༧གོང་ས་མཆོག་མི་རིང་བར་ཨི་ཊ་ལིར་ཆིབས་བསྒྱུར་གནང་འཆར།

༧གོང་ས་མཆོག་ཨི་ཊ་ལིའི་ནང་ཚོགས་རྒྱུའི་ཆོས་ལུགས་རིས་མེད་དུས་སྟོན་གྱི་དབུ་འབྱེད་མཛད་སྒོའི་ཚོགས་མགོན་དུ་གདན་ཞུ་གནང་འདུག  
མི་རིང་བའི་ཕྱི་ཟླ་ ༩ པའི་ནང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཨི་ཊ་ལིའི་ནང་ཆོས་ལུགས་རིས་མེད་དུས་སྟོན་གྱི་དབུ་འབྱེད་མཛད་སྒོའི་ཚོགས་མགོན་དུ་ཆིབས་བསྒྱུར་སྐྱོང་གནང་མཛད་རྒྱུ་ཡིན་འདུག  
དེ་ཡང་གོང་ཞུས་ཆོས་ལུགས་རིས་མེད་ཀྱི་དུས་སྟོན་དེ་བཞིན་འདི་ལོའི་ཕྱི་ཟླ་ ༩ པའི་ཚེས་ ༡༩ ནས་ ༢༣ བར་ཨི་ཊ་ལིའི་ས་གནས་ (Florence) རུ་བསྐྱང་རྒྱུ་ཡིན་པ་དང༌། དུས་སྟོན་གོ་སྒྲིག་གནང་མཁན་ཚོས་ཇི་ལྟར་གསོལ་འདེབས་ཞུས་པ་ལྟར། ༧གོང་ས་སྐྱབས་མགོན་ཆེན་པོ་མཆོག་གིས་ཉིན་དང་པོའི་མཛད་སྒོ་དབུ་འབྱེད་དང་འབྲེལ་ཉིན་དེའི་ཞོགས་པར་༼ཁྲིམས་གཞིའི་རང་དབང༽ཞེས་པའི་བརྗོད་གཞིའི་ཐོག་བགྲོ་གླེང་གི་ཚོགས་འདུའི་ནང་ལྷན་ཞུགས་གནང་རྒྱུ་ཡིན་འདུག་ཅིང༌། བགྲོ་གླེང་དེའི་ནང་༧གོང་ས་སྐྱབས་མགོན་ཆེན་པོ་མཆོག་གི་ལྷན་དུ་མངའ་ཁུལ་གྱི་ས་གནས་ (Bose) ཟེར་བའི་ཡེ་ཤུའི་ཆོས་དཔོན་ (Enzo Bianchi) དང༌། (Florence) མངའ་ཁུལ་གྱི་ཁ་ཆེའི་ཆོས་དཔོན་ (Ezzedin Elzir) བཅས་ཀྱང་མཉམ་ཞུགས་གནང་གི་ཡོད་འདུག་པ་དང༌། ཡང་ཉིན་དེའི་ཕྱི་དྲོ་ས་གནས་སུ་ཡོད་པའི་རྫེ་ཙོང་ཁ་པ་ཆོས་ཚོགས་ཀྱིས་གོ་སྒྲིག་འོག ༧གོང་ས་སྐྱབས་མགོན་ཆེན་པོ་མཆོག་གིས་ ༼ཤེས་ཡོན་གྱི་ལམ་ནས་ཞི་བདེ་༽ ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག
གནས་ཚུལ་ནང་འགྲེལ་བརྗོད་བྱས་པར་གཞིགས་ན། གོང་ཞུས་ཆོས་ལུགས་རིས་མེད་ཀྱི་དུས་སྟོན་དེ་བཞིན་ (Florence) ས་གནས་སུ་རྟེན་གཞི་བྱས་པའི་ (Nelson Mandela) གླེང་སྟེགས་ཟེར་བའི་ལྟེ་གནས་སུ་གོ་སྒྲིག་གནང་གི་ཡོད་པ་དང༌། ལྟེ་གནས་དེར་༧གོང་ས་སྐྱབས་མགོན་ཆེན་པོ་མཆོག་དེ་སྔ་ཕྱི་ལོ་ ༡༩༩༩ ལོར་ཡང་ཆིབས་བསྒྱུར་བསྐྱངས་ཡོད་པ་རེད།།

གསར་འགོད་པ་ངག་དབང་ཆོས་འཕེལ།