ཕྱི་ལོ་ ༢༠༢༦ ཟླ་ ༢ ཚེས་ ༢༤ ཉིན་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པའི་གོ་སྒྲིག་འོག་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་ཐོག རྒྱ་ནག་གཞུང་གི་བཙན་གནོན་འོག་བོད་བསྟན་སྲིད་མི་རིགས་ཀྱི་ཆེད་དུ་རང་སྲོག་བློས་བཏང་གནང་བའི་བོད་ཀྱི་ཆབ་སྲིད་བཙོན་ཟུར་འདས་གསོན་རྣམས་ཀྱི་ཆེད་དུ་མཆོད་འབུལ་སྨོན་ལམ་ཞིག་ཚོགས་པ་དང་སྦྲགས། མཆོད་འབུལ་སྨོན་ལམ་གྱི་གོ་སྒྲིག་ཚོགས་ཆུང་ནས་༧གོང་ས་༧སྐྱབས་མགོན་ཆེན་པོ་མཆོག་ལ་བོད་མི་འདས་པོ་འབུམ་ཕྲག་བརྒལ་བ་རྣམས་ཀྱི་ཆེད་དུ་ཐུགས་སྨོན་སྐྱབས་འཇུག་ཡོང་བའི་གསོལ་འདེབས་ཞུས་ཡོད་པ་རེད།
ད་རེས་ཀྱི་མཆོད་འབུལ་སྨོན་ལམ་འདིའི་ཐོག་ཆེད་དུ་བཅར་མཁན་གྱི་བོད་མི་ཁག་ཅིག་ལ་འདི་ག་རླུང་འཕྲིན་ཁང་གིས་བཀའ་འདྲི་ཞུས་པར། བོད་ཀྱི་ཆབ་སྲིད་བཙོན་ཟུར་གྲགས་ཅན་ཕུན་ཚོགས་ཉི་སྒྲོན་ལགས་ཀྱིས། ཐེངས་འདིར་བོད་ཀྱི་ཆབ་སྲིད་བཙོན་ཟུར་འདས་གསོན་རྣམས་ཀྱི་ཆེད་༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་ཐོག་མཆོད་འབུལ་སྨོན་ལམ་ཞིག་ཚོགས་ཐུབ་པར་སེམས་གཏིང་ནས་དགའ་ཚོར་ཆེན་པོ་བྱུང་ཡོད་སྐོར་འགྲེལ་བརྗོད་དང་སྦྲགས། བོད་ནང་གི་ད་ལྟའི་ཛ་དྲག་གནས་སྟངས་ཐད་ཐུགས་འཚབ་ཆེན་པོ་གནང་གི་ཡོད་པ་གསལ་སྟོན་གྱིས། བོད་ནང་གནས་བཞུགས་བོད་མི་རྣམས་ལ་མགྱོགས་མྱུར་༧གོང་ས་༧སྐྱབས་མགོན་ཆེན་པོ་མཆོག་གི་ཞལ་མཇལ་ཐོབ་པའི་སྨོན་ལམ་ཞུ་བཞིན་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
ཡང་བཞུགས་སྒར་དུ་གནས་སྡོད་ཟླ་བ་སྒྲོལ་མ་ལགས་ཀྱིས། བོད་ཀྱི་ཆབ་སྲིད་བཙོན་ཟུར་འདས་གསོན་རྣམས་ཀྱི་ཆེད་དུ་སྨོན་ལམ་དང་འཚོ་ཞིང་བཞུགས་པ་རྣམས་ཀྱི་ཆེད་དུ་བཙན་བྱོལ་བོད་མི་རྣམས་ཀྱིས་ལས་འགུལ་མུ་མཐུད་སྤེལ་རྒྱུ་གལ་ཆེ་རེད་ཅེས་གསུངས་བྱུང་།
ཡང་གོ་སྒྲིག་ཚོགས་ཆུང་གི་ཚོགས་མི་ཆབ་སྲིད་བཙོན་ཟུར་ངག་དབང་གསང་གྲོལ་ལགས་དང་དགེ་བཤེས་ཟླ་བ་རྒྱལ་མཚན་ལགས་ཀྱིས། ད་རེས་མཆོད་འབུལ་རྒྱ་ཆེན་པོ་བྱུང་ཐུབ་པ་དེ་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་གྱི་མཇུག་ཏུ་ཆོས་ཕྱོགས་ཀྱི་མཛད་དོན་ལེགས་གྲུབ་བྱུང་བར་ངོས་འཛིན་གྱིས་དགའ་བ་སྒོམ་བཞིན་ཡོད་པ་གསུངས་ཀྱི་འདུག་ལ། གོ་སྒྲིག་ཚོགས་ཆུང་གི་ཚོགས་མི་ངག་དབང་འོད་འབར་ལགས་ཀྱིས། བོད་ཀྱི་ལོ་རྒྱུས་ནང་བོད་དོན་འཐབ་རྩོད་ཆེད་བོད་མི་འབུམ་བཅུ་གཉིས་ལྷག་འདས་གྲོངས་སུ་ཕྱིན་ཡོད་པ་རྣམས་ཀྱི་ཆེད། ༧གོང་ས་༧སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་པ་བཞིན་མཆོད་འབུལ་སྨོན་ལམ་ཐོག་ཆིབས་བསྒྱུར་བསྐྱངས་པར་བཀའ་དྲིན་ཆེ་ཞེས་གསུངས་ཀྱི་འདུག
ད་རེས་རྒྱལ་ཁབ་ཁག་ ༡༥ ཙམ་ནས་བོད་ཀྱི་ཆབ་སྲིད་བཙོན་ཟུར་རྣམ་པས་མཉམ་ཞུགས་གནང་ཡོད་ཅིང་། དགེ་བཤེས་ཟླ་བ་རྒྱལ་མཚན་ལགས་ཀྱིས། ད་རེས་འདིར་དངོས་སུ་མཉམ་ཞུགས་མི་ཐུབ་པ་ཡིན་ཡང་རང་རང་གིས་འཕེན་པ་བཏང་སྟེ་ལས་དོན་ཡག་པོ་བསྒྲུབས་སོང་ཞུ་རྒྱུ་ཡིན་ཞེས་གསུངས།
ཡང་ཕྱི་ཚེས་ ༢༣ ཉིན་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་སུད་སི་ལྷ་ས་བུའི་མཐུན་གྲོགས་ཚོགས་པ་ཐུན་མོང་ནས་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། ཕྱི་ཚེས་ ༢༤ ཉིན་༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་ཐོག་ཆབ་སྲིད་བཙོན་ཟུར་འདས་གསོན་རྣམས་ཀྱི་ཆེད་མཆོད་འབུལ་སྨོན་ལམ་ཞིག་གོ་སྒྲིག་ཞུ་ཐུབ་པ་བྱུང་བར་དགའ་ཚོར་ཆེན་པོ་བྱུང་སྐོར་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
གཞན་ཡང་ཕྱི་ཟླ་ ༢ ཚེས་ ༢༥ ཉིན་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པའི་ངོས་ནས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། དགའ་ལྡན་ཕོ་བྲང་གི་དྲུང་ཆེ། དེ་བཞིན་བོད་དོན་འཐབ་རྩོད་ཆེད་བྱས་རྗེས་ཅན་གྱི་མི་སྣ་ཁག་ཅིག་ལ་བཀའ་དྲིན་རྗེས་དྲན་གྱི་གཟེངས་རྟགས་འབུལ་རྒྱུ་ཡིན་པ་རེད་འདུག།
བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།