༄༅། །Australia ནས་ཕེབས་པའི་མཁན་ཟུར་རིན་པོ་ཆེ་མཆོག་གི་སློབ་མ་ཁི་འཇོ་རིན་པོ་ཆེ་ནས་ང་ཚོའི་གསར་འགོད་པར་འགྲེལ་བརྗོད་གནང་ཡག་ལ། སེར་སྨད་རྒྱལ་རོང་མཁན་ཟུར་རིན་པོ་ཆེ་ལ་མཆོག་དགོང་པ་མ་རྫོགས་པའི་ཉིན་འགའ་ཤས་གོང་ཞལ་མཇལ་སྐབས་ཐུགས་ཕྲལ་གནང་མི་དགོས་པའི་སློབ་སྟོན་གནང་འདུག མཁན་ཟུར་རིན་པོ་ཆེ་མཆོག་ཉེ་བའི་ལོ་འགའི་སྔོན་ནས་མཆིན་པའི་སྙུང་གཞི་བྱུང་ཡོད་པའི་སྐོར་མཁན་ཟུར་རིན་པོ་ཆེའི་སྐུ་ཚ་དགེ་བཤེས་དགེ་ལེགས་ལགས་ཀྱིས་གསུང་འདུག་ལ། མཁན་ཟུར་རིན་པོ་ཆེ་མཆོག་རྒྱ་གར་ལྷོ་ཕྱོགས་མེ་སོར་རྫོང་དང་། བྷེང་ལོར་གྲོང་ཁྱེར་བཅས་ནས་ཀོ་ལེམ་པེ་ཨེ་ཤེ་ཡ་ནང་དམིགས་བསལ་མཆིན་པའི་སྨན་ཁང་དུ་བསྟེན་གཏུག་གནང་ཡོད་པ་རེད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་རྟགས་ཞུས་པ་དང་། སྐུའི་བླ་སྨན་སྡེ་ཚན་ནས་ཀྱང་བོད་ཀྱི་སྨན་པ་ཆེད་མངགས་བཏང་གནང་ནས་སྨན་བཅོས་ཞུས་ཡོད་རེད། འོན་ཀྱང་ཕྱི་ཚེས་ ༨ ཀྱི་མཚན་མོ་ཕྱག་ཚོད་ ༡༢ དང་ཕྱེད་ཙམ་ལ་དགོངས་པ་གཞན་དོན་གཤེགས་པའི་ཡིད་སྐྱོའི་གནས་ཚུལ་བྱུང་བཞག ད་ལྟའི་སྐབས་མཁན་ཟུར་རིན་པོ་ཆེ་མཆོག་ཐུགས་དམ་ལ་བཞུགས་ཡོད་པ་དང་། སེར་སྨད་གྲྭ་ཚང་དང་། མཁན་ཟུར་བླ་བྲང་། ཁི་འཇོ་བླ་བྲང་ཐུན་མོང་གི་གོ་སྒྲིག་འོག མཁན་ཟུར་རིན་པོ་ཆེ་ཐུགས་དམ་མ་གྲོལ་བར་དུ་སེར་སྨད་གྲྭ་ཚང་གི་འཛིན་གྲྭ་སོ་སོའི་རེས་མོས་ཀྱིས་སྤྱོད་འཇུག་དང་། རྩ་གསུམ་སོགས་ཀྱི་མཚན་ཕུད་ཆོས་ཀློག་གནང་རྒྱུ་ཡིན་པ་རེད།
