ເຈົ້າໜ້າທີ່ ແຂວງຊຽງຂວາງ ກັກຕົວແມ່ຍິງ ທີ່ຖືກຕ້ອງຫາຄ້າມະນຸດ

ເຈົ້າໜ້າທີ່ຕໍາຫລວດ ປ້ອງກັນຄວາມສະຫງົບ ແຂວງຊຽງຂວາງ ເວົ້າໃນມື້ວັນທີ 28 ພຶດສະພານີ້ ເຖິງຄວາມຄືບໜ້າ ກ່ຽວກັບກໍລະນີນາຍໜ້າລາວ 3 ຄົນ ທີ່ເປັນຄົນບ້ານດຽວກັນ ຕົວະຍົວະຜູ້ເປັນພໍ່ແມ່ ໃຫ້ລູກສາວ ໄປເປັນເມຍຄົນຈີນ ແບບບໍ່ຖືກກົດໝາຍວ່າ ປັດຈຸບັນ ກໍາລັງກຽມສົ່ງບົດສະຫລຸບ ສໍານວນຄະດີ ໃຫ້ໄອຍະການແຂວງ ເພື່ອຟ້ອງຂຶ້ນສານ ຕັດສິນຄະດີ. ຂະນະນີ້ ນາຍໜ້າທັງ 3 ຄົນຍັງຖືກຂັງຄຸກ ຢູ່ແຂວງຊຽງຂວາງ ດັ່ງເຈົ້າໜ້າທີ່ ປກສ ແຂວງຊຽງຂວາງ ນາງນຶ່ງ ກ່າວຕໍ່ວິທຍຸເອເຊັຽເສຣີ ວ່າ:

“ໂຕນີ້ ມັນບໍ່ສຸດ ຢູ່ກັບຂັ້ນເຈົ້າໜ່າທີ່ນໍ  ຂັ້ນເຈົ້າໜ້າທີ່ຍັງສະຫລຸບສົ່ງໄອຍະການ ຕ້ອງຫັນເຂົ້າສູ່ລະບຽບກົດໝາຍ ຕໍາຫລວດຕັດສິນບໍ່ໄດ້ເດ ຫັ້ນນະ ໂຕນີ້ ຊ່ວງນີ້ ບ້ານເມືອງເຮົານີ້ກໍາລັງລະບາດໜັກເດ ສ່ວນຫລາຍມັນກໍສິມີນາຍໜ້ານໍ ບາງກຸ່ມກໍນາຍໜ້າ ບາງກຸ່ມກໍມາແຕ່ງດອງ ໝັ້ນໝາຍແບບແອບແຝງໄປ ໄປ ໄປຈໍານວນນຶ່ງ ແລ້ວກໍຫາຍສາບສູນໄປເລີຍ ໝູ່ຄູ່ຮັກແພງ ຈຸລູກຫລານດຽວນີ້ ໄປ ໄປຫັ້ນນໍານໍ ໄປຮອດພຸ້ນ ໃນເມື່ອມັນໄປບໍ່ຖືກໃຈຕົວເອງ ກັບມາຄອບຄົວ ມາຮ້ອງຟ້ອງຕໍ່ເຈົ້າໜ້າທີ່ ບາງເທື່ອໄປມັນກໍບໍ່ໄດ້ຫລູຫລາ ດັ່ງທີ່ເຮົາຄິດຫັ້ນນະ ມັນກໍບໍ່ລວຍ ເຫັນສະພາບຄອບຄົວເຂົາຢູ່ພຸ້ນ ມັນທຸກ ມັນຍາກຫັ້ນນະນໍ ເຂົາບໍ່ໃຫ້ເງິນໃຊ້ຈ່າຍກໍມີ ຈະກັບບ້ານຫັ້ນນະ ກໍໂທຫາພໍ່ແມ່ ພໍ່ແມ່ກໍມາແຈ້ງຄວາມ.”

ນາງເວົ້າຕື່ມວ່າ ເມື່ອວັນທີ 22 ເມສາທີ່ຜ່ານມາ ຜູ້ທີ່ເປັນພໍ່ແມ່ ເຂົ້າມາແຈ້ງຄວາມຢູ່ ປກສ ແຂວງຊຽງຂວາງ ວ່າ ລູກສາວຂອງຕົນ ຕົກເປັນຜູ້ເຄາະຮ້າຍ ຈາກການຄ້າມະນຸດ ຢູ່ຈີນ ຍ້ອນມີກຸ່ມນາຍໜ້າ 3 ຄົນ ທີ່ເປັນຄົນບ້ານດຽວກັນ ຕົວະໃຫ້ຍົກລູກສາວ ເຂົ້າພິທີແຕ່ງດອງກັບຄົນຈີນ ໂດຍໃຫ້ຄ່າດອງ 150 ລ້ານກີບ. ແຕ່ເມື່ອພໍພາໄປເຖິງຈີນແລ້ວ  ລູກສາວຂອງຕົນ ພັດປະເຊີນກັບຄວາມ ທຸກຍາກຫລາຍກວ່າເກົ່າ ແລ້ວຈຶ່ງຕິດຕໍ່ມາຫາພໍ່ແມ່ ໃຫ້ຊ່ວຍໄດ້ກັບຄືນມາລາວ.

ກ່ຽວກັບເລື່ຶອງນີ້ ຊາວບ້ານຈອມສີ ເວົ້າວ່າ ປະມານ 10 ວັນທີ່ຜ່ານມາ ເຈົ້າໜ້າທີ່ຕໍາຫລວດແຂວງ ມາຈັບນາງ ໄມ ອາຍຸ 33 ປີ, ນາງ ທອງ ອາຍຸ 54 ປີ ແລະນາງ ພອນ ອາຍຸ 39 ປີ. ທັງ 3 ຄົນນີ້ ເປັນຄົນບ້ານຈອມສີ ແລະເປັນນາຍໜ້າ ທີ່ມີການວາງແຜນ ແບບແນບນຽນ ເລືອກເອົາແມ່ຍິງຢູ່ໃນບ້ານນີ້ ໄປເປັນເມຍຈີນ ໂດຍສະເໜີໃຫ້ຄ່າດອງສູງ ແລະຜູ້ເປັນພໍ່ແມ່ ກໍບໍ່ຮູ້ເທົ້າເຖິງການ, ບໍ່ຄິດເຖິງວ່າ ຄົນບ້ານດຽວ ຈະຕົວະເອົາລູກຂອງຕົນໄປ ດັ່ງທີ່ລາວເວົ້າວ່າ:

“ແມ່ນແລ້ວຫວະ ເຫັນເຂົາເອົາໄປ ເອົາໄປຢູ່ແຂວງນະ ມີຜູ້ນຶ່ງແຫລະ ມີຜົນກະທົບນະ ເຂົາຈັ່ງເອົາໄປຢູ່ແຂວງ ເຂົາບໍ່ໄດ້ເອົາບັດ ເຮັດບັດ ເຮັດໃບເລີຍນະ ຟັງວ່າຫັ້ນນະ ມີແຕ່ວ່າເຂົາໄດ້ພາສປອດ ແລ້ວເຂົາກໍໄປເລີຍຫັ້ນນະ ອ້າຍບໍ່ຮູ້ຈັກຊິວ່າແຫລະ ເອົາແຕ່ຂັ້ນເທິງເຂົາເຊັນ (ລົງໂທດ)ມັນກໍບໍ່ດີ (ນາຍໜ້າມາຕົວະເອົາແມ່ຍິງລາວໄປເປັນເມຍຈີນ)ປານໃດຫັ້ນແຫລະ ແມ່ນແທ້ ເກາະ ເຂົາກໍຮູ້ເທົ້າບໍ່ເຖິງການແຫລະ ເຂົາບໍ່ຮູ້ນໍ ຄວາມຮູ້ເຂົາກໍບໍ່ມີຫັ້ນນະ ກໍຢາກໃຫ້ຂັ້ນເທິງເຈລະຈາເບິ່ງວ່າ ລັກສະນະເຂົາໄປຫັ້ນ ເຂົາກໍບໍ່ແມ່ນເຂົາຕົວະ ເຂົາຍົວະຫັ້ນນະ ຟັງວ່າຫັ້ນນະ ມີແຕ່ວ່າເຂົາມາຖາມເອົາ ຜູ້ໃດຊິໄປແລ້ວ ເຂົາມາຊອກເອົາຄົນຫັ້ນນະ ມາຊອກເອົາວ່າ ມັກບໍ່ຜູ້ນັ້ນ ຜູ້ນີ້ ຫັ້ນນະ ແລ້ວພໍ່ແມ່ເຂົາກໍຍິນຍອມຫັ້ນນະ ເປັນຮູບນັ້ນແຫລະ.”

ຜ່ານການສວບສວນຂອງເຈົ້າໜ້າທີ່ຕໍາຫລວດ ນາຍໜ້າທັງ 3 ຄົນ ຮັບສາລະ ພາບວ່າ ໄດ້ຕົວະເອົາຍິງສາວ ຄົນບ້ານດຽວກັນນັ້ນ ໄປເປັນເມຍຄົນຈີນແທ້ ແລະວ່າ ໄດ້ເປັນນາຍໜ້າໃຫ້ຄົນຈີນ ທີ່ຢູ່ແຂວງຫລວງນໍ້າທາ ຕົວະຍົວະເອົາແມ່ຍິງລາວໃຫ້ ໂດຍໄດ້ຮັບຄ່າຕອບແທນ ແຕ່ 20 ລ້ານ ຫາ 35 ລ້ານກີບຕໍ່ຄົນ. ໄດ້ໃຊ້ກົນອຸບາຍ ຕໍ່ຜູ້ປົກຄອງຍິງສາວວ່າ ມີຄົນຈີນ ເປັນໂສດ ແລະມີເງິນຫລາຍ ຢາກໄດ້ເມຍ ທີ່ເປັນຄົນລາວ, ຈະໃຫ້ຄ່າດອງ 150 ລ້ານກີບ, ເມື່ອຜູ້ປົກຄອງຕົກລົງ ກໍຈະສົ່ງໄປໃຫ້ຄົນຈີນ ຢູ່ຊາຍແດນ ບໍ່ເຕັນ-ບໍ່ຫານ ແຂວງຫລວງນໍ້າທາ ແລະວ່າ ໄດ້ເລີ່ມກະທໍາມາ ຕັ້ງແຕ່ປີ 2016 ແລະໄດ້ຕົວະເອົາແມ່ຍິງໄປໄດ້ຫລາຍຄົນແລ້ວ. ໃນນັ້ນ ຈໍານວນນຶ່ງ ໄດ້ສົ່ງໄປຈີນແລ້ວ ແລະຈໍານວນນຶ່ງ ຍັງຢູ່ລາວ. ສ່ວນຫລາຍ ເປັນຍິງສາວ ອາຍຸ 18 ປີຫາ 20 ປີ, ອີງຕາມຂໍ້ມູນ ຈາກເຟສບຸກ ເພຈ ຂ່າວ ປກສ ແຂວງຊຽງຂວາງ.

ການກະທໍາຂອງນາຍໜ້າທັງ 3 ຄົນນັ້ນ ເຈົ້າໜ້າທີ່ຕໍາຫລວດແຂວງຊຽງຂວາງ ເວົ້າວ່າ ມີເຈດຕະນາຕິດຕໍ່ເອົາຍິງສາວລາວ ໄປເອົາຜົວຈີນ ໂດຍຊອກຫາຄົນສົ່ງ ຫລືນໍາສົ່ງໄປ ແບບບໍ່ມີເອກກະສານ ແລະໄດ້ຮັບຄ່າຕອບແທນ ຊຶ່ງເປັນການກະທໍາຜິດ ໃນຂໍ້ຫາຄ້າມະນຸດ ຕາມມາດຕາ 215 ຂອງປະມວນກົດໝາຍອາຍາ ດັ່ງເຈົ້າໜ້າທີ່ ປກສ ແຂວງຊຽງຂວາງ ທ່ານດຽວກັນນີ້ ເວົ້າວ່າ:

“ຈະໄປຮູບການຈັ່ງໃດກໍຢ່ານໍ ມັນຈະເຂົ້າເຄືອຂ່າຍຕົວະ ຍົວະຫລອກລວງໄປຫັ້ນ ຫັນເຂົ້າສູ່ກົດໝາຍໄດ້ໝົດຫັ້ນນະ ມັນກໍມີຢູ່ຕາມປະມວນກົດໝາຍຂອງມັນຫັ້ນແຫລະ ສົມມຸດເຮົາໃຫ້ເງິນນໍ ຊື້ຈ້າງ ຈອບອອຍ ຊັກຊວນ ຫລືນໍາສົ່ງຫັ້ນນະ ມັນກໍເຂົ້າເຄືອຂ່າຍຂອງການຄ້າມະນຸດ ຊໍາເລົາ ຢູ່ແຂວງ ຈຸເອື້ອຍກໍເອົາວິທີການລົງໂຄສະນານໍ ລົງໂຄສະນາເປັນປົກກະຕິ ແຕ່ລະເມືອງ ແຕ່ລະບ້ານຫັ້ນ ຖ້າວ່າມີພົນລະເມືອງດີແຈ້ງວ່າ ມີຄົນຈີນມາລັກລອບຂໍໝັ້ນໝາຍຢູ່ບ້ານໃດ ບ້ານນຶ່ງນະ ເຈົ້າໜ້າທີ່ພວກເຮົາກໍຊິເຂົ້າຈັບກຸມເລີຍ ຖ້າເຂົາບໍ່ມີເອກກະສານແຕ່ງດອງຖືກຕ້ອງ ເຈົ້າໜ້າທີ່ພວກເຮົາຈະເຂົ້າຈັບກຸມໝົດເລີຍ ຈໍານວນນຶ່ງເຂົາກໍເປັນຫົວສົ່ງຕໍ່ ຈໍານວນນຶ່ງເຂົາກໍມາເລາະເອົາເອງເລີຍ.”

ກ່ຽວກັບຄະດີທີ່ວ່ານີ້ ເຈົ້າໜ້າທີ່ດ້ານກົດໝາຍ ຢູ່ແຂວງຊຽງຂວາງ ເວົ້າໃນມື້ວັນທີ 28 ພຶດສະພານີ້ວ່າ ຫາກສໍານວນຄະດີ ໄປຮອດໄອຍະການແຂວງແລ້ວ ກໍຈະໃຊ້ເວລາປະມານ 15 ມື້ ເພື່ອຄົ້ນຄວ້າ ແລ້ວກໍຈະສົ່ງໄປສານ ເພື່ອພິຈາລະ ນາຕັດສິນລົງໂທດພວກກ່ຽວ.

“ຄັນວ່າມາຮອດໄອຍະການແລ້ວ ໄທເຮົາກໍຄົ້ນຄວ້າຖະແຫລງຫາສານເປັນຜູ້ພິຈາລະນາ ຕັດສິນເນາະ ເບື້ອງໂທດຫັ້ນນ່າ ແລ້ວກໍກໍານົດເວລາໃນການຄົ້ນຄວ້າ ຢູ່ໄອຍະການນີ້ມັນມີແຕ່ 15 ວັນເນາະ ມັນກໍ ຄັນວ່າ ມັນຈະມັນແຈ້ງ ກໍຍົກເວັ້ນຄະດີທີ່ມີຄວາມຫຍູ້ງຍາກ ມັນກໍຈະໄດ້ສົ່ງກັບໄປກັບມາຢູ່ ຄັນວ່າມັນແຈ້ງໝົດແລ້ວກໍມີແຕ່ 15 ວັນຕ້ອງອອກຈາກໄອຍະການໄປໃຫ້ສານຕັດສິນ ພາຍຫລັງທີ່ສານເນາະ ຮັບສໍານວນຄະດີຈາກໄອຍະການ ພາຍໃນເດືອນນຶ່ງ ສານຕ້ອງເອົາມາຕັດສິນຕາມກົດໝາຍ.”

ເຈົ້າໜ້າທີ່ດ້ານກົດໝາຍແຂວງຊຽງຂວາງທ່ານນີ້ ຍັງເວົ້າຕໍ່ໄປວ່າ ສໍາລັບໂທດກ່ຽວກັບການກະທໍາຜິດໃນຂໍ້ຫາຄ້າມະນຸດ ມາດຕາ 215 ຂອງປະມວນກົດ    ໝາຍອາຍາ ຈະເປັນໂທດໜັກ ຍ້ອນເປັນໂທດກ່ຽວກັບການຄ້າມະນຸດ.

“ໂອ້ ມາດຕານີ້ນິ ຖ້າຈື່ນີ້ ໂທດສູງເດ້ ເຈົ້າເອີ້ຍ ມາດຕາ 215 ນີ້ນ່າ ໂທດນີ້ຫລາຍ ມັນເປັນຄ້າມະນຸດນີ້ ເພາະກົດໝາຍຈະປົກປ້ອງເລື້ອງ ການຄ້າມະນຸດນີ້ນ່າ ມັນຈະມີຫລາຍວັກຢູ່

ໃນມາດຕານີ້ນ່າ ມັນກໍບໍ່ແນ່ວ່າ ຜູ້ໃດມັນຈະຖືກ... ໃດຫັ້ນນ່າເນາະ ຄືວັກນຶ່ງນີ້ ມັນກໍ 5 15 ປີແລ້ວເດ້ນີ້.”

ແຕ່ເຖິງຢ່າງໃດກໍຕາມ ເຈົ້າໜ້າທີ່ຕໍາຫລວດ ແຂວງຊຽງຂວາງ ແລະເຈົ້າໜ້າທີ່ດ້ານກົດໝາຍແຂວງຊຽງຂວາງ ກໍເວົ້າວ່າ ຈະຮ່ວມມືກັນ ເພື່ອຂະຫຍາຍຜົນ ຫາຜູ້ຮ່ວມຂະບວນການ ທີ່ວ່ານັ້ນ ມາດໍາເນີນຄະດີ ພ້ອມທັງຈະຫາຊ່ອງທາງຊ່ວຍເຫລືອຜູ້ຖືກເຄາະຮ້າຍ ຢູ່ຈີນ ໄດ້ກັບຄືນມາລາວ ຢ່າງປອດໄພ, ອີງຕາມ ຄໍາເຫັນຂອງເຈົ້າໜ້າທີ່ຕໍາຫລວດ ທີ່ໃຫ້ວິທຍຸເອເຊັຍເສຣີໄດ້ສໍາພາດ ໃນມື້ວັນທີ 28 ພຶດສະພານີ້.