ບັບແຕ່ ຝ່າຍທະຫານຢຶດອໍານາດ ຈາກຣັຖບານພົລເຮືອນ ຢູ່ປະເທດພະມ້າ ໃນເດືອນກຸມພາ ປີິ 2021, ກໍມີຄົນໜຸ່ມ-ສາວ ຢູ່ປະເທດພະມ້າທີ່ຮັກ ປະຊາທິປະໄຕ ແລະ ເສຣີພາບ ກໍພາກັນໜີເຂົ້າໄປປ່າ ຕັ້ງກອງກໍາລັງປະກອບອາວຸດ ເພື່ອຕໍ່ສູ້ກັບທະຫານພະມ້າທີ່ຢຶດອໍານາດ.
ຄົນໜຸ່ມ-ສາວ ຈາກຫຼາກຫຼາຍອາຊີບ ບໍ່ວ່າ ຈະເປັນນັກສຶກສາ, ບັນຍາຊົນ, ນັກສະແດງ, ປະຊາຊົນທົ່ວໄປ ຫຼື ບຸກຄົນທີ່ເຮັດວຽກສື່ມວນຊົນ ແລະ ສາຂາອາຊີບອື່ນໆ ກໍພາກັນໜີເຂົ້າປ່າ ເພື່ອຈັບປືນຕໍ່ສູ້ກັບທະຫານພະມ້າ.
ໃນນັ້ນ ກໍມີນັກຂ່າວອິດສຣະ ພະມ້າຄົນນຶ່ງ ທີ່ຊື່ ວ່າ Sit Ko Naing ທີ່ເຄີຍຣາຍງານຂ່າວ ປະຈໍາຢູ່ ເຂດເມືອງປາກັນ ເຂດພາກເໜືອຂອງຣັຖສິນ ກໍໄດ້ສະໝັກໃຈໜີເຂົ້າປ່າ ໄປຮ່ວມກັບກອງກໍາລັງ ປົກປ້ອງປະຊາຊົນ ຄື ກັບຊາວໜຸ່ມພະມ້າ ຄົນອື່ນໆ ເພຶື່ອຕໍ່ສູ້ກັບທະຫານພະມ້າ ຫຼັງຈາກທະຫານພະມ້າເຂົ້າຢຶດອໍານາດ ຈາກຣັຖບານຂອງ ຍານາງ ອອງ ຊານ ຊູ ຈີ ທີ່ຊະນະການເລືອກຕັ້ງ.
Sit Ko Naing ອາຍຸ 27 ປີ ເຄີຍຣາຍງານ ໃຫ້ສໍານັກຂ່າວທ້ອງຖິ່ນ ແລະ ສໍານັກຂ່າວສາກົນ ຈົນວ່າ ມື້ນຶ່ງ ໄດ້ເຫັນຕໍາຣວດ ແລະ ທະຫານທີ່ຖືອາວຸດປືນ ໄດ້ຂ້ານັກສຶກສາ ແລະ ປະຊາຊົນຜູ້ບໍລິສຸດ ຜູ້ທີ່ມາຮ່ວມປະທ້ວງ ແບບສະຫງົບ.
Sit Ko Naing ໄດ້ກ່າວວ່າ:
“ຖ້າມີຄົນຖາມວ່າ ຢ້ານຕາຍບໍ່? ເປັນຫຍັງຊິບໍ່ຢ້ານ ທຸກຄົນກໍຢ້ານຕາຍ ແຕ່ ຂ້ອຍຢ້ານວ່າ ອະນາຄົດຂອງປະເທດຊິມືດມົນ. ທະຫານພະມ້າ ໄດ້ທໍາລາຍຄວາມສາມັກຄີ ຂອງປະຊາຊົນ, ປະເທດຊາດ ແລະ ປະຊາຊົນ. ພວກເຮົາຕຣຽມຕົວ ເພື່ອຕໍ່ສູ້ກັບໃຫ້ເຖິງທີ່ສຸດ ເພື່ອໃຫ້ປະເທດຊາດ ແລະ ປະຊາຊົນ ຢູ່ລອດ ຍ້ອນວ່າ ມັນຈະເປັນການຕໍ່ສູ້ ຄັ້ງສຸດທ້າຍ ເພຶື່ອຂຸດຮາກ ຖອນຕົ້ນ ຜເດັດການ ທະຫານ.”
Sit Ko Naing ເຮັດວຽກເປັນນັກຂ່າວອິສຣະ ທີ່ເຕີບໂຕມາຢູ່ໃນເຂດເມືອງ ຢິນມາບິນ ໄດ້ກ່າວຕໍ່ນັກຂ່າວເອເຊັຽເສຣີ ຜແນກພາສາພະມ້າ ວ່າ ລາວໄດ້ຕັດສິນໃຈວ່າ ລາວຈະບໍ່ຢູ່ເສີຍ ກັບບັນຫາດັ່ງກ່າວ ສະນັ້ນ ລາວຈຶ່ງ ວາງປາກາ ແລ້ວຫັນມາຈັບປືນແທນ ແລະ ເຂົ້າຮ່ວມກອງກໍາລັງ ປົກປ້ອງປະຊາຊົນ ເພື່ອຕໍ່ສູ້ ຟື້ນຟູປະຊາທິປະໄຕ ໃນພະມ້າ.
ມີການຈັດຕັ້ງ ກອງກໍາລັງປົກປ້ອງປະຊາຊົນ ໃນທົ່ວປະເທດ ລວມທັງຢູ່ໃນເຂດ ທີ່ມີກອງກໍາລັງ ຊົນຊາດ ຊົນເຜົ່າ ຜູ້ທີ່ຕໍ່ສູ້ກັບທະຫານພະມ້າ ມາໄດ້ຫຼາຍປີ. ໃນບາງກໍລະນີ, ກຸ່ມຊົນຊາດຊົນເຜົ່າ ໄດ້ຮ່ວມກັບກອງກໍາລັງ ປົກປ້ອງປະຊາຊົນ ຍ້ອນວ່າ ພວກເຮົາມີສັດຕູ ອັນໂຕດຽວກັນ ແລະ ທະຫານພະມ້າຍັງຄົງຢືນການ ທີ່ຈະຢູ່ໃນອໍານາດ.
Sit Ko Naing ໄດ້ເຂົ້າໄປຮວ່ມ ປະຕິບັດການຢູ່ໃນເຂດ ທີ່ກອງກໍາລັງຊົນຊາດຊົນເຜົ່າ ແລະ ລາວຕ້ອງຕໍ່ສູ້ເພື່ອເອົາຊະນະ ອຸປະສັກຊີວິດ ເພືີ່ອການປະຕິວັດປະຊາຊົນ.
Sit Ko Naing ໄດ້ກ່າວວ່າ:
“ມັນໄດ້ສ້າງຄວາມແຕກຕ່າງ ໃຫ້ແກ່ປະເທດຊາດ ຖ້າວ່າ ເຈົ້າເອງເປັນສ່ວນນຶ່ງ ໃນການຕໍ່ສູ້. ພວກເຮົາໄດ້ຕຣຽມຕົວ ຕໍ່ສູ້ຈົນເຖິງທີ່ສຸດ.”
ກ່ອນທີ່ຈະເປັນນັກຂ່າວ, Sit Ko Naing ໄດ້ຂຽນເຣື່ອງສັ້ນ ແລະ ກາບກອນ ແລະ ລາວໄດ້ຈັດຕັ້ງສມາຄົມຫ້ອງສມຸດຊຸມຊົນ ເພື່ອເອົາປື້ມໄປແຈກຢາຍ ໃຫ້ປະຊາຊົນຢູ່ໃນເມືອງ ແລະ ປະຊາຊົນຢູ່ໃນບ້ານ ຢູ່ໃນເຂດເມືອງການີ, ຊຶ່ງເປັນສ່ວນນຶ່ງໃນເມືອງທີ່ລາວຢູ່. ລາວໄດ້ຈັດການຝຶກອົບຮົມ ເພື່ອໃຫ້ການສຶກສາຊາວໜຸ່ມຜູ້ທີ່ບໍ່ຮູ້ໜັງສື ແລະ ເປັນປະທານສມາຄົມນັກຂຽນ ໃນເມືອງ ຢິນມາບິນ.
ໃນປີ 2017, ລາວເປັນນັກຂຽນ ທີ່ມີນາມປາກາ ວ່າ Ketharaza ຊຶ່ງເປັນການໂຮມ ເຣື່ອງສັ້ນຂອງລາວ.
ລາວ ໄດ້ວາງແຜນພິມກາບກອນ ແລະ ປຶ້ມຂອງລາວ ກ່ຽວກັບ ບູຮານຄະດີ ແຕ່ວ່າ ຍ້ອນທະຫານຢຶດອໍານາດ ຈຶ່ງເຮັດໃຫ້ວຽກງານຢຸດສງັກ ແລະ ລາວຫວັງວ່າ ລາວຈະກັບຄືໄປອີກ ຫລັງຈາກການຕໍ່ສູ້ສິ້ນສຸດລົງ.
Sit Ko Naing ຂາດການຕິດຕໍ່ກັບຄອບຄົວຂອງລາວ ທີ່ເປັນຜູ້ອົພຍົບຢູ່ເມືອງ ຢິນມາບິນ.
ລາວກ່າວວ່າ:
“ທະຫານໄດ້ລະງັບການໃຊ້ໂທລະສັບ ແລະ ຕັດສັນຍານອິນເຕີເນັດ ຢູ່ໃນເມືອງ ແລະ ບາງຄັ້ງພວກເຮົາຕ້ອງຟັງຂ່າວຈາກວິທະຍຸ.”
Sit Ko Naing ໄດ້ກ່າວວ່າ: ກັງວົນນໍາຄອບຄົວຂອງລາວ ໃນເວລາທີ່ໄດ້ຍິນຂ່າວ ບໍ່ດີທີ່ເກິີດຂຶ້ນຢູ່ໃນເມືອງຂອງລາວ ແຕ່ວ່າ ລາວກໍກັງວົນກັບສຖານການທີ່ເກີດຂຶ້ນ. ບໍ່ມີຫຍັງທີ່ເຮົາຈະເຮັດບໍ່ໄດ້ ຍົກເວັ້ນຄວາມກັງວົນ. ພວກເຮົາບໍ່ສາມາດ ພົວພັນກັບຄອບຄົວ ແລະ ຖາມສາລະທຸກກັນໄດ້.
ແຕ່ Sit Ko Naing ກໍຍັງມີຄວາມເຊື່ອວ່າ ຄວາມສາມັກຄີຂອງປະຊາຊົນ ສາມາດເອົາຊະນະພວກທະຫານໄດ້ ແລະ ເອົາປະເທດກັບຄືນມາໄດ້.
ຍ້ອນວ່າ ບໍ່ມີຄວາມຍຸຕິທັມໃຫ້ພາຍໃນປະເທດ ທຸກໆວັນ ກໍເປັນວັນແຫ່ງການປະຕິວັດ. ນີ້ຈະເປັນການຕໍ່ສູ້ຄັ້ງສຸດທ້າຍ ໃນການສ້າງຕັ້ງສະຫະພັນທະຮັຖ ແລະ ນີ້ເປັນການຕໍ່ສູ້ຄັ້ງສຸດທ້າຍ ເພື່ອເສຣີພາບທີ່ແທ້ຈິງ.
ເຫດການຫຼ້າສຸດ ກໍຄື ກອງທັບພະມ້າ ໄດ້ເຜົາບ້ານເຮືອນຂອງປະຊາຊົນຫຼາຍກວ່າ 100 ຫຼັງ ຈາກທີ່ມີການຕໍ່ສູ້ກັນຢູ່ໃນເຂດ ແມກເວ ໂດຍ ທີ່ທະຫານພະມ້າ ໄດ້ຍິງປືນໃຫຍ່ຖະຫຼົ່ມບ້ານເຮືອນຂອງປະຊາຊົນເປັນເວລາເຖິງ 30 ມື້ ອີງຕາມຂໍ້ມູນຈາກປະຊາຊົນຢູ່ໃນໝູ່ບ້ານ.
ນອກຈາກນີ້ ໝູ່ບ້ານທີ່ຊື່ວ່າ ຊັນແມວ ທີ່ຢູ່ໃນເຂດເມືອງ ກໍ ມີບ້ານເຮືອນຂອງປະຊາຊົນທັງໝົດ 190 ຫຼັງ ແລະ ປັດຈຸບັນເຫຼືອພຽງເຮືອນ 30 ຫຼັງເທົ່ານັ້ນ ສ່ວນທີ່ເຫຼືອຖືກທໍາລາຍຈົນໝົດ ໂດຍທີ່ພວກທະຫານເຂົ້າມາບຸກໂຈມຕີ.
ທະຫານພະມ້າ ໂຈມຕີຊາວບ້ານ ດ້ວຍການຍິງປືນໃຫຍ່ ແລະ ຕິດຕາມດ້ວຍການຍິງປະທະກັນ ລະຫວ່າງ ທະຫານພະມ້າ ກັບ ກອງກໍາລັງປົກປ້ອງປະຊາຊົນ ຊຶ່ງເປັນກອງກໍາລັງ ທີ່ຖືກສ້າງຕັ້ງຂຶ້ນຫຼັງຈາກທີ່ທະຫານພະມ້າຢຶດອໍານາດ ໃນເດືອນກຸມພາ 2021.
ປະຊາຊົນຢູ່ບ້ານ ຊັນແມວ ໄດ້ກ່າວຕໍ່ນັກຂ່າວເອເຊັຽເສຣີ ຜແນກພາສາພະມ້າ ວ່າ:
“ມີທະຫານພະມ້າປະມານ 40-50 ຄົນ ເຂົ້າມາໝູ່ບ້ານ ແລ້ວຍິງປືນໃສ່ໝູ່ບ້ານ ເຂົ້າເຈົ້າໃຊ້ອາວຸດໜັກ ແລະ ປືນກົນ. ປະຊາຊົນຕ້ອງພາກັນໜີໄປທາງທິດໃຕ້.”
ຊາວບ້ານຄົນອື່ນໆ ໄດ້ກ່າວຕໍ່ເອເຊັຽເສຣີ ວ່າ:
“ທະຫານພະມ້າ ໄດ້ເລີ່ມຍິງປືນໃສ່ບ້ານເຮືອນປະຊາຊົນ ເປັນເຫດເຮັດໃຫ້ຊາວບ້ານຄົນນຶ່ງ ໄດ້ຮັບບາດເຈັບ.”
ຊາວບ້ານທີ່ໄດ້ຮັບຜົລກະທົບໃນໝູ່ບ້ານ ໄດ້ກ່າວວ່າ ລາວຮູ້ສຶກສິ້ນຫວັງ. ຊາວບ້ານທີ່ບ້ານຖືກທໍາລາຍ ໄດ້ກ່າວວ່າ:
“ທ່ານຄົງຈະຄິດພາບອອກວ່າ ຂ້ອຍຮູ້ສຶກແນວໃດ? ຂ້ອຍອາຍຸ 33 ປີ ແລະ ຂ້ອຍເຮັດວຽກໜັກຕລອດຊີວິດ ຊົ່ວວ່າຊິສ້າງເຮືອນໄດ້ ກັບເງິນທຸກກິີບກ່ອນທີ່ຂ້ອຍ ຈະເກັບຫອມອອມລິດມາໄດ້.”
ຊາວບ້ານທ່ານນີ້ ກ່າວຕື່ມອີກວ່າ:
“ເຮືອນຂອງລາວຖືກໄຟໄໝ້ ຫຼັງຈາກສ້າງມາໄດ້ບໍ່ຮອດນຶ່ງປີ. ລາວບໍ່ມີແນວໃດຊິເວົ້າເລີຍ ວ່າ ເສັຽໃຈຂນາດໃດ ເພາະວ່າ ເຮືອນຂອງລາວ ກ່ອນຈະສ້າງມາໄດ້ຕ້ອງໃຊ້ເງິນຢ່າງໜ້ອຍ 10 ລ້ານ ຢຽດ ສະກຸນເງິນພະມ້າ ປະມານ 60 ລ້ານກີບ.”
ມີຊາວບ້ານເຖິງ 1,000 ຄົນ ພາກັນໜີຈາກບ້ານ ໃນຊ້ວງທີມີທະຫານພະມ້າເຂົ້າມາໂຈມຕີ. ເຂົ້າເຈົ້າໄດ້ພາກັນຊອກຫາບ່ອນລີ້ໄພ ຢູ່ໃນປ່າ ແລະ ໝູ່ບ້ານໃກ້ຄຽງ.
ຊາວບ້ານອີກຄົນນຶ່ງກ່່າວວ່າ ຊາວບ້ານບໍ່ມີອາຫານ ແລະ ເສື້ອຜ້າ ແລະ ລາວຢາກຮ້ອງໃຫ້ ຍ້ອນວ່າ ລາວບໍ່ມີບ້ານຢູ່ແລ້ວ ແລະ ສົ່ງໄສໃນສິ່ງທີ່ທະຫານພະມ້າເຮັດ.
ຊາວບ້ານຄົນນີ້ ກ່າວວ່າ:
“ພວກເຮົາຈະມີບັນຫາສະເພາະໜ້າຫຼາຍທີ່ສຸດ ພວກເຮົາບໍ່ມີບ່ອນຢູ່ໃນຕອນນີ້, ແລະ ພວກເຮົາອາຈປຸກຕູບຢູ່ໃນປ່າ. ໃນເວລາທະຫານພະມ້າມາ ພວກເຮົາພາກັນຂ້ຽວໜີ້ ແລະ ບໍ່ໄດ້ເອົາຫຍັງຕິດໂຕມາ. ພວກເຮົາບໍ່ໄດ້ເອົາເຄື່ອງບ່ອນຢູ່ບ່ອນນອນມາ ແລະ ບໍ່ມີອາຫານການກິນພຽງພໍ, ແຕ່ວ່າ ຢ່າງໜ້ອຍພວກເຮົາກໍໄດ້ເອົາຜ້າຫົ່ມຕິດໂຕມານໍາ.”
ຊາວບ້ານອີກຄົນນຶ່ງກ່າວຕື່ມວ່າ:
“ສິ່ງສໍາຄັນ ກໍຄື ພວກເຮົາຄົງຈະນອນຫລັບ ຖ້າວ່າລະບອບຜເດັດການໝົດໄປ ຖ້າບໍ່ດັ່ງນັ້ນ ພວກເຮົາກໍຄົງຈະຢູ່ຢ່າງຢ້ານກົວ ທຸກມື້.”
ເຈົ້າໜ້າທີ່ທະຫານພະມ້າ ທີ່ຜ່ານມາ ກໍປະຕິເສດວ່າ ບໍ່ໄດ້ມີສ່ວນກ່ຽວຂ້ອງກັບການໂຈມຕີບ້ານເຮືອນຂອງປະຊາຊົນ ຕາມທີ່ມີການລາຍງານຂ່າວຢູ່ໃນເຂດສະກາງ ແລະ ຣັຖສິນ.
ກຸ່ມທີ່ເຮັດວຽກມະນຸດສທັມ ໄດ້ເຮັດການວິໃຈ ກ່ຽວກັບເຣື່ອງການພັທດ້ານເມືອງໃນປະເທດພະມ້າ ທີ່ໄດ້ມີການເກັບກໍາຜົລກະທົບຂອງການຣັຖປະຫານ ແລະ ຜົລກະທົບຕາມມາ ໄດ້ກ່າວຕໍ່ເອເຊັຽເສຣີ ວ່າ ພາຍໃນເດືອນມົກກະຣາ 2022 ມີບ້ານເຮືອນຂອງປະຊາຊົນຖືກທໍາລາຍເກືອບ 2,000 ຫຼັງ ໃນ 90 ບ້ານ ຢູ່ທົ່ວປະເທດ ໃນນັ້ນມີເຮືອນ 400 ຫຼັງຖືກເຜົາໝົດ ຢູ່ ເຂດ ແມັກເວ.
ໂຕເລກດັ່ງກ່າວ ບໍ່ໄດ້ລວມເອົາເຮືອນຊາວບ້ານທີ່ໄດ້ຮັບຄວາມເສັຽຫາຍໃນການໂຈມຕີ ໃນວັນທີອັງຄານທີ່ຜ່ານມາ.