བོད་ཕྱི་ནང་གཉིས་སུ་༧གོང་ས་མཆོག་གི་ཞབས་པུས་སྨན་བཅོས་ལམ་ལྷོང་ཡོང་སླད་སྨན་བླའི་གཟུངས་སྔགས་གཙོས་ཞབས་རིམ་སྒྲུབ་བཞིན་འདུག

སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཨ་རིའི་ནིའུ་ཡོག་གྲོང་ཁྱེར་དུ་ཞབས་སོར་བདེ་བར་འཁོད་སྐབས། ༠༦།༢༣།༢༠༢༤

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཨ་མི་རི་ཀའི་གྲོང་ཁྱེར་ནེའུ་ཡོག་ཏུ་ཞབས་པུས་སྨན་བཅོས་གནང་བར་ཕེབས་གཏན་འཁེལ་བའི་གནས་ཚུལ་ཕྱིར་བསྒྲགས་གནང་མ་ཐག འཛམ་གླིང་གི་ས་ཕྱོགས་གང་སར་གནས་པའི་བོད་མི་དང་། དད་ལྡན་པ་ཚོས་གནས་ཆུང་གི་བཀའ་ལུངས་ཕེབས་པ་ལྟར་སྨན་བླའི་གཟུངས་སྔགས་དང་། ༧རྒྱལ་བའི་ཞབས་རིམ་སོགས་རྒྱུན་མི་ཆད་པར་གསུངས་འདོན་ཞུས་གནང་བཞིན་ཡོད་པ་དང་། བོད་ནང་རྒྱ་ནག་གཞུང་གི་དམ་དྲག་ཇི་ལྟར་ཡོད་མིན་ལ་མ་བལྟོས་པར་བོད་མི་ཚོས་ཐུགས་སྣང་ཆེན་པོས་སྨན་བླའི་གཟུངས་བསྔགས་གསུངས་འདོན་གནང་བཞིན་ཡོད་པ་མ་ཟད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུའི་འཕྲོད་བཞེས་ཞབས་པུས་སྨན་བཅོས་ཀྱི་གནས་སྟངས་དང་འབྲེལ་བའི་སྐོར་ལ་ཐུགས་འཚབ་ཆེན་པོས་ཞལ་པར་བརྒྱུད་བཀའ་འདྲི་གནང་མཁན་ཡང་ཡང་ཡོང་བཞིན་ཡོད་པ་འདི་ག་ཨ་མི་རི་ཀའི་ནང་གནས་བཞུགས་བོད་མི་ཁག་ཅིག་གིས་ཨེ་ཤེ་ཡ་རང་དབང་རླུང་འཕྲིན་ཁང་དུ་གནས་ཚུལ་ངོ་སྤྲོད་གནང་བྱུང་།
ཡང་བོད་ནས་བོད་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ལམ་ནས། བོད་ནང་གི་ས་གནས་གང་ས་གང་དུ་དགོན་པ་དང་མང་ཚོགས་ཚོས་ཞབས་རིམ་སྒྲུབ་བཞིན་འདུག བོད་མིའི་སྐྱབས་མགོན་བདེ་བར་སྨོན་ཞེས་ལན་གནང་བྱུང་།
དེང་སྐབས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཨ་མི་རི་ཀའི་ནང་སྐུའི་འཕྲོད་བཞེས་ཞབས་པུས་སྨན་བཅོས་ཆེད་ཕེབས་ཡོད་དུས། བོད་ནས་ཨ་མི་རི་ཀའི་ནང་གཉེན་འཕྲད་དུ་ཕེབས་མཁན་བོད་མི་ཁག་ཅིག་དུས་ཡུན་དེའི་རིང་ཨ་མི་རི་ཀའི་ནང་ཕེབས་རྒྱུའི་ཐོངས་མཆན་ཆ་ཚང་རག་ཚར་ནས་གྲ་སྒྲིག་ཨང་སར་ཡོད་པ་ཡིན་ནའང་གཞུང་འབྲེལ་འབྲེལ་ཡོད་མི་སྣ་ནས་བཀའ་འགུགས་བྱས་སྟེ་ད་རེས་༧གོང་ས་ཏཱ་ལའི་བླ་མ་མཆོག་ཨ་མི་རི་ཀའི་ནང་ཕེབས་པའི་དུས་ཚོད་དང་བསྟུན་ནས་གཉེན་འཕྲད་དུ་འགྲོ་དགོས་དོན་ཅི་ཡིན་ཞེས་འདྲི་རྩད་བྱས་བའི་གནས་ཚུལ་བྱུང་འདུག བོད་ནང་གི་བོད་མི་ཁག་ཅིག་གིས་འདི་ག་ཨ་མི་རི་ཀའི་ནང་གནས་བཞུགས་གནང་མཁན་བོད་མི་བརྒྱུད་བྱང་ཨ་མི་རི་ཀའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་སུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུའི་འཕྲོད་བཞེས་དང་འབྲེལ་བའི་གནད་དོན་སྐོར་བཀའ་འདྲི་ཞུས་སྐབས། སྐུ་ཚབ་དོན་གཅོད་མཆོག་གིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དེང་སྐབས་ནེའུ་ཡོག་ཏུ་སྐུའི་འཕྲོད་བཞེས་བརྟག་དཔྱད་གནང་བཞིན་ཡོད་པས་ཞབས་པུས་སྨན་བཅོས་འགྲུབ་མཚམས་སུ་དགའ་ལྡན་ཕོ་བྲང་ནས་གསལ་བསྒྲགས་གནང་རྒྱུ་ཡིན་སྟབས་བོད་ནང་དུ་ཡོད་པའི་བོད་མི་ཚོས་སྨན་བླའི་གཟུངས་སྔགས་གང་མང་གསོག་སྒྲུབ་གནང་སྐྱོང་ཡོང་བ་ཞུ་ཅེས་གསུངས་བྱུང་།

སྤྱི་ནོར་༧གོང་ས་སྐྱབས་མགོན་པོ་མཆོག་ཨ་རིར་སྐུའི་འཕྲོད་བཞེས་སླད་ཞབས་སོར་འཁོད་ཡོད་པའི་གོ་སྐབས་དང་བསྟུན། ཨ་མི་རི་ཀ་དང་། ཁེ་ཎ་ཌ། སུད་སི། ཕ་རན་སི། བལ་ཡུལ་བཅས་ནས་དད་ལྡན་མང་ཚོགས་༣༢༠་ལྷག་གིས་བསོད་ནམས་གསོག་པའི་ཆེད་དང་། སྐུའི་འཕྲོད་བཞེས་ཀྱི་གནང་སྒོ་མཐའ་དག་ལེགས་པར་འགྲུབ་པའི་སྨོན་ལམ་ཆེད་ཁྱོན་བསྡོམས་ཨ་སྒོར་གཅིག་འབུམ་གཅིག་ཁྲི་བཞི་སྟོང་བརྒྱ་དང་ཉི་ཤུ་ལྷག་སྐུ་ཚབ་དོན་གཅོད་བརྒྱུད་དགའ་ལྡན་ཕོ་བྲང་ཡིག་ཚང་ལ་འབུལ་འདུག
དེ་བཞིན་རྒྱ་གར་དང་བལ་ཡུལ། བྱང་ཨ་རི་དང་ཡོ་རོབ་སོགས་ས་གནས་གང་སར་བོད་མི་དང་ཧི་མ་ལ་ཡའི་རི་བརྒྱུད་ཁུལ་གྱི་མི་རིགས་གཙོས་དད་ལྡན་པ་ཚོས་སྨན་བླའི་གཟུངས་སྔགས་གཙོས་ཞབས་རིམ་སྒྲུབ་བཞིན་པ་རེད།
དེ་འབྲེལ་འདི་ཚེས་༢༧ཉིན་བྱང་ཨ་རིའི་བོད་ཀྱི་སྐུ་ཚབ་དོན་གཅོད་ལས་ཁུངས་ནས་སྤྱི་བསྒྲགས་སྤེལ་བའི་ནང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་༧སྐུའི་འཕྲོད་བཞེས་དངོས་གཞི་རིང་མིན་དབུ་འཛུགས་གནང་རྒྱུར་བརྟེན། སྤྱི་ཟླ་༦པའི་ཚེས་༢༨དང་ཚེས་༢༩ཉིན་གཉིས་རིང་སྔ་དྲོ་ཕྱག་ཚོད་༧།༠༠ པ་ནས་ཉིན་གུང་ ༡༢།༠༠ བར་དང་། ཉིན་རྒྱབ་ཕྱག་ཚོད་ ༢།༠༠པ་ནས་ ༥།༠༠པ་བར་སྨན་བླའི་གཟུང་སྔགས་དང་། ཏཱ་རེའི་བསྟོད་པ། མ་ཎི་ཡིག་དྲུག་བཅས་གནད་སྨིན་གསོག་སྒྲུབ་གནང་དགོས་པའི་རེ་སྐུལ་དང་མཉམ། སྐུའི་འཕྲོད་བཞེས་ལེགས་འགྲུབ་ཀྱིས་རྒྱ་གར་དུ་ཕྱིར་ཕེབས་མ་གྲུབ་བར་ཞབས་རིམ་ཁག་གསོག་སྒྲུབ་གནང་སྐྱོང་ཡོང་བ་ཞུ་རྒྱུ་དང་། སྐུའི་འཕྲོད་བཞེས་དང་འབྲེལ་བའི་སྐོར་འབྲེལ་ཡོད་དགའ་ལྡན་ཕོ་བྲང་ཡིག་ཚང་དང་། སྐུའི་བླ་སྨན་པ་མཆོག་གིས་སྐབས་མཚམས་སུ་གསལ་བསྒྲགས་གནང་རྒྱུའི་དགོངས་པ་འདུག་ཅེས་གསལ་འདུག
དབུས་བོད་མིའི་སྒྲིག་འཛུགས་ཀྱི་བཀའ་དྲུང་ཡིག་ཚང་ནས་བཀའ་བློན་ལས་ཁུངས་ཁག་གི་དྲུང་ཆེ་རྣམ་པར་སྤྱི་ཟླ་༦པའི་ཚེས་༢༧འཁོད་པའི་བཀའ་ཡིག་ཞིག་བཏང་གནང་འདུག་པའི་ནང་། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་མི་རི་ཀར་ཞབས་པུས་སྨན་བཅོས་སླད་ཆིབས་སྒྱུར་བསྐྱངས་གནང་མཛད་ཡོད་པ་བཞིན། སྤྱི་ཟླ་༦པའི་ཚེས་༢༨ཉིན་རྒྱབ་ལས་བྱེད་ཚང་མས་སོ་སོའི་ལས་ཁུངས་ནང་གནས་ཆུང་ཆོས་རྒྱལ་ཆེན་པོའི་བཀའ་ལུང་ཕེབས་པ་བཞིན་སྨན་བླའི་གཟུངས་སྔགས་གསོག་སྒྲུབ་གནང་རྒྱུའི་བཀོད་ཁྱབ་གནང་འདུག
དེ་བཞིན་སྐུ་བཅར་ཕན་བདེ་ལེགས་བཤད་གླིང་རྣམ་རྒྱལ་གྲྭ་ཚང་ནས་ཀྱང་སྤྱི་ཚེས་༢༨རེས་གཟའ་པ་སངས་ཉིན་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་༧རྒྱལ་བའི་སྐུ་གཟུགས་འཕྲོད་བཞེས་སླད་སྨན་བླའི་མདོ་མཆོག་དང་འབྲེལ་སེར་སྐྱ་ཕོ་མོ་ཀུན་ནས་སྨན་བླའི་གཟུངས་སྔགས་གསོག་སྒྲུབ་དང་སྒྲོལ་མ་མཎྜལ་བཞི་པའི་ཆོ་ག་དང་འབྲེལ་ཏཱ་རེའི་བསྟོད་པ་མཚན་སྐྱོང། འཕགས་མཆོག་ཐུགས་རྗེ་ཆེན་པོའི་གཟུངས་སྔགས་ཡི་གེ་དྲུག་མ་བཅས་གསོག་སྒྲུབ་གནང་རྒྱུ་ཡིན་པའི་གསལ་བསྒྲགས་གནང་འདུག།

གསར་འགོད་པ། དབྱངས་སྒྲོན། ཀླུ་འབུམ། རིག་ལྡན་སྒྲོལ་མ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།