རྒྱ་ནག་ནང་དམངས་གཙོའི་འོས་འདེམས་ཚོད་ལྟ་བྱེད་བཞིན་པ།

༄༅༎རྒྱ་ནག་གཞུང་གིས་རྒྱ་ནག་གི་ཞིང་པའི་ས་ཁུལ་ནང་དམངས་གཙོའི་འོས་འདེམས་ལམ་ལུགས་ཚོད་ལྟ་བྱེད་བཞིན་ཡོད་པ་རེད།ཕྱི་ཟླ་དང་པོའི་ཚེས་༣༡ཉིན་ནས་ཉེ་ཆར་ངོ་རྒོལ་གྱི་དོན་རྐྱེན་བྱུང་སའི་རྒྱ་ནག་གོང་ཏུང་ཞིང་ཆེན་དབུའུ་ཁན་གྲོང་ཚོའི་ནང་ས་གནས་དཔོན་རིགས་ཀྱི་འོས་འདེམས་སྤེལ་སྒོ་ཚུགས་ཀྱི་ཡོད་པ་དང་། དེའི་ཐོག་རྒྱ་ནག་དབུས་གཞུང་གིས་དོ་སྣང་ཆེན་པོ་བྱེད་བཞིན་པ་མ་ཟད། རྒྱ་ནག་གི་དཔོན་རིགས་ཁག་གཅིག་གིས་ཞིང་པའི་ས་གནས་ནང་དེང་སྐབས་ངོ་རྒོལ་གྱི་ཐོ་རླབས་འཕྱུར་བཞིན་པའི་དཀའ་རྙོག་དེ་སེལ་རྒྱུར་ས་གནས་ཀྱི་དཔོན་རིགས་ཚོ་མི་མང་ཚོས་འདོད་མོས་ཡོད་པ་ཞིག་འོས་འདེམས་བྱ་རྒྱུའི་ཐབས་ལམ་དེ་བཟང་ཤོས་ཤིག་ཡིན་པར་ངོས་འཛིན་བྱེད་ཀྱི་ཡོད་པར་བརྟེན། རྒྱ་ནག་གོང་ཏུང་ཞིང་ཆེན་དབུའུ་ཁན་གྲོང་ཚོའི་གྲོང་མི་ཚོས་ས་གནས་དེའི་ནང་གི་དཔོན་རིགས་ཀྱིས་ལྐོག་ཟ་བྱས་ནས་ས་གནས་དེའི་ནང་གི་ས་ཞིང་མང་པོ་ཞིག ས་ཁང་ཚོང་པར་ཕྱིར་ཚོང་བྱས་པའི་གནད་དོན་གྱིས་རྐྱེན་པས། ས་གནས་གྲོང་མི་ཚོས་ངོ་རྒོལ་ཤུགས་ཆེའི་འོག གོང་ཏུང་ཞིང་ཆེན་གྱི་ཆེད་མཐོའི་དཔོན་རིགས་དབང་ཡང་ནས་ ས་གནས་དཔོན་རིགས་དམངས་གཙོའི་ཐབས་ལམ་གྱི་ཐོག་ནས་ས་གནས་གྲོང་མི་ཚོས་འོས་འདེམས་བྱ་རྒྱུར་མོས་མཐུན་བྱས་ནས་ངོ་རྒོལ་གྱི་རྣམ་པ་དེ་བཞིན་ཞི་བའི་ཐོག་ནས་རེ་ཞིག་སེལ་ཐུབ་ཡོད་པ་རེད། ད་རེས་གཟའ་ལྷག་པའི་ཉིན་ དབུའུ་ཁན་གྲོང་ཚོའི་གྲོང་མི་དྲུག་སྟོག་ལྷག་ཙམ་ཡོད་པ་རྣམས་ཀྱིས་འོས་ཤོག་དབྱུག་པའི་ས་ཚུགས་ཁག་ཏུ་དམངས་གཙོའི་ལམ་གྱི་ཐོག་ནས་ས་གནས་གྲོང་མིའི་དཔོན་རིགས་འོས་འདེམས་བྱས་ཡོད་འདུག།