຄໍາເວົ້າ ຂອງຄົນຂັບແທັກຊີ ຢູ່ເຂດສາມຫລ່ຽມຄໍາ ຜູ້ນຶ່ງ ຕໍ່ວິທຍຸເອເຊັຽເສຣີໃນມື້ວັນທີ 19 ກັນຍານີ້.

“ຂະເຈົ້າຖືກຕົວະໄປຂາຍຢູ່ທາງກ່ອງນໍ້າເກິງຫັ້ນນ່າ ມັນບໍ່ໄດ້ຢູ່ໃນຕົວເມືອງ ແບບວ່າມັນເປັນທາງປ່ຽວຫັ້ນນ່າ ຕາມທີ່ວ່າຄາດການນີ້ແຫລະ ທີ່ເຮົາແຊັດໃນກຸ່ມແລ່ນແທັກຊີນໍາກັນ ອາດຮະບໍ່ແມ່ນລູກຄ້າ ກໍລະນີອາດຈະສົ່ງຂອງຜິດເນາະ ອັນນຶ່ງ ອັນສອງມາ ບາງເທື່ອອາດຈະຮັບໂອນເງິນອາດສະຍາກໍາຂ້າມຊາດເນາະ ຄອນແຊັນເຕີຫັ້ນນ່າ ກໍລະນີທີ່ວ່າຂະເຈົ້າຮັບໂອນ ແລ້ວຜູ້ກ່ຽວໂອນ ໂອນແລ້ວເງິນຫລາຍຫັ້ນນ່າ ລະດັບຕໍ່າສູດລ້ານບາດຫັ້ນນ່າ ຜູ້ກ່ຽວຫັ້ນອາດຄຽດແຄ້ນຢຸ່ໃນໃຈ ແລ້ວສິຈ້າງມືຂ້າໂດຍສະເພາະ ເປັນມືຂ້າໂດຍສະເພາະນ່າຂະເຈົ້າໄປຂ້າຫັ້ນນ່າ.”

ຄົນຂັບລົດແທັກຊີ ຢູ່ເຂດສາມຫລ່ຽມຄໍາຜູ້ນຶ່ງ ກໍເວົ້າເຖິງກໍລະນີການຄາດຕະກໍາ ທີ່ເກີດຂຶ້ນນັ້ນວ່າ ຕົນບໍ່ຮູ້ເລື່ອງນີ້ຊັດເຈນ ແຕ່ກໍອາດເປັນໄປໄດ້  ທີ່ຈະເກີດຈາກ ການຍາດແຍ່ງລູກຄ້າ, ການຫຼຸດຄ່າແທັກຊີ. ແຕ່ເບິ່ງຈາກຮູບການແລ້ວ ກໍເຊື່ອໄດ້ວ່າ ນີ້ແມ່ນການຄາດຕະກໍາ ທີ່ມີການວາງແຜນມາແລ້ວ  ມີເຈດຕະນາຈະແຈ້ງ, ບໍ່ແມ່ນການປຸນຈີ້ ດັ່ງທີ່ທ່ານກ່າວວ່າ:

“ບໍ່ຮູ້ຄືກັນ ບໍ່ຮູ້ຊັດເຈນເພາະວ່າຂ່າວມັນງຽບ ຂ່າວຢູ່ລາວຫັ້ນນ່າ ມັນເມືອງເຖື່ອນຫັ້ນນ່າຢູ່ນີ້ ມັນໜ້າຈະມີແຜນ ວາງແຜນ ເຈດຕະນາຢ່າງດຽວຫັ້ນແຫລະ ຖ້າວ່າປຸ້ນນີ້ບໍ່ແມ່ນດອກ ປຸ້ນນີ້ບໍ່ແມ່ນດອກ ຜິດໃຈກັນນີ້ແຫລະ ຜິດໃຈກັນແລ້ວກໍເລື້ອງຕັດລາຄາ ເລື້ອງຮັບກັນຕັດໜ້າຈັ່ງຊີ້ ນ່າຈະຕັດລາຄາ ຫຼາຍກວ່າ.”

ແລະຄົນຂັບລົດແທັກຊີ ຢູ່ເຂດສາມຫລ່ຽມຄໍາອີກຜູ້ນຶ່ງ ກໍເວົ້າຕໍ່ວິທຍຸເອເຊັຽເສີ ໃນມື້ວັນທີ 19 ກັນຍານີ້ວ່າ ເຫດການຄາດຕະກໍາຄັ້ງນີ້ ສ້າງຄວາມຫວາດກົວໃຫ້ແກ່ຜູ້ປະກອບການຂັບລົດຮັບສົ່ງ ໃນເຂດເສດຖະກິດພິເສດຫຼາຍ, ເຮັດໃຫ້ ຊ່ວງນີ້ ຄົນຂັບແທັກຊີ ສ່ວນຫລາຍ ຕ້ອງໄດ້ລະມັດລະວັງໂຕ ຫຼາຍຂຶ້ນ ໂດຍຈະຮັບແຕ່ລູກຄ້າປະຈໍາ ທີ່ໄວ້ໃຈໄດ້ເທົ່ານັ້ນ ບໍ່ຮັບລູກຄ້າແປກໜ້າ ແລະພະ ຍາຍາມບໍ່ໄປໄກເມືອງ ດັ່ງທີ່ທ່ານກ່າວວ່າ:

“ກໍຢ້ານຢູ່ ຮັບແຕ່ລູກຄ້າປະຈໍາ ລູກຄ້າແປກໜ້າກໍບໍ່ຮັບ ກໍຕ້ອງເບິ່ງກ່ອນຍັງວ່າ ເບິ່ງໂປໄຟເບິ່ງວ່າໄປໃສ ໄປໃກ້ໄປໄກຕອນກາງ ຄືນ ກາງຄືນກໍຮັບແຕ່ວ່າໄປໄກແມ່ນຢ້ານ ກໍລະວັງໂຕແຫລະ ບໍ່ຮູ້ຄືກັນວ່າເປັນລູກຄ້າແນວໃດ.”

ເພື່ອຂໍຮູ້ກ່ຽວກັບຄວາມຄືບໜ້າ ຂອງຄະດີທີ່ວ່ານີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາ ກອງບັນຊາການຕໍາຫຼວດປ້ອງກັນຄວາມສະຫງົບແຂວງບໍ່ແກ້ວ, ແຕ່ເຈົ້າໜ້າທີ່ທີ່ກ່ຽວຂ້ອງ ນາງນຶ່ງບອກວ່າ ຍັງບໍ່ສະດວກທີ່ຈະໃຫ້ຄໍາເຫັນ:

“ບໍ່ມີຢູ່ນໍາບົດຂະເຈົ້າສະພາບປະຈໍາວັນຫັ້ນນ່າ ເຮົາກະບໍ່ຢາກກ້າວກ່າຍໜ້າທີ່ຂະເຈົ້າ ມີແຕ່ວ່າຖ້າມີເບີຜະແນກທີ່ຮັບຜິດຊອບວຽກ ອັນນີ້ກໍລົມຂະເຈົ້າເລີຍເດີ.”

ພ້ອມດຽວກັນນັ້ນ ວິທຍຸເອເຊັຽເສຣີ ກໍໄດ້ຕິດຕໍ່ ຖາມໄປຍັງບຸກຄົນໃກ້ຊິດ ຂອງຜູ້ເສຍຊີວິດ, ແຕ່ໄດ້ຄໍາຕອບພຽງແຕ່ວ່າ ຍັງບໍ່ສະດວກ ທີ່ຈະເວົ້າຫຍັງໄດ້ໃນຕອນນີ້.  

ເລື່ອງການຄາດຕະກໍາ ຢູ່ເຂດເສດຖະກິດສາມຫຼ່ຽມຄໍາ ເມື່ອກ່ອນໜ້ານີ້ ກໍເຄີຍໄດ້ເກີດຂື້ນ ເຊັ່ນກໍລະນີ ແມ່ຍິງລາວ ຊື່ນາງ ພະນັດດາ ອິນເມທາ ອາຍຸ 24 ປີ ຄົນບ້ານໄຜ່ ເມືອງຈໍາພອນ ແຂວງສວັນນະເຂດ ໄດ້ຖືກຊາຍຄົນຈີນ ອູ້ມຂຶ້ນລົດສ່ວນຕົວ ຢູ່ຕໍ່ໜ້າຮ້ານບັນເທີງແຫ່ງນຶ່ງ ໃນເຂດເສຖກິຈພິເສດສາມຫຼ່ຽມ ຄໍາ ເມືອງຕົ້ນເຜິ້ງ ແຂວງບໍ່ແກ້ວ ໃນມື້ວັນທີ 23 ທັນວາ 2023. ຕໍ່ມາໄດ້ຖືກພົບສົບ ໄຫລຢູ່ກາງແມ່ນໍ້າຂອງ ໃນເຂດເມືອງຕົ້ນເຜິ້ງ ໃນມື້ວັນທີ 28 ທັນວາ.