བོད་མིའི་མཉམ་འབྲེལ་ཁག་ཡོངས་ཀྱི་འཛིན་སྐྱོང་ཚོགས་ཆེན་ཐེངས་ཉེར་གཉིས་པ་རྒྱ་གར་ལྷོ་ཕྱོགས་སུ་ཚོགས་བཞིན་འདུག

དེ་ཡང་ཟླ་བ་འདིའི་ཕྱི་ཚེས་༢༨ནས་༣༡བར་ཉིན་བཞིའི་རིང་། བོད་མིའི་སྤྱི་མཐུན་མཉམ་འབྲེལ་གྱི་གོ་སྒྲིག་འོག་བོད་མིའི་མཉམ་འབྲེལ་ཁག་༡༥འི་འཛིན་སྐྱོང་ཚོགས་ཆེན་ཐེངས་༢༢པ། རྒྱ་གར་ལྷོ་ཕྱོགས་སྦེ་ལ་ཀོ་པི་ལུགས་བསམ་མཉམ་འབྲེལ་ཚོགས་ཁང་གི་ནང་དབུ་ཚུགས་གནང་སོང་། ཚོགས་ཆེན་དབུ་འཛུགས་ཀྱི་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་དྲུང་འཕར་བྱམས་པ་ཕུན་ཚོགས་ལགས། དེ་བཞིན་ཕྱོགས་བཞུགས་སྤྱི་འཐུས་དང་ས་གནས་འགོ་འཛིན་གཙོས། ལས་སྣེ་རྣམ་པ་དང་འབྲེལ་ཡོད་ཚོགས་བཅར་བ་ལྷན་འཛོམས་ཐོག བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གཞུང་གི་ལམ་སྟོན་གཞིར་བཟུང་བོད་མིའི་མཉམ་འབྲེལ་ཁག་གིས་ལས་དོན་གཉེར་བཞིན་པར་ལེགས་གསོ་བསྔགས་བརྗོད་དང་སྦྲགས། བོད་མིའི་འཐབ་རྩོད་ཆེད་ནུས་པ་ཆེ་ཤོས་དེ་བོད་མིའི་ནང་ཁུལ་མཐུན་སྒྲིལ་བྱ་རྒྱུ་དེ་ཡིན་དུས། སྤྱི་ཚོགས་ཀྱི་འགན་འཁུར་མཁན་ཚོས་དེའི་ཐོག་འགན་འཁུར་དགོས་པ་སོགས་ནན་བརྗོད་གསུངས་བཤད་གནང་སོང་།

མཛད་སྒོའི་ཐོག་བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་སྤྱི་ཟུར་པད་མ་བདེ་ལེགས་ཀྱིས། བོད་མིའི་མཉམ་འབྲེལ་ཁག་གི་འཛིན་སྐྱོང་ཚོགས་ཆེན་ཚོགས་དགོས་པའི་གནད་འགག་དང་། དེའི་རྒྱབ་ལྗོངས་བརྒྱུད་རིམ་དང་མང་གཙོའི་ལམ་སྲོལ་དང་མཐུན་པར་བོད་མིའི་མཉམ་འབྲེལ་ཁག་རང་སྐྱོང་སྡེ་ཚན་དུ་བསྒྱུར་པའི་གནས་སྟངས་དང་། དེ་བཞིན་མཉམ་འབྲེལ་ཁག་གི་འཛིན་སྐྱོང་དེ་གཞུང་གི་ལམ་སྟོན་གཞིར་བཟུང་ལག་བསྟར་གནང་ཏེ་མཉམ་འབྲེལ་ཁག་གི་གནས་སྟངས་གང་སྤྱིའི་ཆ་ནས་ཡར་རྒྱས་ཕྱིན་ཏེ་བོད་མིའི་སྤྱི་མཐུན་མཉམ་འབྲེལ་དང་མཉམ་འབྲེལ་ཁག་ནས་གཞུང་དམངས་གཉིས་ལ་ཞབས་ཞུ་སྒྲུབ་གནང་གི་ཡོད་པ་གསུང་གནང་སོང་།
ལྷན་ཚོགས་འདིའི་ཐོག་བོད་མིའི་མཉམ་འབྲེལ་ཁག་བཅོ་ལྔའི་ཚོགས་གཙོ་དང་དྲུང་ཆེ་དེ་བཞིན་འགན་འཐུས་རེ་བཅས་ཁྱོན་ཚོགས་ཞུགས་པ་མི་གྲངས་༤༥་མཉམ་ཞུགས་གནང་འདུག་ལ། ལྷན་ཚོགས་འདིའི་ཐོག་མཉམ་འབྲེལ་སོ་སོའི་ལོ་འཁོར་ལས་བསྡོམས་དང་རྩིས་ཕྲ་སྙན་སྒྲོན་གནང་ཞིང་། འདས་ལོའི་གྲོས་ཆོད་ལག་བསྟར་ཇི་བྱུང་སོགས་ཀྱི་ཐད་གྲོས་བསྡུར་གནང་གི་ཡོད་པ་མ་ཟད། མཉམ་འབྲེལ་ཁག་སོ་སོའི་ལས་འཆར་འདྲ་མིན་ཞིག་ཡོད་པའི་ནང་མེའོ་ཆོས་འཕེལ་གླིང་མཉམ་འབྲེལ་ལ་ད་ལོ་རྒྱ་གར་ཨ་རུ་ན་ཅལ་མངའ་སྡེ་གཞུང་གི་རོགས་སྐྱོར་འོག་ཧིན་སྒོར་འབུམ་༡༩༠ལས་གཞི་ཞིག་ཡོད་སྐོར་མེའོ་ཆོས་འཕེལ་གླིང་མཉམ་འབྲེལ་དྲུང་ཆེ་བསྟན་འཛིན་རབ་འབྱོར་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
དེ་མཚུངས་ལ་དྭགས་བསོད་ནམས་གླིང་མཉམ་འབྲེལ་ཚོགས་གཙོ་ཀརྨ་རྡོ་རྗེ་ལགས་ཀྱིས་གསུངས་ན། བསོད་ནམས་མཉམ་འབྲེལ་ལ་ད་ལོ་རྡོ་སྣུམ་ཚོང་སྒྱུར་ཁང་(PetrolPump)་གི་ལས་འཆར་དེ་ཡིན་པ་ཡག་པོ་འགྲོ་བཞིན་པ་གསུང་གནང་བྱུང་།
དེ་མིན་བོད་མིའི་མཉམ་འབྲེལ་གཞན་ཁག་ལ་ཡང་དེ་མཚུངས་ལས་འཆར་འདྲ་མིན་ཞིག་ཡོད་པ་རེད།

གཞི་རྩའི་ཆ་ནས་རྒྱ་གར་ནང་བོད་མིའི་གཞིས་ཆགས་ཁག་སྲ་བརྟན་རྒྱུན་གནས་ཐུབ་རྒྱུར་གཞིས་ཆགས་ཁག་གི་བོད་མི་སོ་ནམ་པ་རྣམས་ལ་མཐུན་འགྱུར་རྒྱབ་སྐྱོར་གནང་ཆེད། བོད་མིའི་མཉམ་འབྲེལ་སྡེ་ཚན་གསར་བཙུགས་གནང་ཡོད་ན། བོད་མིའི་མཉམ་འབྲེལ་སོ་སོའི་ལས་དོན་གཉེར་བ་ལས་མཉམ་འབྲེལ་ཁག་ཕན་ཚུན་བར་འབྲེལ་བ་དེ་ཙམ་མེད་དུས། བོད་མིའི་མཉམ་འབྲེལ་ཁག་གི་སོ་ནམ་པའི་ཐོན་སྐྱེད་དང་ལག་ཤེས་བཟོ་ལས་ཁག་གི་ཐོན་རྫས་ཚོང་སྒྱུར་བྱ་རྒྱུར་མཉམ་འབྲེལ་ཁག་ཚང་མས་རང་རང་གི་ཉམས་མྱོང་བརྗེ་ལེན་དང་། དཀའ་ངལ་ཁག་ལ་གདོང་ལེན་བྱ་རྒྱུར་དམིགས་ཏེ་སྤྱི་མཐུན་མཉམ་འབྲེལ་ཞིག་གསར་བཙུགས་གནང་རྒྱུར་གལ་ཆེར་གཟིགས་ཏེ། བོད་མིའི་སྒྲིག་འཛུགས་ཀྱི་ལམ་སྟོན་འོག་ཕྱི་ལོ་༢༠༠༥་བོད་མིའི་གཞིས་ཆགས་ཁག་གི་མཉམ་འབྲེལ་ཁག་མཉམ་རུབ་ཀྱི་ཐོག་ནས་བོད་མིའི་སྤྱི་མཐུན་མཉམ་འབྲེལ་གསར་བཙུགས་གནང་ཡོད་པ་དང་། སྤྱི་མཐུན་མཉམ་འབྲེལ་དེའི་ཁྱབ་ཁོངས་རྒྱ་གར་ལྷོ་ཕྱོགས་ཀར་ན་ཀྲ་ཀ་དང་ཆ་ཏིས་གྷར། མ་ཧ་ར་ཏྲ། ཇ་མུ་ཀཤ་མིར། ཨ་རུ་ན་ཅལ་དང་ཨོ་ཌི་ས། ཧི་མ་ཅལ་དེ་བཞིན་སིམ་ཀིམ་དང་ནུབ་བྷེང་གྷལ་བཅས་རྒྱ་གར་གྱི་མངའ་སྡེ་ཁག་དགུའི་ཁྱབ་ཁོངས་སུ་བོད་མིའི་མཉམ་འབྲེལ་བཅོ་ལྔ་ཡོད་པ་རེད།

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།