བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕོ་བྲང་པོ་ཏ་ལར་གསེར་ཁྲི་མངའ་གསོལ་ཞུས་ཏེ་ལོ་ངོ་ ༨༦ འཁོར་བའི་དུས་དྲན་གྱི་མཛད་སྒོ་ཞིག་ཕྱི་ལོ་ ༢༠༢༦ ཟླ་ ༢ ཚེས་ ༢༢ ཉིན་བཞུགས་སྒར་རྡ་རམ་ས་ལར་གུས་བརྩི་དང་དད་གུས་ཆེན་པོས་སྲུང་བརྩི་ཞུས་ཡོད།
རྗེས་དྲན་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། བྱིས་པའི་ཐོབ་ཐང་ཐད་ཕྱག་ལས་གནང་མཁན་རྒྱ་གར་བ་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ཀཡེ་ལཤ་ སཏྱར་ཐི་ (Kailash Satyarthi) ལགས་དང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག ཕི་ལི་པིནསི་ཀྱི་གྲོས་ཚོགས་འཐུས་མི་ ཨེ་ཌརྱིན་ མཡེ་ཀལ་ ཨ་མ་ཊོངྒ (Adrian Michael Amatong) དང་། ཕི་ལི་པིནསི་ཀྱི་གྲོས་ཚོགས་འཐུས་མི་ ར་ཕསི་ རོཌྲི་གྷེཛ་ (Rufus B Rodriguez) བཅས་དབུ་ཞུགས་གནང་ཡོད།
གཞན་ཡང་ཧིན་དྷུ་དང་། ཁ་ཆེ། སིཀ་ཆོས་ལུགས་བཅས་ཀྱི་སྐུ་ཚབ་ནས་ཀྱང་མཉམ་ཞུགས་གནང་ཡོད་ལ། ༧གོང་ས་༧སྐྱབས་མགོན་ཆེན་པོ་མཆོག་གིས་ཞི་བདེ་དང་། བྱམས་བརྩེ། བོད་ཀྱི་རིག་གཞུང་དང་ངོ་བོ་སྲུང་སྐྱོབ་ཆེད་༧སྐུ་ཚེ་ཧྲིལ་པོར་མཛད་འཕྲིན་རླབས་ཆེན་བསྒྲུབས་པར་རྗེས་དྲན་ཞུས་ཤིང་། ༧གོང་ས་མཆོག་གིས་མུ་མཐུད་འཛམ་གླིང་ཞི་བདེའི་ཐད་བཀའ་སློབ་དང་དབུ་འཁྲིད་གནང་བར་བཀའ་དྲིན་དང་གུས་བརྩི་ཞུ་གི་ཡོད་པའི་ཆེ་བསྟོད་ཞུས་ཡོད་པ་མ་ཟད། ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ཀཡེ་ལཤ་ སཏྱར་ཐི་ལགས་དང་ཕི་ལི་པིནསི་ཀྱི་གྲོས་ཚོགས་འཐུས་མི་བཅས་ཀྱིས་༧གོང་ས་༧སྐྱབས་མགོན་ཆེན་པོ་མཆོག་གི་ཕོ་བྲང་དུ་མཇལ་བཅར་ཞུས་ཡོད་པ་རེད།
ཕྱི་ལོ་ ༢༠༡༤ ལོར་ནོ་སྦེལ་ཞི་བདེའི་གཟེངས་རྟགས་བཞེས་མཁན་ཀཡེ་ལཤ་ སཏྱར་ཐི་ (Kailash Satyarthi) ལགས་ཀྱིས་༧གོང་ས་༧སྐྱབས་མགོན་ཆེན་པོའི་མཛད་འཕྲིན་ཐད་བསྔགས་བརྗོད་གནང་སྟེ་གསར་འགོད་པ་ཚོར། བྱམས་སྙིང་རྗེ་ནི་ཚོར་བའམ་ཡང་ན་རིན་ཐང་ཅན་གྱི་་ཡོན་ཏན་ཙམ་མ་ཡིན་པར། ནུས་པ་ལྡན་ཞིང་། ང་ཚོས་ཉིན་རེའི་འཚོ་བའི་ཁྲོད་བྱམས་སྙིང་རྗེ་ལྡན་པའི་དབུ་ཁྲིད་བསྐྲུན་དགོས་པ་དང་། ལྷག་པར་འགྲོ་བ་མི་ཕན་ཚུན་གྱི་དཀའ་ངལ་ཚོར་ཐུབ་མཁན་ཞིག་རྒྱ་ནག་ཐེ་བའི་འཛམ་གླིང་གི་ཆབ་སྲིད་པ་རྣམས་སྙིང་རྗེ་ལྡན་པའི་འགོ་ཁྲིད་གཅིག་ཡོང་ཐབས་བྱ་དགོས་པ་དང་། དེ་འདྲ་བྱུང་ན་ཕན་ཚུན་གྱི་དཀའ་ངལ་ཚོར་ཐུབ་པ་དང་། མི་རིགས་སྣ་ཚོགས་ལ་བླང་དོར་གྱི་བསླབ་བྱ་ལྡན་པའི་འགན་འཁུར་དང་འགན་འཁྲི་ལྡན་པར་འགྱུར་ངེས་རེད་ཅེས་གསུངས་བྱུང་།
བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་གསེར་ཁྲི་མངའ་གསོལ་ནི་ལོ་རྒྱུས་ཐོག་བོད་མི་ཙམ་མ་ཡིན་པར་འཛམ་གླིང་ཡོངས་ཀྱི་ཆེད་དུ་དུས་ཚིགས་ཁྱད་པར་ཅན་ཞིག་ཡིན། འཛམ་གླིང་གི་འགྱུར་འགྲོས་དང་ལྷན་བོད་མི་རྣམས་ཀྱིས་དཀའ་ངལ་མང་དག་ཅིག་གདོང་ལེན་བྱས་དགོས་བྱུང་ཡོད་ཀྱང་སྐབས་དེར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལ་བརྟེན་ནས་བོད་མི་རྣམས་ལ་སོ་སོའི་ངོ་བོ་དང་། ཆོས། རིག་གཞུང་ཉར་ཚགས་ཐུབ་པ་བྱུང་ཡོད་པ་མ་ཟད། འཛམ་གླིང་ཡོངས་སུ་ཁྱབ་སྤེལ་ཐུབ་པ་བྱུང་ཡོད་པ་གསུངས། ཧིན་དྷུའི་ཆོས་དཔོན་ཨ་ཇེ་ ཀུ་མར་ ཤར་མ་ (Ajay Kumar Sharma) ལགས། ཁ་ཆེའི་ཆོས་དཔོན་ མོཧ་མདྷ་ ཀ་མིལ་ ཇ་མི་ (Muhamad Kamil Jamie) ལགས། ཡེ་ཤུའི་ཆོས་དཔོན་ ཝིཀ་ཊར་ ཁོ་ཇི་(Victor Khojee) ལགས། སིག་གི་ཆོས་དཔོན་སརབ་ཇིཏ་ སིངྒ་ (Sarbjeet Singh) ལགས་བཅས་ཀྱིས་༧གོང་ས་༧སྐྱབས་མགོན་ཆེན་པོ་མཆོག་གི་འཛམ་གླིང་ཞི་བདེའི་ཆེད་མཛད་འཕྲིན་བསྐྱངས་དང་སྐྱོང་བཞིན་པར་ཆེ་བསྟོད་ཞུས་ཡོད་པ་རེད།
སྲིད་སྐྱོང་སྤེན་པ་ཚེ་རིང་ལགས་ཀྱིས། “མགོན་པོ་མཆོག་གིས་ང་ཚོའི་ཆེད་དུ་དུས་ཚོད་དང་འགྲན་རྒྱུགས་ཀྱི་བྱུང་རབས་ཤིག་ཀྱང་ཡིན་ཞིང་། ངོ་ཤེས་པ་གནམ་དང་ས་ལས་མེད་པའི་བཙན་བྱོལ་གྱི་ལོ་ཟླའི་ནང་། ང་ཚོའི་སྐད་ཡིག་དང་། ཆོས་ལུགས། རིག་གཞུང་། མི་རིགས་ཀྱི་ཆེ་མཐོང་ད་ལྟའི་བར་དུ་སྲུང་ཉར་ཐུབ་སྟེ། འཛམ་གླིང་ཤར་ནུབ་ཀྱི་གྲོང་དང་གྲོང་ཁྱེར་འདྲ་མིན་དུ་གནས་འཁོད་ངེད་ཅག་ཚང་མས་དེང་སང་སྤོབས་པའི་ཐོག་ནས་ང་བོད་པ་ཡིན་ཞེས་གསུང་ཕོད་ཀྱི་ཡོད་པ་འདི་དང་། བོད་ནང་བོད་མི་རིགས་རྩ་མེད་གཏོང་རྒྱུའི་རྒྱ་གཞུང་གི་དྲག་ཆར་རླུང་འཚུབ་ལྟ་བུའི་ཆབ་སྲིད་ལས་འགུལ་དང་། སྲིད་ཇུས་གང་གིས་ཀྱང་བོད་མི་རིགས་ཀྱི་ཐུན་མོང་མ་ཡིན་པའི་ངོ་བོ་གཅེས་ཉར་གྱི་སེམས་ཤུགས་གཅོག་ཐུབ་ཀྱི་མེད་པ་འདིའང་༸མགོན་པོ་མཆོག་གི་ཐབས་མཁས་ཐུགས་རྗེའི་བྱིན་རླབས་ལ་བརྟེན་ནས་བྱུང་བ་ཞིག་ཡིན་པ་ང་ཚོ་ཚང་མས་དུས་དང་རྣམ་པ་ཀུན་ཏུ་བཀའ་དྲིན་རྗེས་དྲན་ཞུ་དགོས།“ཞེས་གསུངས།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས་ཀྱིས་སྤྱི་འཐུས་ལྷན་ཚོགས་ཀྱི་གསུང་བཤད་གནང་པའི་ནང་། ༧གོང་ས་༧སྐྱབས་མགོན་ཆེན་པོ་མཆོག་གི་མཛད་འཕྲིན་ལ་ཆེ་བསྟོད་རྗེས་དྲན་ཞུས་ཤིང་། “སྤྱི་ཚོགས་ནང་དཀའ་རྙོག་ཆེ་ཆུང་གང་ཞིག་ཡིན་ཡང་སྟོབས་ཆེ་ཆུང་དང་གོ་མཚོན་བེད་སྤྱོད་ཀྱིས་དམག་འཐབ་དང་འཁྲུག་འཛིང་མེད་པར་ཕན་ཚུན་གྲོས་མོལ་གྱི་ལམ་ནས་དཀའ་ངལ་ཐག་གཅོད་ཡོང་ཐབས་བྱ་དགོས་པའི་ལམ་སྟོན་གནང་ཞིང་། བོད་དོན་འཐབ་རྩོད་ཀྱང་འཚེ་མེད་ཞི་བའི་ལམ་ནས་རྒྱ་ནག་གཞུང་མཉམ་འབྲེལ་ལམ་གྱིས་དཀའ་རྙོག་སེལ་ཐབས་ལ་འབད་བརྩོན་གནང་ཡོད་”ཅེས་གསུངས་།
མཛད་སྒོའི་ཐོག་གསུང་བཤད་གནང་མཁན་གྱི་སྐུ་མགྲོན་རྣམ་པས་༧གོང་ས་༧སྐྱབས་མགོན་ཆེན་པོ་མཆོག་གིས་འཚེ་མེད་ཞི་བའི་ལམ་དང་། ཆོས་ལུགས་མཐུན་སྒྲིལ། འཛམ་གླིང་ཞི་བདེ་སོགས་ཀྱི་ཐོག་མུ་མཐུད་ཐུགས་འགན་བཞེས་པར་བཀྲིན་རྗེས་དྲན་དང་བསྔགས་བརྗོད་ཞུས་པ་དང་། ༧གོང་ས་མཆོག་སྐུ་ཚེ་བརྟན་པ་དང་སྐུ་ཁམས་གསལ་ཐང་ཡོང་བའི་སྨོན་འདུན་ཡང་ཞུས་ཡོད་པ་རེད།།