བོད་པའི་བུད་མེད་ལྔས་སྤང་གོང་འཁྱགས་རོམ་སྟེང་རྒྱང་རྒྱུག་གི་ཉིན་དང་པོའི་འགྲན་བསྡུར་ནང་མཉམ་ཞུགས་བྱེད་མཁན་ཚང་མ་ཨང་རིམ་བཅུ་པའི་ནང་ཚུད་ཡོད་པ་དང་། ཡེ་ཤེས་གསང་གྲོལ་ལགས་སུ་ཨང་དང་པོ་ཐོབ་ཡོད་འདུག
སྤང་གོང་འཁྱགས་རོམ་སྟེང་རྒྱང་རྒྱུག་འགྲན་བསྡུར་ཞེས་དགུན་དུས་སུ་ལ་དྭགས་སྤང་གོང་མཚོ་འཁྱགས་པར་གྱུར་ཡོད་པའི་ཐོག་ལོ་ལྟར་ལ་དྭགས་བློ་སྟོབས་རྩེད་རིགས་ཐེབས་རྩ་ (Adventure Sport Foundation of Ladakh) ཞེས་པའི་ཚོགས་པས་རྒྱང་རྒྱུག་འགྲན་བསྡུར་ཞིག་གོ་སྒྲིག་ཞུ་སྲོལ་ཡོད་པ་ལྟར། འདི་ལོའི་ཉིན་དང་པོ་སྟེ་ཕྱི་ཟླ་ ༢ ཚེས་ ༢༤ ཉིན་སྤྱི་ལེ་ (KM) ༡༠ དང་ ༤༢ ཀྱི་འགྲན་བསྡུར་བྱས་པ་བརྒྱུད་བོད་པའི་བུད་མེད་ལྔས་མཉམ་ཞུགས་བྱས་ཡོད་ཅིང་། ཁོང་ཚོ་ཚང་མས་འགྲན་བསྡུར་ནང་ཨང་རིམ་བཅུའི་ནང་ཚུད་ཐུབ་པ་བྱུང་བ་དང་། དེའི་ནང་ནས་ལ་དྭགས་བསོད་ནམས་གླིང་བོད་མིའི་གཞིས་ཆགས་ནས་ཡིན་པ་ཡེ་ཤེས་གསང་གྲོལ་ལགས་སུ་སྤྱི་ལེ་ ༡༠ ཡི་རྒྱང་རྒྱུག་ནང་ཨང་དང་པོ་ཐོབ་ཡོད་འདུག་ལ། ཁོང་ད་རེས་རྒྱང་རྒྱུག་འགྲན་བསྡུར་འདིའི་ནང་མཉམ་ཞུགས་བྱས་པ་ཐོག་མ་ཆགས་འདུག
ཡེ་ཤེས་གསང་གྲོལ་ལགས་ཀྱིས། རང་ཉིད་བོད་པ་ཞིག་ཡིན་པས་རྒྱ་གར་བ་སྤྱི་དང་ལ་དྭགས་པའི་ཡུལ་མིའི་མཉམ་དུ་འགྲན་བསྡུར་ནང་ཞུགས་ནས་དཀའ་ལས་ཁག་པོ་བྱུང་ན་ཡང་། བོད་པ་ཞིག་ལ་ཨང་དང་པོ་ཐོབ་དུས་བོད་མི་ཁག་ཅིག་གིས་བོད་ཀྱི་རྒྱལ་དར་འཕྱར་བ་མཐོང་དུས་སེམས་ཤུགས་ཕར་མ་ཞིག་སྐྱེས་བྱུང་ཞེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ཡང་ཁོང་གི་གཅེན་མོ་ཚེ་རིང་དབྱངས་འཛོམས་ལགས་ཀྱང་དེ་སྔོན་ལ་དྭགས་མཁར་མདོང་ལའི་རྒྱང་རྒྱུག་ནང་གྲུབ་འབྲས་ལེགས་པོ་ཐོབ་མྱོང་ཡོད་པ་མ་ཟད། ད་རེས་འཁྱགས་རོམ་སྟེང་སྤྱི་ལེ་ ༤༢ ཀྱི་འགྲན་རྒྱུག་ནང་ཨང་བཞི་པ་ཐོབ་འདུག ཚེ་རིང་དབྱངས་འཛོམས་ལགས་ཀྱིས། སྔར་དང་བསྡུར་ན་ད་རེས་བོད་མི་མང་བ་འཛུལ་ཞུགས་བྱས་འདུག་པས་དགའ་སྣང་བྱུང་ཞེས་གསུངས་བྱུང་།
དེ་བཞིན་སྤྱི་ལེ་ ༤༢ ནང་ཨང་དྲུག་པ་ཐོབ་མཁན་དཀོན་མཆོག་སྒྲོལ་མ་ལགས་སློབ་གྲྭ་འགྲིམ་པའི་དུས་ནས་སློབ་གྲྭའི་ཁང་ཚན་ནང་ཁུལ་གྱི་རྒྱང་རྒྱུག་འགྲན་བསྡུར་མང་པོའི་ནང་མཉམ་ཞུགས་གནང་མྱོང་ཡོད་པ་རེད། ཁོང་གིས་གསུང་དོན་དུ། ང་ཚོ་སློབ་གྲྭར་སྐྱོད་པའི་སྐབས་ནས་རྒྱང་རྒྱུག་ནང་མཉམ་ཞུགས་བྱས་ཏེ་ལུས་པོར་སྦྱོང་བརྡར་མུ་མཐུད་བྱས་ཡོད་སྟབས། ད་ལྟའང་འགྲན་རྒྱུག་འདི་འདྲའི་ནང་འཛུལ་ཞུགས་བྱེད་རྒྱུ་འདི་རན་འཚམས་ཞིག་མཐོང་གི་འདུག་ཅེས་གསུངས་བྱུང་།
སྤྱིར་རྒྱང་རྒྱུག་འགྲན་བསྡུར་ནང་མཉམ་ཞུགས་གནང་མཁན་མང་ཆེ་ནི་རྒྱུན་དུ་འཚོ་བའི་ནང་སྦྱོང་བརྡར་གནང་མཁན་ཡིན་པའི་གནས་སྟངས་ཤིག་ཆགས་ཀྱི་ཡོད་ཀྱང་། ད་རེས་བོད་པ་མཉམ་ཞུགས་གནང་མཁན་ཚང་མ་ཨང་རིམ་བཅུའི་ནང་ཚུད་ཐུབ་ཡོད་པ་དེ་ནི་བོད་པ་ཚང་མས་དམིགས་བསལ་གྱི་སྤོབས་པ་བྱེད་འོས་པ་ཞིག་ཏུ་གྱུར་བ་སྤྱི་ལེ་ ༡༠ འགྲན་བསྡུར་ནང་གི་ཨང་རིམ་བཞི་པ་ཐོབ་མཁན་བསྟན་འཛིན་དབང་མོ་ལགས་ཀྱིས་གསུངས་བྱུང་།
ཡང་ཕུར་བུ་ལྷ་མོ་ལགས་ལ་སྤྱི་ལེ་ ༡༠ རྒྱང་རྒྱུག་ནང་ཨང་རིམ་ལྔ་པ་ཐོབ་འདུག
སྤང་གོང་འཁྱགས་རོམ་སྟེང་གི་རྒྱང་རྒྱུག་འགྲན་བསྡུར་འདི་བཞིན་སྤྱིར་བཏང་གི་འཕགས་བོད་གཉིས་ཀྱི་ས་མཚམས་ཕྱོགས་སུ་ཡུལ་སྐོར་སྤྲོ་འཆམ་དར་སྤེལ་གཏོང་ཆེད་ཕྱི་ལོ་ ༢༠༢༣ ལོར་འགོ་འཛུགས་བྱས་པ་ཞིག་ཡིན་པ་དང་། ལོ་རེ་བཞིན་འཁྱགས་རོམ་ཉུང་དུ་འགྲོ་བའི་དུས་སྐབས་འདིར། རྒྱང་རྒྱུག་དེ་བརྒྱུད་དམིགས་བཀར་གནམ་གཤིས་འགྱུར་ལྡོག་གི་གནས་ཚུལ་ཐད་ལ་དོ་སྣང་ཡོང་ཆེད་གོ་སྒྲིག་ཞུ་བཞིན་ཡོད་པའི་སྐོར་ལས་རིམ་གོ་སྒྲིག་ཞུ་མཁན་གཙོ་བོ་བྱམས་པ་ཚེ་བརྟན་ལགས་ཀྱིས་སྔར་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་ཡོད།
ཡང་ད་རེས་སྐྱེས་པའི་རྩེད་འགྲན་པའི་རུ་ཁག་ནང་གི་སྤྱི་ལེ་ ༤༢ ནང་ཨང་བདུན་པ་ཐོབ་པའི་བསྟན་འཛིན་ཆོས་འཛིན་ལགས་ཀྱིས་སྤང་གོང་འཁྱགས་རོམ་སྟེང་གི་རྒྱང་རྒྱུག་འགྲན་བསྡུར་འདིའི་ནང་རྒྱང་རྒྱུག་གནང་མཁན་བོད་པའི་གྲངས་འབོར་དེ་བས་མང་བ་ཡོད་ན་བསམ་གྱི་འདུག་ཅེས་གསུངས་བྱུང་།
སྤང་གོང་འཁྱགས་རོམ་སྟེང་གི་རྒྱང་རྒྱུག་འགྲན་བསྡུར་འདི་བཞིན་ལོ་ལྟར་ཉིན་གཉིས་རིང་གནང་གི་ཡོད་པ་དང་འདི་ལོའི་འགྲན་ཚོགས་འདི་ཕྱི་ཟླ་ ༢ ཚེས་ ༢༤ སྟེ་ཉིན་དང་པོའི་འགྲན་བསྡུར་ནང་མཉམ་ཞུགས་གནང་མཁན་ཁྱོན་བོད་པ་མི་གྲངས་ ༡༦ བྱུང་འདུག།