༄༅༎ཕྱི་ཟླ་༧ཚེས་༢༡རེས་གཟའ་ཉི་མའི་ཉིན་སོག་ཡུལ་གྱི་རྒྱལ་ས་ཨོ་ལར་སྦ་ཏོར་དུ་རྒྱལ་སྤྱིའི་བོད་རིག་པའི་ཚོགས་འདུ་ཐེངས་བཅུ་གསུམ་པ་དབུ་འཛུགས་གནང་ཡོད་པ་རེད།ཚོགས་འདུའི་ཐོག་ཏུ་བོད་ཕྱི་ནང་གཉིས་དང་ཕྱི་རྒྱལ་ཡུལ་ཁག་བཅས་ནས་བོད་རིག་པའི་ཞིབ་འཇུག་པ་བཞི་བརྒྱ་ལྷག་འདུ་འཛོམས་ཀྱིས་ཚེས་ ༢༡་ནས་ ༢༦ བར་ཉི་མ་བདུན་རིང་ཚོགས་ཆུང་ཆ་བགོས་ཀྱིས་མཁས་པ་སོ་སོའི་ཆེད་རྩོམ་སྒྲོགས་སྦྱང་གནང་རྒྱུ་ཡིན་པའི་སྐོར་རྨེའུ་དཀོན་རྒྱམ་ལགས་ཀྱིས་ཚོགས་འདུ་འཚོགས་ཡུལ་ནས་བཏང་འབྱོར་བྱུང་བའི་གནས་ཚུལ་ལྟར་ན།ཐེངས་འདིའི་རྒྱལ་སྤྱིའི་བོད་རིག་པའི་ཚོགས་འདུ་དེ་བཞིན་སོག་པོའི་ཚན་རིག་ཞིབ་འཇུག་ལྟེ་གནས་ཀྱི་ལོ་རྒྱུས་ཞིབ་འཇུག་ཁང་དང་།རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པ།སོག་པོའི་རྒྱལ་ཡོངས་སློབ་གྲྭ་ཆེན་མོའི་སྤྱི་ཚོགས་ཚན་རིག་སློབ་གཉེར་ཁང་།སོག་པོའི་བོད་རིག་པའི་ཞིབ་འཇུག་ཚོགས་པ་བཅས་ཀྱིས་མཉམ་འབྲེལ་ཐོག་ནས་གོ་སྒྲིག་གནང་བ་ཞིག་ཡིན་པ་དང༌། ཚོགས་འདུའི་དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་སོག་པོའི་རྒྱལ་སར་རྟེན་གཞི་བྱས་པའི་རྒྱ་གར་གྱི་གཞུང་ཚབ་ཆེན་མོ་དང་། སོག་པོའི་ནང་པའི་མཐུན་ཚོགས་ཀྱི་ཚོགས་གཙོ་ཏེ་ལོ་རིན་པོ་ཆེ། ཨ་རིར་རྟེན་གཞི་བྱེད་པའི་བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་གི་འགན་འཛིན་ཨ་ཀྱ་རིན་པོ་ཆེ་སོགས་ཀྱི་གཙོས་པས་ཚོགས་བཅར་བ་རྣམས་དང་ཟུར་ཉན་པ་བཅས་ཁྱོན་མི་གྲངས་ ༨༠༠ཙམ་མཉམ་ཞུགས་གནང་ཡོད་པ་དང༌། ཚོགས་འདུར་ བོད་རིག་པའི་མཁས་པ་ ༤༦༠ ཙམ་མཉམ་ཞུགས་གནང་ཡོད་པའི་ཁོངས་སུ།བོད་ནང་ནས་ཕེབས་མཁན།པ་སངས་དབང་འདུས་ལགས་དང་། རྒྱ་གར་ནས།བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་དང་། ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་།ཤེས་རིག་ལས་ཁུངས་ཀྱི་ཉམས་ཞིབ་པ་གཅུང་ཚེ་རིང་ལགས་དང་ཁེ་ན་ཌ་ནས་ཚེ་རིང་ཤཀྱཱ་ལགས་དང་།ཨ་རི་ནས་བཀྲས་མཐོང་བསྟན་འཛིན་རྣམ་རྒྱལ་བཅས་ཕེབས་ཡོད་པ་རེད།
རྒྱལ་སྤྱིའི་བོད་རིག་པའི་ཞི་བ་འཇུག་ཚོགས་པའི་ཚོགས་གཙོ་ Charle Ramble ལགས་ཀྱིས་གསུང་དོན་ལྟར་ན་ ཐེངས་འདིའི་ཚོགས་འདུར་སྙན་ཞུ་འབུལ་མཁན་ ༧༣༠ ཙམ་བྱུང་ཡོད་ཀྱང་རྒྱ་ནག་གཞུང་གིས་བོད་རིག་པའི་ཞིབ་འཇུག་པ་མང་པོ་ཞིག་བཀག་འགོག་བྱས་པའི་རྐྱེན་གྱིས་བོད་རིག་པའི་དཔལ་ཡོན་དེ་འཛམ་གླིང་གི་ཞིབ་འཇུག་ཁྱབ་ཁོངས་སུ་འཛུལ་རྒྱུའི་གོ་སྐབས་འཕྲོག་པ་རེད།གལ་སྲིད་བོད་ནང་གི་ཞིབ་འཇུག་པ་མང་པོ་འཛུལ་ཞུགས་ཐུབ་ཡོད་ན་འཛམ་གླིང་གི་ཞིབ་འཇུག་བྱེད་ཕྱོགས་དང་རིགས་ལམ་སྣ་ཚོགས་སོགས་དངོས་སུ་ཉམས་སུ་མྱོང་ཐུབ་ཀྱི་ཡོད་པ་རེད་ཅེས་དང་ ཁོང་གིས་མུ་མཐུད་དེ་ཐེངས་འདིའི་ཚོགས་འདུ་ནི་ ཕྱོགས་ཡོངས་ནས་རྒྱ་ཆེ་ཤོས་དེ་ཆགས་ཡོད་
ཅེས་དང་རྒྱལ་སྤྱིའི་གཞོན་ནུའི་བོད་རིག་པའི་ཚོགས་ཆེན་ཐེངས་བཞི་པ་དེ་ ཇར་མ་ནིའི་གྲོང་ཁྱེར་ Leipzig ནང་ཚོགས་རྒྱུ་ཡིན་སོགས་གསལ་བསྒྲགས་གནང་ཡོད་པ་རེད།།
