ທະຫານພະມ້າ ສັງຫານໝູ່

ມີປະຊາຊົນ ເສັຽຊີວິດ 29 ຄົນ ໃນນັ້ນລວມທີເດັກນອ້ອຍ 11 ຄົນ ໃນເວລາທີ່ ທະຫານພະມ້າ ຖິ້ມລະເບີດລົງໃສ່ເຂດພາກເໜືອ ຂອງຣັຖກະສິນ ເຊິ່ງເປັນເຂດຄ້າຍຜູ້ອົບພະຍົບ ອີງຕາມເຈົ້າໜ້າທີ່ຖແລງຂ່າວ ອິສຣະ ຂອງຣັຖກະສິນ.​ ພັກເອກ ນໍບຸນ ໄດ້ກ່າວວ່າ ຜູ້ເຄາະຮ້າຍທັງໝົດ ເປັນປະຊາຊົນທີ່ອົບພະຍົບ ທີ່ດໍາລົງຊີວິດ ຢູ່ໃກ້ກັບເຂດໄລຊາ ໃນເຂດຊາຍແດນເຂດພູດອຍ ລະຫວ່າງ ຣັຖກະສິນ ແລະ ປະເທດຈີນ. ເຂດໄລຊາ ເປັນສູນບັນຊາການໃຫຍ່ຂອງ ກອງກໍາລັງກະສິນ ໄດ້ຕໍ່ສູ້ກັບທະຫານພະມ້າ ມາຫຼາຍທົດສະວັດ ແລະ ຄວບຄຸມຢູ່ເຂດພາກເໜືອຂອງພະມ້າ.

ທ່ານ ນໍບຸນ ໄດ້ກ່າວອ້າງວ່າ ທະຫານພະມ້າ ໄດ້ເລັງເປົ້າໝາຍໂຈມຕີ ສູນບັນຊາການໃຫຍ່ຂອງກອງກໍາລັງກະສິນ ເຊິ່ງການໂຈມຕີ ໄດ້ມີຂຶ້ນໃນຕອນທ່ຽງຄືນ ວັນຈັນ ຕາມເວລາທ້ອງຖິ່ນ ຂອງພະມ້າ. ໃນບັນດາຜູ້ເສັຽຊີວິດ 29 ຄົນ ມີເດັກນ້ອຍ 11 ຄົນ ລວມຢູ່ນໍາ ເຊິ່ງໄດ້ນໍາມາທໍາພິທີເຜົາ ໃນວັນອັງຄານ. ນອກຈາກນີ້ ມີປະຊາຊົນ 57 ຄົນ ໄດ້ຮັບບາດເຈັບ ແລະ ຖືກນໍາສົ່ງໄປປິ່ນປົວຢູ່ໂຮງໝໍ ໃກ້ຄຽງ. ນອກຈາກນີ້ ເຈົ້າໜ້າທີ່ທ້ອງຖິ່ນ ຍັງຣາຍງານວ່າ ປັດຈຸບັນ ກໍາລັງຄົ້ນຫາຜູ້ທີ່ສູນຫາຍ ແລະ ເສັຽຊີວິດ ແລະ ກໍາລັງມີການພິສູດສົບ ຜູ້ເສັຽຊີວິດ.

ທ່ານ ນໍບຸນ ໄດ້ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າ ວ່າ ນີ້ບໍ່ມີຮູບແບບການໂຈມຕີຂອງທະຫານພະມ້າແບບປົກຕິ ເຖິງວ່າ ທະຫານພະມ້າ ຈະຍິງໂຈມຕີ ເຂດ ໄລຊາ ດ້ວຍປືນໃຫຍ່ກໍຕາມ, ແຕ່ວ່າ ການໂຈມຕີຄັ້ງນີ້ ອາດຈະມາຈາກການໃຊ້ໂດຣນ.​ 

ທ່ານ ກ່າວຕື່ມວ່າ ມັນບໍ່ແມ່ນປືນໃຫຍ່ ແຕ່ ມັນເປັນຫຍັງຄ້າຍຄືກັບຍົນ ຫຼື ໂດຣນ. ຖ້າວ່າ ມັນເປັນຍົນສູ້ຣົບ ສຽງມັນຕ້ອງດັງ ແລະ ບໍ່ແນ່ໃຈວ່າ ມັນເປັນລະເບີດຊະນິດໃດ.​

ທ່ານ ກ່າວຕື່ມວ່າ ທະຫານພະມ້າ ໄດ້ນາບຂູ່ພວກເຮົາ ທີ່ພວກເຮົາໄດ້ເຂົ້າຮ່ວມການເຈຣະຈາ ສັນຕິພາບ ໃນກອງກໍາລັງຊົນເຜົ່າຕ່າງໆ. ປະຊາຊົນຢູ່ເຂດ ໄລຊາ ຜູ້ທີ່ ໃຫ້ການຊ່ວຍເຫຼືອ ໄດ້ກ່າວຕໍ່ເອເຊັຽເສຣີ ວ່າ ຜູ້ທີ່ໄດ້ຮັບບາດເຈັບ ຖືກນໍາສົ່ງໄປໂຮງໝໍໃນຕອນສວຍ ຂອງວັນອັງຄານ.

ຊາວບ້ານ ທ່ານນີ້ ໄດ້ກ່າວວ່າ ລາວໄດ້ເຫັນເດັກນ້ອຍທີ່ໄດ້ຮັບບາດເຈັບ ແລະ ເອົານົມໃຫ້້ເດັກນ້ອຍ ຜູ້ທີ່ແມ່ ຂອງພວກເຂົາເສັຽຊີວິດ. ພວກເຮົາຕ້ອງໃຫ້ການຊ່ວຍເຫຼືອເດັກນ້ອຍເຫຼົ່ານັ້ນ.​

ປະຊາຊົນ ທ່ານ ນີ້ ໄດ້ກ່າວຕືື່ມວ່າ ນອກຈາກປະຊາຊົນ 57 ຄົນ ທີ່ໄດ້ຮັບບາດເຈັບແລ້ວ ຍັງມີຫຼາຍກວ່ານັ້ນ ໂດຍ ສະເພາະ ຜູ້ທີ່ບໍ່ໄດ້ໄປໂຮງໝໍ ຍ້ອນວ່າ ຄ້າຍຜູ້ອົບພະຍົບ ຖືກທໍາລາຍຈາກການໂຈມຕີ.​

ຊາວບ້ານຄົນອື່ນໆ ຜູ້ທີ່ເຫັນການໂຈມຕີ ໄດ້ກ່າວວ່າ ມີເຮືອນປະຊາຊົນຫຼາຍຫຼັງຖືກທໍາລາຍ ຍ້ອນການໂຈມຕີ ຈາກລະເບີດທໍາລາຍລ້າງສູງ.​ ນອກຈາກນີ້ ຍອດຜູ້ເສັຽຊີວິດຂອງກຸ່ມຕໍ່ຕ້ານພະມ້າ ໄດ້ສູງຂຶ້ນໃນສອງເດືອນທີ່ຜ່ານມາ ຫຼາຍກວ່າ 100 ຄົນ ໃນເດືອນສິງຫາ ແລະ ກັນຍາ ພ້ອມກັນ ອີງຕາມ ອົງກອນທີ່ຕິດຕາມສັນຕິພາບ ຂອງພະມ້າ ເຊິ່ງໄດ້ຮວບຮວມຂໍ້ມູນກ່ຽວກັບຂໍ້ຂັດແຍ່ງ ທາງທະຫານ ໃນປະເທດ. ອັດຕຣາການເສັຽຊີວິດ ທີ່ສູງຂຶ້ນ ເປັນໂຕຊີ້ວັດ ວ່າ ສົງຄາມກາງເມືອງ ລະຫວ່າງ ທະຫານພະມ້າ ແລະ ກູ່ມຕໍ່ຕ້ານ ຍິ່ງທະວີຄວາມເຂັ້ມຂຸ້ນກວ່າເກົ່າ ນັບແຕ່ ທະຫານພະມ້າເຂົ້າມາຍຶດອໍານາດໃນປີ 2021.

ໃນ 6 ເດືອນ ທີ່ຜ່ານມາ ນັບແຕ່ ເດືອນ ກຸມພາ ຫາ ເດືອນ ກໍຣະກະດາ, ມີກຸ່ມກອງກໍາລັງປົກປ້ອງປະຊາຊົນ 132 ຄົນ ເສັຽຊີວິດ.​

ມີສະມາຊິກກຸ່ມກອງກໍາລັງປົກປ້ອງ ປະຊາຊົນຫຼາຍຄົນ ເປັນປະຊາຊົນທັມດາ ຜູຸ້ທີ່ ຈັບອາວຸດສູ້ກັບທະຫານພະມ້າ ແລະ ບາງຄັ້ງ ກໍຂາດການພົວພັນ ຫຼື ປະສານງານ ລະຫວ່າງ ໜ່ວຍງານທີ່ແຕກຕ່າງກັນ ອີງຕາມແຫຼ່ງຂ່າວ ທີ່ກ່າວວິທຍຸ ຕໍ່ເອເຊັຽເສຣີ.

ຮ້ອຍເອກ ລິນ ເຈ ອອງ, ສະມາຊິກຂະບວນການ ອະຣິຍະຂັດຂືນ ໄດ້ກ່່າວວ່າ ເມື່ອສົງຄາມ ມີຄວາມດຸເດືອດຂຶ້ນ, ທຸກຝ່າຍກໍຈໍາເປັນຕ້ອງໄດ້ໃຊ້ຍຸທວິທີ ແລະ ອາວຸດ ແລະ ລູກປືນ ທີ່ມີຄວາມແຕກຕ່າງ ນັ້ນໄດ້ສະແດງໃຫ້ເຫັນວ່າ ມີບັນຫາສໍາລັບ ກອງກໍາລັງປົກປ້ອງປະຊາຊົນ ຫຼື PDF.

ທ່ານກ່າວວ່າ ກຸ່ມກອງກໍາລັງຕໍ່ຕ້ານທະຫານພະມ້າ ຕ້ອງການອາວຸດ ແລະ ການຝຶກແອບຍຸທວິທີ ແລະ ການປະສານງານ.

ທ່ານ ກ່່າວຕື່ມວ່າ: ຖ້າ ທ່ານ ເບິ່ງພື້ນທີ່ ບ່ອນທີີ່ມີການສັງຫານເກີດຂຶ້ນ ພື້ນທີ່ດັ່ງກ່າວ ຈະຂາດການປະສານງານກັນ ລະຫວ່າງ ສະມາຊິກໃນກຸ່ມ, ຂາດຂໍ້ມູນຂ່າວສານ ແລະ ຍັງຂາດຄວາມເຊື່ອໝັ້ນ ກັນລະຫວ່າງ ໜ່ວຍງານກອງກໍາລັງປົກປ້ອງປະຊາຊົນ.  

ອີງຕາມຂໍ້ມູນຈາກໜ່ວຍງານ ຕິດຕາມສັນຕິພາບຂອງພະມ້າ, ຍອດຜູ້ເສັຽຊີວິດຢູ່ເຂດສະກາງ 51 ຄົນ, ຢູ່ ເຂດແມັກເວ 6 ຄົນ, ຢູ່ຣັຖສິນ 20 ຄົນ, ຣັຖກະຢາ 2 ຄົນ, ເຂດທະນິຕາຣີ 10 ຄົນ, ມັນດາເລ 3 ຄົນ, ຣັຖກະສິນ 1 ຄົນ, ເຂດພະໂຄ 2 ຄົນ, ຣັຖກະຢິນ 5 ຄົນ ແລະ ຢູ່ຣັຖສານ 1 ຄົນ.

ໃນວັນທີ 18 ກັນຍາ, ມີສະມາຊິກກອງກໍາລັງປົກປ້ອງ ປະຊາຊົນຖືກສັງຫານ 18 ຄົນ ໃນການຕໍ່ສູ້ກັນລະຫວ່າງ ກຸ່ມກອງກໍາລັງປົກປ້ອງປະຊະຊາຊົນ ແລະ ທະຫານພະມ້າ ຢູ່ ເມືອງປາໂລ ຢູ່ເຂດ ທານິນຕາຣີ. ພວກເຂົາເຈົ້າຖືກຈັບໂຕ ແລະ ຖືກສັງຫານ ຍ້ອນຂາດກໍາລັງພົນ ແລະ ອາວຸດ ອີງຕາມຂໍ້ມູນ ຈາກບຸກຄົນທີ່ຮັບຜິີດຊອບ ກໍາລັງພົນ ຢູ່ ເຂດເມືອງມີອີກ.​

ບຸກຄົນດັ່ງກ່າວ ໄດ້ກ່າວວ່າ ມີທະຫານພະມ້າ 200 ຄົນ ປິດລ້ອມ ກຸ່ມກອງກໍາລັງປົກປ້ອງປະຊາຊົນ ແລະ ໄດ້ຈັບເຂົາເຈົ້າຢູ່ໃນເຮືອນ ຢູ່ເຂດໝູ່ບ້ານຕາອາງ ຍ້ອນວ່າ ລູກປືນເຂົາເຈົ້າໝົດ ໃນເວລາ ທີ່ຍິງຕໍ່ສູ້ກັນ.

ໃນວັນທີ 22 ກັນຍາ, ທະຫານພະມ້າ ໄດ້ຈັບໂຕ ແລະ ສັງຫານ ສະມາຊິກກອງກໍາລັງປົກປ້ອງປະຊາຊົນ ຢູ່ໃກ້ໝູ່ບ້ານ ເຊຢາຕໍ ເຂດສະກາງ ອີງຕາມຂໍ້ມູນຈາກ ຮ້ອຍເອກ ຂິນ ຕວາງ.

ທ່ານ ກ່າວວ່າ ກຸ່ມກອງກໍາລັງປົກປ້ອງປະຊາຊົນ ບໍ່ມີເວລາແລ່ນ ຍ້ອນວ່າ ເຂົາເຈົ້າກໍາລັງອົບພະຍົບປະຊາຊົນ. ນອກຈາກນີ້ ຂໍ້ມູນທາງດ້ານຄວາມໝັ້ນຄົງ ກໍຮົ່ວໄຫຼ ແລະ ເຂົາເຈົ້າບໍ່ໄດ້ຮັບຂໍ້ມູນຢ່າງທັນການ.

ທ່ານ ຕັນ ຊໍ ເນັງ ນັກວິຈານການເມືອງ ໄດ້ກ່າວວ່າ ກອງກໍາລັງປົກປ້ອງປະຊາຊົນ ຈະຕ້ອງໄດ້ປັບໂຕ ກັບການປ່ຽນແປງ ທາງດ້ານຍຸທວິທີ ຂອງປະທານພະມ້າ. ກອງກໍາລັງຝ່າຍຕໍ່ຕ້ານ ໄດ້ຮັບຄວາມເສັຽຫາຍຫຼາຍ ຍ້ອນວ່າ ເຂົາເຈົ້າຂາດຍຸທສາດ ທາງການທະຫານ ຂັ້ນພື້ນຖານ. ທ່ານ ຍັງກ່າວຕື່ມວ່າ ມັນບໍ່ແມ່ນສະຖານະການ ຄືອະດີດ ແບບທີ່ ທະຫານພະມ້າໃຊ້ປືນໃຫຍ່ໂຈມຕີ.​

ວິທຍຸ ເອເຊັຽເສຣີ ຜແກນພາສາພະມ້າ ພະຍາຍາມ ຕິດຕໍ່ຫາ ພົນຕຣີ ຊໍ ມິນ ຕັນ ກ່ຽວກັບການສັງຫານສະມາຊິກ ກຸ່ມກອງກໍາລັງປົກປ້ອງ ປະຊາຊົນ, ແຕ່ ທ່ານ ບໍ່ຕອບ.

ກຸ່ມທະຫານພະມ້າ ໄດ້ຈັບໂຕ ແລະ ກັກຂັງສະມາຊິກ ພັກສັນນິບາດແຫ່ງຊາຕ ເພື່ອປະຊາຊົນທິປະໄຕຂອງພະມ້າ ຫຼື NLD ເກືອບ 2,000 ຄົນ ນັບແຕ່ທະຫານພະມ້າເຂົ້າມາຍຶດອໍານາດ ຈາກຣັຖບານພົລເຮືອນ. 

ພັກສັນນິບາດແຫ່ງຊາຕ ເພື່ອປະຊາທິປະໄຕ ຂອງພະມ້າ ຫຼື NLD ໄດ້ອອກຖແລງການ ເນື່ອງໃນວັນຄົບຮອບ 35 ປີ ຂອງການສ້າງຕັ້ງພັກ.​

ພັກ NLD ຂອງພະມ້າ ໄດ້ເຂົ້າມາບໍຣິຫານປະເທດ ໃນປີ 2015 ຫຼັງຈາກເອົາຊະນະພັກຂອງຝ່າຍທະຫານພະມ້າ ໃນການເລືອກຕັ້ງທົ່ວໄປ ຂອງພະມ້າໃນເວລານັ້ນ, ແຕ່ວ່າ ໃນປີ 2021 ທະຫານພະມ້າ ໄດ້ຣັຖປະຫານຍຶດອໍານາດ ແລະ ຈັບ ຍານາງ ອອງ ຊານ ຊູ ຈີ, ຫົວໜ້າພັກ NLD ໂດຍໃສ່ຂໍ້ຫາວ່າ ພັກຂອງຍານາງ ສໍ້ໂກງການເລືອກຕັ້ງ.

ທ່ານ Phil Robertson, ຮອງຜູ້ອໍານວຍການ ອົງການສິ້ງຊອມ ດ້ານສິດທະມະນຸສ ປະຈໍາເຂດເອເຊັຽ ໄດ້ກ່າວຕໍ່ນັກຂ່າວວ່າ:

“ມັນເປັນທີ່ແຈ້ງຂາວແລ້ວວ່າ ທະຫານພະມ້າທໍາລາຍ ຄວາມເປັນປະຊາທິປະໄຕ ແລະ ເຮັດໃຫ້ປະຊາຊົນພະມ້າ ຕ້ອງອົບພະຍົບ ເຊິ່ງມັນເປັນສິ່ງທີ່ຮັບບໍ່ໄດ້ ແລະ ປະຊາຊົນຄົມໂລກຕ້ອງອອກມາດໍາເນີນການ ເຣື່ອງນີ້.”

ນັບຕັ້ງນັ້ນເປັນຕົ້ນມາ, ກຸ່ມທະຫານພະມ້າ ໄດ້ຈັບໂຕສະມາຊິກພັກ NLD ເກືອບ 2,000 ຄົນ, ໃນນັ້ນ ມີສະມາຊິກພັກ ປະມານ 1,200​ ຄົນ ຍັງຄົງຖືກຄຸມຂັງຢູ່ ອີງຕາມການຣາຍງານ ຂອງພັກ NLD.​

ທ່ານ ຂິນຊວງ, ກໍາມະການບໍຣິຫານພັກ ໄດ້ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າ ວ່າ ກຸ່ມທະຫານພະມ້າ ໄດ້ທໍາລາຍຄວາມຝັນ ຂອງປະຊາຊົນພະມ້າ ຜູ້ທີ່ລົງຄະແນນເລືອກພັກ NLD ເມື່ອ 8 ປີ ກ່ອນ.​

ທ່ານ ກ່າວວ່າ ທະຫານພະມ້າ ຍັງຄົງຈັບ ແກນນໍາພັກ NLD ແບບຜິດກົດໝາຍ ແລະ ທໍາລາຍຫ້ອງການຂອງພັກ, ສັງຫານສະມາຊິກພັກ. ເປັນທີ່ແຈ້ງຂາວແລ້ວວ່າ ກຸ່ມທະຫານພະມ້າ ກໍາລັງພະຍາຍາມ ທໍາລາຍພັກ NLD ຢ່າງເປັນລະບົບ. ກຸ່ມທະຫານພະມ້າ ໄດ້ບຸກທໍາລາຍຫ້ອງການ ຂອງພັກ NLD ໃນທົ່ວປະເທດພະມ້າ ຢ່າງໜ້ອຍ 160 ຄັ້ງ, ທໍາລາຍຕຶກອາຄານໄປແລ້ວເກືອບ 400 ແຫ່ງ, ແລະ ຍຶດຊັບສິນສະມາຊິກພັກ NLD 370 ທ່ານ ລວມທັງເຮືອນ ຂອງສະມາຊິກພັກ 180 ທ່ານ, ຊັບສິນອື່ນ ແລະ ຍານພະຫະນະ ອີງຕາມການຣາຍງານ ຂອງພັກ NLD.

ບົດຣາຍງານຍັງລະບຸວ່າ ກຸ່ມທະຫານພະມ້າ ໄດ້ສັງຫານສະມາຊິກພັກ NLD ໄປແລ້ວຢ່າງ 100 ຄົນ ລວມທັງສະມາຊິກ ສະພາແຫ່ງຊາຕຂອງພະມ້າ. ຕໍ່ກັບຖແລງການ ແລະ ຄໍາອ້າງຂອງພັກ NLD, ເຈົ້າໜ້າທີ່ ຝ່າຍທະຫານພະມ້າ ຍັງຄົງບໍ່ມີຊີ້ແຈງແຕ່ຢ່າງໃດ. ອີງຕາມ ສະມາຄົມຊ່ວຍເຫຼືອນັກໂທດການເມືອງ ຂອງພະມ້າ ທີ່ມີຫ້ອງການໃຫຍ່ ຕັ້ງຢູ່ປະເທດໄທຍ, ທະຫານພະມ້າ ໄດ້ສັງຫານນັກເຄື່ອນໄຫວ ໄປແລ້ວປະມານ 4,000 ຄົນ ນັບແຕ່ກຸ່ມທະຫານພະມ້າ ເຂົ້າມາຍຶດອໍານາດ ຈາກຣັຖບານທີ່ມາຈາກການເລືອກຕັ້ງ ໃນເດືອນກຸມພາ ປີ 2021 ແລະ ໄດ້ຈັບໂຕປະຊາຊົນໄປແລ້ວເກືອບ 20,000​ ຄົນ.