ສິລປິນນັກເຄື່ອນໄຫວໄທ ເດີນທາງເຖິງ ປາຣີສ໌

ນັກ​ຂ່າວ ອາ ແອັ​ຟ ເອ ທີ່​ກຸງວໍ​ຊິງ​ຕັນ ດີ​ຊີ
2019-08-05
ອີແມວລ໌
ຄໍາເຫັນ
Share
ພິມ
ສະມາຊິກ ວົງດົນຕຣີ ໄຟເຢັນ (ຈາກຊ້າຍຫາຂວາ) Nithiwat Wannasiri, Worravut Thueakchaiyaphum, Romchalee Sombulrattanakul, Trairong Sinseubpol. 
(ຮູບແຄັບເຈີ ຈາກ ວີດີໂອ ຢູ່ສະຖານທີ່ແຫ່ງນຶ່ງ ໃນສປປລາວ, ວັນທີ 9 ກໍຣະກະດາ 2019)
ສະມາຊິກ ວົງດົນຕຣີ ໄຟເຢັນ (ຈາກຊ້າຍຫາຂວາ) Nithiwat Wannasiri, Worravut Thueakchaiyaphum, Romchalee Sombulrattanakul, Trairong Sinseubpol. (ຮູບແຄັບເຈີ ຈາກ ວີດີໂອ ຢູ່ສະຖານທີ່ແຫ່ງນຶ່ງ ໃນສປປລາວ, ວັນທີ 9 ກໍຣະກະດາ 2019)
AFP

ສິ​ລ​ປິນ​ ວົງ ‘​ໄຟ​ເຢັນ’ ຂອງ​ໄທ ທີ່​ເຫັນ​ຕ່າງ​ທາງ​ການ​ເມືືອງ ຜູ່ທີ່​ລີ້​ຊ່ອນ ຢູ່​ສ​ປ​ປ​ລາວ ໄດ້​ເດີນ​ທາງ​ໄປ​ເຖິງ ກຸງປາ​ຣີ​ສ໌ ແລ້ວ ເພື່ອ​ຢື່ນ​ເອກ​ສານ ຂໍ​ລີ້​ພັຍ ໃນ​ປະ​ເທດ​ຝ​ຣັ່ງ​ເສດ, ອິງ​ຕາມ​ຄວາມ​ເວົ້າ ຂອງ​ສະ​ມາ​ຊິ​ກວົງ ແລະ ນັກ​ເຄື່ອນ​ໄຫວ ກ່າວ​ຕໍ່​ນັກ​ຂ່າວ ເອ ແອັ​ຟ ພີ (AFP) ເມື່ອ​ວັນ​ເສົາ ຜ່ານ​ມາ.

ສະ​ມາ​ຊິກ ວົງ​ດົນ​ຕ​ຣີໄຟ​ເຢັນ ໄດ້​ຮັບ ວີ​ຊາ ພິ​ເສດ ຈາກ​ປະ​ເທດ​ຝ​ຣັ່ງ​ເສດ ເມື່ອ​ປາຍ​ເດືອນ​ກໍ​ຣະ​ກະ​ດາ ຜ່ານ​ມາ, ຊຶ່ງ​ອະ​ນຸ​ຍາດ​ໃຫ້​ພວກ​ຂະ​ເຈົ້າ ເດີນ​ທາງ​ໄປ​ຍັງ ກຸງປາ​ຣີ​ສ໌ ເພືຶ່ອ​ເຣີ່ມ​ຂັ້ນ​ຕອນ ການ​ຢື່ນ​ເອກ​ສານ ຂໍ​ລີ້​ພັຍ​ການ​ເມືອງ, ອິງ​ຕາມ ຄວາມ​ເວົ້າ ຂອງ​ຍາ​ນາງ ຈັນ​ຢາ ຢິ້ມ​ປ​ຣະ​ເສີດ, ນັກ​ເຄື່ອນ​ໄຫວ ຊາວ​ໄທ ອີກ​ຄົນ​ນຶ່ງ ທີ່​ເດີນ​ທາງ​ຮ່ວມ​ໄປ​ກັບ ພວກ​ຂະ​ເຈົ້າ ກ່າວ​ຕໍ່​ນັກ​ຂ່າວ ເອ ແອັ​ຟ ພີ (AFP).

“ຂັ້ນ​ຕອນ ຂອງ​ການ​ຍື່ນ ຂໍ​ລີ້​ພັຍ​ນັ້ນ ຈະ​ຕ້ອງ​ດຳ​ເນີນ​ເຣື່ອງ ທີ່​ປະ​ເທດ​ຝ​ຣັ່ງ​ເສດ, ຊຶ່ງ​ອາດ​ຕ້ອງ​ໃຊ້​ເວ​ລາ 6 ເດືອນ ຫາ 1 ປີ.”

ເມື່ອ​ທ້າຍ​ເດືອນ​ກໍ​ຣະ​ກະ​ດາ ຜ່ານ​ມາ, ທ່ານ ໄຕ​ຣ​ຣົງ ສິນ​ສືບ​ຜົ​ລ, ຫົວ​ໜ້າ​ວົງ​ດົນ​ຕ​ຣີ ໄຟ​ເຢັນ ໄດ້​ກ່າວ​ຕໍ່ ນັກ​ຂ່າວ ອາ ​ແອັ​ຟ ເອ ທີ່​ສຳ​ນັກ​ງານ​ໃຫ​ຍ່ ​ກຸງວໍ​ຊິງ​ຕັນ ດີ​ຊີ ວ່າ:

“ຕອນ​ນີ້ ກໍ​ມີ​ຄຳ​ຂູ່, ສ່ວນ​ຫຼາຍ ກໍ​ມາ​ທາງ ໂຊ​ຊ້ຽວລ໌ (Social) ນີ້​ແຫຼະ ເພາະ​ວ່າ ພວກ​ເຂົາ ບໍ່​ຮູ້​ວ່າ ເຮົາ​ຢູ່​ໃສ. ກໍ​ມີ​ຄຳ​ຂູ່ ທາງ​ເຟ​ສ​ບຸກ​ຄ໌ (Facebook), ທາງ​ເພດ​ຈ໌ (Page), ທາງ ຖວີດ​ເຕີ້ (Twitter) ກໍ​ມີ… ຕ່າ​ງໆ​ນາງໆ ວ່າ ມຶງ​ໂດນ​ແນ້ ຣາຍ​ຕໍ່​ໄປ ກໍ​ຕ້ອງ​ເປັນ​ມຶງ. ແຕ່​ກໍ… ກໍ​ດ້ວຍ​ວ່າ ມັນ​ເປັນ​ການ​ສະ​ແດງ ຖາມ​ວ່າ ມັນ​ໜ້າຢ້ານກົວ​ບໍ? ມັນ​ກໍ​ໜ້າ​ຢ້ານ​ກົວ. ເຮົາ​ກໍ​ບໍ່​ຮູ້​ວ່າ ອັນ​ໃດ​ແທ້ ອັນ​ໃດ​ຫລິ້ນ ມັນ​ມາ​ທຸກ​ມື້. ດັ່ງ​ນັ້ນ ການ​ຣະ​ມັດ​ຣະ​ວັງ ອັນ​ດັບ​ແຣກ ເຮົາ​ຕ້ອງ​ຊ່ອຍ​ເຫຼືອ ໂຕ​ເອງ​ກ່ອນ.”

ໃນ​ຂະ​ນະ​ທີ່ ​ໃຫ້​ສັມ​ພາດ ຕໍ່ ອາ ແອັ​ຟ ເອ ​ນັ້ນ, ຫົວ​ໜ້າ ​ວົງ​ດົນ​ຕ​ຣີໄຟ​ເຢັນ ກໍ​ຂໍ​ສງວນ ຊື່ປະ​ເທດ ​ທີ່​ຕົນ​ຫຼົບ​ລີ້​ຢູ່, ແຕ່ກ່ອນ​ໜ້າ​ນັ້ນ ​ແຫຼ່ງ​ຂ່າວ ເອ ແອັ​ຟ ພີ (AFP) ຣາຍ​ງານ ເມື່ອ​ວັນ​ທີ 25 ກໍ​ຣະ​ກະ​ດາ​ວ່າ ສະ​ມ​າ​ຊິກ ວົງ​ດົນ​ຕ​ຣີ ໄດ້​ຫຼົບ​ລີ້ ຢູ່​ ສ​ປ​ປ​ລາວ. ເຖິງ​ຢ່າງ​ໃດ ກໍ​ຕາມ, ສະ​ມາ​ຊິກວົງ​ດົນ​ຕ​ຣີ ດັ່ງ​ກ່າວ ຍັງ​ຕ້ອງ​ການ ການ​ຊ່ອຍ​ເຫຼືອ ຫລາຍ​ຢູ່:

“ຍັງ​ຈະ​ຕ້ອງ​ອາ​ສັຍ ເງິນ​ບໍ​ຣິ​ຈາກ, ຈະ​ຕ້ອງ​ອາ​ສັຍ ການ​ຊ່ອຍ​ເຫຼືອ ເພາ​ະວ່າ ເຮົາ​ຍັງທຳ​ມາ​ຫາ​ກິນບໍ່​ໄດ້, ເຮົາ​ບໍ່​ມີ​ ພາ​ສ​ປອດ, ເຮົາ​ບໍ່​ມີ ບັດ​ປະ​ຊ​າ​ຊົນ, ເຮົາ​ບໍ່​ມີ​ໃບ​ເຂົ້າ​ເມືອງ, ທຸກ​ມື້​ນີ້ ເຮົາ​ຍັງ​ຢູ່​ໃນ​ສ​ະ​ຖາ​ນະ ຜູ້​ຫຼົບ​ໜີເຂົ້າ​ເມືອງ​ຢູ່​ເລີຍ ຈະ​ຖືກ​ຫຼິ້ນ​ງານ ມື້​ໃດ ກໍ​ຍັງ​ບໍ່​ຮູ້, ເຮົາ​ບໍ່​ມີ​ສະ​ຖາ​ນະ​ຫ​ຍັງ​ເລີຍ ແລະ ກໍ​ບໍ່​ມີ​ຕົວ​ຕົນ​ເລີຍ.”

ເຖິງ​ຢ່າງ​ໃດ​ກໍ​ດີ, ກຸ່ມ​ວົງ​ໄຟ​ເຢັນ ກຳ​ລັງວາງ​ແຜນ ຈະ​ສະ​ແດງ​ຄອນ​ເສີ​ຣ໌ດ​ທ໌ ຄັ້ງ​ທຳ​ອິດ ທີ່ ພ​ລັ​ສ ເດີ ລາ ຣິ​ພັບ​ບ​ລິກ (Place de la Republique) ແລະ ທ່ານ ໄຕ​ຣ​ຣົງ ກ່າວ​ຕໍ່ ນັກ​ຂ່າວ ເອ ແອັ​ຟ ພີ (AFP) ວ່າ ທາງວົງ​ດົນ​ຕ​ຣີ ປາ​ຖ​ນາ ຈະ​ສືບ​ຕໍ່ ຜ​ລິດ​ດົນ​ຕ​ຣີ ເລົ່າ​ເຣື່ອງ ຊີ​ວິດ ຂອງ​ພວກ​ຂະ​ເຈົ້າ​ເອງ.

ຄໍາເຫັນ (1)
Share

(

Congratulations boys and girls ! You are the heroes who inspeire lots of people back home.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 07, 2019 05:52 AM

ເຕັມຫນ້າ