སྦིར་སིལ་དུ་ཡོ་རོབ་གྲོས་ཚོགས་ཀྱི་འཐུས་མི་དང་ཕྱི་རྒྱལ་གཞུང་ཚབ་སོགས་མགྲོན་འབོད་ཀྱིས་༧གོང་ས་མཆོག་གི་འཁྲུངས་སྐར་སྲུང་བརྩི་ཞུས་འདུག

སྦིར་སིལ་(Brussels)་བོད་ཀྱི་སྐུ་ཚབ་དོན་གཅོད་ཁང་གིས་ཡོ་རོབ་གྲོས་ཚོགས་ཀྱི་ཚོགས་དུས་དང་བསྟུན་ནས་བོད་ཀྱི་དབུ་ཁྲིད་སྤྱི་ནོར་༧གོང་ས་མཆོག་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་དུས་ཆེན་ཕྱིར་བསྣུར་གྱིས་འདི་ཚེས་༡༠ཉིན་གཞུང་འབྲེལ་སྲུང་བརྩི་ཞུས་སྐབས། ཡོ་རོབ་གྲོས་ཚོགས་ཀྱི་འཐུས་མི་དང་། ཡོ་རོབ་མཉམ་འབྲེལ་སྒྲིག་འཛུགས་ཀྱི་འཐུས་མི། དེ་བཞིན་ཨ་རི་དང་། ལ་ཐི་ཝེ་ཡ། ལི་ཐོ་ནི་ཡ། ཆེ་ཁི། རྒྱ་གར། ཐེ་ཝན་བཅས་ཀྱི་གཞུང་ཚབ་མགྲོན་འབོད་ཀྱིས་ཆེད་ཕེབས་གནང་ཡོད་འདུག

སྦིར་སིལ་བོད་ཀྱི་སྐུ་ཚབ་དོན་གཅོད་སྒྲོན་འགན་ཁང་རིག་འཛིན་ཆོས་སྒྲོན་ལགས་ཀྱིས་སྐུ་མགྲོན་རྣམ་པར་དགའ་བསུ་དང་། མཛད་སྒོའི་ཐོག་གོང་ཞུས་སྐུ་མགྲོན་རྣམ་པས་༧གོང་ས་ཏཱ་ལའི་བླ་མ་མཆོག་དང་བོད་མི་དམངས་ལ་རྒྱབ་སྐྱོར་གནང་དང་གནང་བཞིན་པར་བཀའ་དྲིན་ཆེ་ཞུས་བ་དང་། དེ་བཞིན་༧གོང་ས་མཆོག་གིས་འཛམ་གླིང་ཞི་བདེ་དང་འགྲོ་བ་མིའི་རིགས་ཀྱི་བདེ་སྡུག་ཐད་ཀྱི་མཛད་རྗེས་རླབས་ཆེན་ངོ་སྤྲོད་མདོར་བསྡུས་ཞུས་འདུག
དེ་མིན་བོད་ཀྱི་གཞས་མ་རྣམ་རྒྱལ་ལྷ་མོ་ལགས་ཀྱིས་བོད་ཀྱི་གཞས་སྣ་འཁྲབ་སྟོན་དང་། སྦིར་ཇམ་བོད་རིགས་ཚོགས་པ་དང་གཟའ་མཇུག་བོད་ཡིག་སློབ་གྲྭའི་སྐུ་ཚབ་ཀྱང་མཉམ་ཞུགས་གནང་ཞིང་། མཇུག་ཏུ་སྐུ་མགྲོན་རྣམས་ཀྱིས་བོད་ཡིག་ཐོག་སོ་སོའི་མཚན་དང་ཡང་ན་བོད་ཡིག་གཞན་བྲིས་ནས་དྲན་རྟེན་དུ་ཉར་བ་སོགས་བྷིར་སིལ་བོད་ཀྱི་སྐུ་ཚབ་དོན་གཅོད་ཁང་གིས་གནས་ཚུལ་སྤེལ་འདུག

གསར་འགོད་པ། ལྕགས་མོ་འཚོ།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།