ຜົນວິເຄາະທາງຣົດໄຟ ຂອງປະເທດໃກ້ຄຽງ

ການສ້າງ ທາງຣົດໄຟ ຄວາມໄວສູງ ຕາມການວິເຄາະ ຂອງປະເທດ ເພື່ອນບ້ານ ແທນທີ່ ຈະເປັນ ການສົ່ງເສີມ ການລົງທຶນ ດຶງດູດ ຊາວ ຕ່າງປະເທດ ແຕ່ກັບເປັນ ການທ່ວງດຶງ ການເຕີບໃຫຍ່ ຂອງເສຖກິດ.
ມະນີຈັນ
2012-10-30
ອີແມວລ໌
ຄໍາເຫັນ
Share
ພິມ

ໂຄງການ ສ້າງທາງຣົດໄຟ ຄວາມໄວສູງ ຂອງ ຣັຖບານລາວ ເຣື່ອງທີ່ວ່າ ຈະຄຸ້ມຄ່າ ຫລືບໍ່ຄຸ້ມຄ່າ ນັ້ນ ບໍ່ຕັ້ງເປັນ ບັນຫາ ເພາະຣັຖບານລາວ ມີຕົວເລຂ ຄິດໄລ່ ອອກມາວ່າ ຈະຄຸ້ມ ຈັກປີຈັກປີ. ອີກຢ່າງນຶ່ງ ຜູ້ໃຫ້ເງິນກູ້ຢືມ ຄືຣັຖບານຈີນ ກໍເຕັມໃຈ ໃຫ້ກູ້ຢືມ.

ຫາກມາເບິ່ງເຖິງ ບົດຮຽນ ຂອງປະເທດ ວຽດນາມ ກໍເຫັນວ່າ ໂຄງການສ້າງ ທາງຣົດໄຟ ຄວາມໄວສູງ ບໍ່ຄຸ້ມຄ່າ ທາງຣັຖສະພາ ວຽດນາມ ຈຶ່ງບໍ່ຮັບຜ່ານ. ນັກວິຊາການໄທ ກ່າວຕໍ່ RFA ເມື່ອວັນທີ 28 ຕຸລາ 2012 ໃນຕອນນຶ່ງວ່າ:

"ທ່ານວ່າ ກໍຣະນີ ຂອງວຽດນາມ ທີ່ມີໂຄງການ ສ້າງທາງຣົດໄຟ ຄວາມໄວສູງ ຊິງເຈີເຊັນ ຜ່ານການຄົ້ນຄວ້າ ຈາກຍີ່ປຸ່ນ ເຫັນວ່າບໍ່ຄຸ້ມຄ່າ ກັບການລົງທຶນ ທີ່ສູງ ໃຫ້ຖ້າ ໄປອີກປະມານ 20 ປີ ເພາະຜູ້ໂດຍສານ ກໍບໍ່ມີຄວາມພ້ອມ ທີ່ຈະໃຊ້. ຍີ່ປຸ່ນ ໄດ້ສເນີໃຫ້ສ້າງ ແບບໄລຍະສັ້ນ ນາຈາງ-ໂຮຈິມິນ ຊຶ່ງເປັນເສັ້ນທາງ ທີ່ຈະມີ ຜູ້ໂດຍສານໃຊ້ ຫລາຍ".

ສໍາລັບ ກໍຣະນີ ຂອງໄທ ທ່ານວ່າ ມັນກໍມີຄວາມ ວິຕົກກັງວົນ ຄືກັນ:

"ຣັຖບານ ຂອງຍານາງ ຍິ່ງລັກ ຊິນນະວັດ ໃຫ້ຄວາມສໍາຄັນ ທາງຣົດໄຟ ຄວາມໄວສູງ ສາຍບາງກອກ-ຊຽງໃໝ່ ສ່ວນວ່າສາຍ ບາງກອກ-ໜອງຄາຍ ຍັງບໍ່ມີແຜນເທື່ອ ເພາະຈະຕ້ອງໃຊ້ ງົປມານສູງ ເຖິງ 2 ແສນ ລ້ານບາດ. ບັນຫາກໍຄື ຄ່າໂດຍສານ ມັນຈະແພງ ຄົນທີ່ສາມາດຂຶ້ນໄດ້ ກໍຈະເປັນຄົນ ທີ່ມີຖານະ ເປັນນັກ ທຸຣະກິດ ບໍ່ແມ່ນ ຄົນທັມມະດາ ທົ່ວໄປ".

ປະເທດຈີນ ກໍຍັງສ້າງບໍ່ໄດ້ ຕາມແຜນ ທີ່ໄດ້ວາງໄວ້ ໃນປີ 2012 ຈີນຈື່ງໄດ້ໂຈະ ການສ້າງທາງຣົດໄຟ ທັງໝົດ ເຫລືອພຽງ 23 ສາຍ ຮວມທັງຣົດໄຟ ຄວາມໄວສູງ 9 ສາຍນໍາດ້ວຍ ຍ້ອນບັນຫາ ໜີ້ສິນ ການສໍ້ຣາສບັງຫລວງ ເຣືື່ອງທາງຣົດໄຟ. ເສັ້ນປັກກິ່ງ-ຊຽງໄຮ ລົງທຶນໄປ ນັບເປັນລ້ານໆບາດ ມັນກໍຂາດທຶນ ແລະ ກໍຫລຸດຄວາມໄວ ຈາກ 350 ກິໂລແມັຕ ຕໍ່ຊົ່ວໂມງ ລົງມາເປັນ 300 ກິໂລແມັຕ ຕໍ່ຊົ່ວໂມງ ເທົ່ານັ້ນ.

ໃນປະເທດໄທ ເອງ ສາຍທາງຣົດໄຟ airport link ແຕ່ສນາມບິນ ສຸວັນນະພູມ ເຂົ້າບາງກອກ ກໍລຸບທຶນ. ສໍາລັບ ສປປລາວ ຄົນກໍບໍ່ຫລາຍ ຄົນທີ່ີສາມາດ ຂີ່ໄດ້ຈະມີ ໜ້ອຍ.

ທ່ານກ່າວ ຊໍ້າທ້າຍວ່າ ຫາກເບີ່ງຄືນຫລັງໄປ ໃນສມັຍຝຣັ່ງເສດ ເປັນຫຍັງຝຣັ່ງ ຈຶ່ງບໍ່ສ້າງ ທາງຣົດໄຟ ໃນລາວ ສ້າງພໍເປັນຮູບ ຢູ່ຫລີ່ຜີ ພາກໃຕ້ຂອງລາວ ແຕ່ສ້າງໃນ ກໍາພູຊາ ແລະວຽດນາມ.

ຄໍາເຫັນ (3)
Share

ຫຼານລາວ

ຈາກ ລາວ

ຖ້າສ້າງທາງລົດໄຟໄປແລ້ວ ໄລຍະເວລາ 5-10 ກໍໄດ້ແລ້ວ ແຕ່ວ່າໜີ້ສິນຫັ້ນຕິ 100-200 ປີ ລູກຫຼານລາວໄຊ້ໜີ້ໝົດບໍ່ ບາງທີລັດຖະບານ ຊຸດນີ້ ສ້າງຂື້ນມາ ສິໄດ້ໜ້າໄດ້ຕາ ແຕ່ຊຸດຕໍ່ໄປສິມາໄຊ້ໜີ້ ມັນຊິບໍ່ແມ່ນບັນຫາບໍ່? ຄວນຄຶດເດີ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 05, 2012 12:25 PM

ບຸນຊູ

ຈາກ ວຽງຈັນ

ມີທາງລົດໄຟໄວ້ ເປັນຫໍວາງສະແດງ ເຖິງຄວາມສ່ອງໃສ ຂອງຜູ້ນຳຊຸດ ປະຈຸບັນ ແລະ ໃຫ້ລຸ້ນລູກຫລານໃຊ້ຫນີ້້ ແລະຍ້ອງຍໍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 01, 2012 10:38 AM

xayphone

ຈາກ sesutthanark

ຫາກມີການສ້າງທາງລົດໄຟ ປະເທດລາວ ຕ້ອງພັດທະນາໄວຂື້ນແນ່ນອນ ແຕ່ແມ່ນໃຜຈະເປັນຜູ້ຮັບຜິດຊອບໜີສີ້ນ ໃນອະນາຄົດ (ລູກຫລານເບາະ)


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Oct 31, 2012 10:18 AM

ເຕັມຫນ້າ