ໂຄງກາຣເຂຕເສຖກິຈ ພິເສດ ຂ.ຄຳມ່ວນ

ທາງກາຣ ແຂວງຄຳມ່ວນ ມີໂຄງກາຣ ຈະສ້າງ ເຂຕ ເສຖກິຈ ພິເສດ ຫລັງຈາກ ເປີດໃຊ້ ຂົວ ມິຕພາບ ແຫ່ງທີ່ 3
ຫວາດ ສີມູນ
2011.10.27
F-Khammouan ຕົວເມືອງ ທ່າແຂກ ແຊວງ ຄຳມ່ວນ ສປປ.ລາວ
travelfish.org

ກົດຟັງສຽງ

ທາງກາຣ ແຂວງຄໍາມ່ວນ ກໍາລັງຕຣຽມ ລົງມື ຈັດສ້າງ ເຂຕເສຖກິຈ ພິເສດ ພູຂຽວ ຢ່າງຈິງຈັງ ເນື່ອງຈາກວ່າ ຂົວ ມິຕພາບ ລາວ-ໄທຽ ຂ້າມ ແມ່ນ້ຳຂອງ ແຫ່ງທີ່ 3 ຣະຫວ່າງ ແຂວງຄຳມ່ວນ ນະຄອນພະນົມ ກໍມີກຳໜົດ ເປີດໃຊ້ ໃນມື້ ວັນທີ່ 11 ເດືອນ ພຶສຈິກາ 2011 ນີ້ ຢ່າງເປັນ ທາງກາຣ ແລະ ປັຈຈຸບັນ ກໍມີ ນັກລົງທຶນ ຊາວລາວ ຈຳນວນໜຶ່ງ ເຂົ້າໄປ ເຣີ່ມດຳເນີນ ກາຣກໍ່ສ້າງ ໃນເຂຕ ດັ່ງກ່າວ ນີ້ແລ້ວ. ດັ່ງເຈົ້າໜ້າທີ່ ກ່ຽວຂ້ອງ ທ່ານໜຶ່ງ ໄດ້ກ່າວວ່າ:

"ເຮົາສິເຣີ່ມ ລົງມື ໃນເດືອນ 11 ນີ້ ພາຍຫລັງ ເປີດຂົວແລ້ວ ພວກເຮົາ ສິເຣີ່ມວາງ ສີລາຣືກ ດຽວນີ້ ກ່ຽວກັບ ເອກສາຣ ພວກເຮົາ ໄດ້ຮັບ ອະນຸຍາຕ ທັງໝົດ ຈາກ ຣັຖບາລ ແລ້ວ ນັກລົງທຶນ ພາຍໃນ ສິບຸກເບີກ ກ່ອນ ເຂົາເຈົ້າ ສິບຸກເບີກ ເສັ້ນທາງ ຫຍັງກ່ອນ ແລ້ວກໍດຶງ ໄຟຟ້າ ນ້ຳປະປາ ເຂົ້າ".

ພ້ອມດຽວກັນນີ້ ທ່ານກໍວ່າ ເຖິງແມ່ນ ປັຈຈຸບັນ ມີແຕ່ບັນດາ ນັກລົງທຶນ ຈາກພາຍໃນ ເຂົ້າມາ ຣີເຣີ່ມ ສ້າງແດ່ແລ້ວ ນັ້ນກໍຕາມ ແຕ່ທາງ ໜ່ວຍງານ ກ່ຽວຂ້ອງ ກໍຍັງ ມີກາຣ ເຜີຽແຜ່ ໂຄສະນາ ໃຫ້ບັນດາ ນັກທຸຣະກິຈ ຊາວ ຕ່າງປະເທສ ເຊັ່ນ ຊາວຈີນ ແລະ ຊາວໄທຽ ເຂົ້າມາ ລົງທຶນ ຕື່ມອີກ ເພາະຍັງມີ ພື້ນທີ່ ອັນກວ້າງໃຫຍ່.

ເຈົ້າໜ້າທີ່ລາວ ໄດ້ແຈ້ງ ເພີ່ມວ່າ ໂຄງກາຣ ຈັດສ້າງ ເຂຕ "ເສຖກິຈພິເສດ ພູຂຽວ" ດັ່ງກ່າວນີ້ ໄດ້ແບ່ງອອກ ເປັນ 2 ພາກສ່ວນ ຄືສ່ວນ ທີ່ໜຶ່ງແມ່ນ ບໍຣິເວນ ທາງໃຕ້ ຂອງເມືອງ ທ່າແຂກ ໃນເຂຕ ພື້ນທີ່ 4,850 ເຮກຕ໊າຣ໌ ໃຫ້ເປັນ ເຂຕ ອຸຕສາຫະກັມ ເພື່ອຮອງຮັບ ກາຣຂຍາຍຕົວ ໃນຂັ້ນ ຕໍ່ໆໄປ.

ສ່ວນພາກທີ່ 2 ນັ້ນ ແມ່ນຢູ່ໃນ ບໍຣິເວນ ສົ້ນຂົວ ມິຕພາບ ລາວ-ໄທຽ ແຫ່ງທີ່ 3 ນັ້ນເອງ ຊຶ່ງ ມີພື້ນທີ່ ທັງໝົດ 1,023 ເຮັກຕ໊າຣ໌ ໂດຽມີ ໂຄງກາຣ ທີ່ຈະສ້າງ ໂຮງຮຽນ ຫ້າງ ສັພສິນຄ້າ ສວນນ້ຳ ໂຮງແຮມ ແລະ ສວນ ສາທາຣະນະຊົນ ສຳຫລັບ ຊາວລາວ ແລະ ຊາວຕ່າງ ປະເທສ ທີ່ຄາດວ່າ ຈະມີກາຣ ຂຍາຍຕົວ ຂຶ້ນຢ່າງ ວ່ອງໄວ ໃນ ອະນາຄົຕ ອັນໃກ້ ຂ້າງໜ້ານີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.