པཎ་ཆེན་རིན་པོ་ཆེའི་འཁྲུངས་སྐར་གང་སར་སྲུང་བརྩི་གནང་འདུག

བཞུགས་སྒར་དུ་པཎ་ཆེན་རིན་པོ་ཆེ་མཆོག་གི་འཁྲུངས་སྐར་ཉིན་ལས་འགུལ་སྤེལ་བཞིན་པ། ༢༠༡༧།༤།༢༥

བོད་ཕྱི་ཡི་བོད་མི་གནས་སྡོད་བྱེད་ཡུལ་གང་སར་རྣམ་པ་འདྲ་མིན་ཐོག་པཎ་ཆེན་རིན་པོ་ཆེའི་འཁྲུངས་སྐར་སྲུང་བརྩི་གནང་འདུག
དེ་ཡང་ཕྱི་ཟླ་བཞི་པའི་ཚེས་༢༥ ཉིན་མོ་འདི་ནི་༧གོང་ས་༧སྐྱབས་མགོན་ཆེན་པོ་མཆོག་གིས་ངོས་འཛིན་གནང་པའི་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་ལ་འཁེལ་ཡོད་པར་བརྟེན། བཞུགས་སྒར་རྡ་རམ་ས་ལ་དང་། བྱེས་གྱི་གདན་ས་བཀྲ་ཤིས་ལྷུན་པོ། དེ་བཞིན་ཨ་རི་དང་ཨོསི་ཊརེ་ལི་ཡ། ཁེ་ན་ཊ། ཡོ་རོབ། ར་ཤི་ཡ་སོགས་བོད་མི་གནས་སྡོད་བྱེད་ཡུལ་གང་སར་རྣམ་པ་འདྲ་མིན་ཐོག་བོད་མི་དང་བོད་དོན་རྒྱབ་སྐྱོར་བ་ཚོས་འཁྲུངས་སྐར་སྲུང་བརྩི་ཞུས་ཡོད་པ་རེད།  བྱེས་ཀྱི་གདན་ས་བཀྲིས་ལྷུན་པོར་དཔལ་ས་སྐྱ་༧གོང་མ་ཁྲི་ཆེན་རིན་པོ་ཆེ་དབུ་ཞུགས་ཐོག་དུས་ཆེད་དེ་སྲུང་བརྩི་ཞུས་ཤིང་།  ས་སྐྱ་༧གོང་མ་ཁྲི་ཆེན་རིན་པོ་ཆེ་མཆོག་གིས་ཡང་སྲིད་རིན་པོ་ཆེ་མགྱོགས་ནས་མྱུར་དུ་ང་ཚོས་ཚང་མས་ཞལ་མཇལ་གསུང་ཐོས་ཡོང་རྒྱུར་ཚང་མས་ཐུགས་སྨོན་དང་། ཐོུང་གི་བསོད་ནམས་གསོག་དགོས་པའི་བཀའ་སློབ་ཕེབས་ཡོད་པ་རེད།
པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་དགུང་གྲངས་ ༦ ལ་ཕེབས་སྐབས་རྒྱ་ནག་གཞུང་གིས་ཁོང་དང་ཁོང་གི་ཡབ་ཡུམ་སྐུ་འཁོར་དང་བཅས་པ་ཚང་མ་བཙན་ཁྲིད་བྱས་ཏེ་ད་བར་ལོ་ངོ་ ༢༢ ཙམ་འགྲོ་གི་ཡོད་ཅིང་། རྒྱ་ནག་གཞུང་གིས་ཁོང་རྣམས་བདེ་གནས་སུ་ཡོད་ལུགས་ཙམ་ལས་གར་ཡོད་གནས་ཚུལ་ད་བར་ཕྱིར་བསྒྲགས་བྱས་མྱོང་མེད་པ་རེད།  དབུས་བོད་མིའི་སྒྲིག་འཛུགས་དང་། དེ་བཞིན་བོད་དོན་རྒྱབ་སྐྱོར་བ། འགྲོ་བ་མིའི་ཐོབ་ཐང་དོན་གཉེར་བ། འཛམ་གླིང་མཉམ་འབྲེལ་རྒྱལ་ཚོགས། ཨ་རི་གཙོས་པའི་མང་གཙོའི་ཡུལ་གྲུ་ཁག་ནས་པཎ་ཆེན་རིན་པོ་ཆེ་གློད་གྲོལ་ཡོང་ཐབས་སུ་རྒྱབ་སྐྱོར་དང་ཞུ་གཏུགས་ཀྱི་ལས་འགུལ་མུ་འཐུད་སྤེལ་མུས་ཡིན་པ་རེད།

གསར་འགོད་པ་གཡུ་སྒྲོན་དང་། པ་སངས་དོན་ལྡན།