རྒྱ་ནག་གཞུང་གིས་བོད་དམག་ཁུལ་ཁང་གི་མི་དམངས་བཅིངས་གྲོལ་དམག་གི་ཆབ་སྲིད་ཨུ་ཡོན་Tang Xiaoཡི་ད་ཡོད་དབང་ཚད་ཆེ་རུ་བཏང་འདུག
དེ་རིང་ལྷོ་རྒྱ་ནག་གི་སྔ་དྲོའི་ཕོ་ཉ་ཟེར་བའི་དབྱིན་ཡིག་གསར་ཤོག་ཐོག་ལ། Tang Xiaoནི་བོད་རང་སྐྱོང་ལྗོངས་དམག་ཁུལ་ཁང་གི་ཆབ་སྲིད་ཨུ་ཡོན་གོ་གནས་ཡོད་པ་དེ་ནས་རྒྱ་ནག་མི་དམངས་བཅིངས་འགྲོལ་དམག་གི་སྤྱི་ཁྱབ་ཆབ་སྲིད་ཚན་པས་རིམ་པ་གཉིས་པའི་དམག་སྤྱི་གཞོན་པའི་གོ་གནས་དང་གཅིག་མཚུངས་ལྡན་པའི་དབང་ཆ་སྤྲད་ཡོད་ཅིང། དེ་ནི་བོད་ནང་གི་དྲག་ཆས་ཉེན་རྟོག་པར་དམིག་བསལ་གནས་བབ་དང་ཐབས་ཇུས་ཀྱི་གནས་བབ། ཁོང་ཚོའི་འགན་འཁྲི་དང་། ལས་འགན་ལྗིད་པོ་ཡོད་པར་ལྟོས་ནས་ཐག་གཅོད་བྱས་པ་ཞིག་ཡིན་ལུགས་བཀོད་ཡོད་ལ། ད་དུང་བོད་ལྗོངས་ཉིན་རེའི་ཚགས་པར་ཐོག་ལ། Tang Xiao ལ་དབང་ཚད་ཁྱབ་ཆེ་རུ་བཏང་བ་དེ་ནི་བོད་ནང་ཞི་བདེ་ལྷིང་འཇགས་རྒྱུན་གནས་སྐྲུན་ཐབས་ཀྱི་ཆེད་དུ་ཡིན་ཚུལ་བཀོད་ཡོད་ལུགས་ལུང་འདྲེན་བྱས་ཡོད་པ་རེད།
Tang Xiaoལ་བོད་དམག་ཁུལ་ཁང་གི་ཆབ་སྲིད་ཨུ་ཡོན་གོ་གནས་ཡོད་པ་དེའི་ཐོག་ནས་། དྲག་ཆས་ཉེན་རྟོག་ཚན་པའི་དམར་ཤོག་ཚོགས་པའི་ཚབ་མཚོན་དང་དམག་དཔུང་གི་བསམ་བློའི་འཁྱེར་ཕྱོགས་ལ་ལྟ་རྟོགས་བྱེད་པའི་དབང་ཆ་ལྡན་ཡོད་པའི་ཁར་ད་ཆ་དབང་ཆ་ཆེ་རུ་བཏང་བ་དེའི་ཐོག་ནས་དྲག་ཆས་ཉེན་རྟོག་ཚན་པའི་དམག་དཔོན་གོ་གནས་ཨང་གཉིས་པའི་དབང་ཆ་གཅིག་མཚུངས་ཀྱི་དབང་ཤུགས་ཅན་དུ་གྱུར་ཡོད་པ་རེད། ད་དུང་བོད་ལྗོངས་ཉིན་རེའི་ཚགས་པར་དེའི་ཐོག་ལ། རྒྱ་ནག་གི་དྲག་ཆས་ཉེན་རྟོག་པ་ནི་སྤྱི་ཚོགས་བརྟན་ལྷིང་བཟོ་མཁན་དང། ས་ཡོམ་སོགས་རང་བྱུང་གི་གནོད་འཚེ་རྒུད་སྐྱོབ་བྱེད་མཁན་སོགས་གཞུང་གི་ཁྲིམས་ལུགས་ལག་བསྟར་བྱེད་མཁན་ཞིག་ཡིན་པ་ལྟར། བོད་ཀྱི་དྲག་ཆས་ཉེན་རྟོག་ཚན་པ་དེ་ཡིས་བོད་ནང་སྤྱི་ཚོགས་བརྟན་ལྷིང་སྐྲུན་རྒྱུ་མ་ཟད། ལྷག་པར་དུ་དམར་ཤོག་ཚོགས་པར་བློ་གཏད་དང་རྒྱལ་ཞེན་གྱི་བསམ་བློ་རྒྱུན་གནས་ཐུབ་པ་དང། འཇིགས་སྐུལ་དྲག་སྤྱོད་པར་གདོང་ལེན་བྱ་རྒྱུའི་འགན་འཁྲི་ཡོད་པའི་སྐོར་བཀོད་ཡོད་པ་རེད། དེ་བཞིན་རྒྱ་ནག་གྲོང་ཁྱེར་ཧྲང་ཧེ་་དུ་ཡོད་པའི་དམག་དོན་མཁས་པ་Ni Lexiong གིས། Tang Xiaoཡི་དབང་ཆ་ཆེ་རུ་བཏང་དེ་ཡིས་རྒྱ་ནག་མི་དམངས་བཅིངས་འགྲོལ་དམག་གི་ཁྲིམས་ལུགས་དབང་ཚད་ཁྱབ་ཆེ་རུ་དང་གནས་བབ་ཡར་རྒྱས་དང། ལས་དོན་སྲ་བརྟན་དུ་བཏང་བ་ཡིན་ལུགས་བཤད་ཡོད་པ་རེད།
གསར་འགོད་པ་ཉི་མ་གཡུ་སྒྲོན།
