ཁོང་ཁྲོ་ནི་མིག་ལོང་བ་ལྟབུ་ཡིན་པས་བྱམས་བརྩེ་ལྡན་པ་བྱོས། ༧གོང་ས་མཆོག་གིས།

བོད་ཀྱི་དབུ་ཁྲིད་༧གོང་ས་མཆོག་གིས་ཁོང་ཁྲོ་ནི་མིག་ལོང་བ་ལྟབུ་ཡིན་པས་ནམ་ཡང་བྱམས་བརྩེ་ལྡན་པའི་ཁོར་ཡུག་བསྐྲུན་གལ་ཆེ་བ་བཀའ་སྩལ་འདུག
འདི་ཟླའི་ཚེས་༡༢་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཞུགས་སྒར་རྒྱལ་བའི་ཕོ་བྲང་ནང་། དམིགས་བསལ་མཇལ་ཁ་སྩལ་གནང་མཛད་པའི་རྒྱ་གར་གྱི་ནང་མི་ཞིག་གི་ཁྲོད་ནས་བུ་མོ་ཞིག་གིས་གཞན་ལ་གནོད་པ་བྱེད་མཁན་དེ་ལ་བྱམས་བརྩེ་ཇི་འདྲ་བྱེད་དགོས་མིན་བཅའ་འདྲི་ཞུས་པར། ༧གོང་ས་མཆོག་གིས། མི་དེ་འདྲར་ང་ཚོས་སློབ་གསོ་སྤྲོད་དགོས་པ་དང་། ནམ་ཞིག་ཡག་པོ་ཆགས་སྲིད། དཔེར་ན། མི་གཞན་ཞིག་དང་འཁྲུག་པ་ཤོར་པ་ཡིན་ན་རང་ཉིད་ཁ་བཙུམ་ནས་བསྡད་ཚེ་ཉིན་རྗེས་མའམ་ཡང་ན་བདུན་ཕྲག་རྗེས་མར་མི་འཁྲུག་པ་ཤོར་ས་དེ་དང་རང་ཉིད་ག་དུས་ཡིན་ནའི་གྲོགས་པོ་གྲོགས་མོ་ཡག་ཤོས་དེ་ཆགས་སྲིད་པ་རེད་དཀའ་ངལ་ཆུང་ཆུང་ཞིག་འཕྲད་པའི་སྐབས་སུ་འཕྲལ་དུ་ཁོང་ཁྲོ་དྲག་པོ་ལང་པ་ཡིན་ན་མ་འོངས་པར་གནས་ཚུལ་བཟང་པོ་ཞིག་ཡོང་སྲིད་པ་དེ་དག་ཚང་མ་གཏོར་བཤིག་གཏོང་གི་ཡོད་སྟབས་རང་ཉིད་ཀྱི་རིག་སྟོབས་དང་ཤེས་བྱ། བྱམས་བརྩེ་བེད་སྤྱོད་བྱེད་དགོས་པའི་བཀའ་སྩལ་གནང་མཛད་པ་མ་ཟད། ཁོང་ཁྲོ་ནི་མིག་ལོང་བ་ལྟ་བུ་ཡིན་པ་དང་ཁོང་ཁྲོས་ཟུར་གཅིག་རང་ནས་བལྟས་པ་མ་གཏོགས་
་ཕྱོགས་ཚང་མའམ་གཅིག་ལ་གཅིག་བརྟེན་སྐོར་བལྟ་ཡི་ཡོད་མ་རེད། གལ་ཏེ་ཁྱེད་རང་དང་རང་གི་ཁྱིམ་མཚེས་གཉིས་འཁྲུག་པ་ཤོར་པ་སོགས་དཀའ་ངལ་བྱུང་ན་ཡང་བསམ་བློ་རྒྱ་ཆེ་ས་ནས་བཏང་བ་ཡིན་ན། ཁྱེད་རང་ཁྱིམ་མཚེས་དང་མཉམ་ཞིབ་བྱས་ནས་སྡོད་དགོས་ཀྱི་ཡོད་རེད། དེ་འདྲ་སོང་ཙང་མ་འོངས་པར་གྲོགས་པོ་གྲོགས་མོ་ཡག་པོ་ཞིག་ཆགས་པའི་གནས་ཚུལ་བཟང་པོ་ཡོང་སྲིད་པ་དེ་སྒོ་ཕྱེ་ནས་འཇོག་དགོས་སྐོར་སོགས་བཀའ་སློབ་སྩལ་འདུག