རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཁོངས་སུ་རྒྱ་ནག་འོས་བབ་མེད་པའི་ལས་འགུལ་སྤེལ་བཞིན་འདུག

དེ་ཡང་ཕྱི་ལོ་༢༠༡༦ལོའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཁོངས་རྒྱལ་ཁབ་ཁག་གི་འོས་བསྡུའི་སྐབས། རྒྱ་ནག་ལ་རྒྱབ་སྐྱོར་གྱི་འོས་ཤོག་གྲངས་༡༨༠ཐོབ་ཡོད། ཡིན་ན་ཡང་རྗེས་སུ་རྒྱ་ནག་གཞུང་གིས་ཡུ་གུར་མི་རིགས་ཐོག་དམ་དྲག་གི་སྲིད་ཇུས་ལག་བསྟར་བྱས་བའི་བྱ་སྤྱོད་ལ་བརྟེན་ཕྱི་ལོ་༢༠༢༠ལོར་འོས་ཤོག་གྲངས་ ༡༣༩ལས་ཐོབ་མེད་པ་རེད་འདུག (The Inter- Parliamentary Alliance on China)་ཞེས་པའི་རྒྱ་ནག་ཐད་རྒྱལ་སྤྱིའི་གྲོས་ཚོགས་གནའ་མཐུན་ཚོགས་པ་དེས་རྒྱ་ནག་ལ་རྒྱབ་སྐྱོར་ཉུང་བ་ཐོབ་ཐབས་ཀྱི་འབད་བརྩོན་བྱེད་བཞིན་པར། ཁོང་ཚོར་རྒྱ་ནག་ལ་རྒྱབ་སྐྱོར་མ་གནང་མཁན་གྱི་རྒྱལ་ཁབ་གསར་པ་གྲངས་༡༥འི་རྒྱབ་སྐྱོར་ཐོབ་ཡོད་པའི་ཁོངས་ཨི་ཊ་ལི་དང་། (Bolivia)་རྒྱལ་ཁབ་གཉིས་བྱུང་ཡོད་པ་རེད་འདུག
གོང་ཞུས་ཚོགས་པ་དེའི་ཚོགས་གཙོ་དབྱིན་ཡུལ་གྱི་གྲོས་ཚོགས་འཐུས་མི་ལྕམ་(Helena Kennedy)་ཡིས། རྒྱ་ནག་གཞུང་ལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིའི་འོས་ཆོས་ཚང་གི་མེད་པ་དེ་གསལ་པོ་རེད། རྒྱ་ནག་གཞུང་གིས་གྲངས་ཉུང་མི་རིགས་རྩ་མེད་བཟོ་བ་དང་འགྲོ་བ་མིར་ནག་ཅན་གྱི་ལས་དོན་སྤེལ་བའི་ཉེས་བ་ཡོད་པ་མ་ཟད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྟོག་ཞིབ་གནང་མཁན་དང་མཉམ་ལས་མི་བྱེད་པ་དང་། ལྷག་པར་དུ་དམིགས་བསལ་སྐུ་ཚབ་དང་དམིགས་བསལ་འགྲོ་ལུགས་ཀྱི་སྐུ་ཚབ་རྣམ་པས་བློ་ཚབས་བསྟན་པར་ཕར་རྒོལ་བྱས་ཡོད་པ་རེད། ད་ཐེངས་རྒྱ་ནག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཁོངས་སུ་ཞུགས་རྒྱུར་བཀག་འགོག་བྱེད་མ་ཐུབ་ཀྱང་རྒྱབ་སྐྱོར་གྱི་འོས་ཤོག་གྲངས་ཉུང་བ་ཐོབ་པ་བྱེད་རྒྱུ་དེ་ནི་འཛམ་གླིང་གི་ཐོག་བརྡ་ལན་གསལ་པོ་ཞིག་སྤྲོད་ཐུབ་རྒྱུ་ཡིན་པ་རེད་ཅེས་གསུངས་འདུག
དེ་བཞིན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་རྒྱལ་ཁབ་འོས་འདེམས་གནང་སྐབས། ཚོགས་མི་རྒྱལ་ཁབ་རྣམས་ཀྱིས་རྒྱ་ནག་དང་ར་ཤེ་ཡ་སོགས་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་རྒྱལ་ཁབ་ལ་འོས་ཤོག་མི་འཕེན་པའི་ཞུ་སྐུལ་གནང་འདུག

གསར་འགོད་པ། ལྷུན་གྲུབ་ཚེ་རིང་།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།