ཨ་རི་དང་རྒྱ་གར་གྱི་དཔོན་རིགས་ཚོས་སྐུའི་འཁྲུངས་སྐར་ལ་འཚམས་འདྲི་ཞུས་པར་རྒྱ་ནག་གིས་སྐྱོན་བརྗོད་བྱས་འདུག

སྤྱི་ཟླ་༧པའི་ཚེས་༦ཉིན་ནི་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་ཉིན་མོ་ཡིན་པར་བརྟེན། འཛམ་གླིང་གི་ཡུལ་གྲུ་གང་སར་རྣམ་པ་འདྲ་མིན་གྱི་ཐོག་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་༧སྐུའི་འཁྲུངས་སྐར་སྲུང་བརྩི་ཞུས་ཡོད་པ་དང་། ཨ་རི་དང་རྒྱ་གར་བཅས་ཀྱི་དཔོན་རིགས་ཚོས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་འདྲི་གནང་ཡོད་པ་རེད།
རྒྱ་ནག་དམར་ཤོག་ཚོགས་པ་དང་སྲིད་གཞུང་གི་ཆེད་ལས་མཁས་པ་ཟེར་བའི་ཀྲུའུ་ཝེ་ཆོན་གྱིས་ཨ་རི་དང་རྒྱ་གར་གྱི་དཔོན་རིགས་ཚོས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་ལ་འཚམས་འདྲི་ཞུས་བར་སྐྱོན་བརྗོད་བྱས་ཡོད་པ་དང་སྦྲགས། ཨ་རི་དང་རྒྱ་གར་རྒྱལ་ཁབ་གཉིས་ཀྱི་དཔོན་རིགས་ཚོའི་བྱ་སྤྱོད་དེ་ནི་ཏཱ་ལའི་བླ་མའི་འཁྲུངས་སྐར་བེད་སྤྱད་ནས་རྒྱ་ནག་ལ་ཁ་གཏད་ཀྱི་རྣམ་པ་ཞིག་ཡིན་ལུགས་རྒྱ་ནག་གཞུང་འབྲེལ་གོ་ལའི་དུས་བབ་གསར་ཁང་གིས་གནས་ཚུལ་སྤེལ་འདུག
གནས་ཚུལ་དེའི་ནང་རྒྱ་ནག་མི་དམངས་ཆབ་སྲིད་གྲོས་ཚོགས་ཀྱི་མི་རིགས་དང་ཆོས་ལུགས་ལྷན་ཁང་གི་འགན་འཛིན་ཟུར་པ་ཀྲུའུ་ཝེ་ཆོན་གྱིས་བཤད་པ་ལུང་འདྲེན་བྱས་པའི་ནང་། ཨ་རིའི་ཕྱི་སྲིད་དྲུང་ཆེ་ཨན་ཊོ་ནི་བྷི་ལིན་ཀེན་(Antony Blinken)་དང་རྒྱ་གར་གྱི་སྲིད་བློན་མོ་དྷིས་(Modi)་གཉིས་ཀྱི་བྱ་སྤྱོད་དེ་ཏཱ་ལའི་བླ་མ་བེད་སྤྱད་ནས་རྒྱ་ནག་ལ་ཚོད་འཛིན་དང་ཁ་གཏད་བྱེད་ཀྱི་ཡོད་ལུགས་བརྗོད་ཡོད་འདུག་ལ། ཀྲུའུ་ཝེ་ཆོན་གྱིས་ད་དུང་ཏཱ་ལའི་ཚོགས་པའི་ཤུགས་རྐྱེན་ད་ཆ་ཆུང་དུ་འགྲོ་བཞིན་པའི་སྐབས་ཨ་རི་དང་རྒྱ་གར་གྱི་འབད་རྩོན་བྱེད་ཡས་དེ་རིགས་ཀྱིས་རྒྱ་ནག་ལ་ཤུགས་རྐྱེན་གཏོང་ཐུབ་རྒྱུར་ཕན་འབྲས་གང་ཡང་ཐོན་མེད་ལུགས་སོགས་བཤད་ཡོད་འདུག
ཨ་མི་རི་ཀའི་ཕྱི་སྲིད་དྲུང་ཆེ་(Antony Blinken)་མཆོག་གིས་སྐུའི་འཁྲུངས་སྐར་ཉིན་འཚམས་འཕྲིན་སྤེལ་བའི་ནང་། ༧མགོན་པོ་གང་ཉིད་ཀྱིས་འཚེ་བ་མེད་པ་དང་བྱམས་སྙིང་རྗེའི་ཐོག་བཀའ་སློབ་ལམ་བསྟོན་མཛད་བཞིན་པ་ཁག་སྤྱི་དང་། ལྷག་དོན་དུ་འགྲོ་བ་མི་སྤྱི་ཡོངས་ལ་འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཆེད་ཆོད་སེམས་བརྟན་པོ་ཡོད་སྟབས་༧མགོན་པོ་གང་ཉིད་ནི་གཞིས་བྱེས་གཉིས་སུ་འཁོད་པའི་བོད་མི་ཡོངས་དང་། འཛམ་གླིང་ནང་གི་མི་མང་མང་པོར་སེམས་འགུལ་གནང་མཁན་གྱི་སྐྱེས་ཆེན་ཞིག་ཡིན་སྐོར་སོགས་ཆེ་བསྟོད་དང་མཉམ། ཨ་མི་རི་ཀའི་ངོས་ནས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་དང་བཅས་པ་སྲུང་སྐྱོབ་ཞུ་རྒྱུ་མ་ཟད། གཞན་གྱི་ཐེ་བྱུས་རྩ་བ་ནས་མེད་པར་བོད་ཀྱི་ཆོས་ཕྱོགས་དབུ་ཁྲིད་རྣམས་ཀྱི་ཡང་སྲིད་བོད་མི་རྣམས་ཀྱིས་རང་དབང་སྒོ་ནས་ངོས་འཛིན་ཞུ་ཕྱོགས་ལ་ཡང་རྒྱབ་སྐྱོང་ཞུ་དང་ཞུ་རྒྱུ་ཡིན་པ་ཡང་བསྐྱར་ནན་བརྗོད་གནང་འདུག་ལ་དེའི་ཐད་ཡང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་འཆར་ཅན་གསར་འགོད་ལྷན་ཚོགས་ཐོག་བོད་ཀྱི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཡིན་ཚུལ་བཤད་ནས་སྐྱོན་བརྗོད་བྱས་འདུག
དེ་བཞིན་རྒྱ་གར་གྱི་སྲིད་བློན་མོ་དྷིས་མཆོག་གིས་ཀྱང་(X)་སྤྱི་ཚོགས་དྲྭ་རྒྱ་བརྒྱུད་ནས་༧གོང་ས་སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་འདྲི་གནང་ཡོད་པ་རེད།

གསར་འགོད་པ། འཆི་མེད།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།