ມີປະຊາຊົນ 20,000 ປາຍ ຄົນ ຕ້ອງຖິ້ມບ້ານເຮືອນຂອງຕົນເອງ ຢູ່ເຂດສະກາງ ໃນຂະນະທີ່ທະຫານພະມ້າ ໄດ້ເປີດການບຸກໂຈມຕີ ຢ່າງໜັກ ຕໍ່ກຸ່ມກອງກຳລັງປົກປ້ອງປະຊາຊົນ ຫຼື PDFD. ການໂຈມຕີ ໄດ້ມີຂຶ້ນ ຫຼັງຈາກນຶ່ງອາທິດ ທີ່ທະຫານພະມ້າໂຈມຕີ ທາງອາກາດໃສ່ໝູ່ບ້ານ ຢູ່ເຂດເມືອງກັນບາລູ ໃນເວລາທີ່ກີການເປີດຫ້ອງການບໍຣິຫານທ້ອງຖິ່ນ ເຮັດໃຫ້ມີຜູ້ເສັຽຊີວິດ 200 ຄົນ ຈາກໂຕເລກອັບເດດຫຼ້າສຸດ.
ເຂດສະກາງ ເປັນຈຸດເດືອດ ໃນການຕໍ່ຕ້ານທະຫານພະມ້າ ແລະ ເປັນສູນກາງການຮູ້ຣົບທີ່ຮ້າຍແຮງທີ່ສຸດ ນັບຕັ້ງແຕ່ທະຫານພະມ້າ ເຂົ້າມາຢຶດອຳນາດ ໃນວັນທີ 1 ກຸມພາ 2021.
ມີທະຫານພະມ້າປະມານ 100 ຄົນ ເຂົ້າມາບຸກທະລາຍໝູ່ບ້ານ ມີອິນດວງ ໃນວັນພຸດທີ່ຜ່ານມາ, ເຮັດໃຫ້ກຸ່ມກອງກຳລັງປົກປ້ອງປະຊາຊົນ 5 ຄົນ ເສັຽຊີວິດ ອີງຕາມຂໍ້ມູນຈາກເຈົ້າໜ້າທີ່ກຸ່ມກອງກຳລັງປົກປ້ອງປະຊາຊົນ ຜູ້ທີ່ບໍ່ປະສົງອອກຊື່. ກອງກຳລັງປົກປ້ອງປະຊາຊົນ ໄດ້ຕອບໂຕ້ ຍິງປະທະກັນກັບທະຫານພະມ້າ.
ຊາວບ້ານທີ່ຢູ່ໃກ້ບ້ານ ອອງຕາ ໄດ້ກ່າວວ່າ ຫຼັງຈາກທີ່ມີການຕໍ່ສູ້ກັນ, ພວກທະຫານພະມ້າ ກໍຍິງປືນໃຫຍ່ໃສ່ບ້ານອື່ນໆ ທຳລາຍວັດ ແລະ ເຜົາເຮືອນຂອງປະຊາຊົນ 3 ຫຼັງ ໃນໝູ່ບ້ານເຂົາເຈົ້າ.
ຊາວບ້ານ ໄດ້ກ່າວຕື່ມວ່າ ມີຊາວບ້ານ 5 ຄົນ ຖືກທະຫານພະມ້າ ຈັບໂຕໄປ ເພື່ອເປັນໂຕປະກັນ ໃນເວລາທີ່ເຂົາເຈົ້າອອກ ຈາກບ້ານອອງຕາ.
ຊາວບ້ານ ມີ ອິນ ດວງ ຜູ້ທີ່ບໍ່ປະສົງອອກຊື່ ໄດ້ກ່າວວ່າ ມີປະຊາຊົນຫຼາຍພັນຄົນ ຢູ່ບ້ານໃກ້ຄຽງ ໄດ້ໜີອອກຈາກບ້ານ. ຊາວບ້ານ ກ່າວຕື່ມອີກວ່າ ມີ 10 ໝູ່ບ້ານ ຢູ່ເຂດພາກໃຕ້ຂອງ ບ້ານ ມີ ອິນ ດວງ ທີ່ມີປະຊາຊົນປະມານ 18,000 ຄົນ ແລະ ມີປະຊາຊົນອີກ 2,000 ຄົນ ຢູ່ບ້ານທີ່ຢູ່ພາກເໜືອຂອງບ້ານ ມີ ອິນ ດວງ ໄດ້ພາກັນຫຼົບໜີ.
ກອງກຳລັງປົກປ້ອງປະຊາຊົນ ຜູ້ທີ່ບໍ່ປະສົງອອກຊື່ ໄດ້ກ່າວຕໍ່ວິທຍຸ ເອເຊັຽເສຣີ ວ່າ 21 ບ້ານ ບໍ່ມີຄົນຢູ່ເລີຍ. ວິທຍຸເອເຊັຽເສຣີ ໄດ້ໂທຫາ ໂຄສົກທະຫານພະມ້າ ຢູ່ເຂດສະກາງ ເພື່ອຖາມຂໍ້ມູນເລື່ອງນີ້, ແຕ່ ບໍ່ມີໃຜຮັບໂທລະສັບ. ໃນເດືອນຕຸລາ 2022 ທີ່ຜ່ານມາ, ອົງການສະຫະປະຊາຊາຕ ໄດ້ປະກາດວ່າ ມີປະຊາຊົນ 50,000 ຄົນ ໄດ້ຫຼົບໜີຈາກການສູ້ຣົບ ຢູ່ເຂດສະກາງ ນັບແຕ່ທະຫານພະມ້າເຂົ້າມາຢຶດອຳນາດໃນເດືອນກຸມພາ 2021. ຊາວເມືອງດັ່ງກ່າວ ຕ້ອງຕໍ່ຕ້ານກັບທະຫານພະມ້າ ທີ່ຍຶດອຳນາດມາແຕ່ ວັນທີ 1 ກຸມພາ 2021, ໂດຍ ເຂົ້າເຈົ້າມີການຈັດຕັ້ງກຸ່ມ ກອງກຳລັງປົກປ້ອງປະຊາຊົນ ຫຼື PDF ຫຼັງຈາກທະຫານເຂົ້າມາຍຶດອຳນາດ ຈາກພັກສັນນິບາດແຫ່ງຊາຕ ເພື່ອປະຊາທິປະໄຕຂອງພະມ້າ ແລະ ມີການຕັດສັນຍາໂທລະສັບ ແລະ ອິນເຕີເນັດ.
ປະຊາຊົນທີ່ໜີການສູ້ຣົບ ໄດ້ກ່າວວ່າ:
“ພວກເຮົາຕ້ອງໜີປະເລົ້າເຂົ້າ, ສັດລ້ຽງ ບໍ່ວ່າ ຈະເປັນງົວ ແລະ ແບ້. ພວກເຮົາເປັນຫ່ວງສັດລ້ຽງ ຖ້າວ່າ ສັດລ້ຽງຖືກຍິງຕາຍ ພວກເຮົາຈະບໍ່ມີຫຍັງເຫຼືອ ພວກເຮົາບໍ່ມີວຽກເຮັດ ແລະ ຍາກທີ່ຫາລ້ຽງຄອບຄົວ.”
ນອກຈາກນີ້ ປະຊາຊົນຊາວເມືອງປາເລ ໄດ້ກ່າວວ່າ ມີປະຊາຊົນ 4 ຄົນເສັຽຊີວິດ ລວມມີເດັກຍິງ ຍ້ອນການໂຈມຕີຂອງທະຫານພະມ້າ ຫຼັງຈາກທີ່ຊາວບ້ານ ໄດ້ພາກັນກັບຄືນມາບ້ານ ໃນຂະນະທີ່ ເຂົາເຈົ້າກຳລັງລ້ຽງງົວ ແລ ເກືອໝູ ຢູ່.
ແຫຼ່ງຂ່າວ ຈາກເມືອງປາເລ ໄດ້ໃຫ້ສຳພາດວ່າ ຜູ້ທີ່ຖືກເຄາະຮ້າຍ ເປັນແມ່ຍິງ ອາຍຸ 45 ປີ ແລະ ເດັກຍິງ ອາຍຸ 15 ປີ ແລະ ແມ່ຍິງ ອາຍຸ 54 ປີ, ແລະ ອີກ ນຶ່ງຄົນ ເປັນຜູ້ຊາຍ.
ຊາວບ້ານກ່າວວ່າ ເຫດເກີດໃນຕອນສວາຍ ທະຫານພະມ້າພາກັນເຂົ້າມາ ທາງຕາເວັນອອກຂອງບ້ານ ແລະ ຊາວບ້ານກໍພາກັນໜີ. ຊາວບ້ານກ່າວຕື່ມວ່າ ມີຜູ້ຍິງ 2 ຄົນ ແລະ ເດັກຍິງ 1 ຄົນ ເສັຽຊີວິດ, ທີ່ຖືກພົບສົບຢູ່ຫ້ອງນ້ຳ ແລະ ມີຜູ້ຊາຍເສັຽຊີວິດ ທີ່ຖືກເຊືອກມັດຄໍຢູ່.
ໃນທີ່ສຸດ ພວກທະຫານ ກໍອອກຈາກໝູ່ບ້ານ ຊາວບ້ານຈຶ່ງເຂົ້າມາພົບສົບຜູ້ເສັຽຊີວິດ ຫຼັງຈາກທີ່ເຂົ້າເຈົ້າເຂົ້າມາບ້ານ. ຊາວບ້ານ ໄດ້ກ່າວ ຕໍ່ວິທຍຸ ເອເຊັຽເສຣີ ຜແນກພາສາພະມ້າ ວ່າ ສົບຜູ້ເສັຽຊີວິດ ຖືກຝັງ ນອກໝູ່ບ້ານ. ຍັງບໍ່ຈະແຈ້ງວ່າ ເປັນຍ້ອນສາເຫດຫຍັງ ໜ່ວຍງານຂອງທະຫານພະມ້າ ຈຶ່ງບຸກໂຈມຕີບ້ານ ແລ້ວສັງຫານປະຊາຊົນ. ປະຊາຊົນ ທ່ານນຶ່ງ ໄດ້ກ່າວວ່າ ຊາວບ້ານກຳລັງລ້ຽງງົວ ແລະ ເກືອໝູຢູ່ ໃນບ້ານ ແລະ ເຂົາເຈົ້າກໍຖືກຍິງ ໂດຍທະຫານພະມ້າ.
ປະຊາຊົນ ກ່າວວ່າ:
“ພວກທະຫານພະມ້າ ບໍ່ສົນກັບຊີວິດມະນຸສ ປະຊາຊົນຖືກທໍລະມານ ແລະ ຖືກສັງຫານ ພວກເຮົາມີການບັນທຶກວີດີໂອ ຢູ່ໃນພື້ນທີ່ ທີ່ມີການສັງຫານ ແລະ ຫຼຸມສົບ.”
ປະຊາຊົນກ່າວວ່າ ມີການສຳເນົາວີດີໂອ ໃຫ້ແກ່ໜ່ວຍງານກອງກຳລັງປົກປ້ອງປະຊາຊົນ ເຊິ່ງເຂົາເຈົ້າກ່າວວ່າ ເຂົາເຈົ້າຈະສົ່ງວີດີໂອດັ່ງກ່າວ ໃຫ້ໂຕແທນຣັຖບານເງົາຂອງພະມ້າ.
ແຫຼ່ງຂ່າວ ຈາກກຸ່ມກອງກຳລັງປົກປ້ອງປະຊາຊົນ ໄດ້ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າວ່າ: “ຜູ້ທີ່ຕົກເປັນເຫຍື່ອ ແມ່ນພົລເຮືອນ ແລະ ບໍ່ມີສ່ວນກ່ຽວຂ້ອງຫຍັງກັບ ຝ່າຍຕໍ່ຕ້ານທະຫານ.”
ນອກຈາກນີ້, ທະຫານພະມ້າ ໄດ້ບຸກທະລາຍ ສະມາຊິກສັນນິບາດແຫ່ງຊາຕ ເພື່ອປະຊາທິປະໄຕ ແລະ ໄດ້ໃຫ້ສານຕັດສິນ ຈຳຄຸກຕລອດຊີວິດ ສະມາຊິກພັກຫຼາຍຄົນ ຢູ່ ເຂດພາກໃຕ້ຂອງຣັຖຊານ.
ສານພະມ້າ ໄດ້ຕັດສິນປະຫານຊີວິດ ທ້າວ ເພກອນ ແລະ ທ້າວ ເມືອງເຢັນ ແລະ ທ້າວ ໂຈເຊບ, ນອກຈາກນີ້ ສານທະຫານພະມ້າ ຢູ່ພາກເໜືອເຂດຣັຖສະກາງ ໄດ້ສັ່ງຕັດສິນຈຳຄຸກ ຜູ້ຍິງຊາວພະມ້າ 9 ຄົນ ເປັນເວລາ 12 ປີ ຍ້ອນພວກເຂົາຖືກກ່າວຫາວ່າ ເປັນກຸ່ມກອງກຳລັງປົກປ້ອງປະຊາຊົນ ຫຼື PDFD. ກຸ່ມກອງກຳລັງປົກປ້ອງປະຊາຊົນ ຖືກຈັດຕັ້ງຂຶ້ນໂດຍປະຊາຊົນພະມ້າ ເພື່ອຕໍ່ຕ້ານກຸ່ມທະຫານພະມ້າທີ່ຣັຖປະຫານຢຶດອຳນາດຈາກຣັຖບານພະມ້າທີ່ມາຈາກການເລືອກຕັ້ງໃນເດືອນກຸມພາ 2021 ທີ່ຜ່ານມາ. ບັນດາຜູ້ຍິງທັງ 9 ຄົນຖືກດຳເນີນຄະດີ ພາຍໃຕ້ກົດໄອຍະການເສິກຂອງທະຫານພະມ້າ ໂດຍສານທະຫານພະມ້າ ແລະ ເຂົາເຈົ້າຖືກຕັດສິນຈຳຄຸກໃນເດືອນຕຸລາ 2022 ທີ່ຜ່ານມາ ອີງຕາມແຫຼ່ງຂ່າວ ທີ່ໃກ້ຊິດຄ້າຍຄຸມຂັງ ແລະ ເຈົ້າໜ້າທີ່ກຸ່ມກອງກຳລັງປົກປ້ອງປະຊາຊົນ. ຂໍ້ມູນດັ່ງກ່າວ ຕ້ອງໃຊ້ເວລາ 1 ເດືອນ ກ່ອນທີ່ຈະມີການເຜີຍແຜ່ ຍ້ອນວ່າ ເຈົ້າໜ້າທີ່ທະຫານພະມ້າ ບໍ່ໄດ້ແຈ້ງໃຫ້ຄອບຄົວຜູ້ທີ່ຖືກສັ່ງຈຳຄຸກຮັບຮູ້. ຜູ້ຍິງທີ່ຖືກສານ ຕັດສິນທັງໝົດ ມີອາຍຸປະມານ 20 ປີ ເຂົາເຈົ້າໄດ້ຖືກຈັບໂຕ ໃນເວລາທີ່ທະຫານພະມ້າ ໄດ້ບຸກລະທາຍຄ້າຍ ຂອງກຸ່ມກອງກຳລັງປົກປ້ອງ ປະຊາຊົນ ຢູ່ເມືອງກາເລ ໃນວັນທີ 16 ພຶສຈິກາ 2021 ທີ່ຜ່ານມາ ເຊິ່ງເຂົ້າເຈົ້າຖືກຄຸມຂັງຢູ່ໃນຄຸກເມືອງກາເລ. ພວກເຂົາແຕ່ລະຄົນ ໄດ້ຮັບໂທດຈຳຄຸກ 2 ປີ ພາຍໃຕ້ມາຕຣາ 505 ແລະ ອີກ 10 ປີ ພາຍໃຕ້ມາຕຣາ 50 ຂອງກົດໝາຍ ຕ້ານການກໍ່ການຮ້າຍຂອງທະຫານພະມ້າ. ເຈົ້າໜ້າທີ່ກຸ່ມກອງກຳລັງ ປົກປ້ອງປະຊາຊົນ ຜູ້ທີ່ບໍ່ປະສົງອອກຊື່ ໄດ້ກ່າວວ່າ ແມ່ຍິງເຫຼົ່ານັ້ນ ບໍ່ໄດ້ໂທດໜັກ ແຕ່ ເຂົາເຈົ້າກໍຖືກບັງຄັບໃຫ້ເຮັດວຽກຢູ່ໃນຄຸກ.
ທ່ານ ກ່າວຕື່ມອີກວ່າ: “ແມ່ຍິ່ງເຫຼົ່ານັ້ນ ທີ່ຢູ່ໃນຄຸກ ຍັງມີສຸຂພາບທີ່ດີ ເຂົາເຈົ້າເຮັດວຽກຕາມທີ່ເຈົ້າໜ້າທີ່ສັ່ງ ໂດຍເຂົາເຈົ້າເຮັດວຽກຕັດຫຍິບ.”
ແມ່ຍິງທີ່ຖືກຈັບນັ້ນ ຊື່ວ່າ ລາ ຕັນ ຫວີ, ມາ ສອນ ດວງ, ຄາ ລອນ ສານ, ລາ ມອມ ຄາມ, ວັນ ລາ ລອນ, ມາ ລາ ປຽນ ເປວ, ຊາມ ຊູ ຊາ ອຳ, ແມນ ລຳ ດິມ, ນິ ອອງ ດອນ ກິອຽນ.
ນາງ ລາ ຕັນ ຫວີ ໄດ້ບອກຄອບຄົວຂອງລາວ ວ່າ ຜູ້ຍິງທັງໝົດ ຖືກທະຫານພະມ້າຈັບໂຕໄປ ເປັນເວລາ ເກືອບ 5 ເດືອນ. ໃນເວລານັ້ນ, ເຂົາເຈົ້າບໍ່ສາມາດຕິດຕໍ່ຫາໃຜໄດ້ ຢູ່ນອກຄຸກ. ຕໍ່ມາເຂົາເຈົ້າຈຶ່ງໄດ້ຮັບອະນຸຍາດໃຫ້ຕິດຕໍ່ຫາຄອບຄົວ ແຕ່ວ່າ ບໍ່ອະນຸຍາດໃຫ້ບອກຄອບຄົວວ່າ ເຂົາເຈົ້າຖືກສານຕັດສິນຕອນໃດ ເຊິ່ງຂໍ້ມູນດັ່ງກ່າວ ຫາກໍ່ຖືກຮັບຮູ້ໃນທ້າຍປີ 2022 ໂດຍ ຜ່ານທະນາຍຄວາມ ແລະ ເຈົ້າໜ້າທີ່ຄຸກ. ນອກຈາກນີ້, ໃນເດືອນຕຸລາ ປີ 2022 ທີ່ຜ່ານມາ, ທ່ານ ຕູຣູ ຄູໂບຕ້າ ເປັນນັກຂ່າວຍີ່ປຸ່ນ ຖືກສານທະຫານພະມ້າຕັດສິນຈຳຄຸກ 7 ປີ ໃນຂະນະທີ່ ລາວເອງກຳລັງຖ່າຍວີດີໂອ ການປະທ້ວງຂອງປະຊາຊົນຊາວພະມ້າ ໂດຍ ສານທະຫານພະມ້າຕັດສິນວ່າ ລາວມີຄວາມຜິດຂໍ້ຫາປະຈານປະເທດພະມ້າ ແລະ ລະເມີດກົດໝາຍການສື່ສານທາງອິນເຕີເນັດ. ນັກຂ່າວ ຍີ່ປຸ່ນຄົນນີ້ ຖືກສານຕັດສິນ 3 ປີ ໃນຂໍ້ຫາທີນຶ່ງ ແລະ ຖືກຕັດສິນອີກ 7 ປີ ໃນຂໍ້ຫາທີສອງ, ແຕ່ວ່າ ໃນການຕັດສິນກໍໄດ້ລວມເອົາການລົງໂທດ 7 ປີ ເທົ່ານັ້ນ. ນອກຈາກນີ້ ນັກຂ່າວຄົນນີ້ ຍັງຈະຖືກດຳເນີນຄະດີອີກໃນຂໍ້ຫາທີ 3 ວ່າດ້ວຍການລະເມີດກົດໝາຍກວດຄົນເຂົ້າເມືອງ.