ཨ་རི་གཞུང་གི་ངོས་ནས་༧གོང་ས་མཆོག་གི་སྐུའི་སྲུང་བྱ་སོགས་ལ་མཐུན་འགྱུར་ཡག་པོ་གནང་བཞིན་ཡོད་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུའི་ཞབས་པུས་སྨན་བཅོས་ཆེད། ཟླ་འདིའི་སྤྱི་ཚེས་༢༣་ཉིན་ཨ་རིའི་གྲོང་ཁྱེར་ནེའུ་ཡོག་ཏུ་བོད་མི་དང་བོད་དོན་རྒྱབ་སྐྱོར་བ། དད་ལྡན་མི་མང་ཁྲི་གཅིག་ཙམ་གྱི་དགའ་བསུའི་ཕེབས་བསུའི་ཐོག་ཞབས་སོར་བདེ་བར་འཁོད་ཡོད་པ་དང་། སྨན་བཅོས་མ་གནང་གོང་སྐུ་ངལ་གསོ་དགོས་པ་ལྟར་ད་ལྟ་སྐུ་ངལ་གསོ་བཞིན་པ་དང་། ཨ་རི་གཞུང་གི་ངོས་ནས་༧གོང་ས་མཆོག་ལ་སྔར་བཞིན་སྣེ་ལེན་དང་སྐུའི་སྲུང་བྱའི་མཐུན་རྐྱེན་སོགས་ཧ་ཅང་ཡག་པོ་གནང་བཞིན་པ་བྱང་ཨ་རིའི་བོད་ཀྱི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
མི་ལོ་༧ལྷག་གི་རྗེས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཨ་རིའི་ནང་ཆིབས་བསྒྱུར་གནང་ཡོད་པ་དང་བསྟུན་ཨེ་ཤེ་ཡ་རང་དབང་རླུང་འཕྲིན་ཁང་གིས་ཨ་རིའི་ཕྱི་སྲིད་ལས་ཁུངས་ལ་འབྲེལ་ཡོད་གནས་ཚུལ་ཁག་ཅིག་གི་ཐད་འདྲི་རྩད་བྱས་བར་ཡིག་ཐོག་ལན་འདེབས་གནང་བའི་ནང་། ༧གོང་ས་སྐྱབས་མགོན་ཏཱ་ལའི་བླ་མ་མཆོག་ནི་འཛམ་གླིང་ནང་དད་གུས་བྱེད་ཡུལ་གྱི་ཆོས་ལུགས་ཀྱི་དབུ་ཁྲིད་ཞིག་ཡིན་པས། ཨ་རིའི་ནང་ཕེབས་པར་ནམ་ཀུན་དུ་དགའ་བསུ་ཡོད་ཅེས་དང་། ཨ་རིས་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་ཐབས་དང་། དེ་བཞིན་བོད་ཀྱི་ཐུན་མོང་མ་ཡིན་པའི་ལོ་རྒྱུས་དང་རིག་གཞུང་གོམས་སྲོལ་ཡོད་པ་དེ་དག་སྲུང་སྐྱོབ་ཆེད་རྒྱབ་སྐྱོར་འབད་བརྩོད་བྱེད་རྒྱུའི་ཆོད་སེམས་བརྟན་པོ་ཡིན་ཅེས་བཀོད་འདུག ཡང་ད་ཐེངས་ཨ་རིའི་སྲིད་འཛིན་(Joe Biden)་དང་༧གོང་ས་མཆོག་བར་མཇལ་འཕྲད་གནང་མིན་ཐད་དྲི་བ་བཀོད་ཡོད་པར། ཨ་རིའི་དཔོན་རིགས་དང་༧གོང་ས་ཏཱ་ལའི་བླ་མ་མཆོག་གཙོས་པའི་བརྩི་མཐོང་ཅན་གྱི་ཆོས་ལུགས་དབུ་ཁྲིད་བར་མཇལ་འཕྲད་ཞུ་རྒྱུའི་ལམ་སྲོལ་ཞིག་ཡོད་ནའང་། ད་ལྟ་ཆར་དེའི་ཐད་གཏན་འཁེལ་ཐུབ་པའི་སྐད་ཆ་གང་ཡང་མེད་ཅེས་ཡིག་ཐོག་ལན་འདེབས་གནང་བྱུང་།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཐོག་མར་སྤྱི་ལོ་༡༩༩༡་ལོའི་ནང་སྐབས་དེ་དུས་ཀྱི་ཨ་རིའི་སྲིད་འཛིན་(George H.W.Bush)་དང་མཇལ་འཕྲད་གནང་ཡོད་པ་དང་། སྤྱི་ལོ་༢༠༡༦་ལོའི་ནང་ཡང་སྐབས་དེ་དུས་ཀྱི་ཨ་རིའི་སྲིད་འཛིན་(Barack Obama)་དང་མཇལ་འཕྲད་གནང་བ་དེ་ནི་མཇུག་ཤོས་ཡིན་པ་རེད། སྤྱི་ལོ་༢༠༢༠་ལོའི་ཨ་རིའི་སྲིད་འཛིན་གྱི་འོས་བསྡུའི་དྲིལ་བསྒྲགས་སྤེལ་བཞིན་པའི་སྐབས་སྐུ་ཞབས་(Joe Biden)་གྱིས་ཨ་རིའི་ཕྱི་སྲིད་སྲིད་བྱུས་གྱི་ཕྱོགས་ལ་རིན་ཐང་ལྡན་པའི་ཞབས་འདེབས་ཞུ་རྒྱུའི་ཆ་ཤས་སུ་༧གོང་ས་ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུ་ཡིན་པ་ཁས་ལེན་བྱས་ཡོད་པ་དང་མཉམ་ཁོང་གིས་འགྲོ་བ་མིའི་ཐོབ་ཐང་གལ་ཆེའི་རང་བཞིན་སྐོར་ནན་བརྗོད་དང་སྦྲགས ༧གོང་ས་ཏཱ་ལའི་བླ་མ་མཆོག་དང་ཐད་ཀར་བཀའ་མོལ་ཐོག་ནས་བོད་ཀྱི་གནད་དོན་ཐད་ལ་རྒྱབ་སྐྱོར་དགོས་པའི་འབོད་སྐུལ་ཞུས་ཡོད་པ་རེད། ཡིན་ན་ཡང་ད་བར་དུ་ཨ་རིའི་སྲིད་འཛིན་འཇཱོ་སྦཡེ་ཌེན་དང་༧གོང་ས་མཆོག་བར་མཇལ་འཕྲད་བྱུང་མེད།
སྤྱི་ནོར་༧གོང་ས་མཆོག་སྐུའི་ཞབས་པུས་སྨན་བཅོས་ཆེད་ཨ་རིར་ཆིབས་བསྒྱུར་མ་གནང་གོང་། ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་རམ་ས་ལར་ཆེད་ཕེབས་ཀྱིས་༧གོང་ས་མཆོག་ལ་མཇལ་བཅར་ཞུས་བ་དང་། ཨ་རིའི་གྲོས་ཚོགས་གོང་འོག་ནང་གཏན་འབེབས་བྱུང་བའི་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་དེ་སྤྱན་འབུལ་ཞུས་ཡོད་པ་མ་ཟད། བོད་མིའི་སྒྲིག་འཛུགས་ལ་འཚམས་གཟིགས་དང་བཙན་བྱོལ་བོད་མིའི་མང་གཙོའི་འགྲོ་ལུགས་ལ་བསྔགས་བརྗོད་གནང་ཡོད་པ་རེད།

གསར་འགོད་པ། ཆོས་སྐྱིད། བསྟན་འཛིན་བདེ་སྐྱིད།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།