སྤྱི་ཟླ་༧པའི་ཚེས་༢༡རེས་གཟའ་ཉི་མའི་ཉིན། ཨ་མི་རི་ཀའི་སྲིད་འཛིན་འཇཱོ་སྦཡེ་ཌེན་(Joe Biden)་མཆོག་གིས་སྤྱི་ལོ་༢༠༢༤་ལོའི་སྲིད་འཛིན་འོས་བསྡུའི་འགྲན་རྩོད་ནས་ཕྱིར་འཐེན་གནང་རྒྱུ་ཡིན་པ་ཡོངས་ཁྱབ་ཕྱག་བྲིས་ཞིག་ཁྱབ་སྤེལ་གནང་སྟེ་ཁོང་གིས་ཐག་གཅོད་འདི་བཞིན་གསལ་བསྒྲགས་གནང་ཡོད་པ་དང་། ཕྱག་བྲིས་དེའི་ནང་། ཁོང་གིས་ད་ལྟའི་སྲིད་འཛིན་གྱི་ཐུགས་འགན་བཞེས་ཐུབ་པ་དེ་ནི་ཁོང་གི་སྐུ་ཚེའི་ནང་ལས་དོན་རྩ་བ་ཆེ་ཤོས་ལ་ངོས་འཛིན་གནང་གི་ཡོད་པ་དང་། སླར་ཡང་ལོ་བཞིའི་རིང་མུ་མཐུད་ཨ་མི་རི་ཀའི་སྲིད་འཛིན་གནང་ཐུབ་རྒྱུར་སྲིད་འཛིན་འོས་བསྡུའི་ནང་འགྲན་ཞུགས་གནང་རྒྱུའི་འདུན་པ་ཡོད་ནའང་རྒྱལ་ཁབ་ཀྱི་རྩ་དོན་དང་། མང་གཙོ་ཚོགས་པའི་ཁེ་ཕན་གྱི་ཆེད་དུ་ད་རེས་སྲིད་འཛིན་གྱི་འོས་བསྡུའི་འགྲན་རྩོད་ནང་འགྲན་ཞུགས་མི་དགོས་པར་ཕྱིར་འཐེན་གནང་རྒྱུར་ཐག་གཅོད་གནང་པ་ཡིན་ཞེས་བསྒྲགས་པ་དང་ཆབས་ཅིག ཁོང་གིས་སྲིད་འཛིན་གཞོན་པ་ལྕམ་(Kamala Harris)་ལགས་སྲིད་འཛིན་གྱི་འོས་མིར་རྒྱབ་གཉེར་གནང་གི་ཡོད་ཅེས་གསུང་འདུག
གསལ་བསྒྲགས་དེའི་རྗེས་སུ་ཨ་རིའི་སྲིད་འཛིན་ཟུར་པ་ཨོ་བྷ་མ་གཙོས་དམངས་གཙོ་ཚོགས་པའི་དབུ་ཁྲིད་མང་པོས་སྲིད་འཛིན་སྦཡེ་ཌེན་གྱི་བློ་སྟོབས་ཆེ་བའི་འདམ་ཀར་གུས་བརྩི་དང་། ཁོང་གིས་མི་ཚེ་ཧྲིལ་པོར་ཨ་རིའི་ཆབ་སྲིད་ལས་དོན་ཐད་ཀྱི་མཛད་རྗེས་ལ་བསྔགས་བརྗོད་གནང་འདུག དེ་བཞིན་དབྱིན་ཇི་དང་ཇར་མན་སོགས་འཛམ་གླིང་གི་དབུ་ཁྲིད་མང་པོས་ཁོང་ནི་འཛམ་གླིང་གི་སྲིད་དོན་གར་སྟེགས་སྟེང་ཤུགས་རྐྱེན་ཆེ་ཤོས་ཀྱི་དབུ་ཁྲིད་ཅིག་ལ་ངོས་འཛིན་གནང་གི་འདུག
གསར་འགོད་པ། དབྱངས་སྒྲོན།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།