ལྷ་ས་གྲོང་ཁྱེར་ནང་དམག་སྦྱོང་དང་འབྲེལ་བའི་མཁའ་ཟོན་ཉེན་བརྡ་ཚོད་ལྟ་བྱས་འདུག

རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་གྲོང་ཁྱེར་ནང་དམག་སྦྱོང་དང་འབྲེལ་བའི་མཁའ་ཟོན་ཉེན་བརྡ་ཚོད་ལྟ་བྱས་ཡོད་པ་མ་ཟད། ལྷོ་ཁ། གཞིས་ཀ་རྩེ། དེ་བཞིན་ལྷ་སའི་ཤར་ལྷོའི་ཕྱོགས་སུ་ཡོད་པའི་ཉིང་ཁྲི་གྲོང་ཁྱེར་སོགས་ཀྱི་ནང་དུའང་ཚོད་ལྟ་བྱས་འདུག འདི་ཚེས་༡༩ཉིན་ལྷ་ས་གྲོང་ཁྱེར་ནང་དམག་སྦྱོང་དང་འབྲེལ་བའི་མཁའ་ཟོན་ཉེན་བརྡ་ཟེར་བ་ཞིག་གཏོང་རྒྱུ་ཡིན་ལུཌ་གྲོང་ཁྱེར་མི་དམངས་སྲིད་གཞུང་གིས་ཉེ་ལམ་གསལ་བསྒྲགས་ཤིག་སྤེལ་འདུག་ཅིང་། འདི་ག་རླུང་འཕྲིན་ཁང་གིས་ལྷ་སར་བོད་མི་ཁག་ཅིག་ལ་ཉེན་བརྡའི་གནས་སྟངས་སྐོར་གནས་ཚུལ་རྒྱུས་ལོན་ཞུས་པར་མིང་འབོད་གནང་འདོད་མེད་པའི་བོད་མི་ཞིག་གིས་བརྙན་པར་དང་བཅས་འདི་གའི་རླུང་འཕྲིན་ཁང་ལ་བཏང་འབྱོར་བྱུང་བའི་ནང་ལྷ་སའི་ཁུལ་དུ་ཉེན་བརྡའི་སྒྲ་དང་མེ་མདའི་སྒྲ་བཅས་དུས་གཅིག་ཏུ་བསྒྲགས་ཏེ། མི་རྣམས་འགུལ་སྐྱོད་མ་བྱས་པར་རང་སར་གནས་པའི་བརྙན་ཐུང་སོགས་འབྱོར་བྱུང་ལ། བོད་མི་ཁོང་གིས་དེང་སྐབས་རྒྱ་ནག་གཞུང་གིས་ལྷ་སའི་ཁུལ་དུ་རྒྱ་མི་དམག་མིའི་གྲངས་འབོར་ཇེ་མང་དུ་གཏོང་བཞིན་པའི་ཁར། ཉེན་རྟོག་ཁང་གསར་པའི་རིགས་མང་དུ་གཏོང་བཞིན་ཡོད་པ་དང་། བོད་པའི་དམག་མི་མང་པོ་ཞིག་ས་མཚམས་ཀྱི་ཕྱོགས་སུ་བཏང་ཡོད་ལུགས་འགྲེལ་བརྗོད་གནང་བྱུང་ལ། ལྷ་སའི་གྲོང་ཁྱེར་ནང་གལ་ཏེ་ངོ་རྒོལ་དང་རྒྱ་གཞུང་གི་ལྟ་སྤྱོད་དང་མི་མཐུན་པའི་གནས་ཚུལ་རིགས་ལྷག་པ་ཡིན་ཚེ། ཉེན་རྟོག་པ་དང་དམག་མི་དེ་དག་གྲ་སྒྲིག་ཨང་སར་བྱས་ནས་བསྡད་ཡོད་པ་འགྲེལ་བརྗོད་གནང་འདུག དེའི་ཐད་གནད་དོན་དབྱེ་ཞིབ་པ་ཚོས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། སྤྱི་ལོ་༢༠༠༩ལོར་ལྷ་སའི་ནང་དམག་སྦྱོང་བྱས་པ་བཞིན། ད་རེས་ཀྱི་སྦྱོང་བརྡར་འདིས་བོད་མི་ཚོར་འཇིགས་སྣང་དང་དངངས་སྐྲག་སླངས་ཡོད་མ་ཟད། ས་མཚམས་ཁག་ཏུ་གནམ་ཐང་གསར་རྒྱག་གིས་དམག་སྦྱོང་བྱེད་བཞིན་པ་དེ་ནི། དཔུང་དམག་ངོམས་པ་དང་བོད་མི་ཚོར་འཇིགས་སྣང་སྐུལ་བཞིན་པ་རེད་ཅེས་འགྲེལ་བརྗོད་གནང་འདུག དམག་སྦྱོང་དང་འབྲེལ་བའི་མཁའ་ཟོན་ཉེན་བརྡ་ཟེར་བ་ཚོད་ལྟ་བྱེད་དགོས་དོན་ནི། སྤྱི་ལོ་༡༩༣༡ཟླ་༩ཚེས་༡༩ཉིན་ཉི་ཧོང་གིས་རྒྱ་ནག་བྱང་ཤར་ཏོ་བྷེའེ་ས་ཁུལ་ནང་བཙན་འཛུལ་བྱས་པའི་དུས་སྐབས་ཤིག་ལ་ངོས་འཛིན་གྱིས། བོད་ཙམ་མ་ཟད་རྒྱ་ནག་རྒྱལ་ཡོངས་སུ་ས་ཆ་མང་པོའི་ནང་མཁའ་ཟོན་ཉེན་བརྡ་བཏང་ཡོད་འདུག་ཀྱང་། གནད་དོན་དབྱེ་ཞིབ་པ་ཚོས་མཁའ་ཟོན་སྦྱོང་བརྡར་རིགས་ནི་དམིགས་བསལ་མཁའ་དམག་གི་ཐོག་ནས་དམག་འཐབ་བྱུང་བ་ཡིན་ན། དེར་གདོང་ལེན་བྱེད་སྟངས་ཀྱི་སྦྱོང་བརྡར་ཞིག་ཡིན་པ་འགྲེལ་བརྗོད་གནང་གི་ཡོད་པ་རེད།།

ཁྱེད་ཀྱི་མཆན་འགོད་ཆེད་འདི་གནོན།

• པར་བཀོད།
• འགྲེམ་སྤེལ།
• གཞན་ལ་ཐོངས།

མཆན་ཚང་མར་གཟིགས།.

• ཐད་ཀར་རྒྱང་སྲིང༌།
• སྒྲ་མཛོད།