སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་གནང་བར། ད་རེས་སངས་རྒྱས་པའི་ཆོས་ལ་ཞུགས་ཏེ་དགེ་ཚུལ་སློང་གྲུབ་པ་དང་བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་བྱ་རྒྱུའི་སེམས་ཤུགས་སྐྱེ་དགོས་པ་དང་། ང་རང་ལ་མཚོན་ན་ཡང་ཞོགས་པ་གཉིད་ལས་བསད་པ་དང་བཅོམ་ལྡན་འདས་ཀྱི་རྗེས་འབྲངས་དགེ་སློང་ཞིག་ཡིན་པ་བསམ་བློ་འཁོར་ནས་ཡོད།
ཡང་ཟླ་ ༢ ཚེས་ ༢༧ ཉིན་ནས་བསྒྲུབ་བྱ་ཕོ་མོ་དྲུག་ཅུ་རེ་གསུམ་ལ་བར་མ་རབ་བྱུང་དང་དགེ་ཚུལ་གྱི་བསླབ་སྡོམ་སྩལ་གནང་ཡོད་པ་དང་། ཉིན་ཤས་རིང་དགེ་ཚུལ་སློང་གི་སྡོམ་པ་ཞུ་མཁན་ཁྱོན་བསྒྲུབ་བྱ་ཉི་བརྒྱ་སུམ་ཅུ་ཙམ་ཞིག་ཡོད་པ་དགའ་ལྡན་ཕོ་བྲང་ཡིག་ཚང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་ངོ་སྤྲོད་གནང་བྱུང་ལ། དགེ་ཚུལ་སློང་གི་སྡོམ་པ་གནང་རྒྱུ་འདི་སྤྱི་བཏང་དུས་ཚོད་འདིའི་སྐབས་ལ་གནང་གི་ཡོད་པ་དང་། ད་རེས་དགེ་ཚུལ་སློང་གྱི་སྡོམ་པ་བཞེས་མཁན་བསྒྱུབ་བྱ་ ༢༣༠ ཙམ་ཡོད་རེད་ཅེས་གསུངས་བྱུང་།
༧གོང་ས་མཆོག་གི་བཀའ་སློབ་གནང་བའི་ནང་ཕྱིའི་ཆ་ལུགས་བརྗེ་པས་མ་ཟད། ཚེ་འདི་རང་ལ་ཐར་པའི་གོ་འཕང་འགྲུབ་བསམ་པའི་སེམས་ཤུགས་སྐྱེས་དགོས་པ་བཀའ་གནང་ཡོད་པ་དང་། བཙན་བྱོལ་བྱས་ནས་ང་ཚོ་རང་དབང་ལུང་པའི་ནང་སངས་རྒྱས་ཀྱི་ཆོས་ཉམས་ལེན་ཡག་པོ་བྱེད་པའི་གོ་སྐབས་ཡོད་པ་ཞིག་ཆགས་ཡོད། དེར་བརྟེན་ཁྱེད་ཚོ་ཁྲལ་དང་ཁྲིམས་འགལ་ནས་གྲྭ་པ་བྱ་དགོས་པ་ཟེར་གྱི་མེད་པར། སོ་སོའི་འདོད་མོས་ལྟར་བཅོམ་ལྡན་འདས་ཀྱི་རྗེས་འབྲངས་དགེ་ཚུལ་སློང་གི་སྡོམ་པ་ལེན་ནས་སྔོན་ལ་རབ་བྱུང་ཡག་པོ་ཞིག་བྱེད་ཀྱི་ཡིན་བསམ་པའི་སེམས་ཤུགས་སྐྱེ་རྒྱུ་འདི་གལ་ཆེན་པོ་རེད་ཅེས་༧གོང་ས་མཆོག་ནས་བཀའ་གནང་འདུག
དགེ་ཚུལ་སློང་གི་སྡོམ་པ་འདི་ནི་ཧ་ཅང་གལ་ཆེན་པོ་ཞིག་ཡིན་ཞིང་། བོད་གངས་ཅན་པར་མཚོན་ན། ཐོག་མར་མཁན་ཆེན་ཞི་བ་འཚོ་བོད་ལ་ཕེབས་ནས་སད་མི་བདུན་བྱུང་བ་དང་དེ་ནས་བསྟན་པ་ཕྱི་དར་གྱི་སྐབས་སུ་བླ་ཆེན་དགོངས་པ་རབ་གསལ་གྱིས་སངས་རྒྱས་བསྟན་པའི་མེ་རོ་སྨད་ནས་གསོས་གནང་ཡོད་པ་སོགས་ཡང་སྟེན་རིན་པོ་ཆེས་གསུངས་བྱུང་ལ། ད་དུང་མུ་མཐུད་གསུངས་པར། ད་ལྟའི་གནས་སྐབས་ལ་སངས་རྒྱས་ཀྱི་བསྟན་པ་བསྐྱར་དར་ཡང་དར་ཡོང་བའི་འགོ་འདི་ཡང་བོད་གངས་ཅན་གྱི་ལྗོངས་སུ་རྒྱ་གུང་བྲན་གྱིས་སངས་རྒྱས་བསྟན་པར་གཏོར་བཤིག་བཏང་ནས་རྒྱ་གར་འཕགས་པའི་ཡུལ་དུ་སངས་རྒྱས་ཀྱི་བསྟན་པ་དར་འཕེལ་གཏོང་བའི་འགོ་འདི་ཡང་ཐོག་མར་ཡིད་བཞིན་ནོར་བུ་མཆོག་གིས་དྲུག་ཅུ་རེ་གྲངས་ནས་གནས་མཆོག་ཝ་ར་ཎ་སི་ནས་དགེ་སློང་གི་སྡོམ་པ་ཐོག་མར་གནང་ཡོད་ཅེས་གསུངས་བྱུང་།
ཡང་ཟླ་ ༣ ཚེས་ ༢ ཉིན་༧རྒྱལ་བའི་ཕོ་བྲང་དུ་བསྙེན་རྫོགས་ཀྱི་སྡོམ་པ་གནང་སྐབས་ད་ལྟ་འཛམ་གླིང་ནང་སངས་རྒྱས་པའི་ཆོས་ལ་དོ་སྣང་ཆེན་པོ་ཡོད་པའི་སྐོར་བཀའ་གནང་འདུག ད་རིང་འདིར་བསྙེན་རྫོགས་འགྲུབ་རྒྱུ་དང་འཛམ་གླིང་འདིའི་ཐོག་སངས་རྒྱས་ཆོས་ལ་དོ་སྣང་ཆེན་པོ་ཡོད་པའི་བཟོ་འདུག་པ་དང་ནུབ་ཕྱོགས་རྒྱལ་ཁབ་ནང་དུ་ཡང་སངས་རྒྱས་ཆོས་ལ་དོ་སྣང་ཆེན་པོ་བྱེད་ཀྱི་ཡོད་པའི་བཟོ་འདུག དེ་བཞིན་ཨུ་རུ་སུ་སོགས་ལ་ཡང་དོ་སྣང་ཡག་པོ་ཡོད་པའི་བཟོ་འདུག་ཅེས་བཀའ་གནང་འདུག་ལ། ད་རེས་༧རྒྱལ་བའི་ཕོ་བྲང་དུ་རྒྱུད་གྲྭ་སྨད་སྟོད་སོགས་ཀྱི་བསྒྲུབ་བྱ་ལྔ་བཅུ་ང་བཞི་ལ་བསླབ་གཞི་ཡོངས་སུ་རྫོགས་པའི་བསྙེན་རྫོགས་ཀྱི་སྡོམ་པ་སྩལ་གནང་ཡོད་པ་དང་། ༧གོང་ས་མཆོག་ནས་མུ་མཐུད་བཀའ་གནང་བར། གང་ལྟར་ང་ཚོ་དངོས་ཡོད་གནས་ཚུལ་འདི་ཐབས་སྐྱོ་པོའི་ངང་གནས་ཡོད་པ་དང་། ང་ཚོ་བཙན་བྱོལ་པ་བྱས་ནས་བསྡད་ཡོད། ང་མཁན་པོར་ཆ་མཚོན་ན་ཡང་བཙན་བྱོལ་བ་བྱས་ནས་བསྡད་ཡོད་པས། ངས་ནོར་བུ་གླིང་ཁ་ནས་བྲོས་ཡོང་སྟེ་ལྷ་སའི་གཙལ་པོ་ཕར་གྲོལ་བའི་རྗེས་སུ་ལྷ་སར་ཕྱིར་བལྟས་སློག་དུས་ཏོག་ཙམ་སེམས་སྐྱོ་པོ་བྱུང་ཞེས་བཀའ་གནང་འདུག
ཡང་སྟེན་རིན་པོ་ཆེས་ངོ་སྤྲོད་གནང་བར། སངས་རྒྱས་བསྟན་པ་གནས་མི་གནས་ཀྱི་ཚད་འཛིན་ས་ལྟ་བུ་འདི་འདུལ་བའི་བསྟན་པ་གནས་མི་གནས་ཡིན་ཞིང་། འདིའི་ནང་ནས་དགེ་ཚུལ་སློང་གི་སྡོམ་པ་ཚུལ་བཞིན་བཟུང་ནས་དགེ་འདུན་གྱི་སྡེ་ཡོད་མེད་ལ་རགས་ལུས་ཡོད། དེར་བརྟེན་འདི་ཧ་ཅང་གི་གལ་འགངས་ཆེན་པོ་ཡིན་པ་དང་། དེའི་རྒྱབ་ཏུ་གཏན་ཚིགས་ཆེན་པོ་དང་རྒྱུ་མཚན་ཆེན་པོ་ཞིག་ལྡན་ཡོད་པ་གསུངས་བྱུང་།
ད་རེས་སྡོམ་པ་ཞུ་མཁན་གྲས་སུ་སེར་བྱེས་གཙང་པ་ཁང་ཚན་ནས་ཡིན་པའི་སྨན་པ་བློ་བཟང་བརྩོན་འགྲུས་ལགས་ཀྱིས་གསུངས་པར། གུས་པ་རང་ཉིད་ལ་ཆ་མཚོན་ན། སྟོན་པ་བླ་ན་མེད་པ་དང་འཛམ་གླིང་ཞི་བདེའི་དེད་དཔོན་གྱི་སྐུ་མདུན་ནས་དུས་ཁྱད་པར་ཅན་ཆོ་འཕྲུལ་དུས་ཆེན་ཚེས་༡༥ཡི་སྐབས་དེར་བསྙེན་རྫོགས་ཀྱི་སྡོམ་པ་ཞུ་རྒྱུ་བྱུང་བ་འདི་བསྐལ་པ་བཟང་པོ་བྱུང་པ་དང་བསོད་ནམས་ཆེན་པོ་ཡིན་བསམ་པ་ཡོང་གི་འདུག་ལ། སྡོམ་པ་འདི་ཡག་པོ་སྲུང་རྒྱུའི་དམ་བཅའ་བཞག་པ་ཡིན་ཞེས་གསུངས་བྱུང་།
ཡང་རྒྱུད་སྟོད་གྲྭ་ཚང་གི་དགེ་འདུན་པ་བསྟན་འཛིན་དགེ་འདུན་ལགས་ཀྱིས་གསུངས་པར། སྟོན་པ་ཐུགས་རྗེ་ཅན་གྱི་སྡོམ་རྒྱུན་༧རྒྱལ་བ་ཐམས་ཅད་མཁྱེན་པའི་དྲུང་ནས་ཞུ་རྒྱུ་བྱུང་པ་འདི་སོ་སོའི་བསོད་ནམས་ལ་ངོས་འཛིན་ཞུ་བཞིན་ཡོད་ལ། སེམས་ལ་བརྗོད་པར་དཀའ་བའི་བདེ་བ་དང་སྙིགས་མའི་དུས་འདིར་འགན་ཆེན་པོ་ཞིག་ལེན་པའི་ཚོར་བ་བྱུང་ཞེས་གསུངས་བྱུང་།
གཞན་ཡང་ཕྱི་ལོ་ ༢༠༢༦ ཟླ་ ༣ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་སོག་རིགས་ཀྱིས་གཙོས་དད་ལྡན་ཕྱོགས་འགྲུལ་བ་ལྔ་བརྒྱ་ཙམ་ཞིག་ལ་མཇལ་ཁ་སྩལ་གནང་ཡོད་འདུག
བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།