ཕྱི་ལོ་ ༢༠༢༦ ཟླ་ ༢ ཚེས་ ༢༣ ཉིན་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་མཐུན་གྲོགས་ཚོགས་པ་གཉིས་ཀྱིས་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། བརྟན་བཞུགས་བསྟར་འབུལ་གྱི་ཆེད་ད་རེས་རྒྱལ་ཁབ་བཅོ་ལྔ་ནས་བོད་ཀྱི་ཆབ་སྲིད་བཙོན་ཟུར་དང་ཁོང་རྣམ་པའི་ནང་མི་སུམ་བརྒྱ་ལྷག་གིས་བཞུགས་སྒར་དུ་ཆེད་བཅར་ཞུས་ཏེ། ༧གོང་ས་༧སྐྱབས་མགོན་ཆེན་པོ་མཆོག་གིས་འགྲོ་བ་སྤྱི་ལ་ཕན་པའི་དགོངས་གཞི་ཐུགས་སྐྱེད་དམ་བཅའ་བཞིར་ཆེ་བསྟོད་དང་བཀའ་དྲིན་རྗེས་དྲན་ཞུ་སླད་མཚོན་དོན་གྱི་གཟེངས་རྟགས་ཤིག་འབུལ་ལམ་ཞུས་ཡོད་པ་རེད།
རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པའི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཞོན་ཆབ་སྲིད་བཙོན་ཟུར་ངག་དབང་གསང་གྲོལ་ལགས་ཀྱིས། ད་ལྟའི་ཆར་གཞིས་ལུས་བོད་མི་རྣམས་ལ་༧གོང་ས་༧སྐྱབས་མཆོན་ཆེན་པོ་མཆོག་གི་སྐུ་པར་མཇལ་རྒྱུ་ལྟ་ཞོག མཚན་ཙམ་ཡང་ཡོངས་ཁྱབ་ཀྱི་འབོད་མི་ཐུབ་པའི་ཛ་དྲག་གི་གནས་སྟངས་འོག་གནས་ཡོད་སྟབས། ཐེངས་འདིར་ཆབ་སྲིད་བཙོན་ཟུར་རྣམས་ཀྱིས་བོད་ནང་གི་བོད་མི་རྣམས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ་ཞུས་ཐུབ་པ་འདི་ཧ་ཅང་སྐལ་པ་བཟང་པོ་ཞིག་ཏུ་ངོས་འཛིན་གནང་གི་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
ད་དུང་བརྟན་བཞུགས་འབུལ་ལམ་ཞུ་མཁན་ཁོངས་ནས་སུད་སི་ལྷ་ས་བུའི་མཐུན་གྲོགས་ཚོགས་པའི་ཚོགས་གཙོ་ཡོ་རོབ་སྤྱི་ཟུར་ཟམ་མདོ་བྱམས་པ་ཚེ་རིང་ལགས་ཀྱིས། ཐེངས་འདིར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་དགུ་བཅུར་ཕེབས་སྐབས་བརྟན་བཞུགས་བསྟར་འབུལ་ཞུས་ཐུབ་པ་བྱུང་བ་ནི། ཚོགས་པའི་ཚོགས་མི་ལོ་ན་བགྲེས་པ་རྣམས་ཀྱི་རེ་འདོད་ཡིན་པས་ད་རེས་ལེགས་གྲུབ་བྱུང་བར་དགའ་ཚོར་ཆེན་པོ་བྱུང་སྐོར་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
རྩ་བའི་ཐེངས་འདིར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་མཐུན་གྲོགས་ཚོགས་པ་གཉིས་ཀྱིས་བརྟན་བཞུགས་བསྟར་འབུལ་ཞུས་པ་འདི་བཞིན། བོད་རྒྱལ་ལོ་ ༢༡༥༣ རབ་གནས་མེ་རྟ་ལོའི་བརྟན་བཞུགས་བསྟར་འབུལ་ཞུས་པ་ཐོག་མ་དེ་ཆགས་ཀྱི་ཡོད་པ་དང་། བརྟན་བཞུགས་ཀྱི་མཛད་སྒོར་ཕྱི་ནང་གི་དད་ལྡན་པ་སྟོང་ཚོ་བརྒལ་བས་ཆེད་བཅར་གྱིས་༧གོང་ས་༧སྐྱབས་མགོན་ཆེན་པོ་མཆོག་༧སྐུ་ཚེ་ཞབས་པད་བརྟན་པའི་སྨོན་འདུན་ཞུས་ཡོད་པ་རེད།།
བརྙན་པར་སྒྲིག་སྦྱོར་བ། བསྟན་འཛིན་དོན་ཡོད། ནོར་སྡེ་སྒྲོལ་མ།