ທະຫານພະມ້າໂຈມຕີ ເຂດພົລເຮືອນ ເຮັດໃຫ້ຊາວບ້ານ 4,000 ປາຍຄົນ ຈາກ 15 ບ້ານ ຢູ່ເຂດສະກາງ ພາກຕາເວັນອອກສ່ຽງເໜືອ ຂອງພະມ້າ ຊາວບ້ານຕ້ອງໜີ ອອກຈາກບ້ານ ເພື່ອຫຼົບຄວາມຮຸນແຮງ.
ການໂຈມຕີດັ່ງກ່າວ ເກີດຂຶ້ນເປັນເວລາ 3 ມື້ ແລ້ວ ແລະ ຍັງສືບຕໍ່ມາຮອດວັນສຸກ ຢູ່ເຂດເມືອງສະກາງ ພາກຕາເວັນອອກສ່ຽງເໜືອ ຂອງພະມ້າ ໂດຍມີທະຫານພະມ້າ ປະມານ 100 ຄົນ ໄດ້ຫັນມາໂຈມຕີ ພົລເຮືອນແທນ ເຊິ່ງຂັດຕໍ່ຫຼັກການ ທາງການທະຫານ.
ມີຍົນເຮລິຄອບເຕີ້ຣ໌ 4 ລຳ ໄດ້ໂຈມຕີໝູ່ບ້ານ ເຮັດໃຫ້ມີຜູ້ເສັຽຊີວິຕ 1 ຄົນ ຊື່ວ່າ ຂິນ ເມືອງສານ ແລະ ມີຜູ້ຍິງ ກັບຜູ້ຊາຍໄດ້ຮັບບາດເຈັບ.
ປະຊາຊົນ ໄດ້ກ່າວຕໍ່ວິທຍຸເອເຊັຽເສຣີ ຜແນກພາສາພະມ້າ ວ່າ:
“ມີຜູ້ເສັຽຊີວິຕຄາທີ່ ແລະ ຜູ້ຍິງໄດ້ຮັບບາດເຈັບສາຫັດ ຢູ່ຂັນໄດບ້ານ ແລະ ລາວກໍໄດ້ຮັບການຮັກສາ ຈາກກອງກຳລັງ ສະພາທະຫານພະມ້າ. ປະຊາຊົນພາກັນຫຼົບໜີ ບໍ່ກ້າກັບຄືນບ້ານ ຈົນກະທັ້ງທະຫານພະມ້າ ຈະອອກຈາກບ້ານເຂົາເຈົ້າກ່ອນ. ສະພາບທາງພາກພື້ນດິນ ມີຄວາມອັດຕະຄັດຫຼາຍ.”
ປະຊາຊົນ ກ່າວວ່າ ມີປະຊາຊົນປະມານ 100 ຄົນ ບໍ່ຍອມໜີຈາກບ້ານ ແລະ ເຂົາເຈົ້າຖືກບັງຄັບ ແລະ ພວກທະຫານ ພາກັນມາກວດຂໍ້ຄວາມໂທຣະສັບ ເຂົາເຈົ້າ ວ່າມີການຕິດຕໍ່ ກັບກຸ່ມກອງກຳລັງ ປົກປ້ອງປະຊາຊົນຫຼືບໍ່.
ປະຊາຊົນ ກ່າວວ່າ ຍົນເຮລິຄອບເຕີ້ຣ໌ ຂອງທະຫານພະມ້າ ໄດ້ຍິງປືນໃສ່ໝູ່ບ້ານ ໃນວັນທີ 2 ກໍຣະກະດາ ທີ່ຜ່ານມາ.
ຊາວເມືອງດັ່ງກ່າວ ຕ້ອງຕໍ່ຕ້ານກັບທະຫານພະມ້າ ທີ່ຍຶດອຳນາດມາແຕ່ ວັນທີ 1 ກຸມພາ 2021, ໂດຍ ເຂົ້າເຈົ້າ ມີການຈັດຕັ້ງກຸ່ມກອງກຳລັງ ປົກປ້ອງປະຊາຊົນ ຫຼື PDF ຫຼັງຈາກທະຫານ ເຂົ້າມາຍຶດອຳນາດ ຈາກພັກສັນນິບາດ ແຫ່ງຊາຕ ເພື່ອປະຊາທິປະໄຕ ຂອງພະມ້າ ແລະ ມີການຕັດສັນຍາໂທຣະສັບ ແລະ ອິນເຕີຣ໌ເນັຕ.
ປະຊາຊົນທີ່ໜີການສູ້ຣົບ ໄດ້ກ່າວວ່າ:
“ພວກເຮົາຕ້ອງໜີປະເລົ້າເຂົ້າ, ສັດລ້ຽງ ບໍ່ວ່າ ຈະເປັນງົວ ແລະ ແບ້. ພວກເຮົາເປັນຫ່ວງສັດລ້ຽງ ຖ້າວ່າ ສັດລ້ຽງຖືກຍິງຕາຍ ພວກເຮົາຈະບໍ່ມີຫຍັງເຫຼືອ ພວກເຮົາບໍ່ມີວຽກເຮັດ ແລະ ຍາກທີ່ຫາລ້ຽງຄອບຄົວ.”
ນອກຈາກນີ້ ປະຊາຊົນຊາວເມືອງປາເລ ໄດ້ກ່າວວ່າ ມີປະຊາຊົນ 4 ຄົນເສັຽຊີວິຕ ລວມມີເດັກ ຖືກຍິງ ຍ້ອນການໂຈມຕີ ຂອງທະຫານພະມ້າ ຫຼັງຈາກທີ່ຊາວບ້ານ ໄດ້ພາກັນກັບຄືນມາບ້ານ ໃນຂະນະທີ່ ເຂົາເຈົ້າກຳລັງລ້ຽງງົວ ແລ ເກືອໝູຢູ່.
ແຫຼ່ງຂ່າວ ຈາກເມືອງປາເລ ໄດ້ໃຫ້ສັມພາດວ່າ ຜູ້ທີ່ຖືກເຄາະຮ້າຍ ເປັນແມ່ຍິງ ອາຍຸ 45 ປີ, ເດັກນ້ອຍແມ່ຍິງ ອາຍຸ 15 ປີ, ແມ່ຍິງ ອາຍຸ 54 ປີ, ແລະ ອີກ ນຶ່ງຄົນ ເປັນຜູ້ຊາຍ.
ມີທະຫານພະມ້າປະມານ 100 ຄົນ ໄດ້ເຂົ້າມາທີ່ໝູ່ບ້ານ ໃນວັນທີ 10 ກໍຣະກະດາ ແລະ ບັງຄັບໃຫ້ຊາວບ້ານທັງໝົດ ໜີເຂົ້າໄປໃນປ່າ.
ຊາວບ້ານກ່າວວ່າ: “ເຫດເກີດໃນຕອນສວາຍ ວັນທີ 10 ກໍຣະກະດາ ທະຫານພະມ້າ ພາກັນເຂົ້າມາ ທາງຕາເວັນອອກ ຂອງບ້ານ ແລະ ຊາວບ້ານກໍພາກັນໜີ.”
ຊາວບ້ານກ່າວຕື່ມວ່າ: “ມີຜູ້ຍິງ 2 ຄົນ, ເດັກນ້ອຍແມ່ຍິງ 1 ຄົນ ເສັຽຊີວິຕ ທີ່ຖືກພົບສົບຢູ່ຫ້ອງນ້ຳ ແລະ ມີຜູ້ຊາຍເສັຽຊີວິຕ ທີ່ຖືກເຊືອກມັດຄໍຢູ່.”
ໃນທີ່ສຸດ ພວກທະຫານ ກໍອອກຈາກໝູ່ບ້ານ ໃນວັນທີ 11 ກໍຣະກະດາ ຊາວບ້ານຈຶ່ງເຂົ້າມາ ພົບສົບຜູ້ເສັຽຊີວິຕ.
ຊາວບ້ານ ໄດ້ກ່າວ ຕໍ່ວິທຍຸເອເຊັຽເສຣີ ຜແນກພາສາພະມ້າ ວ່າ ສົບຜູ້ເສັຽຊີວິຕ ຖືກຝັງ ນອກໝູ່ບ້ານ.
ຍັງບໍ່ຈະແຈ້ງວ່າ ເປັນຍ້ອນສາເຫດຫຍັງ ໜ່ວຍງານຂອງທະຫານພະມ້າ ຈຶ່ງບຸກໂຈມຕີບ້ານ ແລ້ວສັງຫານປະຊາຊົນ. ປະຊາຊົນ ທ່ານນຶ່ງ ໄດ້ກ່າວວ່າ: ຊາວບ້ານກຳລັງລ້ຽງງົວ, ເກືອໝູຢູ່ໃນບ້ານ ແລະ ເຂົາເຈົ້າກໍຖືກຍິງ ໂດຍທະຫານພະມ້າ.
ປະຊາຊົນ ກ່າວວ່າ:
“ພວກທະຫານພະມ້າ ບໍ່ສົນກັບຊີວິດຕມະນຸສ ປະຊາຊົນຖືກທໍລະມານ ແລະ ຖືກສັງຫານ ພວກເຮົາມີການບັນທຶກວີດີໂອ ຢູ່ໃນພື້ນທີ່ ທີ່ມີການສັງຫານ ແລະ ຫຼຸມສົບ.”
ປະຊາຊົນກ່າວວ່າ: “ມີການສຳເນົາວີດີໂອ (Copy) ໃຫ້ແກ່ໜ່ວຍງານ ກອງກຳລັງປົກປ້ອງ ປະຊາຊົນ ເຊິ່ງເຂົາເຈົ້າກ່າວວ່າ ເຂົາເຈົ້າຈະສົ່ງວີດີໂອດັ່ງກ່າວ ໃຫ້ໂຕແທນຣັຖບານເງົາ ຂອງພະມ້າ.”
ແຫຼ່ງຂ່າວ ຈາກກຸ່ມກອງກຳລັງປົກປ້ອງ ປະຊາຊົນ ໄດ້ກ່າວຕໍ່ວິທຍຸເອເຊັຽເສຣີ ຜແນກພາສາພະມ້າວ່າ: "ຜູ້ທີ່ຕົກເປັນເຫຍື່ອ ແມ່ນພົລເຮືອນ ແລະ ບໍ່ມີສ່ວນກ່ຽວຂ້ອງຫຍັງກັບ ຝ່າຍຕໍ່ຕ້ານທະຫານ."
ນອກຈາກນີ້, ທະຫານພະມ້າ ໄດ້ບຸກທະລາຍ ສະມາຊິກສັນນິບາດແຫ່ງຊາ8 ເພື່ອປະຊາທິປະໄຕ ແລະ ໄດ້ໃຫ້ສານຕັດສິນ ຈຳຄຸກຕລອດຊີວິ8 ສະມາຊິກພັກຫຼາຍຄົນ ຢູ່ ເຂດພາກໃຕ້ຂອງຣັຖຊານ ໃນເດືອນທີ່ຜ່ານມາ. ສານພະມ້າ ໄດ້ຕັດສິນປະຫານຊີວິຕ ທ້າວເພກອນ, ທ້າວເມືອງເຢັນ ແລະ ທ້າວໂຈເຊບ ໃນວັນພະຫັດທີ່ຜ່ານມາ.
ຣັຖສານ ມີຊາຍແດນຕິດກັບ ຣັຖກະຢາ ບ່ອນທີ່ ທະຫານກະຫລ່ຽງ ໄດ້ຕໍ່ສູ້ກັບທະຫານພະມ້າ ເພື່ອຄວາມເປັນເອກຣາຊ. ການຕໍ່ສູ້ລະຫວ່າງ ທະຫານພະມ້າ ກັບ ທະຫານກະຫລ່ຽງ ໂດຍ ກຸ່ມກອງກຳລັງປົກປ້ອງປະຊາຊົນ ທີ່ໄດ້ພາກັນເຂົ້າໄປຢູ່ໃນເຂດຣັຖສານ. ນອກຈາກນີ້ ຍາງ ອອນຊານ ຊູຈີ ຫົວໜ້າສັນນິບາດແຫ່ງຊາຕ ເພື່ອປະຊາທິປະໄຕ ຂອງພະມ້າ ທີ່ຖືກທະຫານພະມ້າ ຍຶດດດຳນາດ ແລະ ກັກໂຕ ໄດ້ຖືກຍ້າຍໄປກັກຂັງດ່ຽວ ນັບແຕ່ເດືອນມິຖຸນາ ທີ່ຜ່ານມາ. ແຫຼ່ງຂ່າວທີ່ໃກ້ຊິດເຈົ້າໜ້າທີ່ສານ ນະຄອນຫລວງ ເນປີດໍ ຂອງພະມ້າ ໄດ້ ກ່າວຕໍ່ວິທຍຸເອເຊັຽເສຣີ ຜແນກພາສາພະມ້າ ວ່າ:
“ຄະດີ ຂອງຍານາງ ອອງ ຊານ ຊູຈີ ແລະ ຄົນໃກ້ຊິດຂອງ ຍານາງ ໄດ້ຖືກນຳມາໄຕ່ສວນ ຢູ່ສານພິເສດ ສະເພາະຢູ່ໃນຄຸກເລີຍ.”
ຜູ້ທີ່ເຫັນເຫດການ ຖືກທະຫານພະມ້າ ນຳໂຕມາສືບສວນ-ສອບສວນ ຢູ່ໃນສານ ທີ່ມີສ່ວນພົວພັນໃນຄະດີນີ້. ຂໍ້ມູນການສືບສວນສອບສວນ ຍັງບໍ່ມີການເປີດເຜີຍ ໃນຂະນະທີ່ ທະນາຍຄວາມຂອງ ຍານາງ ອອງຊານ ຊູຈີ ຍັງ ບໍ່ໄດ້ຮັບອະນຸຍາດ ໃຫ້ເຜີຍແຜ່ຂໍ້ມູນຕໍ່ສື່ມວນຊົນ. ທີ່ຜ່ານມາ, ໄດ້ມີການໄຕ່ສວນຄະດີດັ່ງກ່າວ ທຸກໆວັນພະຫັດ ໃນສານພິເສດ ຢູ່ ນະຄອນຫລວງ ເນປີດໍ ເຊິ່ງດຳເນີນການ ຢູ່ຄ້າຍທະຫານ ນັບແຕ່ວັນທີ 1 ກຸມພາ 2021 ເປັນຕົ້ນມາ. ທ່ານ ຊານ ເທີເນວ ໄດ້ເປັນທີ່ປຶກສາ ທາງດ້ານທຸຣະກິຈ ຂອງຍານາງ ອອງ ຊານ ຊູ ຈີ ນັບແຕ່ປີ 2017 ຢູພາຍໃຕ້ຣັຖບານ ຂອງພັກສັນນິບາດແຫ່ງຊາຕ ເພື່ອປະຊາທິປະໄຕ ຂອງພະມ້າ. ທ່ານ ເປັນຄົນຕ່າງປະເທດ ຄົນທຳອິດ ທີ່ໃກ້ຊິດກັບຣັຖບານ ຂອງຍານາງ ອອງ ຊານ ຊູ ຈີ ໄດ້ຖືກຈັບ ແລະ ກັກໂຕ ນັບແຕ່ທະຫານເຂົ້າມາຍຶດອຳນາດ.
ຍານາງ ອອງ ຊານ ຊູ ຈີ ອາຍຸ 77 ປີ ໄດ້ຖືກດຳເນີນຄະດີ 19 ຂໍ້ຫາ ນັບແຕ່ທະຫານພະມ້າເຂົ້າມາຍຶດອຳນາດ. ຍານາງ ຖືກຕັດສິນຈຳຄຸກ 11 ປີ ໃນ 6 ຂໍ້ຫາ. ທີ່ເຫຼືອ ອີກ 13 ຂໍ້ຫາ ຍັງຄົງພິຈາຣະນາ ຢູ່. ຖ້າມີການຕັດສິນໝົດທຸກຂໍ້ຫາ ຍາງນາງ ກໍຈະຖືກຕັດສິນຈຳຄຸກ ເປັນເວລາ 100 ປາຍ ປີ.
ທະຫານພະມ້າ ທີ່ຍຶດອຳນາດ ໄດ້ປະກາດ ວ່າ:
“ຍານາງ ອອງ ຊານ ຊູ ຈີ ໄດ້ຖືກສົ່ງຂັງຄຸກ ພາຍໃຕ້ກົດໝາຍອາສຍາ ຫຼັງຈາກ ທີ່ສານທະຫານພະມ້າ ໄດ້ມີການໄຕ່ສວນ ກ່ອນໜ້ານີ້ ຍານາງ ອອງ ຊານ ຊູຈີ ຖືກກັກບໍລິເວນ ຢູ່ພາຍໃນບ້ານພັກ.”
ທະຫານພະມ້າ ໄດ້ມີການວາງກຳລັງເຈົ້າໜ້າທີ່ ຢູ່ຄຸກຄຸມຂັງ ແລະ ໄດ້ເພີ່ມການຮັກສາຄວາມປອດພັຍ ຫຼັງຈາກ ຍາງ ນາງ ອອງ ຊານ ຊູຈີ ຖືກນຳໂຕມາ ຢູ່ຄຸກນະຄອນຫລວງ ເນປີດໍ.
ກອງກຳລັງ ປະສົມທະຫານພະມ້າ ແລະ ກຸ່ມຕິດອາວຸດທີ່ສນັບສນູນ ທະຫານພະມ້າ ໄດ້ສັງຫານພົລເຮືອນ 20 ປາຍ ຄົນ ໃນເດືອນພືດສພາ ທີ່ຜ່ານມາ ນີ້ ຢູ່ໃນເຂດສະກາງ ຂອງພະມ້າ ອີງຕາມແຫຼ່ງຂ່າວ ຜູ້ທີ່ເວົ້າວ່າ ທະຫານພະມ້າ ໄດ້ບັງຄັບໃຫ້ປະຊາຊົນ ນອນຂວ້າມໜ້າ ແລ້ວ ສັງຫານເຂົາເຈົ້າ.
ສຳນັກຂ່າວວິທຍຸເອເຊັຽເສຣີ ຜແນກພາສາພະມ້າ ໄດ້ຣາຍງານວ່າ ຜູ້ທີ່ເຄາະຮ້າຍລວມ ຜູ້ຊາຍອາຍຸ 70 ປີ ແລະ ໄວໜູ່ມທີ່ເປັນຜູ້ຍິງຢູ່ນຳ ທີ່ຖືກສັງຫານໃນວັນທີ 2 ພຶສພາ, 3 ຄົນ ມາຈາກບ້ານ ເຊກູນ, 6 ຄົນ ຈາກບ້ານນີ ອອງ ບິນ, 9 ຄົນ ມາຈາກ ບ້ານອອດໂປ, 1 ຄົນ ມາຈາກ ບ້ານອິນພາດ ແລະ ອີກ 1 ຄົນ ມາຈາກບ້ານມາລີຕາ.
ປະຊາຊົນ ບ້ານອອດໂປ ໄດ້ກ່າວວ່າ ຜູ້ທີ່ຖືກສັງຫານ ເປັນພົລເຮືອນ ທີ່ພາກກັນມາລີ້ຈາກ ກຸ່ມພວກທະຫານພະມ້າ ມາຢູ່ໃນເຂດທີ່ບໍ່ມີການຍຶດຄອງ ຂອງທະຫານ.
ປະຊາຊົນກ່າວວ່າ:
“ພວກເຮົາໄດ້ຍິນວ່າ ທະຫານກຳລັງເຂົ້າມາ ແລະ ຊາວບ້ານກໍພາກັນຫຼົບໜີ ດ້ວຍຄວາມຢ້ານກົວ. ຫຼາຍຄົນກໍພາກັນ ຫຼົບເຂົ້າໄປບ່ອນລີ້ຊ້ອນ ແລະ ໃນເວລານັ້ນ ທະຫານກໍ ເຂົ້າມາພົບພໍດີ.”
ຊາວບ້ານທ່ານນີ້ ຍັງກ່າວຕື່ມວ່າ ທະຫານສັ່ງໃຫ້ຊາວບ້ານພາກັນນອນຂວ້າມໜ້າ ແລະ ກໍຍິງໃສ່ຫົວເຂົາເຈົ້າ. ທະຫານບອກໃຫ້ພວກເດັກນ້ອຍ ອອກໄປຈາກສະຖານທີ່ດັ່ງກ່າວ ກ່ອນທີ່ທະຫານ ກະທຳການສັງຫານຊາວບ້ານ.
ແມ່ຊີ ທີ່ຖືກບັງຄັບໃຫ້ຮັບໃຊ້ ພວກທະຫານພະມ້າ ໄດ້ຫຼົບໜີຈາກພື້ນທີ່ດັ່ງກ່າວ ຫຼັງຈາກຮູ້ວ່າ ພວກທະຫານພະມ້າ ຈະເຂົ້າມາໃນພື້ນທີ່.
ອີງຕາມຂໍ້ມູນຈາກຊາວບ້ານ, ພວກທະຫານພະມ້າ ໄດ້ເຜົາຣົຖຂອງຊາວບ້ານຫຼາຍຄັນ ໃນບ້ານອອດໂປ.
ແຫຼ່ງຂ່າວອີກຄົນນຶ່ງ ໄດ້ກ່າວຕໍ່ວິທຍຸເອເຊັຽເສຣີ ວ່າ: “ໃນມື້ດຽວກັນ, ກໍມີການຕໍ່ສູ້ກັນ ລະຫວ່າງ ທະຫານພະມ້າ ກັບ ກອງກຳລັງປົກປ້ອງປະຊາຊົນ ທີ່ຢູ່ໃກ້ກັບການບ້ານ ເຊກູນ ແລະ ບ້ານ ຊີບີກອນ ໂດຍ ທີ່ທະຫານພະມ້າ ໄດ້ຍິງປືນໃຫຍ່ເຂົ້າມາໃນພື້ນທີ່ ເປັນເຫດເຮັດໃຫ້ຊາວບ້ານເສັຽຊີວິຕ 3 ຄົນ ແລະ ບາດເຈັບ 6 ຄົນ.”