ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ (USCIRF) ཀྱིས་ཕྱི་ཟླ་ ༣ ཚེས་ ༤ ཉིན་ཨ་རིའི་གྲོས་ཚོགས་ཀྱི་ཚོགས་ཁང་ཞིག་ཏུ་ཤོག་གྲངས་ ༩༢ ཡོད་པའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་ཞིག་བཏོན་ཡོད་པའི་ནང་། ཨ་རིའི་གཞུང་གིས་བོད་མིའི་ཆོས་དད་རང་དབང་གི་གནད་དོན་དང་། རྒྱ་ནག་གིས་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་པའི་༧སྐུའི་ཡང་སྲིད་ཀྱི་གནད་དོན་ཐོག་ལ་ཐེ་ཇུས་བྱེད་རྒྱུའི་བསམ་འདུན་བཅང་གི་ཡོད་པ་དེ་གདོང་ལེན་བྱེད་དགོས་པའི་རྒྱབ་གཉེར་གནང་འདུག
སྙན་ཐོ་འདོན་སྤེལ་གནང་སྐབས་ལྷན་ཚོགས་ཀྱི་འགན་འཛིན་ཚོགས་གཙོ་ལྕམ་ ཝི་ཀི་ ཧཛ་ལར་ (Vicky Hartzler) ལགས་ཀྱིས་རིང་མིན་ཟླ་བ་རྗེས་མའི་ནང་ཨ་རིའི་སྲིད་འཛིན་ཌོ་ནལཌི་ཊམཔ་དང་རྒྱ་ནག་གི་སྲིད་འཛིན་ཞི་ཅིན་ཕིང་གཉིས་ཀྱི་མཇལ་མོལ་སྐབས་སུ་གནད་དོན་འདི་དག་གི་ཐད་ལ་གྲོས་མོལ་གནང་རྒྱུའི་གོ་སྐབས་ཤིག་ཡོད་པ་དང་། ཚོང་དོན་གོ་ཁྲལ་གྱི་ཐོག་ལ་གྲོས་མོལ་གནང་གི་ཡོད་པར་བརྟེན། སྐབས་དེར་བཀའ་མོལ་ལྷུག་པོ་ཡོང་བའི་རེ་བ་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་གི་བཅར་འདྲི་དྭང་ལེན་གནང་སྟེ་གསུངས་བྱུང་།
གནས་ཚུལ་ཐོན་པ་ཁག་ལ་གཞིགས་ན། ཨ་རིའི་སྲིད་འཛིན་ཟླ་བ་འདིའི་ཟླ་མཇུག་དང་ཡང་ན་ཕྱི་ཟླ་ ༤ ཟླ་སྟོད་ལ་རྒྱ་ནག་ཏུ་ཕེབས་རྒྱུའི་ལས་རིམ་ཞིག་འཆར་གཞི་སྒྲིག་གནང་གི་ཡོད་པའི་གནས་ཚུལ་ཞིག་ཐོན་ཡོད།
ཟླ་བ་རྗེས་མའི་ནང་ཨ་རིའི་སྲིད་འཛིན་ཌོ་ནལཌི་ཊམཔ་དང་རྒྱ་ནག་གི་སྲིད་འཛིན་ཞི་ཅིན་ཕིང་གཉིས་ཀྱི་མཇལ་མོལ་སྐབས་སུ་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་བོད་ཀྱི་ཆོས་དད་རང་དབང་གི་གནས་བབ་དང་༧གོང་ས་མཆོག་གི་མ་འོངས་ཡང་སྲིད་ཐོག་ལ་རྒྱ་ནག་གིས་ཐེ་ཇུས་བྱེད་པའི་བསམ་འདུན་བཅང་པ་བཅས་ཀྱི་གནད་དོན་འདི་དག་གི་ཐད་ལ་གྲོས་མོལ་གནང་རྒྱུའི་གོ་སྐབས་ཤིག་ཡོད་རེད།"
— ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་འགན་འཛིན་ཚོགས་གཙོ་ལྕམ་ ཝི་ཀི་ ཧཛ་ལར་གྱིས།
ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་སྙན་ཐོ་བཏོན་པའི་ནང་། ཞི་ཅིན་ཕིང་ཕྱི་ལོ་ ༢༠༢༥ ལོར་བོད་དང་ཤིན་ཅང་དུ་སྐྱོད་སྐབས་ཁུལ་འདི་དག་རྒྱ་ནག་ཅན་དུ་སྒྱུར་རྒྱུའི་ཐད་ཤུགས་གནོན་སྤྲད་ཡོད་པ་ཐེར་འདོན་དང་འབྲེལ། རྒྱ་ནག་འདི་བཞིན་ ”Country of Particular Concern” དམིགས་བསལ་སེམས་ཁུར་བྱེད་དགོས་པའི་ཨི་རཱཎ་དང་། འབར་མ། སི་རི་ཡ། ཁྱུ་བྷ། བྱང་ཀོ་རི་ཡ་སོགས་རྒྱལ་ཁབ་ ༡༣ གྱི་ཁོངས་སུ་མུ་མཐུད་མིང་འདོན་གནང་འདུག
ལྷན་ཚོགས་ཀྱི་ཚོགས་ཟུར་དང་ལས་ཐོག་འགན་འཛིན་ཚོགས་མི་ སིཊི་ཕན་ ཤནེཀི་ (Stephen Schneck) ལགས་ཀྱིས། རྒྱ་ནག་གིས་བོད་ཀྱི་ཆོས་ལུགས་རྣམས་རྒྱ་ནག་ཅན་དུ་སྒྱུར་རྒྱུ་དང་། ཡུ་གུར་མི་རིགས་ཚོའི་ཐོག་ལ་གཅིག་མཚུགས་ཀྱི་ཐབས་བྱུས་འཛིན་གྱི་ཡོད་པའི་ཐད་ལ་ཐུགས་འཚབ་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།ཁོང་གིས་མུ་མཐུད་གསུངས་པར། བོད་བདེ་ཆེན་རྫོང་གི་ནང་དུ་བོད་མི་མང་པོ་ཞིག་གནས་སྤོ་བྱེད་འཇུག་གི་ཡོད་པའི་གནད་དོན་ཐད་ལ་ཐུགས་འཚབ་ཡོད་པ་དང་། འདི་འདྲའི་སྲིད་བྱུས་ཤིག་ཤིན་ཅང་ནང་ཡུ་གུར་མི་རིགས་ཐོག་ལའང་ལག་བསྟར་བྱེད་ཡོད་པ་རེད་ཅེས་གསུངས་བྱུང་།
ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་ཕྱི་ལོ་ ༢༠༢༥ ལོའི་ལོ་འཁོར་སྙན་ཐོ་བཏོན་པའི་ནང་ད་དུང་བཀོད་པར། བོད་ནང་དུ་བོད་བརྒྱུད་ནང་བསྟན་གྱི་དགོན་སྡེ་ཁག་གི་ཐོག་དྲག་གནོན་བྱེད་པ་དང་། ༧གོང་ས་མཆོག་ལ་དད་མོས་ཞུ་མཁན་གྱི་དགེ་འདུན་པ་རྣམས་གར་སོང་མེད་པར་བཙན་ཁྲིད་དང་བཙོན་འཇུག་བྱེད་པ་སོགས་ཀྱི་གནས་ཚུལ་ཁག་གསལ་བཀོད་བྱས་འདུག་ལ། ༧ཀུན་གཟིགས་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལོ་ངོ་ ༣༠ ཙམ་སོང་ཡང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་ཡོད་པ། རྒྱ་ནག་གིས་ཕྱི་རྒྱལ་ཁག་ཏུ་ཡོད་པའི་ཆོས་ལུགས་དང་གྲངས་ཉུང་མི་རིགས་ཀྱི་ཐོག་ལ་དྲག་གནོན་བྱེད་པར་ཡར་ཐོན་གྱི་འཕྲུལ་རིགས་བེད་སྤྱོད་བྱེད་ཀྱི་ཡོད་པ་བཀོད་འདུག་པ་མ་ཟད། ཕྱི་ཟླ་ ༢ ནང་སུད་སིའི་གཞུང་གིས་སུད་སིར་གནས་སྡོད་བྱེད་མཁན་བོད་མི་དང་ཡུ་གུར་བ་རྣམས་ལ་རྒྱ་ནག་གཞུང་གིས་སོ་ལྟ་བྱེད་པ་དང་། དེ་དག་ལ་རང་ཉིད་ཀྱི་ཕྱི་སྡོད་མི་མང་ལ་གསང་བའི་ལྟ་ཞིབ་བྱེད་པར་གནོན་ཤུགས་སྤྲོད་དེ་རྒྱལ་མཚམས་བརྒལ་ནས་དྲག་གནོན་གྱི་ཐབས་བྱུས་འཛིན་གྱི་ཡོད་པ་ཡང་བཀོད་འདུག
སྙན་ཐོའི་ནང་མུ་མཐུད་བཀོད་པར། རྒྱལ་སྤྱིའི་བློ་མཐུན་སྒྲིག་འཛུགས་དང་མཉམ་ལས་ཀྱིས་ཆོས་དད་རང་དབང་ལ་དོ་ཕོག་ཚབས་ཆེན་གཏོང་མཁན་གྱི་འགན་ཁུར་བ་སྟེ་རྒྱ་ནག་འཐབ་ཕྱོགས་གཅིག་གྱུར་ལས་ཁུངས་དང་། མང་ཚོགས་བདེ་འཇགས་དང་རྒྱལ་ཁབ་བདེ་འཇགས་ཀྱི་སྒྲིག་འཛུགས་ཁག་ཚུད་པའི་རྒྱ་ནག་གི་དཔོན་རིགས་དང་། རྒྱ་ནག་གཞུང་འབྲེལ་གྱི་སྒྲིག་འཛུགས། རྒྱུ་དངོས་བཅས་པར་ཉེས་ཆད་གཏོང་དགོས་པ་རེད་ཅེས་ཀྱང་བཀོད་འདུག
རྒྱ་ནག་གཞུང་དང་མཉམ་འབྲེལ་བྱས་པའི་རྒྱ་ནག་གི་ཚོང་ལས་ཁང་ཁག་གིས་ཡུ་གུར་དང་བོད་ཀྱི་སྐད་ཡིག་ཐོག་ལ་མིས་བཟོས་རིག་ནུས་ཀྱི་སྐད་ཡིག་སློབ་སྦྱོང་གི་ལམ་ལུགས་གསར་གཏོད་བྱས་ཏེ། དྲ་ལམ་དང་འཕྲུལ་རིགས་ཐོག་ནས་ཆོས་ལུགས་དང་འབྲེལ་བའི་ཡུ་གུར་དང་བོད་ཀྱི་སྐད་ཡིག་ཐོག་བྲིས་པའི་འཕྲིན་གཏོང་རྣམས་ལ་སོ་ལྟ་དང་། ཚོད་འཛིན། འགོག་གནོན་བྱེད་པར་དེ་བས་ནུས་ཤུགས་སྤེལ་བའི་ཐབས་ལམ་འཚོལ་བཞིན་པའི་སྐོར་གསལ་སྟོན་བྱས་འདུག
ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ (USCIRF) ནི་ཕྱི་ལོ་ ༡༩༩༨ ལོར་ཨ་རིའི་རྒྱལ་སྤྱིའི་ཆོས་དད་རང་དབང་གི་ཁྲིམས་ཡིག་ (IRFA) འབྲུ་དོན་བཞིན་ཆབ་སྲིད་ཚོགས་པ་ཟུང་སྦྲེལ་གྱིས་ཆེད་འཛུགས་གནང་པའི་རང་དབང་ཅན་གྱི་ལྷན་ཚོགས་ཤིག་ཡིན་ཞིང་། རང་དབང་ཅན་གྱི་སྒྲིག་འཛུགས་དེས་འཛམ་གླིང་ནང་དུ་ཆོས་དད་རང་དབང་ལ་རྡོག་རོལ་གཏོང་བར་ལྟ་ཞིབ་བྱེད་དེ་ཨ་རིའི་སྲིད་འཛིན་དང་། ཕྱི་སྲིད་དྲུང་ཆེ། ཨ་རིའི་གྲོས་ཚོགས་བཅས་ལ་དམིགས་བསལ་སེམས་ཁུར་བྱེད་དགོས་པའི་རྒྱལ་ཁབ་ཟེར་མིང་འདོན་གནང་སྟེ་ཛ་དྲག་གི་གནད་དོན་ཐོག་ལ་རྒྱབ་གཉེར་འབོད་སྐུལ་དང་ལམ་སྟོན་འབུལ་བཞིན་ཡོད་པ་རེད།།
པར་ལེན་དང་བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།