ນອກຈາກ ລົມພະຍຸໃຕ້ຝຸ່ນ ຮາຈູພິດ ທີ່ໄດ້ກໍ່ໃຫ້ເກີດ ຄວາມເສັຍຫາຍ ໃນເຂດພາກເໜືອ ຂອງລາວ ເມື່ອມໍ່ໆມານີ້ ໃນປັດຈຸບັນນີ້ ລົມພະຍຸ ເມຂລາ ທີ່ກໍາລັງພັດເຂົ້າມາ ທາງພາກກາງ ຂອງລາວ ຕື່ມອີກ ຈຶ່ງເຮັດໃຫ້ທາງການ ໄດ້ຮີບຟ້າວ ປະກາດເຕືອນ ໃຫ້ຊາວບ້ານ ລະມັດລະວັງ ຕໍ່ຜົນກະທົບ ຕ່າງໆ ທີ່ອາດຈະມີຂື້ນ.
ທ່ານນ ວັນດີ ດວງມາລາ ຫົວໜ້າ ກອງພະຍາກອນ ອາກາດ ປະຈໍາກົມອຸຕຸນິຍົມ ວິທະຍາ ເວົ້າຕອນນຶ່ງ ໃນມື້ວັນອັງຄານ ທີ 30 ກັນຍານີ້ວ່າ:
“ເມຂລາ ເຂົ້າຕອນເຊົ້າ ມື້ນີ້ ທີ່ຜ່ານມາທາງ ແຂວງຄໍາມ່ວນ ພາກກາງ ຈົນຮອດພາກເໜືອ ນັບແຕ່ ແຂວງສວັນນະເຂດ ຮອດ ແຂວງຊຽງຂວາງ ຈະມີໂອກາດ ມີຝົນຕົກໜັກ ໄທເຮົາ ກໍໄດ້ແຈ້ງເຕືອນໄປ ແລ້ວ ໂອກາດ ຈະມີນໍ້າອັ່ງ ນໍ້າປ່າ ໄຫລແຮງ”
ທ່ານ ວັນດີ ຊີ້ແຈ້ງຕື່ມ ວ່າ ລົມພະຍຸ ເມຂລາ ຊຶ່ງເລີ້ມຂື້ນ ຈາກ ທະເລຈີນໃຕ້ ໄດ້ຜ່ານພາກກາງຂອງ ວຽດນາມແລ້ວ ກໍຈະພັດຍ້າຍ ເຂົ້າໄປແຂວງຄໍາມ່ວນ, ບໍລິຄໍາໄຊ ແລະ ນະຄອນຫລວງວຽງຈັນ ເຮັດໃຫ້ເຂດ ພື້ນທີ່ນີ້ ຄື ນັບແຕ່ພາກກາງ ຈົນໄປຮອດບາງແຂວງ ທາງພາກເໜືອ ເປັນຕົ້ນ ໄຊຍະບຸຣີ ແລະ ແຂວງຊຽງຂວາງ ອາດຈະເກີດຝົນ ຕົກໜັກ ຢ່າງກະທັນຫັນ ດັ່ງນັ້ນ ປະຊາຊົນຢູ່ໃນເຂດ ທີ່ສ່ຽງຕໍ່ອັນຕະລາຍ ຈຶ່ງຕ້ອງ ໄດ້ກຽມ ຮັບມື ກັບບັນຫາ ນໍ້າຖ້ວມ ດິນເຈື່ອນ ພ້ອມທັງ ນໍ້າປ່າ ໄຫລແຮງ ອີກນໍາ.
ເຖິງຢ່າງໃດກໍດີ ລົມພະຍຸ ເມຂລາ ອາດຈະສົ່ງ ຜົນກະທົບ ໃຫ້ລາວ ພຽງແຕ່ມື້ດຽວ ກ່ອນຈະພັດຜ່ານ ເຂົ້າໄປສູ່ຝັ່ງ ພາກອີສານ ປະເທດໄທ ຕໍ່ໄປ. ຄວາມຮຸນແຮງ ກໍບໍ່ເຖິງຂັ້ນ ລົມພະຍຸໃຕ້ຝຸ່ນ ຈຶ່ງຈະບໍ່ສ້າງຄວາມເສັຍຫາຍ ທີ່ຍາວນານ ແຕ່ກໍຕ້ອງ ໄດ້ລະມັດລະວັງ ຄັກແນ່ ເພາະເມື່ອ ລົມພະຍຸ ເມຂລາ ພັດເຂົ້າ ທໍາລາຍວຽດນາມ ມີຄວາມແຮງ ແລະ ໄວປະມານ 88 ກິໂລແມັດ ຕໍ່ຊົ່ວໂມງ ສ້າງຄວາມເສັຍຫາຍ ຢ່າງໜັກ ມີຜູ້ເສັຍຊີວິດ ຮອດ 41 ຄົນ.
